• Jé Niná koasennda. “Ansoa tisikasénnda rey xi tsʼan, [...] kʼoa tsjoale je naxinandá joni kjoatjao kʼoa jña saʼnda fetʼa je sonʼnde, tsi koa̱n” (Salmo 2:6, 8).

• Yaa kʼoéjnason je yáxilele David. “Jngo ʼndíxʼin katsinná, jngo ʼndí kabʼainá [...]. Kʼoa je xále kao kjoanyʼán xi kjoaʼaíkao alikui kjoetʼa nga ya kʼoéjnason yáxilele David nga koatexoma, je xi nʼio sikʼéjna kjoatéxomale” (Isaías 9:6, 7).

• Yaa Belén jtsín. “Kʼoa ji Belén, [...] yaa tʼatsi kuitjoni je xi koatexoma, [...] je kjoajeyale kuicho saʼnda jña fetʼa sonʼnde” (Miqueas 5:2, 4).

• Chʼa̱sjengi kʼoa ni̱kʼien. “Kichʼasjengi kʼoa likui jme chjí tsaʼyatokoán. [...] Jé kinikiʼaon xi tʼatsʼe jéená; totaon tsaʼya xi tʼatsʼe jéená” (Isaías 53:3, 5).

• Kjoaʼáyanile kʼoa kuitjojeya. “Alikui ya si̱kʼéjnanái ya Tsjó. Alikui kʼoaiʼndai nga nga̱jao̱ skoe̱ xi kixi tífitʼali. [...] Tjín kjoatsjoa ngantsjai nichxin ya ngakixili” (Salmo 16:10, 11).

Tojé Jesús xi bakinle én jebi. Kʼoa jngo ánkje xi i̱ kitsole María, xi na̱le koanni: “Je Nainá Niná tsjoále yáxilele David nʼaile. [...] Je kjoatéxomale likui kjoetʼa” (Lucas 1:31-33).

Je Jesús alikui kʼia tsakatéxoma kʼianga jaʼai i̱ Sonʼnde. Yaa tjen ngʼajmi koatexomani nga Rey sʼin tíjnale je Chjotaxále Niná. Ánni kʼoabixónñá nga toje Jesús xi ndasʼin koatexoma. Kataʼyala jmeni xi kisʼin kʼianga tsakʼejna i̱ Sonʼnde.

•   Je Jesús koanndosinle chjota. Tsakasenkao xi xʼin, xi yánchjín, xi sʼa xti kʼoa xi jekoanjchínga. Alikui kini jñani tsʼe, tsa tjínle kʼoa tsa tsínle tao̱n (Mateo 9:36; Marcos 10:16). Je Jesús koanmake kʼoa kisindayaa jngo chjota xi tífiʼndojon yaole kʼianga i̱ kitsole: “Tsa meli koaan si̱tsjenái” (Marcos 1:40-42).

• Je Jesús kitsoya josʼiaan nga nda kuiyoaa ngixko̱n Niná. I kitso: “Alikui koa̱n nixálao nga jao, Niná kao kjoanyiná”. Kʼoati kui kjoafaʼaitsjen kitsjoa nga kʼoasʼin jchatokoán je xíngiaa josʼin mená nga sikaoná. Xi ijngosani, kʼoati kitsoya nga mandosinle Niná jme xi nʼia, jme xi nikjaʼaitsjeen kʼoa jotjío tokoán. Kuinga machjénni nga si̱kuindaa je ni̱ma̱ná ánni nga nda kuiyoñá ngixko̱n Niná (Mateo 5:28; 6:24; 7:12). Kʼoa kʼoati kitso nga tjínnele jchaa jmeni xi mele Niná kʼoa nga kui kʼoasʼiaan kʼiatsa mená nga tsjoa sa̱tío tokoán (Lucas 11:28).

• Je Jesús tsakakó josʼin tíjna nga bakoá je kjoatsjoacha. Kichokajin je ni̱ma̱le chjota jmeni xi kisʼin kʼoa jmeni xi kitso je Jesús. Je Biblia itso: “Tokoanxkónle ngatsʼi chjota, josʼin tsakakóya. Nga̱ tsakakóyale joni tsa jngo chjota xi tjínle ʼnde” (Mateo 7:28, 29). Tobʼelañá, i kitsosa: “Katamatsjoachao xi jtikeno”. Je Jesús saʼnda tsakʼétsʼoantjai je chjota xi kisikʼien. I kitso: “Nʼai, tichatʼalai nga tsín kui be jme xi sʼín” (Mateo 5:44; Lucas 23:34).

Jé Jesús xi ndasʼin koatexoma, nga̱ tsjoakená kʼoa mele koasenkaoná. Tonga kʼiáni kʼoetsʼiakao nga koatexoma.