Tjínkʼa chjota xi kʼoatso nga tíbʼantjaiyajin je Énle Niná, tonga je profeta Isaías kʼoakitso nga je Énle Niná “tíjnaa ngantsjai nichxin” (Isaías 40:8). Ánni nga tsín jao kʼoéñá tokoán nga tsín tíbʼantjaiyajin.

Je Niná alikui tsjoáʼnde nga kʼoantjaiyajin je Énle. Je xi kisikʼatoya je Énle Niná nichxin kjoatse ñaki tsakʼéxki nga jngó jngó letra ánni nga tsín jme xi tsakʼétʼasonni, tsín jme xi kisikʼantjaiyajinni kʼoa tsín jme xi tsakjaʼáxinnile. Tonga nga chjotajée maa tjínjinkʼa xi kijinle én. Ninga kʼoalani, alikui tsʼantjaiyajin jokjoan tso je xo̱njchá xi tjío saʼnda ngasʼa.

Jmi xo̱njchá kjio xi Énle Niná faʼaitʼa. Kʼiatsa jngo xo̱njchá xi tsín mangóson je én xi faʼaitʼa, ningósonkao kao xo̱njchá xi ngikʼa nga kataʼyale tsa tsín nda kichji kjoaixi (tsa mesali jchai xi tʼatsʼe jebi, chótʼai artículo “¿Se ha cambiado o manipulado la Biblia?”, xi faʼaitʼa ya Internet ya jw.org).

Tobʼelañá, je Rollos del mar Muerto, xi koansjaile je chjota árabe ya mar Muerto nga nó 1947, faʼaitʼa choa je Énle Niná kʼoa jetsʼato 2,000 nó tjínle nga kichji. Jmé xi tsabe je chjota xi tʼatsʼe Biblia kotʼayason nga kisingósonkao je xo̱njchá xi koansjaile kao je Biblia xi kjio ndʼaibi.

Je chjota jebi kʼoakitso nga je Biblia xi tjín ndʼaibi mangóson kao jmeni xi tso je xo̱njchá xi kichji ngasʼa. * Kʼianga kichotʼayason je xo̱njchá xi jenʼio kjoatse kjio kui bakó nga je Biblia xi tjín ndʼaibi likui tíbʼantjaiya jokjoan tso xi kichji saʼnda nga títjon. Alikui jao tjín tokoán nga je Niná xotísʼín nga tsín tíbʼantjaiyajin jmeni xi tso je Énle saʼnda ndʼaibi.

Alikui jao tjín tokoán nga ñaki kʼoatjín jmeni xi tso Biblia. Ndʼaibi, kuila kataʼyaa jméni xi kitsoya profeta xi tʼatsʼe Niná.