Tojngo familia maa ngatsʼiaa nga̱ yaa ntje̱le Adán kinroañá. Tsa jngo familia maa tjínnele nga tsjoacha koaan kʼoa jchaxkoán xíngiaa, tonga ñʼai maná nga kʼoanʼia. Je Niná kui xi mele nga tsjoacha koaan xíngiaa.

“Tsjoacha katamai je xíngi josʼin nga tsjoachai yaoli” (LEVÍTICO 19:18).

“Katamatsjoachao xi jtikeno” (MATEO 5:44).

Ya 1 Corintios 13:4-7 kʼoatso josʼin tíjna nga bakoá kjoatsjoacha.

“Je kjoatjaocha tsejtaní, kʼoa tjínle kjoanda”.

Tikjaʼaitsjenlai jebi. Jósʼe tokuin kʼiatsa jngo xíngi xi tsejta kʼoa xi nda chjota kʼoa tsín tokjoan majtile jña tsín nda nʼiai.

“Je kjoatjaocha tsínle kjoaxintakonjin”.

Tikjaʼaitsjenlai jebi. Jósʼe tokuin tsa tsín ʼya xi makjainle jmeni xi si kʼoa tsa maxinkonkeli.

Je kjoatsjoacha “likui básjai xi titsʼeni”.

Tikjaʼaitsjenlai jebi. Jósʼe tokuin kʼianga kuenta sʼín xi ngikʼa jmeni xi si kʼoa nga tsín toje bitjoson ʼndeʼndele jmeni xi tso.

Je kjoatsjoacha “likui bʼéjinkon xi chʼao tjín”.

Tikjaʼaitsjenlai jebi. Je Niná tíjnanda nga síchatʼale je xi kʼoamanile jéele. Je Biblia itso: “Alikui to jée koanená ngantsjai kʼoa alikui tondiaa kʼoengijti kon” (Salmo 103:9). Nda sʼe tokoán kʼianga síchatʼaná tsa ʼya xi joʼmilee kʼoa tsa ʼya xi jonikoaa. Ñá kʼoati machjén nga si̱chatʼalee tsa ʼya xi jokuitsoná kʼoa josikaoná (Salmo 86:5).

Je kjoatsjoacha “likui sítsjoanile yaole xi tʼatsʼe xi tsín kjoakixi”.

Tikjaʼaitsjenlai jebi. Kʼianga jme xi maná alikui nda sʼe tokoán kʼianga ʼya xi matsjoale. Kuinga tsín koa̱n kʼoatisʼiansíñá kʼianga kjoañʼai faʼá xíngiaa ninga totaon bená.

Kʼianga sichikontʼainná Niná tjínnele nga tsjoacha koaan xíngiaa, tojñani tsʼe, tojotjín nóle kʼoa tojme religión tjíojin. Jngo koya xi koa̱n sʼiaan kuinga kuinyakoaa je xi nganʼio machjénle.