Je profeta Moisés kʼoakitso nga sichikontʼainná Niná tsa si̱tjosoán je kjoatéxomale (Deuteronomio 10:13; 11:27). Ali tsakui nitjosonnilee Niná nga bijkonlee. Kui nitjosonnilee nga ʼyaa jokjoan, kʼoa kui xosíkaoná nga tsjoacha mañá kʼoa tsín mená nga ba kʼoé kon. Je Biblia itso: “Kʼoasʼin tjaochaa Niná, nga nikjitjosoán kjoatéxomale” (1 Juan 5:3).

Jaola koya kataʼyaa josʼin síchikontʼainná Niná nga nitjosonlee.

“An, Jeobá, anña Nináli, je xi kʼoasʼin bakóyali ánni nga ji xi nda kuijnasíni, je xi kʼoasʼin síkasényali ya ndiaa xi tjínnele kuitómjeyai” (ISAÍAS 48:17).

Je Niná, nʼio nda bená kʼoa kui kjoafaʼaitsjen tsjoáná xi binyakaoná. Tsa mená nga koasenkaoná Niná, machjén nga chótʼayajiaan jotso Biblia jmeni xi mele nga sʼiaan.

“Ngisa toxkón ndani je xi nrʼoé énle Niná, kʼoa xi sítjoson” (LUCAS 11:28).

Nichxin xi tiyoaa ndʼaibi, millón mani chjota xi tsjoa tjíole nga sítjoson jotso je Énle Niná. Jngola choa̱ kataʼyaa tʼatsʼe jngo chjota xi España tsʼe xi ngotjo síjtinile yaole tsakai, totaon be chjoónle kao xi kjaʼaí chjota. Ñandia nga kui tsakʼéxkia jmeni xi kiski je profeta Moisés tʼatsʼe jokoankjoan José, tile Jacob. Je José jo choʼnda sʼin kisatena kʼoa ndoyá kinikʼéjnaʼya ninga tsín jme jée kisʼele. Ninga kʼoalani, tosi tonda ndʼé koan kʼoa tsakakó kjoamatokon (Génesis, capítulo 37 saʼnda 45). Je chjota xi España tsʼe i kitso: “Nga kui choa̱le José kisikjaʼaitsjenjian kui xi tsakasenkaona nga ndʼé koan, nga nda chjota koan kʼoa koanna kiskoexkoa yaona. Kʼoa ndʼaibi ndasʼin tiyuijin kao familiana kʼoa tsjoa tjío tokuinjin”.

Ya Biblia faʼaitʼa kjoafaʼaitsjen xi basenkaoná nga ʼyaa josʼin tjínnele jchatokoán xíngiaa. Yaa kjoaʼmiya xi ijngo jchasaa xi tʼatsʼe jebi.