Jméni xi kitso je profeta xi tʼatsʼe Niná
Nichxin kjoatse, profeta kisichjén Niná nga tsakájnale én je chjota. Jmeni xi kitso kʼoati tsoyaná jotjínnele sʼiaan nga sichikontʼainná je Niná. Kataʼyala jme xi bakóyaná jokitso kʼa profetale Niná.
PROFETA ABRAHÁN (IBRAHIM)
Je Niná alikui ʼya xi faʼájin kʼoa mele sichikontʼain ngatsʼi chjota.
Je Niná i̱ kitsole Abrahán: “Tʼatsi kjuinroani nga koa̱nchikontʼain ngatsʼi familia xi tjín sonʼnde” (Génesis 12:3).
Xi bakóyaná. Je Niná nʼio tsjoakená kʼoa mele sichikontʼain ngatsʼi xi sítjosonle, jolani xi xʼin, xi yánchjín kao ʼndíxti.
PROFETA MOISÉS (MUSA)
Je Niná mamakená kʼoa síchikontʼain je xi mele ngisa nda skoe̱xkon.
Je Niná kitsjoale nganʼio Moisés nga koanle tsakatío kjoaxkón. Ninga kʼoalani, je Moisés i kitsole Niná: “Takonái je ndiaali ánni nga skoesínile kʼoa nga tosi tonda so̱kosínina kjoanda ngixkuin” (Éxodo 33:13). Je Niná kisasenle jme xi kisijé Moisés, kitsjoale kjoachjine kʼoa tsakakóle jokjoan kʼoa josʼín. Tobʼelañá, je Moisés koanjinle nga je Niná “tjínle kjoamatokon” kʼoa “mamake chjota” (Éxodo 34:6, 7).
Xi bakóyaná. Je Niná sichikontʼainná ngatsʼiaa kʼiatsa jchaxkoaan. Ya Biblia kʼoatso josʼin mele nga jchaxkoán kʼoa kʼoati tso nga mele sichikontʼainná.
PROFETA JESÚS (ISA)
Je Jesús koanmake chjota kʼoa kisindaya tojme chʼin xi kisʼele
Je Niná sichikontʼainná ngantsjai tsa chjénngilee jme xi kisʼin kʼoa jme xi kitso Jesús.
Je Énle Niná kʼoatso jme xi kisʼin kʼoa jme xi kitsoya Jesús. Je Niná kitsjoale nganʼio nga koanle tsakatío kjoaxkón, nga kisindaya xi xka̱ kjoan, xi jtaya kʼoa xi chjiʼngé. Saʼnda kisikjaʼáya kʼale kʼien. Kʼoasʼin tsakakóni jmeni xi sʼin Niná nichxin xi nroaján. Kʼoakitso Jesús jme xi tjínnele sʼiaan nga sʼe̱ná kjoanda jebi, i kitso: “Jé xi kjoabijnachon ngantsjai, nga kʼoasʼin skoe̱li xi tojngo ji Niná xi ñaki kjoakixi, kʼoa skoe̱ Jesucristo je xi kinikasáin” (Juan 17:3).
Je Jesús tsakakó kjoamatokon, ndʼé koan kʼoa nda chjota koan. Je xi xʼin kao xi yánchjín kisitjoson nga i̱ kitsole Jesús: “Chótʼayao xi tsʼan, nga ndʼénía, kʼoa yo̱ma̱ kjiakoan. Kʼoa sa̱kóno kjoanikjáya xi tʼatsʼe ni̱ma̱no” (Mateo 11:29). Je Jesús tsabexkón je yánchjín, alikui kʼoakisʼin jokisʼin je chjota xi tsakatio nga kʼia xi totaon tsabe yánchjín.
Xi bakóyaná. Je Jesús nʼio tjao koanle chjota kʼoa kui choa̱ tsakʼéjnaná josʼin tjínnele jchatokoán xíngiaa.
JE JESÚS ALI TSA NINÁJIN
Je Biblia kʼoatso nga tojngo mani Niná, kʼoa jé Jesús kisichjén nga kisikʼatoya je Énle (1 Corintios 8:6). Je Jesús kʼoakitso nga ngisa ngʼa tíjna Niná tikʼoajinni je kʼoa nga je Niná kisikasén i̱ Sonʼnde (Juan 11:41, 42; 14:28). *
^ párr. 17 Tsa mesali jchai xi tʼatsʼe Jesús, chótʼai ya sección 8 kao 9 xi tsʼe folleto La fe verdadera, la puerta a una vida feliz, xi faʼaitʼa ya Internet ya www.pr418.com.