“Ji xi noʼyai kjoabʼetsʼoa, kjoaʼaínrʼoeli tojokji chjotani” (Salmo 65:2).

Tjínkʼa chjota xi kʼoatso nga nda satío kon kʼianga bʼétsʼoa, ninga kʼoanisʼin makjainle nga tsín ʼya xi nrʼoéle. Tonga ali tsa tokuijin bʼetsʼoañá nga nda katasatío tokoán kʼianga kjoa tiyojiaan. Je Biblia kʼoatso nga “je Jeobá * chrian tíjnale ngatsʼi je xi nchja̱le, ngatsʼi xi ñaki ni̱ma̱le nroajinni nga nchja̱le [...], kʼoa nrʼoéle kʼianga síjéle nganʼio” (Salmo 145:18, 19).

Alikui jao tjín tokoán nga nrʼoéle Jeobá je chjota xi je bexkón. Je Jeobá itsoná: “Kuinókjoanáo, kʼoétsʼoanáo, kʼoa an kjuinrʼoeno” (Jeremías 29:12).

“Tʼetsʼoantsjao” (Romanos 12:12).

Je Biblia kʼoatsoná nga ntsjaintsjai kʼoétsʼoalee je Niná. Kui jebi xi bakóyaná nga mele Jeobá nga kʼoétsʼoalee (Mateo 26:41; Efesios 6:18).

Ánni menile je Niná nga kʼoétsʼoalai. Tikjaʼaitsjenlai jebi: je xi nʼai ma, nʼio tsjoa sʼe kon kʼianga síjéle nganʼio je ʼndíle. Ningalani jebe nʼai jebi jmeni xi machjénle kʼoa jotjín kon je ʼndíle, kʼianga nrʼoéle jmeni xi tso, je nʼai jebi majinle kʼianga je manʼiotʼa ʼndíle kʼoa nga tsjoake. Tikʼoasʼinni, kʼianga bʼetsʼoalee je Jeobá kʼoasʼin bakonilee nga je ninʼiotʼaa kʼoa nga mená si̱chriantʼalee (Proverbios 15:8; Santiago 4:8).

“Je tikʼamio ngayije kjoanikjáojinno, nga̱ je tísíkuindano” (1 Pedro 5:7).

Je Niná kui xi mele nga kʼoétsʼoalee nga̱ tsjoakená kʼoa mandosinle xi tʼatsaan. Be jme kjoa xi bitjatojiaan kʼoa mele koasenkaoná.

Jokji tse tsakʼejna je rey David, jé Jeobá kisijéle nganʼio kʼoa tsakʼéyanajmíle jokisʼe kon kʼoa jme xi kisikjaʼaitsjen (Salmo 23:1-6). Jókisʼe kon Jeobá xi tʼatsʼe David. Nʼio tsjoake koan kʼoa kinrʼoéle ngantsjai kʼianga tsakʼétsʼoale (Hechos 13:22). Kʼoatisʼinni xi kao ñá, je Niná nrʼoéná kʼianga bʼetsʼoalee nga̱ mandosinle xi tʼatsaan.

Yaa Biblia faʼaitʼa je én jebi. Je xi kiski salmo jebi alikui jao tsakʼé kon nga kinrʼoéle je Jeobá kʼianga tsakʼétsʼoale, kʼoa nʼio tsakasenkao nga tsakʼétsʼoale Niná. Ngisaa koanchriantʼale je Niná kʼoa kichokjoajinle je kjoa xi jaʼatojin (Salmo 116:1-9).

Tsa kʼoati tjínjngo tokoán nga nrʼoéná Niná, tosi tondajin kʼoétsʼoalee. Kataʼyala jokoan je xi Pedro ʼmi, xi España tsʼe. Kʼiaa kʼien je tile nga carro tísíxákao, kʼoa kʼiaa 19 nóle. Nga kui kjoa tíjnajin je Pedro, tsakʼéyanajmíle je Niná jotjín kon kʼoa kjitʼaa kisijéle nganʼio. A kinrʼoéle Niná kʼianga tsakʼétsʼoale. Je Pedro itso: “Kinrʼoéna je Jeobá kʼianga tsakʼetsʼoale. Kʼoasʼin tsaʼbeña nga tsakasenkaona nga̱ kitsjoanganʼionajin je chjoónna kao an, je chjota xi kʼoati je Jeobá síxále”.

Ningalani tsín tijaʼáyanile je tile Pedro kʼianga tsakʼétsʼoa, tonga nʼio tsakinyakao je kʼoa kao familiale. Kʼoa je María del Carmen, xi chjoónle mani itso: “Nga kʼoasʼin tsakʼetsʼoa kui xi tsakasenkaona nga kichokjoajinna je kjoa xi jaʼatojian. ʼBeña nga koanjinle je Jeobá jotjín tokoan, nga̱ nda kisʼe tokoan kʼianga tsakʼetsʼoale”.

Tojo tso je Biblia kʼoa josʼin bʼéyanajmí je chjota, kui bakóyaná nga nrʼoéná je Niná kʼianga bʼetsʼoalee. Tonga ali tsa tongatsʼi je chjota nga nrʼoéle je Niná. Ánni nga tjínni je xi nrʼoéle kʼoa tjínni xi mai.