“Kʼia nga bʼetsʼoai, ali tikuijinni én nichjain” (Mateo 6:7).

Ali tsakuijin xi mele je Jeobá nga tikui tima én kʼoakuixónñá nga kʼoétsʼoaa kʼoa tsa jngo libro kʼoéxkiaa kʼianga kʼoétsʼoaa. Kui xi mele nga ni̱ma̱ná kjuinroajinni jme xi kʼuínlee. Tikjaʼaitsjenlai tsa jngo miyoli xi tikui tima én kʼoakuitsonili nichxin nganyaon. Je xi nʼio miyo fáo, nkjín koya jme xi bʼéyanajmíle xínkjín. Kʼianga ni̱ma̱ná nroajinni jmeni xi ʼmilee je Niná nga bʼetsʼoalee, kʼoasʼin bakonilee nga miyoná mani.

“Nijáo, tonga likui tjoéno, chʼao tjín xi nijáo” (Santiago 4:3).

Alikui kjuinrʼoéná je Niná tsakui si̱jélee jmeni xi tsín sasénle. Tobʼelañá, tsa ʼya xi kui sijéle Niná nga katasʼele suerte kʼianga tao̱n siskánile. A kjuinrʼoéle Niná kʼianga kʼoetsʼoale, nga̱ ʼyañá nga tsín mele nga xkaiʼa koaan kʼoa tsín mele nga tʼatsʼe suerte koa̱nkjainná (Isaías 65:11; Lucas 12:15). Alikuijin kjuinrʼoé je Jeobá tsakui si̱jélee. Tsa mená nga kjuinrʼoéná je Niná kʼianga kʼoétsʼoalee, kuenta sʼiaan jme xi sasénle tojo tso je Biblia.

 “Tsa ʼyani xi tsín mele sitjoson je kjoatéxoma, alikui sa̱sénle Niná kʼianga kʼoetsʼoale” (Proverbios 28:9).

Nichxin kjoatse, tsín kinrʼoéle Niná je chjota xi tsín kisitjoson je kjoatéxomale, kʼoa tojo kʼoaasʼin síkjaʼaitsjen Niná nichxin xi tiyoaa ndʼaibi (Isaías 1:15, 16; Malaquías 3:6). Tsa mená nga kjuinrʼoéná je Niná kʼianga kʼoétsʼoalee, tjínnele si̱tjosoán je kjoatéxomale. A kjuinrʼoéná tsakui xi chʼaotjín kinʼia ngasʼa. Je Niná tíjnanda nga sichatʼaná tsa koakoá nga kʼoamaniná jme xi kinʼia kʼoa tsakui kʼoasʼiaan josʼin mele (Hechos 3:19).