“Tojmeni xi si̱jélao Nʼainá kao jaʼaínna, jé tsjoáno” (Juan 16:23).

Nga kʼoakitso je Jesús kui xi bakóyaná nga jesoa Jeobá kʼoétsʼoalee, alikui koa̱n nga xkóson kʼoa tsa santo kʼoétsʼoalee, tsa ánkje kʼoa tsa je xíngiaa xi jekʼien. Kʼianga kʼoétsʼoalee je Jeobá kui xi mele nga kʼoati si̱kʼaxkiaa je jaʼaínle Jesús. Kʼianga jaʼaínle Jesús nichjén kʼianga bʼetsʼoalee Niná, kʼoasʼin bakonilee nga majinná nga nrʼoéná xi totʼatsʼe jme xi kisʼin je Jesús xi tʼatsaan. Je Jesús i kitso: “Nitoʼyajin xi faʼaikonle Nʼainá, tsa tsian nga an” (Juan 14:6).

“Kʼoatʼinlao jotjío je ni̱ma̱no” (Salmo 62:8).

Kʼianga kʼoétsʼoalee je Jeobá machjén nga kʼoasʼin chja̱koaa joni jngo Nʼai xi nʼio tsjoakená. ʼNdele nga tokui kʼoéxkiaa jmeni xi tso jngo libro kʼianga kʼoétsʼoalee kʼoa tsa tokui kʼoakuixoán jmeni xi tjía jkoaa, tjínnele kao kjoaxkóntokon kʼoétsʼoalee je Niná kʼoa ni̱ma̱ná katanroajinni jmeni xi kʼuínlee.

“Tsa nijé tojmeni kjoa josʼin mele nga je, je nrʼoéná” (1 Juan 5:14).

Je Biblia kʼoatsoná josʼin koasenkaoná je Niná kʼoa jmeni xi machjén nga sʼiaan ñá. Nga kjuinrʼoéná kʼianga kʼoétsʼoalee, machjén nga kʼoasʼin kʼoétsʼoalee “josʼin mele nga je”. Nga jchaa josʼin mele Niná, machjén nga chótʼayá je Biblia, kʼoa kʼoaasʼin ngisa nda jchaxkonñá. Tsa kʼoasʼiaan, kjuinrʼoéná kʼianga kʼoétsʼoalee.

Kui si̱jé jmeni xi machjénná. Si̱jélee Niná nga katabasenkaoná, nga so̱koná jmeni xi chi̱nee, jmeni xi chʼa̱kjá, kʼoa jña kuiyoñá. Kʼoati koa̱n kui si̱jélee nga nda chjoéjiaan jmeni xi sʼiaan, kʼoa kʼoakʼuínlee nga katabasenkaoná nga chókjoajinná je kjoa xi bitjatojiaan. Kʼoakʼuínlee nga katasíchatʼaná, nga ngisa nʼio katasʼejna je kjoamakjainná kʼoa nga katasíkuindaná (Lucas 11:3, 4, 13; Santiago 1:5, 17).

Kʼoétsʼoantjé xíngiaa. Je xi xijchá ma nda sʼe kon kʼianga tsjoake xínkjín je xtile. Nga Nʼainá mani je Jeobá kui xi mele nga si̱kuindangañá xíngiaa. Ndatjín nga bʼetsʼoantjé je xʼinná, je chjoónná, je xtiná, xíngiaa kʼoa kao miyoná. Je Santiago, xi chjotale Jesús koan, i kitso: “Tʼetsʼoantjao xíngio” (Santiago 5:16).

Kʼoailee kjoanda Niná. Je Biblia kʼoatso nga nʼio nda chjota je Niná. Itso: “Kitsjoano jtsí xi ngʼajmi nroani, kʼoa nichxin josʼin nga majchá tsojmintje. Kitsjoano je tsojmi xi biyochonnio, kao kjoatsjoa xi sʼejnajin ni̱ma̱no” (Hechos 14:17). Tsa si̱kjaʼaitsjenjiaan ngayeje xi tsjoáná je Niná, kui xosikaoná nga kʼoainilee kjoanda. Kʼianga nitjosoán je kjoatéxomale, kʼoatisʼin bakonilee nga bʼailee kjoanda (Colosenses 3:15).

Tsa tsín ndi̱to̱n tsjoáná Niná jmeni xi kanijélee, sakʼoajin kjuinroajen je tokoán. A kui xi tsonile nga tsín kuenta sʼínná je Niná. Mai. Kataʼyala kʼaa choa̱ xi bakóyaná nga tjínnele tsejta koaan kʼoa nga tosi tonda kʼoétsʼoaa.

Ya kjoaʼmiya xi títjon kuiná kanokjoañá tʼatsʼe Steve. Bʼéyanajmísaná jokoan. Itso: “Tsa tsínlani tosi tonda tsakʼetsʼoa, jejin kjoatse kisikʼajenle tokoan”. Xi tsakasenkao kuinga kiskotʼaya Biblia kʼoa koanjinle nga tjínnele kjitʼa kʼoetsʼoa. Itsosa Steve: “Tsjoale kjoanda je Niná nga tjíotsjoánganʼiona je miyona. Nʼio tsjoa tjín tokoan ndʼaibi”.

Je Jenny, xi kʼoanátso nga tsín bakinle nga kjuinrʼoéle je Niná, itso ndʼaibi: “Kʼianga ba kisʼe tokoan kʼoakixinle Niná nga katabasenkaona ánni kʼoakisʼeni tokoan”. Jósʼin tsakasenkao nga tsakʼétsʼoa. Itsosa: “Nga tsakʼetsʼoale Niná, tsakasenkaona nga kʼoasʼin tsaʼbekoan yaona josʼin bekonna je. Koanjinna nga toʼanña xi tsín chjí ʼbekoan yaona, nga̱ je Niná alikui kʼoasʼin bekonna. Kʼoati tsakasenkaona nga tsín tosi tonda kisikʼajenle tokoan”. Jósʼin kichomani nga kʼoakisʼin. Itso: “Nga tsakʼetsʼoa kui xi tsakasenkaona nga jo miyo kʼoa jo Nʼai sʼin tsaʼbe je Jeobá, kʼoa koanjinna nga ñaki tíjna. Jé koasenkaona ngantsjai tsa kʼoasʼian josʼin mele”.

Kataʼyala jotso je Isabel. Kʼianga sʼa tjíaʼma je ʼndíle, je chjinexki kʼoakitsole nga yo̱ma̱ kji je ʼndíle kʼianga jtsín. Kinroajen kon nga kʼoatsakʼinle. Saʼnda tjínkʼa xi kʼoakitsole nga katasíkʼatjenjenchjiʼndé je ʼndíle. Itso: “Nga kʼia kʼoasʼin kisikjaʼaitsjen nga kjoaba sikʼienna”. Jméni xi kisʼin je Isabel. Itsosa: “Ngotjo ngosa tsakʼetsʼoanile je Niná nga katabasenkaona”. Kʼoa yo̱ma̱ kji kjoaixi nga kitsin je ʼndíle xi Gerard ʼmi. Jósʼin ʼyañá nga kinrʼoéle Niná kʼianga tsakʼétsʼoale. Itsosa: “Ndʼaibi jeteño nóle je Gerard kʼoa nʼio tsjoa tjín kon ningalani chʼin tjínle, jngoo kjoanichikontʼain xi je Jeobá kitsjoana”.

Jmeni xi tso je Isabel kui síkjaʼaitsjenná jotso Biblia: “Xko̱n Nainá yaa tíkotsenle xi kixi bʼema, kʼoa xo̱ño tínrʼoéle xi bʼétsʼoa” (1 Pedro 3:12). A tsíkui jebi xi bakóná nga machjén nga tosi tonda kʼoétsʼoaa.

Faʼaitʼa ya Biblia josʼin tsakʼétsʼoa je Jesús. Je xi ngisa nʼio ʼyale kui jme xi kitsole je chjotatjenngile josʼin tjínnele kʼoetsʼoa. Jméni xi bakóyaná.