Jósʼiaan nga koa̱n ya sonʼnde chjotse kuiyoaa

TINÓʼYALAI NGA ÉN

Je kjoaʼmiya xi tífaʼato kui tsoya nga jeme sikjeson Niná jmeni xi chon sonʼnde. Ánni tjínjngoni tokoán nga kʼoakoa̱n. Kuinga i̱ tso je Énle Niná:

“Je sonʼndebi faʼatoní” (1 JUAN 2:17).

Tjínjngo tokoán nga sʼe̱ chjota xi kʼoangile yaole nga kjoetʼa jmeni xi chon sonʼnde, nga̱ itsosa texto jebi:

“Je xi sítjoson jo tso Niná ñaki kʼoasʼin bʼejna ngantsjai”.

Nga koa̱n kuitjo̱ntjailee yaoná tjínnele si̱tjosonlee je Niná. Tonga nga koa̱n si̱tjosonlee, machjén nga kataʼyaxkoaan.

NGA KOA̱N KUITJO̱NTJÉ TJÍNNELE JCHAXKOAAN NINÁ

Je Jesús i kitso: “Jé xi kjoabijnachon ngantsjai, nga kʼoasʼin skoe̱li xi tojngo ji Niná xi ñaki kjoakixi” (Juan 17:3). Nga kʼoangilee yaoná nga kjoaʼaí kjoaxkón kʼoa nga koa̱n kuiyoaa ngantsjai nichxin, tjínnele jchaxkoaan je Niná. Tonga ali tsa tokuijin xi machjén nga jchaa nga tíjna je Niná kʼoa nga sʼe̱jinná xi tʼatsʼe. Machjén nga miyole katamaa. Kʼianga ʼya xi nimiyoaa, nikʼayalee nichxin. Kʼoatisʼinni xi kao Niná. Tojo tso je Biblia, kataʼyala kʼa jmeni xi koasenkaoná nga miyole Niná koaan.

Xi bakóya je Biblia

Je Niná kui xi koanmele saʼnda ngasʼa nga ʼndenaxó koa̱n Sonʼnde.

Kʼianga kisinda Niná je Adán kao Eva, yaa ʼndenaxóle Edén kisikatío. Je Adán kao Eva chjotatsje koan kʼoa jé Niná kitsjoale ngayeje xi koanchjénle ánni nga nda kisationi kon. Koanjin tsakatio ngantsjai nichxin kʼiatsa tosi tonda miyole Niná koan. Tonga tsín kisitjosonle Niná.

Ánni nga kjoa bitjatojinñá kʼoa nga kjoañʼai chjaʼañá.

Nga tsín kisitjosonle Niná je Adán, alikui koan tsakʼejna ngantsjai nichxin kʼoa kʼoati koan ngatsʼi chjota. Je Biblia itso: “Je xi jée ʼmi jaʼasʼenjin sonʼnde xi totʼatsʼe jngo chjota. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota” (Romanos 5:12). Tojo ma je chjota nga bakinle chʼin xi sʼele xijchále, kʼoati koan je ntje̱le Adán, tsakinle je jée xi tsakajngi. Kuinga majchíngañá kʼoa mʼeñá xi chjota.

Jmé xi kisʼin Niná nga koasenkaoná.

Je Biblia itso: “Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16). Je Niná kui xá kisikasénni Jesús i̱ Sonʼnde nga ñá kʼienntjainá. Kʼianga kisikjaʼaitsjenjin jmeni xi kisʼin Niná je chjota xi Prabhakar ʼmi, xi 86 nóle, xi ya India tsʼe, itso: “Nga kʼoakisʼin je Jeobá a kʼoasʼin bakónina nga nʼio tsjoakena. Kʼoa nga tsjoakena kʼoati kui kjoanda tsjoána nga koa̱n koatejna ngantsjai nichxin”.

Koaan kʼoailee kjoanda Niná jme xi kisʼin xi tʼatsaan.

Je Biblia kʼoatso nga kʼoasʼin bʼainilee kjoanda Niná kʼianga nitjosoán kjoatéxomale (1 Juan 2:3). Nga nʼio tsjoakená je Jeobá, tsoyaná jme xi sʼiaan nga ndasʼin kuiyoaa ndʼaibi (Isaías 48:17, 18, nota). Je Niná alikui mele nga kjoañʼai chja̱ʼá kuinga kʼoatsoniná nga koa̱n tsjoa sa̱tío tokoán ndʼaibi kʼoa nga koa̱n kuiyoaa ngantsjai nichxin kʼiatsa si̱tjosonlee.

NYAON NYAON KʼOÉXKIAA JE BIBLIA

Kʼoangilee yaoná nga kjoetʼa jme xi chon sonʼnde tsa si̱jélee nganʼio Niná kʼoa tsakui kʼoasʼiaan xi sasénle

Nga koa̱n kuiyochoán tjínnená nga nyaon nyaon kuichaa. Tonga je Jesús i kitso: “Ali tokao nioxtila kʼoéjnakonni chjota, tonga kao ngayije én xi nchja̱ni tsʼoa Niná” (Mateo 4:4).

Je Biblia tsoyaná jotjínni xi tʼatsʼe Jeobá. Kʼianga bʼexkiaa tsoyaná jme xi kisʼin nichxin kjoatse, jme xi tísʼín ndʼaibi kʼoa jme xi sʼin nichxin xi sʼa nroa.

JE NINÁ SI̱JÉLEE NGANʼIO

Jmé xi sʼiaan tsa mená si̱tjosonlee Niná tonga tsa ñʼai maná nga nikʼéjnaa jmeni xi tsín sasénle. Xi koasenkaoná kuinga nda jchaxkoaan je Niná.

Kataʼyala jokoan jngo chjoón xi Sakura ʼmi. Chjoón jebi alikui ndasʼin kikao yaole, tonga kʼianga kiskotʼaya je Biblia, koanjinle nga i̱ tso je Niná: “Tinyaxinlao kjoachajngi” (1 Corintios 6:18). Je Sakura jé Niná kisijéle nganʼio nga kisikʼantjaiya yaole. Ninga kʼoalani, tojo ñʼai male. Itso: “Kʼianga kui xi chʼaotjín faʼaitsjenna, kʼoaxinle Jeobá jotjín tokoan, nga̱ ʼbeñá nga tsín kʼoakoa̱nna nga toʼan. Nga bʼetsʼoale Jeobá ngisaa kjimachriantʼale”. Joni Sakura, millón mani chjota xi tjíobexkon Niná, kʼoa je Niná tíbasenkao chjota jebi nga kjima tjíosíkʼantjaiya yaole kʼoa nga kʼoatjíosʼín josʼin mele Niná (2 Corintios 4:7).

Kʼianga ngisasa nda jchaxkoaan je Niná kʼoati ngisa nda skoe̱xkonná tsanda je, kʼoa miyole kuitsoná (Salmo 25:14; Gálatas 4:9). Kui xi koasenkaoná nga kuitjo̱ntjailee yaoná nga kjoaʼaí kjoaxkón kʼoa nga koa̱n kuiyoaa ya sonʼnde chjotsele Niná. Tonga jókoa̱nchon ya sonʼnde chjotse. Yaa kjoaʼmiya xi ijngo jchaa xi tʼatsʼe jebi.

a Ya Biblia kʼoatso nga Jeobá ʼmi jaʼaínle Niná.

Tsa kʼoati meli jchai xi tʼatsʼe jebi

XO̱N XI BÁJINKONNÁ

Nkjín xi kuinje̱ngi, kʼoati koa̱n kuinje̱ngilai yaoli tsanda ji

Jmé xi tjínnele sʼiaan nga kuinje̱ngilee yaoná nga kjoaʼaí kjoafetʼa. A tsojmi kuinyatjoá.

XO̱N XI BÁJINKONNÁ