Je Chjotaxále Niná jeme koatexoma i̱ Sonʼnde, kʼoa ngatsʼi chjota tsjoa sa̱tío kon, ndasʼin koatio kʼoa tsjoa koaya kon je xá xi sʼin. Je Niná jé Jesús tsakasénnda nga je koatexomaná. Chjotaxá jebi tsín kʼoasʼin josʼín je chjotaxá sonʼnde. Je Jesús kui xi mele nga ndasʼin kuiyoaa. Ñaki kao kjoatsjoacha koatexomani, koakoná kjoanda, skoe̱ma̱ná kʼoa nʼio ndasʼin koatexoma (Isaías 11:4).

Je chjota alikui tixkoa̱ya koationi xi totʼatsʼe josʼin tsen yaole kʼoa jñani tsʼe, tosa jtín sʼin koatio (Apocalipsis 7:9, 10). Ngatsʼi chjota tsjoake koa̱n Niná kʼoa tsjoake koa̱n xínkjín. Ngatsʼiaa jtín sʼin si̱xá nga si̱kuindaa je Sonʼnde, ánni nga kuitjosonniná josʼin tjínndajinle je Niná (Salmo 115:16).

Kʼianga je Chjotaxále Niná jekoanentsja Sonʼnde, je Niná sikuinda Sonʼnde nga tsín tinʼio sje koa̱nni kʼoa tsín tinʼio nyʼán koa̱nni, kʼoa ñaki nda koa̱nchon (Salmo 24:1, 2). Kʼianga kisikʼéjnajyo je jtsíntjao̱nʼio je Jesús, kʼoasʼin tsakakóni nga koa̱nle kʼoasʼin sichjén je nganʼio xi kitsjoale Niná (Marcos 4:39, 41). Kʼianga koatexoma alikui tijme kjoaxkón sʼe̱ni. Xi ijngosani, jé Chjotaxále Niná xosʼin nga ndasʼin koatiokao xínkjín je cho̱ kao chjota kʼoa tsín tiʼya xi sikitsónni je Sonʼnde (Oseas 2:18).

Ndasʼin kuiyoaa ngatsʼiaa, ali ʼya xi tiso̱kochʼinnile, tsín ʼya xi tikoa̱njchíngani kʼoa tsín ʼya xi tikuiyáni (Isaías 35:5, 6). Je Sonʼnde tsje koa̱nchon kʼoa naskánakoa̱nchon, tojo koanchon jña tsakatio je Adán kao Eva. Nga jeʼndenaxó koa̱n nʼio sʼe̱ tsojmi xi ma chine, ngatsʼiaa sʼe̱ná tsojmi xi chi̱nee, to jokoanchon ya ʼndenaxóle Edén (Génesis 2:9). Nga jeʼndenaxó koa̱n kʼiaa kuitjoson jmeni xi kitsole Niná je naxinandá Israel, nga i̱ kitsole: “Kuichiñó nioxtila josaʼnda nga koa̱nskio” (Levítico 26:4, 5).

Kʼianga jekoatexoma je Chjotaxále Niná, sʼee kjoanyʼán jngo tjíjtsa Sonʼnde, alikui ʼya xi titaon skoe̱ni xínkjín, je chjota tjao koa̱nle xínkjín. Alikui tisʼe̱ni kjoajchán, alikui ʼya xi tikjoatéxoma kjoaʼatoneni kʼoa ngatsʼiaa sʼe̱ná jmeni xi machjénná. Je Biblia itso: “Nga jngó jngó yaa koationgi xka̱totseele kao yá higole, kʼoa liʼya xi kuinyaxkónle” (Miqueas 4:3, 4).

Nga jngó jngó familia tsen sʼeele niʼya kʼoa tsín ʼya xi niʼyale kjoaʼale xínkjín, kʼoa jmeni xi sʼiaan tsjoa koaya tokoán. Je Biblia kʼoatso nga je xi ya koatio ya sonʼnde chjotse “ali tokjoatjaojin nga sixá” (Isaías 65:21-23).

Je Biblia itso: “Ñaki kui kjoankjíntokonle Jeobá sʼe̱ ngakjijnda sonʼnde” (Isaías 11:9). Ñá xi chjota kui kjoachjinele Jeobá sʼe̱ná kao tʼatsʼe jmeni xi kisinda. Je kjoachjine xi sʼe̱ná alikui kʼoasʼin si̱chjén nga ki̱cha̱ si̱ndaa kʼoa tsakuije̱ nga xíngiaa si̱kiʼoaan, tosaa kui xi koasenkaoná nga ndasʼin kuiyoaa kʼoa nga si̱kuindaa je Sonʼnde (Salmo 37:11; Isaías 2:4).

Je Niná nʼio naskásʼin kisinda je Sonʼnde, nga̱ kui xi mele nga i̱ kuiyoaa ngantsjai nichxin kʼoa nga kʼoétsaojiaan nga nyaon nyaon (Salmo 37:29; Isaías 45:18). Kʼianga koa̱n kʼoasʼin kuiyoaa, je Niná “tondiaa kjoaʼaxin je kjoabiya” (Isaías 25:8). Je Biblia itso: “Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male” (Apocalipsis 21:4). Je Niná kui kjoanda tsjoále nga koa̱n koatio ngantsjai nichxin je xi ya sonʼnde chjotse koatio, xi tsonile, je xi kʼoasjentjai nga kjoetʼa jme xi chon sonʼnde kao je chjota xi millón mani xi kjoaʼáyale (Juan 5:28, 29; Hechos 24:15).

 Millón mani chjota xi tjío jngo tjíjtsa Sonʼnde xi jekʼoasʼin tjíofikao yaole josʼin mele Niná nga̱ kui xi mele nga koatio kʼianga jekoatexoma je Chjotaxále Niná i̱ Sonʼnde. Ningalani chjotajée ma, tjíobʼénele yaole nga kʼoakjimakjoan jokjoan chjota xi mele Niná nga ya koatio ya sonʼnde chjotse. Jméni xi tjíosʼín. Tjíobexkon jotjínni xi tʼatsʼe Jeobá kao xi tʼatsʼe Jesús (Juan 17:3).

Tongichoasa chale nga kjoetʼa jmeni xi chon sonʼnde. Kʼiatsa meli jchai jme xi tjínnele sʼiain nga kuitjo̱ntjai kʼoa nga koa̱n kuijnai ya sonʼnde chjotse, kʼoatʼinlai je testigole Jeobá nga katatsoyali je Biblia kao je libro Koaan nda kuiyoaa ngantsjai nichxin.