Jmé xi kuitsoni josʼin kuiyoaa nichxin xi nroa
Nkjín chjota xi kʼoasʼin makjainle nga toxá jetjínndajinni jmeni xi koa̱nle nichxin xi sʼa nroa. Kuinga básjainile josʼín tojoni nga ndasʼin koatio.
NKJÍN XI I̱SʼIN MAKJAINLE
XI NIÑO KOTʼASON. Nkjín chjota xi kʼoasʼin makjainle nga kui xi kuitsoni josʼin koatio nichxin xi nroaján josʼin tjío je niño nichxin nga kitsin. Kuinga horóscopo bʼéxkiani nga skoe̱ jmeni xi koa̱nle nichxin xi fini, kʼoa síkuinda yaole nga tsín kjoa jtsaojin kʼoa tsakuije̱ nga ndasʼin koatio.
XI BARAJA KOTʼASON. Tjínkʼa chjota xi je fikonle xi baraja kotʼason nga mele skoe̱ ánni kʼoamani tsa jmeni, kʼoa kui kjonangi jmeni xi tjínnele sʼin. Kuinga kʼoasʼínni nga̱ kui xi mele skoe̱ josʼin sikuinda yaole, nga skoe̱ josʼin kʼoendajin je kjoa xi tjínle kʼoa nga ndasʼin koatio.
NGA ʼNDÍKʼIEN ʼYAXKOÁN. Tjínkʼa xi kʼoatso nga tjínnele skoe̱xkón je ʼndíkʼien kʼoa tsa nkjínsa niná skoe̱xkón ánni nga sikuindani kʼoa sichikontʼainni. Je Van, * jngo chjoón xi Vietnam tsʼe, itso: “Kʼoasʼin koankjainna nga nda koatejna ndʼaibi kʼoa nga nda kuiyuijin kao ʼndíxtina nichxin xi nroa tsa je skoexkoán je ʼndíkʼienna”.
XI KʼOASʼIN MAKJAINLE NGA XIN TSIN IJNGOKʼA NGA JEBIYA. Nkjín xi kʼoatso nga tsin ijngokʼa kʼianga jebiya kʼoa nga to kʼoama ʼndeʼnde. Kʼoasʼin síkjaʼaitsjen nga kui xi tsoni tsa nda koatio ndʼaibi kʼoa tsa mai jmeni xi kisʼin nga sa tsakatiokon nga títjon.
Ningalani nkjín chjota xi be nga tsín kʼoatjín jebi, tojo kotʼa je horóscopo, xo̱n baraja, ʼndíkʼienle bexkón..., kuinga kʼoasʼínni nga mele skoe̱ josʼin koatio nichxin xi sʼa nroa.
JOSʼIN BICHÓMANI
A nda batio je chjota xi kʼoasʼin makjainle.
Kataʼyala jokoan jngo chjota xi Hào ʼmi, xi Vietnam tsʼe. Yaa kikonle chjota xi niño kotʼason, ʼndíkʼienle tsabexkón kʼoa nkjínsa koya jme xi koankjainle tojoni nga nda kʼoéjna. Tonga jósʼin kichomani nga kʼoakisʼin. Je Hào itso: “Tsee tao̱n kisicha, tao̱n kitsjentʼen, kjoa kisʼena kao xíngia kʼoa tsín tinda kisʼeni tokoan”.
Je Qiuming xi Taiwán tsʼe, kui koankjainle nga niño kotʼason chjota, nga xin tsin ijngokʼa chjota nga jebiya, nga to jetjínndajin jmeni xi maná, xo̱n baraja kiskotʼason kʼoa ʼndíkʼienle tsabexkón. Tonga kʼianga jenda kiskotʼayajin jotjínni xi tʼatsʼe jebi, i kitso: “Koanjinna nga tsínni kʼoatjín costumbre jebi kʼoa nga kjántʼa jmeni xi tso. Alikuini kʼoama jotso xi niño kotʼason. Kʼoa nga kʼoasʼin makjainle chjota nga tsin ijngokʼa kʼianga jebiya..., tsa tsín faʼaitsjenle josʼin tsakʼejna nga títjon, jósʼin sindayani yaole kʼoa nda kʼoéjnani”.
“Koanjinna nga tsínni kʼoatjín costumbre jebi kʼoa nga kjántʼa jmeni xi tso” (QIUMING, TAIWÁN)
Kjimajinle je Hào kao Qiuming kʼoa xi kjaʼaísa chjota nga tsínkui xi tsoni josʼin kuiyoaa nichxin xi nroaján kʼiatsa kui koa̱nkjainná tʼatsʼe nga kʼoatso je chjota nga to jetjínndajin jmeni xi maná, tʼatsʼe xi niño kotʼayason, nga ʼndíkʼienle bexkón, kʼoa nga xin ʼnde tsin ijngokʼá kʼianga jebiyaa. A kui xi tsonile jebi nga tsín koa̱n ndasʼin kuiyoaa nichxin xi sʼa nroa.
Nkjín xi kʼoatso nga nda kuiyoaa nichxin xi sʼa nroa tsa skuelangʼa chótʼayá kʼoa tsa nyiná koaan. Jósatío kon je chjota xi kʼoasʼín.
^ párr. 6 Alikui tsa ñaki kʼoaʼmi kʼa chjota xi bʼaxki̱ i̱bi.
^ párr. 16 Én jebi yaa Biblia faʼaitʼa ya Gálatas 6:7. Me tikʼoatsoni je én xi nʼio síchjén chjota jñani xin ʼnde. Itso: “Kʼiatsa melón kʼoéntjai, melón koa̱njchá, kʼiatsa na̱jmáxtila kjoái, na̱jmáxtila koa̱njchá”.
Tsa kʼoati meli jchai xi tʼatsʼe jebi
XO̱N XI BÁJINKONNÁ
Je astrología kao xi kotʼason a koaanle koako jme xi koa̱n nichxin xi nroaján
A koaan kui si̱nʼiotʼaa yaoná jmeni xi tso je chjota xi kotʼason.
XO̱N XI BÁJINKONNÁ
Jmeni xi tsoya je Biblia
A tjínle yaoná xi tojo bʼejnakon kʼianga jebiyaa. A tjínná jngo ni̱ma̱ xi bʼejnakonsa. Jñáni tjío je kʼien.
