Nkjín chjota xi kʼoasʼin síkjaʼaitsjen nga nda koatio kʼiatsa ndasʼin. Kuinga nda fikaoni xi kjaʼaí, bakóle kjoaxkóntokon kʼoa ndasʼin síkjaʼaitsjen. Jngo chjoón xi Vietnam tsʼe xi Linh ʼmi, itso: “Kʼoasʼin kisikjaʼaitsjen ngantsjai nga ndasʼin koatejna kʼiatsa nda sʼian”.

Nkjín chjota xi nda sʼín nga̱ kʼoasʼin sakóyale ya religión jña tjíojin. Jngo chjota xi Taiwán tsʼe xi Hsu-Yun ʼmi, itso: “Kʼoasʼin tsakʼinyana nga kui xi kuitsoni jmeni xi kisʼin nga sʼa tíjnakon jngo chjota tsa tsjoa sʼe̱ kon kʼoa tsa kjoañʼai kjoaʼa kʼianga jekuiyá”.

Kʼianga nda chjota maa ndasʼin biyoaa. Ningalani nda chjota maa alikui tongantsjai nga nda biyoaa. Jngo chjoón xi Hong Kong tsʼe xi Shiu Ping ʼmi, itso: “ʼBeña nga tsín tongantsjai nga ndasʼin biyoaa ninga nda nʼia. Ninga nda kisikuinda je familiana kʼoa nda kisʼian, likuini nda tsakiyuijin, nga̱ je xʼinna kitsjionkonnajin kao je ʼndíxtina”.

Nkjín chjota xi tjíobe nga tsínni tsakui religión xi basenkaoná nga nda nʼia. Jngo chjoón xi Japón tsʼe xi Etsuko ʼmi, itso: “Ya religión jña tsakatejnajian an kixinyale xi sʼa xti jmeni xi kisʼin. Tonga tsínni nda kisʼe tokoan nga tsaʼbe nga je chjota xi ya tjíojin religión jebi alikuini ndasʼin fikao yaole, xá kjányani kʼoa tsín ndasʼin síchjén je tao̱n xi maxkó ya yo̱ngo̱”.

Tjínkʼa chjota xi nʼio sísin tʼatsʼe religión xi kʼoatso nga tsínni ndasʼin batio ninga nda sʼín. Kʼoakisʼe kon jngo chjoón xi Vietnam tsʼe xi Van ʼmi, itso: “Nyaon nyaon tsakatiole to, naxó kao tsojmi xi ma chine je ʼndíkʼienna, ánni nga sichikontʼainnina nichxin xi sʼa nroa. Ninga nkjín nó nga kʼoakisʼian jebi, toxitsjoani, nga̱ tojo kitjochʼinnile je xʼinna. Kʼoa je tsotina xi xin naxinandá tíkotʼaya kʼiaa 20 nóle nga kʼien”.

Jméni xi nda sikatíoná kʼiatsa tsínkui nga nda chjota koaan. Machjén nga ya kjoásjaiyaa jñani ñaki kʼoatjín jme xi kuitsoná nga jchaa jmeni xi nda sikatíoná nichxin xi sʼa nroa. Jñáni koa̱nsjainá je xi kuitsoyaná.