Tojosʼin tiʼyaa, je chjota kui xi mele nga ndasʼin koatio nichxin xi sʼa nroa. Kuinga skuelangʼa kotʼayani, nga tao̱n básjaini, nga nda chjota ma kʼoa nga kʼoasʼin makjainle nga to jetjínndajin jme xi maná. Kʼianga kʼoasʼín chjota yaa mangóson joni tsa jngo mapa tjíokotʼa xi tsín nda tjínnda. Jmé xi koasenkaoná nga ndasʼin kuiyoaa nichxin xi sʼa nroa.

Kʼianga jme xi nʼia me tongantsjai nga je chjonangilee xi ngisa be kʼoa tsa xi ngisa jchínga tikʼoani ñá. Tsa mená nga ndasʼin kuiyoaa nichxin xi sʼa nroa, jéjin chjónangilee xi ngisa be kʼoa xi ngisa tjínle kjoafaʼaitsjen tikʼoajinni ñá. Je xi nʼio nda koandiaaná kui je Énle Niná, xi jejan jmi basen nó tjínle nga kichji.

Ánni nga koa̱n koa̱nkjainniná jmeni xi tso je Biblia. Jé Niná xi ngisasa nʼio chjine, kʼoa kui kjoafaʼaitsjenle faʼaitʼa je Biblia. Jéní xi “Chjotajchínga xi jekjoatse tíjna” ʼmile, nga̱ tíjna ngantsjai nichxin (Daniel 7:9; Salmo 90:2). Jéní “xi kisinda ngʼajmi, je xi ñaki Niná, xi kisinda sonʼnde” (Isaías 45:18). Tijé Niná xotsoni nga Jeobá ʼmi jaʼaínle (Salmo 83:18).

Nga je Niná kisindaná kʼoa nga tsʼe kjoafaʼaitsjen faʼaitʼa Biblia, kʼoatso nga tongóson sʼin bekonná ngatsʼiaa tojñani tsaan kʼoa tojñani kitjenñá. Ndasʼin bichómani nga nitjosoán je kjoafaʼaitsjen xi tsjoá kʼoa binyakao ngatsʼi chjota. Kui Biblia xi ngisa nkjín én tífaʼatoya kʼoa xi ngisa nkjín tíbʼabíson jngo tjíjtsa Sonʼnde. * Choaa ñʼai tíjna nga koa̱njinle toʼya chjotani kʼoa nga sitjoson jme xi tso. Je Biblia itso:

“Niná tongóson fikao ngatsʼi. Tojñani sonʼnde, je xi tsokjónke Niná, xi sʼín xi kjoakixi, Niná tjaokení” (HECHOS 10:34, 35).

Nga tsjoake xtile jngo nʼai basenkao, kʼoati sʼín je Jeobá, nga tsjoakená basenkaoná nga tsjoáná kjoafaʼaitsjen xi faʼaitʼa Biblia (2 Timoteo 3:16). Koaan koa̱nkjainná jmeni xi tso je Énle Niná, nga̱ jé Niná kisindaná kʼoa ngisaa nda be jmeni xi koasenkaoná.

Yaa kjoaʼmiya xi ijngo jchaa jméni xi machjén nga sʼiain nga kʼoasʼin kuijnai.