JÓSʼIAAN NGA TSÍN XÍNGIAA KOA̱NJTICHAA
4 | Je Niná tijélai nganʼio
Je Biblia itso:
“Je kjoanda xi tsjoájin ni̱ma̱ná je Espíritu Santo, xi kui: Kjoatjaocha, kjoatsjoa, kjoa xi nyʼán tjín, kʼoa nga nikjaínlee xíngiaa, kjoandʼé, kjoanda, kʼoa nga makjainná, kjoaʼindajintakon, kʼoa nga chjoéxkoá yaoná” (GÁLATAS 5:22, 23).
Xi tsoyanile:
Je Niná basenkaoná nga chjaʼaxinlee yaoná je kjoajticha. Je espíritu santo basenkaoná nga kui kʼoanʼia jmeni xi tsín koa̱nná kʼoasʼiaan nga toñá. Kuinga ndatjínsíni nga tosa je Niná si̱jélee nganʼio ʼndele nga toñá kuixkantʼakoaa je kjoajticha. Tsa kʼoasʼiaan, kʼoati sʼe̱ tokoán jokisʼe kon pastro Pablo, nga i̱ kitso: “Je nganʼio xi nʼio tse tsʼe Niná ní, ali tsainjinjin” (2 Corintios 4:7). Kʼoa kʼoati koa̱n i̱ kuixoán: “Xi basenkaona jé Jeobá” (Salmo 121:2).
Kʼoatʼiain jebi:
“Nʼio tsʼen koan ngasʼa. [...] Tonga jé Jeobá tsakasenkaona nga nda chjota kjima ndʼaibi” (WALDO).
Tijélai Jeobá je nganʼiotsjele nga katabasenkaoli nga nda chjota katamai (Lucas 11:13). Nga koakui kjoatsjoacha, nga nda kʼuínkoai xi ngikʼa, nga tsejta katamai kʼoa nga koa̱nli chjoéxkui yaoli, kui xi koasenkaoli nga tsín jticha koai̱n je chjota. Kui Biblia tichjain nga tjasjaiyai josʼin tsoyanile nga jngó jngó koya jebi kʼoa kʼoatʼiain. Kʼoati ndatjín tsa je si̱miyui chjota xi bʼénele yaole nga kʼoasʼin fikao yaole. Tsa kʼoasʼiain, kui xi koasenkaoli nga koakui kjoatsjoacha kʼoa nga kʼoasʼiain xá xi nda (Hebreos 10:24).
