Tondiaa tjóxin je kjoajticha
Ningalani tsín tikjoajticha sʼe̱jnajinni ni̱ma̱ná, tonga alikui koa̱nná nga ñá si̱kʼantjaiyaa josʼin síkjaʼaitsjen kʼoa josʼín xi kjaʼaí chjota. Nga nʼio nkjín mani chjota xi totaon ʼya, ʼyáni xi koa̱nle nga tondiaa kʼoendajin kjoa jebi.
Je xi koa̱nle tondiaa kjoaʼaxin je kjoajticha tojéní Jeobá, kʼoa ya Biblia kʼoatso nga kʼoasʼin (Proverbios 20:22).
JE NINÁ KJOAʼAXIN JÑA NROANI JE KJOAJTICHA
-
1. JE NA̱I. Je Na̱i, ánkje xi kontra tsakʼejnale Niná, jé tjínle jée nga kʼoasikji kjoajticha tjín nichxin xi tiyoaa ndʼaibi. Je Niná kjoaʼaxin je Na̱i kao ngatsʼi chjota xi kʼoati tsjoáʼndele yaole nga kjoajticha sʼejnajin ni̱ma̱le (Salmo 37:38; Romanos 16:20).
-
2. JE SONʼNDE XI JE NA̱I KJINENTSJA. Je Niná kjoaʼaxin ngatsʼi xi kjoajticha kaníbason, jolani chjota político xi bʼanachale chjota kao xi nyatítjonle religión xi kjoajticha kaníbason. Je Niná kʼoati kjoaʼaxin je negosioyʼai xi nʼio xkaiʼale tao̱n kʼoa xi tobʼanachale chjota (2 Pedro 3:13).
-
3. NGA CHJOTAJÉE MAA. Je Biblia kʼoatso nga chjotajée maa ngatsʼiaa kʼoa kui xosíkaoná nga kui kʼoanʼiañá kʼoa nga kui nikjaʼaitsjenñá xi chʼaotjín (Romanos 5:12). Kʼoati ya nroani nga majtichaa xíngiaa. Tonga nga je Niná basenkaoná, kuicho nichxin nga tsín tichjotajée koa̱nñá kʼoa nga tsín tijticha koa̱nñá xíngiaa (Isaías 54:13).
JE BIBLIA KʼOATSO NGA TSÍN TISʼE̱NI KJOAJTICHA
-
1. KUI XI KIXI TJÍN KʼOASʼIN CHJOTA. Je Chjotaxále Niná yaa tjen ngʼajmi koatexomani kʼoa kao kjoakixi koatexoma tokʼia saʼndani (Daniel 2:44). Aliʼya xi tikʼoasjengini xínkjín kʼoa aliʼya xi titotaon jchani, je Niná kʼoendajinle kjoa ngatsʼi je chjota xi kjoañʼai tjíofaʼá ndʼaibi (Lucas 18:7).
-
2. NDA KJUINKOAA XÍNGIAA. Aliʼya xi tikjoañʼai kjoaʼani nga̱ tsín tisʼe̱ni kjoajchán kao kjoatsʼen (Salmo 46:9). Naskánakoa̱nchon i̱ Sonʼnde kʼoa tojé koatio chjota xi nda koaikao xínkjín (Salmo 72:7).
-
3. NDASʼIN KUIYOAA NGATSʼIAA. Tsjoake koa̱n xínkjín ngatsʼi chjota (Mateo 22:39). Ali tikjoañʼai chja̱ʼañá, alikui tikui kjoaʼaítsjenniná xi chʼaotjín kao jmeni xi koantʼeen ngasʼa (Isaías 65:17). Kʼianga jetjóxin kjoajticha, je chjota “ñaki nyʼán sʼin koatio” (Salmo 37:11).
A meli nga kʼoasʼin kuijnai nichxin xi sʼa nroa. Nichxin xi tiyoaa ndʼaibi, alikui jtike xínkjín je testigole Jeobá xi millón mani xi tjío jngo tjíjtsa Sonʼnde. Kui je kjoafaʼaitsjen xi ya Biblia faʼaitʼa tjíobinyakao (Salmo 37:8). Ningalani xinxin tsʼe kʼoa ningalani kjaʼaí kjaʼaísʼin ngale, tojngo familia mani ngatsʼi kʼoa jtín sʼin tjío nga̱ tsjoake xínkjín (Isaías 2:2-4).
Je testigole Jeobá kao kjoatsjoa kuitsoyali jósʼiain nga chókjoajinli kʼianga tsín kixi tjín jmeni xi matʼain kʼoa tsa chʼasjengili. Jmeni xi koa̱njinli koasenkaoli nga tsín tiʼya xi jticha koa̱nni. Koa̱njinli jótjínnele sʼin jchatokuin xi kjaʼaí, ninga je xi tsín nda fikaoli kʼoa ninga je xi jtikeli. Tsa kʼoasʼiain, tsjoa sʼe̱ tokuin, ngisaa nda kʼuínkoai xi ngikʼa. Kʼoa xi ngisa chjíle kuinga jchai josʼin kʼuínkoai yaoli nga jetondiaa tjóxin je kjoajticha kʼianga jekoatexoma Chjotaxále Niná (Salmo 37:29).