Je Jeobá kʼoatsoná nga kʼoéyanajmílee jme kjoa xi tibitjatojiaan kʼoa tsa jme xi nikjáojiaan (Salmo 55:22). Ni tse kjoa ni choa kjoa tibitjatojiaan koaan kʼoéyanajmílee Niná. Kʼoati makjáojinle jmeni xi nikjáojiaan. Jméni xi sʼiaan nga nda sʼe̱ ijngokʼani tokoán. Je xi títjon kʼiaa nga kʼoétsʼoaa (Filipenses 4:6, 7).

Tsakui nichxin toñá tiyoaa koa̱nná kʼianga chʼin tjínle kjoafaʼaitsjenná, nga̱ tsín majin sakʼoale xi ngikʼa jotjín tokoán (Proverbios 14:10). Tonga nga nrʼoéná je Niná kʼoa nga mandosinle josatío tokoán koaan kʼoéyanajmílee jotjín tokoán. Je Jeobá kuenta sʼínná kʼoa mandosinle nga chʼin bʼetʼaná, be jme kjoa xi bitjatojiaan kʼoa kuinga kʼoatsoniná nga kʼoéyanajmílee tojme kjoa xi tinikjáojiaan (2 Crónicas 6:29, 30).

Kʼianga kʼoétsʼoalee Jeobá ngisaa sʼe̱jngo tokoán nga je sikuindaná. Kʼoati koa̱n kʼoakʼoé tokoán tojo kisʼe kon jngo xi kiski Biblia nga i̱ kitsole Niná: “Tiʼyaní je kjoañʼai xi tijnajian, kuenta tinʼiai je kjoaba xi tijnajian” (Salmo 31:7). Kʼianga ʼyaa nga mandosinle Jeobá je kjoa xi bitjatojiaan koasenkaoná nga chókjoajinná. Kuenta sʼínná Niná kʼoa nda majinle je kjoa xi bitjatojiaan, kʼoa kui Biblia síchjén nga tsjoánganʼioná.