4 | Kjoafaʼaitsjen xi tsjoá je Biblia
JE BIBLIA ITSO: “Ngayije xo̱n Escritura [...] kjaínga nda machjén” (2 TIMOTEO 3:16).
Jósʼin tsoyanile jebi
Ningalani tsín tsʼe xki nchja̱ni je Biblia nda kjoafaʼaitsjen tsjoáná kʼianga chʼin katʼale kjoafaʼaitsjenná. Kataʼyala choa̱ xi fini.
Jósʼin basenkaoná
“Chjota xi nda tjío, likui machjénle chjinexki, tojé xi tjíomʼe xi machjénle” (MATEO 9:12).
Je Biblia kʼoatso nga ndatjín nga kjoásjee je chjinexki xi kui xá sʼín. Je xi chʼin katʼale kjoafaʼaitsjenle, nkjín xi nda satíoni kon kʼianga jefikonle especialista kʼoa nga jeʼmiyale tʼatsʼe chʼin xi tjínle.
Kʼianga ejercicio nʼia alikui nanda chʼin sʼená (1 TIMOTEO 4:8).
Nda sʼe̱ kjoafaʼaitsjenná tsa kʼoasʼin si̱ngalee yaoná nga kui kʼoasʼiaan xi koasenkaoná, jolani nga kjitʼa ejercicio sʼiaan, nga kui chi̱nee tsojmi xi tsjoánganʼioná kʼoa nga nda sóyofe.
“Jngo ni̱ma̱ xi tsjoa tjínle síndayaná, tonga je kjoaba síkinroajen nganʼioná” (PROVERBIOS 17:22).
Nda sʼe̱ tokoán kʼianga kʼoéxkiaa texto xi faʼaitʼa Biblia xi koasenkaoná kʼoa nga kʼoéndajiaan jmeni xi sʼiaan. Tsa tsín si̱kʼajenlee tokoán alikui kui nʼio kʼoetʼaná je chʼin xi sʼele kjoafaʼaitsjenná.
“Je xi nangitokon, tjínle kjoachjine” (PROVERBIOS 11:2).
Tʼaiʼndelai nga katabasenkaoli tsa ʼya xi kʼoakuitsoli nga tsjoánganʼioli. Tjíondajin je miyoli kao xíngi nga kuinyakaoli. Tsa tsín be josʼin koasenkaoli, ji kʼoatʼinlai jmeni xi machjénli, tonga ali tsʼatonejin kʼoakji nijélai jokji kʼoakoa̱nle kʼoa tʼailai kjoanda.
Jósʼin basenkaoná jmeni xi tso Biblia kʼianga chʼin katʼale kjoafaʼaitsjenná
“Nga tsín sin tjínna kikonle chjinexki. Kʼiaa koanjinna nga chʼin tjínna kʼoa nga tjínnele sixkia kʼianga kʼoakitsona chjoón chjinexki jme chʼin xi tjínna kʼoa kʼoakitsona josʼin tjínnele sixkia” (Nicole, a xi trastorno bipolar ʼmi tjínle).
“Basenkaona nga nyaon nyaon bʼexkiaijin Biblia kao chjoónna kʼoa kui kjoafaʼaitsjen xi nda tso sʼeya kjoa. Kʼianga nʼio sikʼajenle tokoan masjaina jngo texto xi basenkaona” (Peter, xi depresión tjínle).
“Ngasʼa soa mana nga ʼya xi bʼeyanajmíle jme chʼin xi tjínna. Tonga nga tsakʼeyanajmíle jngo chjoón miyona koanjinle jotjín tokoan, tsakasenkaona kʼoa koanjinna nga tsín toʼan tijna” (Ji-yoo, xi trastorno alimentario ʼmi tjínle).
“Tíbasenkaona kjoafaʼaitsjen xi tsjoá Biblia josʼin sikjáya kʼoa josʼin sixá. Je kjoafaʼaitsjen xi tsjoá tíbasenkaona nga chʼin tjínle kjoafaʼaitsjenna” (Timothy, xi trastorno obsesivo compulsivo ʼmi tjínle).
a Alikui tsa ñaki kʼoaʼmi kʼa chjota xi bʼaxki̱ i̱bi.
