Toxá tsín ʼya sakʼoañá jmeni sʼiaan kʼianga chʼin tjínle kjoafaʼaitsjenle jngo miyoná. Kʼianga kuisenkoaa nga kui chʼin tjínle kʼoasʼin koakonilee nga tsjoachaa.

Nda koasenñolee (SANTIAGO 1:19).

Jngo koya josʼin kuisenkoaa kʼiaa nga kuinóʼyalee je miyoná jmeni xi kuitso. Koaan kuinóʼyalee ninga tsínkjoan ʼyaa jmeni xi kʼuínlee. Xi ngisa chjíle kuinga katabe nga tinoʼyalee jmeni xi títso kʼoa nga katamajinle nga mandosin kjoaixiná xi tʼatsʼe. Tijinlai yaoli jotjín kon kʼoa ali chʼaojinsʼin nikjaʼaitsjain xi tʼatsʼe. Sakʼoajin kui kʼoakuitso jmeni xi tsín sa̱sénli kʼoa tsa skanni kʼoakoa̱nle jmeni xi katso (Job 6:2, 3).

“Tinʼiokon xi choa tjíokon” (1 TESALONICENSES 5:14).

Tsakui nichxin nʼio tísíkjáojin je miyoli kʼoa tsa kʼoasʼin síkjaʼaitsjen nga tsín jme chjíle. Takolai nga mandosinli xi tʼatsʼe ninga tsín ʼyai jme xi sí kʼoasʼin kʼoainganʼionilai.

“Jngo xi ñaki miyo tsjoakená tokʼiani” (PROVERBIOS 17:17).

Kʼoatʼinlai nga kuisenkoai. Chjónangilai jme xi machjénle. Tsakui nichxin saʼnda tsín be jmeni xi sʼin, koaan kʼoatʼinlai jmeni xi koa̱n sʼiaon, jolani tsa jña koanngínkitsomao, tsa  tjín xi koanngínkindáo, tsa kuisenkoai nga ndʼiale sitsje kʼoa tsa jmesa xi sʼin (Gálatas 6:2).

Tsejta katamao (1 TESALONICENSES 5:14).

Tsínjin tongantsjai nga koa̱nmele kuinchja̱najmí je miyoli. Koaan kʼoatʼinlai nga kuinóʼyalai tokʼiani koa̱nmele kuinchja̱najmí. Nga chʼin tjínle tsakui nichxin kui kʼoakuitso kʼoa kui kʼoasʼin xi tsín sa̱sénli, tsa tsínni sitjoson jme xi kʼoéndajion kʼoa tsa tokoa̱njtile. Nga kuisenkoai miyoli tsejta katamai kʼoa tijinlai yaoli jotjín kon (Proverbios 18:24).

“Basenkaoña miyona tokʼiani nga nganʼio machjénle ningalani tsín an kʼoakoa̱nna kʼoendajian ngayeje kjoa xi tjínle, tonga nrʼoele nga bʼéyanajmína jotjín kon kʼoa nʼio basenkao nga kʼoasʼian” (Farrah, a jngo miyole xi depresión kao ansiedad tjínle kao xi trastorno alimentario ʼmi tjínle).

“Je miyona nʼio tjao bena kʼoa tsjoa tjín kon ngantsjai. Ñandia nga ya ndʼiale kinchja̱na kʼoa nʼio nda chine tsojmi xi tsakʼénda. Nga nda kisʼena tsakʼeyanajmíle jotjín tokoan” (Ha-eun, xi depresión tjínle).

“Nʼio chjíle nga tsejta maa. Kʼianga kui kʼoasʼín chjoónna xi síjtina kui sikjaʼaitsjen nga kui kʼoasʼínni nga chʼin tjínle. Nga kʼoasʼin sikjaʼaitsjen alikui yaona sijtile kʼoa kuenta sʼian jotjín kon” (Jacob, xi depresión tjínle chjoónle).

“Nʼio basenkaona kʼoa tsjoánganʼiona je chjoónna. Kʼianga ba sʼe tokoan alikui kui kʼoatsona nga kui kʼoasʼian jmeni xi tsín mena. Kʼoa sakʼoani tsínkui kʼoasʼín jmeni xi mele sʼin tsakai. Nʼio nda chjota kʼoa tsín to yaole fini. Nʼio chjí ʼbekoan” (Enrico, xi ansiedad tjínle).