Jósʼiain tsa pornografía kotsenle xʼinli
-
“Jngoyanile nga kjitʼa tíbʼanachana je xʼinna”.
-
“Nʼio chʼao kisʼe tokoan, kʼoasʼin kisikjaʼaitsjen nga tsín jme chjína”.
-
“Ninga nʼio aon koanna toʼan tsakʼejinkoan, alikui ʼya xi tsakʼeyanajmíle”.
-
“Kʼoasʼin kisikjaʼaitsjen nga tsín mandosinle Jeobá xi tʼatsʼan”.
Tojosí tso én jebi kʼoasatío kon je yánchjín kʼianga pornografía kotsenle je xʼinle. Tsa jenkjín sá kʼoa tsa jenkjín nó nga toʼma kʼoatísʼín, tsakui nichxin je chjoón likui tisinʼiotʼani je xʼinle. Jngo chjoón xi i̱ kitso: “Nga kʼoatísʼín je xʼinna kui kisikjaʼaitsjen jmésani xi tíbʼéʼmana”.
A pornografía kotsenle xʼinli. a Je kjoaʼmiya jebi kui xá kisʼendani nga koasenkaoli. Kui chótʼayajiaan je kjoafaʼaitsjen xi tsjoá Biblia xi sinʼio tokuin, xi koasenkaoli nga jchai nga kuenta sʼínli Jeobá, xi koasenkaoli nga nda sʼe̱ tokuin kʼoa nga nʼio sʼe̱jna kjoamakjainli. b
JÓSʼIAIN TSAKUI KJOA TIBITJATOJIN
Ninga tsínlani kʼoakoa̱nli nga ji kʼoakʼuínlai xʼinli jmeni xi sʼin, tonga koaan kjoásjailai josʼiain kʼianga nda sʼe̱ tokuin. Koaan i̱ sʼiain.
Ali jijin fanai jée yaoli. Tsakui nichxin kʼoasʼin síkjaʼaitsjen je chjoón nga je tjínle jée nga pornografía kotsenle je xʼinle. Tobʼelañá, je Alice c i kitso: “Ánni nga tosa kjaʼaí yánchjín kotsennile je xʼinna”. Kʼoa tjínkʼa yánchjín xi tsín nda satío kon nga̱ kʼoasʼin síkjaʼaitsjen nga tsín nda sʼín nga yaole síjtile nga pornografía kotsenle je xʼinle. Je Daniela itso: “Nʼio jti koanna nga pornografía kotsenle je xʼinna. Kʼoasʼin kisikjaʼaitsjen nga an tjínna jée nga tsín tinda tiyokaonijin xíngijin nga yaona sijtile”.
Tsa kʼoatisʼin nikjaʼaitsjain tsanda ji kuenta tʼiain nga tsín ji tjínli jée nga kʼoasʼín xʼinli. Santiago 1:14 itso: “Jngójngó titsʼeni kjoachi̱nga̱le xi chʼao síkao nga je. Je kjoachi̱nga̱le nchja̱ndʼéle yaole” (Rom. 14:12; Filip. 2:12). Alikui ji báneli jée Jeobá, tosaa chjí be nga kixi tiʼmitʼalai (2 Crón. 16:9).
Nga pornografía kotsenle je xʼinli alikui xi tsonile nga ji xi tsín nda tinʼiai. Koasenkaoli nga koa̱njinli nga tsín ji tjínli jée. Je chjota xi kui kotʼayason kʼoatso nga je xi pornografía kotsenle kui símekon jmeni xi tsín kʼoakoa̱nle kʼoasʼin jngo chjoón.
Ali tokuijin nikjáojin ʼndeʼndai. Je Catherine kʼoatso nga tokui kisikjaʼaitsjen ʼndeʼnde nga pornografía kotsenle je xʼinle. Ñaki tokui tsakʼéya jko̱. Je Frances itso: “Kʼianga tsín ʼbe jñani tíjna je xʼinna. Jenʼio sikjáojian bʼajnda nichxin”. Tjínkʼa tichjaa xi kʼoatso nga nʼio soa male kʼianga kajin je ndsʼee kao tichjaa xi tjíojinle nga pornografía kotsenle xʼinle. Kʼoa tjínkʼa xi kʼoatso nga kʼoasʼin síkjaʼaitsjen nga toje tjío, nga tsín ʼya xi majinle jotjío kon.
Kʼiatsa tosi tonda kui si̱kjaʼaitsjenjin kjoa jebi, ngisaa chʼao sʼe̱ tokuin. Tsa tosa kui kuenta sʼiain nga miyoli ma Jeobá tsjoánganʼioli nga nda sʼe̱ tokuin (Sal. 62:2; Efes. 6:10).
Tsakui kjoa tibitjatojin nʼio nda koasenkaoli tsa kʼoéxkiai je Biblia kʼoa tsa si̱kjaʼaitsjenjin jmeni xi tso. Nga̱ faʼaitʼa choa̱le je yánchjín xi nʼio tse kjoa jaʼatojin. Nda kisatio kon nga je Jeobá tsakʼéyanajmíle je kjoa xi tjíofaʼatojin. Ningalani tsín tsakjaʼáxinle je kjoa xi tjíojin tsakasenkao nga nda kisatio kon. Si̱kjaʼaitsjenla tʼatsʼe Ana nga nʼio ba kisʼe kon. Nda kisʼe kon nga je Jeobá tsakʼétsʼoale ninga tsín be josʼin kuichomani je kjoa xi tíjnajin (1 Sam. 1:10, 12, 18; 2 Cor. 1:3, 4).
Koaan kuinyakao xi chjotajchínga sʼin tjío je xʼin kao je chjoón
Tijélai nganʼio je xi chjotajchínga sʼin tjío, nga̱ yaa mangóson “jngo ʼnde jñani bijnaʼmalee je ntjao̱, jngo ʼnde jñani bijnangʼiánlee je jtsínʼio” (Is. 32:2). Tsakui nichxin kʼoakuitsoli nga jngo tichjaa kʼoéyanajmílai jme kjoa xi tibitjatojin (Prov. 17:17).
JÓSʼIN KUISENKOAI JE XʼINLI
Tsakui nichxin kʼoasʼin nikjaʼaitsjain tsa koa̱n kuisenkoai je xʼinli nga tsínti pornografía katakotsennile. Je Biblia kʼoatso nga Ecl. 4:9-12). Je chjota xi kui kotʼayason tʼatsʼe jebi kʼoatso nga nda koatiokao xínkjín xi jechixan kʼoa nga tsínti pornografía skótsennile tsa kuinyakaongañá xínkjín.
ngisa nda bʼendajiaan jngo kjoa kʼiatsa jao mañá (Je xi kʼoati kuenta sʼiain kui tsa ñaki kʼoatjín kon je xʼinli nga tsínti pornografía skótsennile. A ʼyaní nga síjéle nganʼio je Jeobá nga katabasenkao kʼoa a síjéle nganʼio je xi chjotajchínga sʼin tjío (2 Cor. 4:7; Sant. 5:14, 15). Jósʼin tíbakó je xʼinli nga ñaki kʼoatjín kon nga tsínti pornografía skótsennile. Tobʼelañá, a tsín tikui teléfono kʼoa tsa tableta nanda síchjénni, a tísíkuinda yaole nga tsín tikui kjoa ska̱jinni (Prov. 27:12). A me kjoaixile nga kuisenkoai kʼoa a tsoyali jotjín kon. Tsa jaon, koa̱njin kuisenkoai.
Kataʼyala josʼín Felicia, xi Ethan ʼmi xʼinle, kʼoa xi kʼia saʼnda nga ʼndí kji nga pornografía kotsenle. Je Felicia básjaile josʼin basenkao je xʼinle kʼianga kʼoasʼe kon nga pornografía skótsenle. Je Ethan itso: “Kʼoaxinle chjoónna josʼe tokoan, nʼio tjao bena kʼoa basenkaona. Kʼoati kjonangina jmeni xi tisʼian. Kʼoa síkuindana nga tsín toxkia sichjén Internet”. Je Felicia kʼoatso nga tsín nda sʼe kon nga pornografía símekon je xʼinle. Ninga kʼoalani, itso: “Kʼiatsa ba tjín tokoan kʼoa tsa jtina ʼbeña nga tsín koasenkao je xʼinna. Kʼianga jebʼéyanajmína xʼinna jotjín kon kʼoati fákaonajmína nga nda katasʼe tokoan”.
Nga kʼoasʼin fákaonajmí xínkjín, basenkao je xi xʼin nga tsínti pornografía kotsennile. Tonga kʼoati basenkao je chjoón nga sínʼiotʼa ijngokʼa je xʼinle. Kʼianga bʼéyanajmíle je chjoónle xi xʼin ma jotjín kon, jñani fi kʼoa jme xi sʼín kui xi basenkao je chjoón nga tsín chʼao sʼe kon.
Koaan kʼoasʼin kuisenkoai je xʼinli. Nʼio koasenkaono tsa chótʼayajion jme xi tso kjoaʼmiya jebi. Jmé xi tjínnele sʼin je xʼinli. Tjínnele nga tsínti pornografía skótsennile kʼoa tjínnele koako nga koa̱n si̱nʼiotʼa ijngokʼai. ʼNdele nga ji kʼoakʼuínlai tosa je katasíjinle yaole josʼe tokuin nga kʼoasʼín. Kʼoa ji jmé xi tjínnele sʼiain. Tisenkoai nga tsínti pornografía katakotsennile kʼoa tʼaiʼndelai nga katabakó nga koa̱n si̱nʼiotʼa ijngokʼai. Machjén nga kataʼyao nga jao ánni nga pornografía kotsennile chjota kʼoa jméni xi sʼin nga tsín tikui skótsennile. d
Tsa bele tokon nga to cho̱batio nga kui cho̱bayaño kjoa jebi, koaan kuinókjoalao jngo ndsʼee xi nʼiotʼao, xi chjotajchínga sʼin tíjna nga katanrʼoé nga cho̱bayaño kjoa jebi. Ningalani tsínti pornografía skótsennile je xʼinli tsakui nichxin ñʼai koa̱n choatseli nga si̱nʼiotʼa ijngokʼai. Kuenta tʼiain jñani nda sʼín je xʼinli. Tsa tsejta koa̱on chaan ndasʼin kuiyokao ijngokʼaño xíngio (TSA TOSI TONDA PORNOGRAFÍA SKÓTSENLE JE XʼINLI
Tsa pornografía tiskótsenngánile xʼinli alikui xi tsonile tsa tsínkʼia sikʼantjaiya yaole. Kʼiatsa kui nʼio jekitsjentʼale ñʼaijin koa̱nle nga sikʼéjna. Ningalani jenkjín nó nga tsínti pornografía kotsennile, tsakui nichxin toxijña kui skótsen ijngokʼale. Nga tsín kʼoakatama tjínnele nga nda sikuinda yaole. Tjínnele tosi tonda sikuinda yaole ninga jetsínti pornografía símekonni (Prov. 28:14; Mat. 5:29; 1 Cor. 10:12). Tjínnele sindaya kjoafaʼaitsjenle kʼoa nga koa̱njtike je xi chʼaotjín, jolani pornografía kʼoa nga tije sítjosjeyanile yaole chjota (Efes. 4:23; Sal. 97:10; Rom. 12:9). Tsa koaitjenngi kjoafaʼaitsjen jebi koasenkao nga tsínti pornografía skótsennile. e
Kui kuenta tʼiain josʼin tijnai ngixko̱n Jeobá
Tonga tsa tsín mele nga sikʼantjaiya yaole je xʼinli, sakʼoajin jti koa̱nli kʼoa likuijin nda sʼe̱ tokuin. Je Jeobá tʼeyanajmílai kʼoa jé koasenkaoli nga nda sʼe̱ tokuin (1 Ped. 5:7). Tosi tonda je Jeobá tichriantʼalai, tʼetsʼoalai, chótʼayai je Biblia kʼoa tikjaʼaitsjenjin jme xi tso. Tsa kʼoasʼiain, ngisaa koa̱nchriantʼalai je Jeobá. “Je Jeobá chrian tíjnale je xi nʼio aon tjío ni̱ma̱le” kʼoa kui xi mele nga tsjoa satío ijngokʼani kon (Sal. 34:18). Tosi tonda je Jeobá tixálai, tijélai kjoafaʼaitsjen xi chjotajchínga sʼin tjío kʼoa kui tikjaʼaitsjain nga chan sindaya yaole je xʼinli (Rom. 2:4; 2 Ped. 3:9).
a Ningalani je xi xʼin tínchja̱ni kjoaʼmiya jebi kʼoati bakinle je xi yánchjín.
b Tojosʼin bakóya Biblia, tsa pornografía kotsenle je xʼinle jngo chjoón, alikui koa̱n nga kui kʼoangini nga tsjión xínkjín (Mat. 19:9).
c Alikui tsa ñaki kʼoaʼmi.
d Yaa koa̱nsjaisali tʼatsʼe jebi ya jw.org kao ya xo̱n xi bʼasje naxinandále Niná. Tobʼelañá, ya jw.org faʼaitʼa je xi “La pornografía puede destruir su matrimonio” ʼmi; kʼoa ya revista La Atalaya xi tsʼe 1 de abril de 2014, página 10 saʼnda 12 faʼaitʼa xi “Usted puede vencer las tentaciones” ʼmi, kao je Xo̱n xi Bájinkonná xi tsʼe 1 sá agosto nó 2013, página 3 saʼnda 7 jñani tso: “Je pornografía, a síkiʼaonná axo tsín josíkaoná”.
e Nga nʼio tsjentʼale chjota je pornografía, tjínkʼa xi jechixan xi je sijéle kjoafaʼaitsjen xi chjotajchínga sʼin tjío kʼoa kʼoati fikonle chjinexki nga kuinyakao.