1. Tojo tso Hebreos 12:1, jméni xi sʼiaan nga kuichotjenngiaa kjoabijnachon xi tsínkʼia fetʼa.

 JE Biblia kʼoatso nga jngoyale titokanachaa xi chjotale Cristo maa. Kuinga kʼoatinʼiañá nga mená kuichotjenngiaa je kjoabijnachon xi tsínkʼia fetʼa (2 Tim. 4:7, 8). Tjínnele nga nʼio kʼoénelee yaoná nga̱ jeme bichotjenngiaa. Je pastro Pablo kichotjenngi je kjoanda xi kiskoyale kʼoa kʼoakitso jmeni xi sʼiaan nga kuichotjenngiaa kjoanda jebi. I kitso: “Si̱kʼéjna tʼaxián ngayije xi ai […]. Tókalandaa kao kjoatsejta je kjoatokanacha xi tíjna ngixkoaan” (tʼexkiai Hebreos 12:1). b

2. Jmé xi kinchja̱ni Pablo nga i̱ kitso: “Si̱kʼéjna tʼaxián ngayije xi ai”.

² Kʼianga kʼoakitso Pablo nga tjínnele “si̱kʼéjna tʼaxián ngayije xi ai”, kui kinchja̱ni nga tsínkui nʼio kuenta sʼiaan jmeni xi tsín tjínle kjoandosin. Tsa kuilani kuenta sʼiaan, alikuijin kuitjosonná je xá xi kjinená. Kuinga machjénni nga tokjoan chja̱ʼaxinlee yaoná tsa jmeni xi bʼetʼaná ánni nga tosi tonda kuitjosonniná je xále Niná. Tonga kʼoati machjén nga tosi tonda kui kʼoasʼiaan jmeni xi koasenkaoná ánni nga kuichotjenngisíñá kjoabijnachon xi tsínkʼia fetʼa (2 Tim. 2:5). Kataʼyala jméni xi tjínnele sʼiaan.

3. 1) Tojo tso Gálatas 6:5, jmé xi kjinená nga jngó jngoá xi chjotale Cristo maa. 2) Jmé xi chótʼayajiaan i̱ kjoaʼmiya jebi, kʼoa ánni.

³ (Tʼexkiai Gálatas 6:5). c I̱ texto jebi je pastro Pablo kui kisikʼaxki̱ je xá xi kjinená nga jngó jngoá xi chjotale Cristo maa. Kʼoakitso nga totsen tsen si̱tjosoán nga jngó jngoá je xále Niná. I̱ kjoaʼmiya jebi kui chótʼayajiaan  jméni xi tjínnele sʼiaan kʼoa jméni xi koasenkaoná nga kuitjosonná je xá xi kjinená nga jngó jngoá. Kʼoati jchaa jméni xi bʼetʼaná nga tsín bitjosonná je xá xi kjinená, kʼoa jméni xi sʼiaan nga chja̱ʼaxinlee yaoná jebi. Kuinga machjénni nga tokuikjoán kʼoasʼiaan jmeni xi koasenkaoná nga tjoéná kjoabijnachon xi tsínkʼia fetʼa.

4. Ánni nga tsín ñʼai tjínni nga bʼaitʼalee yaoná Niná (kʼoati chótsenlai sén xi faʼaitʼa).

⁴ Kʼianga tsakʼaitʼalee yaoná Jeobá, kʼoatsakʼinlee nga toje jchaxkoán kʼoa nga si̱tjosoán jmeni xi mele. Kʼoa jebi alikui ñʼai tíjna, kuinga machjénni nga si̱tjosoán jmeni xi tsakʼinlee, nga̱ kʼoasʼin kisindaná Jeobá nga koa̱nná kʼoasʼiaan jmeni xi mele (Apoc. 4:11). Toxá kʼoasʼin kisindaniná nga mená jcha xi tʼatsʼe, nga jchaxkoán kʼoa kʼoasʼin kisindaná jokjoan je, kuinga koa̱n si̱chriantʼanilee kʼoa kʼoasʼiaan josʼin mele (Sal. 40:8). Kʼoati nda satío tokoán nga nitjosonlee Jeobá kʼoa nga chjenngilee je Jesús (Mat. 11:28-30).

5. Jmé xi koasenkaoná nga kuitjosonná jme xi tsakʼinlee Niná nga tsakʼaitʼalee yaoná (1 Juan 5:3).

 ⁵ Jmé xi koasenkaoná nga kuitjosonná jme xi tsakʼinlee Niná nga tsakʼaitʼalee yaoná. Xi títjon, tosi tonda tsjoacha katamaa Jeobá. Ngisaa tsjoacha koaan tsa si̱kjaʼaitsjenjiaan josʼin tíbasenkaoná kʼoa jokji kjoanda tsjoáná nichxin xi sʼa nroa. Nga ngisa tsjoacha koaan Niná ngisaa choa ñʼai koa̱nná nga si̱tjosonlee, kʼoa sʼe̱jngo tokoán nga tsín nʼio ñʼai tíjna nga kuitjosonná kjoatéxomale (tʼexkiai 1 Juan 5:3). d Xi majaoni, chjénngilee Jesús. Kitjosonle Jesús jmeni xi mele Niná nga̱ kjitʼaa tsakʼétsʼoale nga kisijéle nganʼio, kʼoa kui kuenta kisʼin je kjoanda xi kisʼejnabasenle (Heb. 5:7; 12:2, TNM). Tojo kisʼin je Jesús, ñá kʼoati koa̱n si̱jélee nganʼio je Jeobá kʼoa kui si̱kjaʼaitsjenjiaan nga koa̱n kuiyoaa ngantsjai nichxin. Tsa tosi tonda tsjoacha koaan je Jeobá kʼoa chjénngilee je Jesús, kuitjosonná jmeni xi tsakʼinlee Jeobá kʼianga tsakʼaitʼalee yaoná.

6. Ánni machjénni nga si̱tjosoán je xá xi kjinená ya yaniʼya (kʼoati chótsenlai sén xi faʼaitʼa).

⁶ Xá xi kjinená ya yaniʼya. Kʼianga tjoéná kjoabijnachon xi tsínkʼia fetʼa, machjén nga ngisa tsjoacha koaan je Jeobá kao Jesús tikʼoajinni je xíngiaa (Mat. 10:37). Tonga alikui kui xi tsonile nga kuinjíotokoán je xi tjío ya yaniʼyaná. Kʼiatsa mená nga tsjoa sa̱tío kon je Jeobá kao Jesús tjínnele nga si̱tjosoán je xá xi kjinená ya yaniʼyaná (1 Tim. 5:4, 8). Tsa kʼoasʼiaan, ngisaa tsjoa sa̱tío tokoán, nga̱ je Jeobá be nga nda koatiokao xínkjín je chjoón kao je xʼin tsa tsjoake kʼoa tsa koakole kjoaxkóntokon xínkjín, tsa tjao skoe̱ kʼoa tsa koakoyale je ʼndíxtile kʼoa tsa je xi ʼndíxti sitjosonle je xijchále (Efes. 5:33; 6:1, 4).

7. Jmé xi koasenkaoná nga kuitjosonná je xá xi kjinená ya yaniʼya.

⁷ Jmé xi koasenkaoná nga kuitjosonná xá jebi. Nga kuitjosonná tojme xá xi kjinená ya yaniʼya, machjén nga kjuintjenngiaa je kjoafaʼaitsjen xi tsjoáná Biblia. Alikui koa̱n nga totsaan kjoafaʼaitsjen si̱chjén, tsín koa̱n nga tokui kjuinñá josʼin koanjchíngaa kʼoa tsakuije̱ jotso chjota (Prov. 24:3, 4). Si̱chjén je xo̱n xi bʼasje naxinandále Niná nga̱ yaa faʼaitʼa josʼin si̱chjén je kjoafaʼaitsjen xi tsjoáná Biblia. Tobʼelañá, ya jñani “Ayuda para las familias” tso, faʼaitʼa jmeni xi koasenkao xi xijchá ma, xi jechixan kao je ʼndíxti nga skoe̱ jmeni xi sʼin kʼianga kjoa kjoaʼatojin. e Ninga tojngo mañá xi kʼoasʼiaan ya yaniʼya, si̱tjosoán jmeni xi tso je Biblia. Tsa kʼoasʼiaan, nda kuiyoaa ya yaniʼya kʼoa sichikontʼainná je Jeobá (1 Ped. 3:1, 2).

8. Jósʼin bʼetʼaná jmeni xi chjoéjiaan.

⁸ Jósʼin bichómani jmeni xi nʼia. Kui kjoanda kitsjoaná Jeobá nga ñá chjoéjiaan jmeni xi mená sʼiaan kʼoa kui xi mele nga kui xi ndatjín chjoéjiaan. Tonga alikui je bʼasjentjainá josʼin bichómani tsakui chjoéjiaan xi tsín ndatjín (Gál. 6:7, 8). Kʼiatsa kui chjoéjiaan xi tsín ndatjín, tsa tsín si̱kjaʼaitsjeen josʼin kuinókjoaa kʼoa tsakui kʼoasʼiaan xi tsín kixi tíjna, machjén  nga kʼoakuixoán nga ñá kasʼená jée. Sakʼoajin tokui si̱kjaʼaitsjeen kʼoa alikuijin tinda sʼe̱ni tokoán. Kʼianga ñá chjoejiaan jmeni xi nʼia, kʼoabixoán nga ñá kasʼená jée tsa tsín nda bichómani jmeni xi nʼia, nga si̱ndayaa yaoná kʼoa nga tsín tikʼoasʼianñá. Tsa kʼoasʼiaan, tosi tonda ya kjuinyaa je ndiaa xi kuichokaoná nga sʼe̱ná je kjoabijnachon xi tsínkʼia fetʼa.

9. Jmé xi koasenkaoná tsakui kʼoakanʼia xi tsín ndatjín (kʼoati chótsenlai sén xi faʼaitʼa).

⁹ Xi koasenkaoná nga si̱ndayaa yaoná. Tsakui kʼoakanʼia xi tsín ndatjín alikui koa̱n nga tokui si̱kjaʼaitsjenjin ʼndeʼndee. Alikui koa̱n nga kjaʼaí xi kjoáne kʼoa tsa yaoná kuisenngiaa. Tosa kʼoakuixoán nga ñá kasʼená jée kʼoa kʼoéndajiaan jmeni xi kanʼia. Tsa tsín tinda tjínni tokoán, ntsjaintsjai kʼoétsʼoalee Jeobá, kʼoéyanajmílee jmeni xi kanʼia kʼoa kʼoakʼuínlee nga katasíchatʼaná (Sal. 25:11; 51:3, 4). Si̱jélee kjoanichatʼa tsa ʼyani xi jokinikoaa kʼoa tsa jmeni xi tsakʼinlee, kʼoa tsa machjén si̱jélee nganʼio xi chjotajchínga sʼin tjío (Sant. 5:14, 15). Si̱ndayaa yaoná kʼoa tsín tikui kʼoasʼianñá xi chʼaotjín. Ñaki kʼoakʼoé tokoán nga je Jeobá koasenkaoná kʼoa nga sichatʼaná (Sal. 103:8-13).

10. Jósʼin kuichomani tsakui si̱kjaʼaitsjen ʼndeʼndee jmeni xi tsín kʼoakoa̱nná kʼoasʼiaan (Gálatas 6:4).

¹⁰ Jmeni xi tsín kʼoakoa̱nná kʼoasʼiaan. Alikui nda satío tokoán kʼianga ya ningósonkoaa yaoná xi ngikʼa (tʼexkiai Gálatas 6:4). f Tsa kʼoasʼiaan, yajin kjuinroani nga koa̱nxinkonchá xíngiaa kʼoa tsʼatojin kʼoakji koa̱nmená kʼoasʼiaan josʼín xi ngikʼa (Gál. 5:26). Tsa kʼoati kji koa̱nmená si̱xá jokji síxá xi ngikʼa, tsʼatonejin kʼoakji kʼoénelee yaoná jokji tjen kʼoakoa̱nná. Je Biblia itso: “Je xi tsín ndi̱to̱n bitjoson tsjoáchʼinle ni̱ma̱ná” (Prov. 13:12). Tsa tsjoáchʼinle ni̱ma̱ná jmeni xi tsín ndi̱to̱n bitjoson, ngisajin koa̱n tsakui chóyalee jmeni xi tsínkʼia kuichotjenngiaa. Jebi sikinroajenjin tokoán kʼoa kuijin xosikaoná nga tsín tinda si̱xánilee Niná (Prov. 24:10).

11. Jmé xi koasenkaoná nga tsínkui si̱kjaʼaitsjenjiaan xi tsínni kuitjosonná.

¹¹ Jmé xi koasenkaoná nga tsínkui si̱kjaʼaitsjenjiaan xi tsínni kuitjosonná. Alikui koa̱n nga tsʼato kʼoakji kʼoénelee yaoná jokji tjen kʼoakoa̱nná, nga̱ je Jeobá alikui kui sijéná xi tsín kʼoakoa̱nná kʼoasʼiaan (2 Cor. 8:12). Kʼoa alikui síngósonkao jmeni xi nʼia kao jmeni xi sʼín xi ngikʼa (Mat. 25:20-23). Nʼio chjí be jmeni xi nʼia nga jngó jngoá, josʼin nixálee, nga kixi mangíntʼalee kʼoa nga chókjoajinná je kjoa xi bitjatojiaan. Kʼiatsa nangitokon maa, koa̱njinná nga tsín toñá kʼoakoa̱nyejená je xá xi kjinená kʼiatsa chʼin tíbʼetʼaná, tsa jekjimajchíngaa kʼoa tsa jmesani xi tíbʼetʼaná. Kʼoasʼiaan jokisʼin Barzilái, alikui chjoé je xá xi sʼe̱nená tsa bele tokoán nga tsín kuitjosonná (2 Sam. 19:35, 36). Kʼoati koa̱n chjénngilee jokisʼin je Moisés, kʼoaiʼndelee tsa ʼya xi koasenkaoná kʼoa kʼoaixálee xi ngikʼa (Éx. 18:21, 22). Tsa nangitokon maa koasenkaoná nga tsín toñá kjoáne xá yaoná kʼoa tosi tonda kao kjoatsjoa si̱xálee Jeobá.

12. A ñá tjínná jée tsa tsín nda sʼin xi ngikʼa.

¹² Kʼianga ñá fané jée yaoná nga tsín nda sʼín xi ngikʼa. Alikui koa̱n nga ñá kʼoakʼuínlee jmeni xi sʼin xi ngikʼa kʼoa  alikui tongantsjai kʼoakoa̱nná nga ñá kuinyakoaa tsa jñani tsín nda sʼin. Tobʼelañá, nʼio aon satío kon xi xijchá ma kʼiatsa tsín tije Jeobá sixánile je tile kʼoa tsa tsotile. Tijé síkiʼaonni yaole xi xijchá ma tsa toje koane jée yaole jmeni xi sʼín je xtile, tonga je Jeobá alikui mele nga nʼio sikjáojin xi xijchá ma (Rom. 14:12).

13. Jósʼin je xi xijchá ma tsakui kʼoasʼin xi tsín ndatjín je xtile.

¹³ Jósʼin je xi xijchá ma tsakui kʼoasʼin xi tsín ndatjín je tile. Je Jeobá kitsjoaná kjoandái nga koa̱n chjoéjiaan jmeni xi sʼiaan nga jngó jngoá, tsa je si̱xálee kʼoa tsa mai. Kui xi mele nga nda kjoénlee ndiaa je ʼndíxtiná ningalani chjotajée maa. Alikui ñá tjínná jée kʼiatsa tsín tije Jeobá sixánile je xtiná, nga̱ jé tjínnele skoéjin jmeni xi sʼin (Prov. 20:11). Tonga tsakui nichxin nʼio si̱kjáojiaan kʼoa kʼoasʼin si̱kjaʼaitsjeen nga tsín nda tsakichakjáyalee. Kʼiatsa kʼoakjimaa, kʼoéyanajmílee Jeobá jotjín tokoán kʼoa kʼoakʼuínlee nga katasíchatʼaná, nga̱ majinle nga tsín tikoa̱n josʼianñá. Kʼoa je Jeobá alikui kui síjéle xi xijchá ma nga je kuinyakao ʼndíxtile tsa tsín nda kuichomani jmeni xi sʼin. Tonga tsa kʼoakoa̱nnile, je Jeobá tíjnandaa nga sichatʼale (Luc. 15:18-20).

14. Ánni nga tsín koa̱n nga to jée kjoáne ʼndeʼndeñá yaoná.

¹⁴ Nga to jée fane ʼndeʼndee yaoná. Kʼianga jée kajiaan alikui nda satío tokoán. Tonga je Jeobá alikui mele nga tokui si̱kjaʼaitsjen ʼndeʼndee jmeni xi kanʼia. Jósʼin jchañá tsa tokui tinikjaʼaitsjen ʼndeʼndee. Tsa kʼoakjimaniná jme xi kinʼia, tsa jetsakʼeyanajmílee xi chjotajchínga sʼin tjío kʼoa tsa tsín tikʼoatinʼiañá, ñaki kʼoakʼoé tokoán nga jekisichatʼaná Jeobá (Hech. 3:19). Nga jekʼoakanʼia jebi, je Jeobá kui xi mele nga tsín tijée kjoáneñá yaoná, nga̱ be nga sikiʼaonná tsa tosi tonda kui kʼoéjinkoaan (Sal. 31:10). Tsa toba sʼe̱ntsjainá, kjuinroajenjin tokoán kʼoa tsínjin tije Jeobá si̱xánilee (2 Cor. 2:7).

15. Jmé xi koasenkaoná nga tsín to jée kjoáne ʼndeʼndee yaoná (1 Juan 3:19, 20; kʼoati chótsenlai sén xi faʼaitʼa).

 ¹⁵ Jmé xi koasenkaoná nga tsín to jée kjoáne ʼndeʼndee yaoná. Kʼiatsa to jée fane ʼndeʼndee yaoná si̱kjaʼaitsjenjiaan josʼin tíjna nga síchatʼaná je Niná (Sal. 130:4). Kʼianga ñaki ni̱ma̱ná nroajinni nga kʼoamaniná je jéená, je Jeobá sítjoson nga i̱ tso: “Alikui tikui kjoaʼaítsjennina je jéele” (Jer. 31:34). Jebi kui xi tsonile nga tsín tikui síkjaʼaitsjenni Jeobá jmeni xi kinʼia kʼianga jesíchatʼaná. Ningalani kjoa bichómani nga tsín nda nʼia, tonga alikui xi tsonile nga tsín síchatʼaná je Jeobá. Alikui chʼao kʼoé tokoán kʼiatsa tsín jme xá sʼe̱nená ya jinjtín. Je Jeobá jekisichatʼaná je jée xi tsakijnyaa kʼoa machjén nga kʼoakʼoé tokoán tsanda ñá (tʼexkiai 1 Juan 3:19, 20). g

16. Tojo sʼín je chjota xi toka, jméni xi kuenta sʼiaan.

¹⁶ Machjén nga kjuintjenngiaa kjoafaʼaitsjen jebi kʼianga so̱koná kjoabijnachon: “Tókao, jméni nga kʼoasʼin chjoésínio kjoatjao” (1 Cor. 9:24). Si̱kjaʼaitsjenjiaan jmeni xi koasenkaoná kʼoa jmeni xi mai nga tinixálee Niná. I̱ kjoaʼmiya jebi, kaʼyaa kʼa choa̱ xi koasenkaoná nga tosi tonda je Jeobá si̱xálee, kʼoa kʼoati kaʼyaa jmeni xi tsín basenkaoná. Je Jesús i kitso: “Tikuindao yaono nga tsín tsa kui ai ska̱le ni̱ma̱no kao kjoachi̱nga̱ kao kjoachʼi̱, kʼoa kao ngayije kjoa xi ai xi tsʼe i̱ sonʼndebi” (Luc. 21:34). Jmeni xi tso texto jebi kao xi kjaʼaínile koasenkaoná nga jchaa jmeni xi tinʼia kʼoa nga si̱ndayaa yaoná nga kuichotjenngiaa je kjoabijnachon xi tsínkʼia fetʼa.

17. Ánni tjínjngoni tokoán nga kuichotjenngiaa je kjoabijnachon xi tsínkʼia fetʼa.

¹⁷ Nga je Jeobá koasenkaoná ñaki tjínjngoo tokoán nga kuichotjenngiaa kjoabijnachon xi tsínkʼia fetʼa (Is. 40:29-31). Kuinga machjénni nga tosi tonda je Jeobá si̱xálee. Kʼoasʼiaan jokisʼin je pastro Pablo nga tsakʼénele yaole josaʼnda nga kitjoéle je kjoanda xi kiskoyale (Filip. 3:13, 14). Ñá xi tjínnele kʼoénelee yaoná kʼoa je Jeobá koasenkaoná nga kuichotjenngiaa je kjoabijnachon xi tsínkʼia fetʼa. Koasenkaoná nga kuitjosonná je xá xi kjinená kʼoa nga chja̱ʼaxinlee yaoná jmeni xi síkiʼaonná (Sal. 68:19). Nga je Jeobá koasenkaoná, chókjoajinná je kjoa xi kuitjátojiaan kʼoa sʼeená je kjoabijnachon xi tsínkʼia fetʼa.