Tjínkʼa xi kjonangi
Tojosʼin faʼaitʼa je Xo̱n xi Bájinkonná xi tsʼe sá junio nó 2020 jñani tso: “Kataʼyaxkón jaʼaínli”, jméni xi sʼa koanjin chjotsená tʼatsʼe jaʼaínle Jeobá kʼoa nga toje xi tiʼndele batéxoma.
Ya kjoaʼmiya jebi koanjinná jme kjoa xi bʼetʼale ngatsʼi chjota kao ánkje. Nga nʼio tjínle kjoandosin nga kuitjotsje je jaʼaínle Jeobá. Nga kataʼyale nga toje Jeobá xi nda batéxoma kʼoati ya tíjnajin nga tjínnele kuitjotsje jaʼaínle. Tsa kixi koanngíntʼalee kʼoa tsa mai kʼoati nʼio tjínle kjoandosin.
Ánni nga nʼio tjínnile kjoandosin nga kuitjotsje je jaʼaínle Jeobá. Janla koya kataʼyaa anni.
Je Na̱i chʼaosʼin kisikʼaxki̱ je jaʼaínle Niná ya ʼndenaxóle Edén kʼoa tojo kʼoatísʼín saʼnda ndʼaibi
Xi títjon, ya ʼndenaxóle Edén, je Na̱i chʼaosʼin kisikʼaxki̱ je jaʼaínle Jeobá. Jmeni xi kitsole Eva kuikjoánni xi kitso nga tsín nda chjota je Niná kʼoa nga tsakʼéchjoale je xi ndatjín. Nga kʼoakitso je Na̱i énndiso tsakáne je Niná. Chʼaosʼin kisikʼaxki̱ jaʼaínle, nga̱ kuikjoánni xi kitso nga tsakʼéndiso je Jeobá. Kuinga “Na̱i” ʼminile nga “énndiso báne” je Niná (Juan 8:44). Je Eva koankjainle jme xi kitsole je Na̱i, tsín tikisitjosonnile Niná kʼoa kʼoasʼin tsakakóni nga tsín timenile nga Niná koatexomale (Gén. 3:1-6). Nichxin xi tiyoaa ndʼaibi, je Na̱i tojo chʼaosʼin tísíkʼaxki̱ jaʼaínle Jeobá. Je xi makjainle énndiso jebi alikui bʼaʼénle jmeni xi tso Jeobá. Ñá xi choʼndale Jeobá maa tokʼoamaná nga kʼoasʼin énndiso sʼene je jaʼaínle Niná. Kʼoa yaa nroani nga kjoatsʼen kʼoa nga kjoañʼai tjín.
Xi majaoni, nga nda koatio je chjota kao ánkje, je Jeobá kʼoatso nga kʼoasjetsje je jaʼaínle. Nʼio chjí be je jaʼaínle. Itso: “Kʼoasjetsjeña je jaʼaínna” (Ezeq. 36:23). Kʼianga kʼoakitso je Jesús josʼin tjínnele kʼoétsʼoaa, i kitso: “Tsje katasʼejna jaʼaínli”. Kui kisikʼaxki̱ nga nʼio chjíle nga kui si̱jélee Niná nga katabitjotsje jaʼaínle (Mat. 6:9, TNM). Je Biblia nkjín kʼa síkʼaxki̱ jokji chjíle nga katabitjongʼa je jaʼaínle Jeobá. Itso: “Chʼa̱sjejeyao je jaʼaínle Jeobá” (1 Crón. 16:29; Sal. 96:8). “Tijndao nga chʼa̱sjengʼao je jaʼaínle” (Sal. 66:2). “Kʼoasjejeyaña jaʼaínli ngantsjai nichxin” (Sal. 86:12). Ñandia nga jesoa Jeobá kinchja̱ni ya tjen ngʼajmi, kʼianga i̱ kitsole Jesús nga tíjna ya yo̱ngo̱ xi tíjna Jerusalén: “Chʼa̱sjejeyai jaʼaínli”. Je Jeobá i kitso: “Jetsʼasjejeya jaʼaínna, kʼoa kʼoasʼin kʼoasjejeyangánia” (Juan 12:28). a
Xi majanni, je xi mele Jeobá kuinga katabitjongʼa jaʼaínle ngantsjai nichxin. Si̱kjaʼaitsjenla josʼin kuitjotsje je jaʼaínle Jeobá kʼianga jekjoaʼato xi jngo jmi nó koatexoma Jesús, kʼianga jechótʼayakao xi tofetʼani je chjota. Jósa̱tío kon je ánkje kao chjota xi tʼatsʼe josʼin kuitjotsje jaʼaínle Jeobá. Kʼianga koa̱njinná xi tʼatsʼe jebi, kuila kataʼyaa nga jao koya xi nʼio tjínle kjoandosin. Nga bakoá tsa kixi mangíntʼalee Niná kʼoa nga toje Jeobá xi tiʼndele batéxoma. Alikui tikʼia chótʼayakaoni chjota tsa kixi fitʼale Niná nga̱ jechjotatsje koa̱n, jekichotʼayakao xi tofetʼani kʼoa koaan koatio ngantsjai nichxin. Nga jejchale nga toje Jeobá xi ndasʼin batéxoma alikui ʼya xi tijao satíoni kon tsa je xi tiʼndele nga koatexoma. Ngatsʼi ánkje kao chjota tojé Jeobá skoe̱xkón nga̱ tojé xi bakinle batéxoma. Tonga, a tojo kuitjotsje je jaʼaínle Jeobá.
Nga kui nichxin, jekitjotsje je jaʼaínle Jeobá kʼoa aliʼya xi tichʼaosʼin sikʼaxki̱ni. Ngatsʼi xi tjío ya ngʼajmi kao xi i̱ Sonʼnde koatio tojo nʼio chjí skoe̱kon je jaʼaínle Jeobá. Nʼio tse jmeni xi sʼin Jeobá. Tobʼelañá, nga nangitokon je Jesús, tsjoánile Nʼaile je kjoatéxoma “jméni nga Niná koa̱nyijesíni tʼatsʼe ngatsʼi” (1 Cor. 15:28). Nga jekoa̱n, je xi i̱ Sonʼnde koatio “kʼoéyondaí kao kjoajeya xi tsʼe ʼndíle Niná” (Rom. 8:21). Je Jeobá sitjoson jme xi tjínndajinle, nga tojngo familia koa̱nni je xtile xi tjío ya ngʼajmi kao xi tjío i̱ Sonʼnde (Efes. 1:10).
Ngatsʼi xtile Jeobá xi tjío ya ngʼajmi kao i̱ Sonʼnde tosi tonda kʼoasjengʼa je jaʼaínle. Jé Niná xi kʼoasʼin koanmele nga i̱ tso xi kiski je David: “Katabitjongʼa je Jeobá Niná […]. Katabitjongʼa je jaʼaínle ngantsjai nichxin” (Sal. 72:18, 19). Kʼianga jekuiyoaa ngantsjai nichxin, nʼio tse jmeni xi kʼia koa̱njinná xi chʼa̱sjengʼañá je jaʼaínle Jeobá.
Je jaʼaínle Jeobá kui tsoya jokjoan. Kʼianga jaʼaínle nikjaʼaitsjeen, majinná nga nʼio tsjoakená (1 Juan 4:8). Kui si̱kjaʼaitsjeen ngantsjai nga kui xá kisindaniná Jeobá nga tsjoakená, nga kisikasén ʼNdíle nga tsakʼéchjíntjainá kʼoa nga toje xi ndasʼin batéxoma. Kʼoa jchañá josʼin koakoná Jeobá nga tsjoake koa̱nná ngantsjai nichxin. Kʼianga jekuiyoaa ngantsjai nichxin, ngisaa koa̱nchriantʼalee kʼoa kuijndálee nga chʼa̱sjengʼaa je jaʼaínle (Sal. 73:28).
