1. Jónʼia nga nitjosonlee je chjotaxá sonʼnde kao Niná.

JE Biblia kʼoatso nga tjínnele si̱tjosonlee je chjotaxá sonʼnde. Tonga kʼoati tso nga tjínnele si̱tjosonlee ngantsjai je Niná (Hechos 5:29; Tito 3:1). Jósʼin kuitjosonniná nga jao koya jebi. Je Jesús jngo kjoafaʼaitsjen kitsjoa xi koasenkaoná. Kitso: “Tʼailao tsokʼoa César je xi tsʼe César, kʼoa tʼailao Niná je xi tsʼe Niná” (Mateo 22:21). ^[1] Jósʼin bʼainilee jmeni xi tsʼe César. Kʼiaa nga nitjosoán kjoatéxomale chjotaxá, kʼianga bakolee kjoaxkóntokon je xi xá tjínle kʼoa kʼianga bʼechjiá jmeni xi machjíntjai (Romanos 13:7). Tonga jósʼiaan tsa kʼoakuitsoná je chjotaxá nga kui kʼoasʼiaan jmeni xi tsín sasénle Niná. Alikui ni̱tjosonlee. Tonga bakolee kjoaxkóntokon ngantsjai.

2. Jósʼin bakoñá nga tsín kjoa polítika nojiaan yaoná.

² Jngo koya josʼin koa̱n kʼoailee “Niná je xi tsʼe Niná” kʼianí nga tsín kjoa polítika kuinójiaan yaoná. Kui xi tsonile nga tsín ʼya xi kʼoainganʼiolee (Isaías 2:4). Alikui chjotaxá biyochjoalee nga̱ ʼyañá nga je Jeobá títsjoáʼndele nga tjío.  Kʼoati tsín ya nojiaan yaoná jmeni xi sʼín je chjota kʼianga bʼasjengʼa naxinandále (Romanos 13:1, 2). Alikʼia nga jme xi nʼia tojoni nga katabʼantjaiya je chjotaxá kʼoa nijngojin partido bʼainganʼiolee. Kʼoati likui nʼia botar kʼoa alijme xá xi kjoa polítika tjenkao chjoé.

3. Ánni nga tsín kjoa polítika kuinójinsíñá yaoná.

³ Ánni nga kʼoatsosíniná je Niná nga tsín kjoa polítika kuinójiaan yaoná. Nkjín koya tjínni. Xi títjon, kuinga choa̱le Jesús mangíntjenngiaa. Je Jesús i kitso: “Li tsʼe sonʼndejian”. Kuinga tsínkʼia kjoa polítika kitsjonjinni yaole kʼoa tsín kjoajchán kijinni (Juan 6:15; 17:16). Xi majaoni, kuinga je bʼainganʼiolee Chjotaxále Niná. Kʼiatsa jngolani chjotaxá sonʼnde kʼoainganʼiolee, jósʼin kʼoakʼuínnilee je chjota nga toje Chjotaxále Niná xi koa̱n kʼoendajin ngayeje kjoa xi tjínná. Xi majanni, kuinga jtín sʼin tiyoaa kao ngatsʼi ndsʼee xi tjío jngo tjíjtsa Sonʼnde. Je relijión ndiso síxkoa̱ya chjota nga kjoa polítika fayojin (1 Pedro 2:17).

4. 1) Jósʼin ʼyañá nga ngisa ñʼai koa̱nná nichxin xi nroa nga tsín kjoa polítika kuinójiaan yaoná. 2) Ánni nga tjínnesínile tongini kuiyondaa.

⁴ Tsakui nichxin ya tinijchá yaoná jñani tsín kjoanʼio bʼénená je chjota nga kjoa polítika kuinójiaan yaoná. Tonga nga jekjimachrianle nga kjoetʼa jme xi chonle sonʼnde je Na̱i ngisa ñʼai koa̱nná nga tsín ya kuinójiaan yaoná. Tojo tso 2 Timoteo 3:3, 4, je chjota xi tjín ndʼaibi toxkia sʼínni kʼoa alikui mangóson je énle. Kʼoa ngisasa xkoa̱ya sʼin koatio. Kʼoa toʼima bʼantjaiyaje̱ josʼín je chjotaxá. Jekʼoakjima jña xin naxinandá kʼoa je ndsʼee nʼio tse kjoa tjíofaʼatojin. Kuinga machjénsíni nga tjen kuiyondaa ndʼaibi ánni nga tsín kjoa polítika kuinójinsíñá yaoná ninga ñʼai kjoa kuitjátojiaan. Ñola koya kataʼyaa josʼin tjen kuiyondaa.

5. Jósʼin síkjaʼaitsjen Jeobá tʼatsʼe chjotaxá sonʼnde.

⁵ Jngo koya josʼin tjen kuiyondaa ndʼaibi nga tsín kjoa polítika kuinójiaan yaoná kuinga kʼoasʼin si̱kjaʼaitsjeen tʼatsʼe chjotaxá sonʼnde josʼin síkjaʼaitsjen Jeobá. Je Jeobá alikui kʼoasʼin kisinda je chjotasonʼnde nga xínkjín koatexomale (Jeremías 10:23). Xi kao Jeobá, ngatsʼi je chjota tongósonní. Tonga je chjotaxá sonʼnde síxkoa̱ya chjota kʼianga kʼoatso nga ngisa ngʼa tíjna je naxinandále. Kʼoa ninga tjín chjotaxá xi mele nga nda sʼín, alikui kʼoamale nga faʼáxin ngayeje kjoa xi tjínná. Je chjotaxá kontra tjíole je Chjotaxále Niná xi kʼia tsakʼétsʼiakaoni nga tsakatéxoma nga nó 1914. Je Chjotaxále Niná jeme kjoaʼaxin ngatsʼi chjotaxá sonʼnde (tʼexkiai Salmo 2:2, 9). *

6. Jósʼin tjínnele jchatokoán je xi xá tjínle.

 ⁶ Je Niná kuinga títsjoáʼndeni nga tjín chjotaxá sonʼnde nga katasʼe kjoatéxoma kʼoa nga katasʼe kjoanyʼán. Kʼoa jebi binyakaoná nga ʼmiyasoán Énle Niná (Romanos 13:3, 4). Je Jeobá kʼoatsoná nga kʼoétsʼoantjé je chjotaxá ánni nga tosi tonda tjóʼndesíniná nga jchaxkoán je Jeobá (1 Timoteo 2:1, 2). Kʼianga ʼya xi josíkaoná koaan si̱jélee nganʼio je chjotaxá tojo kisʼin je pastro Pablo (Hechos 25:11). Kʼoa ninga kʼoatso je Biblia nga je Na̱i kjinentsja je chjotaxá sonʼnde, alikui kʼoatso tsa je fajin jmeni xi sʼín nga jngó jngó chjota xi ya síxákao chjotaxá (Lucas 4:5, 6). Kuinga tsín koa̱n kʼoakuixónsíñá nga je Na̱i tífajin jme xi tísʼín jngo chjota xi xá tjínle. Je Biblia kʼoatso nga tsín koa̱n chʼaosʼin si̱kʼaxkiaa je xi xá tjínle (Tito 3:1, 2).

7. Jméni xi tsín koa̱n sʼiaan.

⁷ Mená si̱tjosonlee Niná kʼoa kuinga tsín kjoa polítika nojinsíñá yaoná kʼoa tsín jngo partido mangíntʼanilee. Sakʼoaa ñʼai maná nga kʼoanʼia kʼoa ngisaa tsa koasenkaoná jmeni xi kuitso nga sʼin. Tobʼelañá, tsa je chjotaxá xi tíjna jñani tsaan tse kjoa tíbajngi kʼoa je chjota likui tisa̱sénnile kʼoa kontra koatiole. Kʼoa tsakui nichxin saʼnda tjín xi kisikao je testigole Jeobá chjotaxá jebi. Jósʼiaan. Likuijin ya kʼoainganʼiolee chjota xi kontra tjíobatio. Tonga alikuijin nda sʼiaan ninga tosi̱kjaʼaitsjeen nga ndatjín jme xi tjíosʼín kʼoa nga katanjele (Efesios 2:2). Tsa mená nga tsín kjoasi kuinójiaan yaoná tjínnele nga tsín ʼya xi kjuintʼalee ninga tojin kjoafaʼaitsjenná, kʼoa nda chósonnilee jme xi kuixoán kʼoa jme xi sʼiaan.

8. Jméni xi sʼiaan tsa nda nikjaʼaitsjeen kʼoa tsa toxkia chjota maa.

⁸ Xi majaoni koya josʼin tjen kuiyondaa ndʼaibi nga tsín kjoa polítika kuinójiaan yaoná kuinga katasʼená kjoafaʼaitsjen “joni tsa ye̱” kʼoa toxkia chjota katamaa “joni tsa nise paloma” (tʼexkiai Mateo 10:16, 17). Tjínná kjoafaʼaitsjen kʼiatsa tongini kuiyondaa tsa jme kjoa kuitjátojiaan. Kʼoa toxkia chjotaa kjimaa kʼiatsa tsín ya kuinójiaan yaoná xi kjoasi tjenkao. Kataʼyala kʼaa jme kjoani kʼoa jmeni xi koasenkaoná nga tsín kjoasi kuinójiaan yaoná.

9. Jósʼin chósonnilee jme xi kuixoán kʼianga tichjakaonajmiá je chjota.

⁹ Kʼianga chjakaonajmiá je chjota. Machjénní nga nda chósonnilee jokuixoán kʼianga tʼatsʼe polítika nchja̱ni je chjota xi tichjakaonajmiá. Tobʼelañá, tsa tʼatsʼe Chjotaxále Niná tichjakaoñá chjota, alikui koa̱n kʼoakʼuínlee tsa sasénná kʼoa tsa mai jmeni xi tso jngo partido. Kʼoa tsa jngo chjota xi kʼoakuitsoná jmeni xi mele sʼin je chjota kʼianga kʼoendajin je kjoa xi tjín sonʼnde, koakolee jotso Biblia nga toje Chjotaxále Niná xi koa̱nle tondiaa kʼoendajin kjoa jebi. Kʼoa jósʼiaan tsakui mele cho̱bayañá tʼatsʼe nga síkʼatsaojenchjiʼndé ʼndíle chjota kʼoa tsa maije̱ kui mele cho̱bayañá tʼatsʼe nga tixʼin xínkjín kʼoa tsa tiyánchjín xínkjín bixankaoni je chjota. Kʼoakʼuínlee jotso je Biblia kʼoa kʼoakʼuínlee josʼin mangíntjenngiaa kjoafaʼaitsjen xi tsjoá. Kʼoa jósʼiaan tsa ʼya xi kʼoakuitsoná nga tjínnele kʼoantjaiya kʼa kjoatéxoma xi tjínle chjotaxá kʼoa tsa maije̱ tjóxin. Tosa tsín  jokʼuínlee kʼoa kʼoati tsín kʼoénelee nga katasíkʼantjaiya josʼin síkjaʼaitsjen.

10. Jméni xi sʼiaan kʼianga tsín kjoasi kuinójiaan yaoná kʼianga bʼexkiaa kʼoa chotsenlee noticia.

¹⁰ Kʼianga bʼexkiaa kʼoa tsa noʼyalee noticia. Tjínkʼa periódiko kʼoa tsa ya jña faʼa noticia nga nʼio tsjoánganʼiole jngo partido. Yaa jña ngisa kʼoama ya naxinandá jñani je chjotaxá fayojin jmeni xi faʼa ya noticia. Kʼiatsa tojngo partido fitʼale je noticia si̱kuindalee yaoná nga tsín kʼoatisʼin si̱kjaʼaitsjeen tsanda ñá. Koaan chjónangilee yaoná: “A kuinga tsjoake̱ña nga nrʼoele jotso je chjota xi faʼa ya noticia nga kʼoatisʼin síkjaʼaitsjen joni an xi tʼatsʼe polítika”. Kʼiatsa mená nga tsín kjoasi kuinójiaan yaoná alikui koa̱n kʼoéxkiaa kʼoa kui chótsenlee je noticia xi jngo partido fitʼale. Kui chótsenlee je noticia kʼoa kui kʼoéxkiaa je periódiko xi tongóson sʼin fikao ngatsʼi. Kʼoa si̱kjaʼaitsjeen jmeni xi tso je Biblia xi tʼatsʼe jebi (2 Timoteo 1:13).

11. Ánni nga ngisa ngotjo kuinójinsíñá yaoná je kjoasi kʼiatsa nʼio tsjoachaa je tao̱n kao tsojmi xi tjínná.

¹¹ Kʼiatsa nʼio tsjoachaa je tao̱n kao tsojmi xi tjínná. Kʼiatsa nʼio tsjoachaa je tao̱n kao tsojmi xi tjínná ngisaa ngotjo kuinójinñá yaoná je kjoasi. Kʼianga jejaʼato nó 1970, ya naxinandá Malaui, nʼio nkjín testigole Jeobá xi kisikatío ngayeje tsojmi xi tjínle nga tsín partido tsakjayojin. Jngo tichjaa xi Ruth ʼmi kʼoatso nga tjínxókʼa ndsʼee xi ki tsakai ya ʼnde jña kinikatío je testigole Jeobá tonga chanxó jngo partido kitʼale tojoni nga koan ki ijngokʼani niʼyale. Ndsʼee jebi tsín kitso kon nga kisikatío tsojmi xi tjínle. Tonga me ngatsʼi je choʼndale Niná nga tsín kjoasi tsjonjin yaole ninga sícha ngayeje tsojmi xi tjínle kʼoa ninga tochoasa tao̱n sʼele (Hebreos 10:34).

12, 13. 1) Jósʼin síkjaʼaitsjen Jeobá tʼatsʼe chjota. 2) Jósʼin jchañá tsa kjoangʼakon jetíbʼetʼaná.

¹² Tsa kjoangʼakon tjínná. Je chjota nʼio tsjoake kʼoa nʼio bʼasjengʼa naxinandále, ʼndele, josʼin tsen yaole kʼoa kao kostumbrele. Tonga je Jeobá alikui kʼoasʼin síkjaʼaitsjen tsa tjín jngo ʼnde kʼoa tsa chjota xi ngisa ngʼa tíjna. Xi kao je tongósónñá ngatsʼiaa. Je Niná kjaʼaí kjaʼaí kisikjoanná nga kisindaná. Kʼoa jebi nʼio tsjoa bʼé tokoán. Je Jeobá alikui mele nga ngisa ngʼa chʼa̱sjee yaoná tikʼoajinni xi ngikʼa (Romanos 10:12).

¹³ Alikui koa̱n nga nʼio chʼa̱sjengʼaa je naxinandáná, tsa saʼnda kʼoasʼin si̱kjaʼaitsjeen nga kui xi ngisasa nʼio nda. Tsa kʼoasʼin si̱kjaʼaitsjeen ngisa ñʼai koa̱nná nga tsín kjoasi kuinójiaan yaoná. Kʼoakoan je chjotale Cristo xi títjon tsakatio. Tjínkʼa je chjotale Cristo xi chjota hebreo kitjenni xi tsín ngóson sʼin tsabekon je yánchjínkʼan xi chjota griego kitjenni (Hechos 6:1). Jósʼin jchañá tsa kjoangʼakon tíbʼetʼaná. Koaan si̱kjaʼaitsjeen: “Jósʼiaan tsa jngo ndsʼee xi xin naxinandále tsjoáná kjoafaʼaitsjen. A kʼoasʼin si̱kjaʼaitsjeen nga ngisa nda jonʼia ñá kʼoa tsín kuenta sʼiaan jme xi kuitsoná”. Tsa kʼoakjimaa, si̱kjaʼaitsjeen nga kʼoatso je Biblia nga tjínnele  nangitokon koaan kʼoa nga kʼoasʼin si̱kjaʼaitsjeen nga ngisa ngʼa tjío xi ngikʼa tikʼoajinni ñá (Filipenses 2:3).

14. 1) Jósʼin basenkaoná je kjoabʼetsʼoa. 2) Jngo choa̱ tʼejnai xi bakó josʼin basenkaoná je kjoabʼetsʼoa.

¹⁴ Xi majanni koya josʼin tjen kuiyondaa ndʼaibi nga tsín kjoa polítika kuinójiaan yaoná kuinga je Jeobá si̱nʼiotʼaa. Koaan si̱jélee nganʼiotsjele ánni nga sʼe̱niná kjoaka kʼoa koa̱nná chjoéxkoá yaoná, kʼoa jebi koasenkaoná tsa tsín kixi tíjna jme xi sʼin je chjotaxá. Kʼoati si̱jélee je Jeobá nga katatsjoáná kjoachjine ánni nga jchasíñá tsa jmeni xi ñʼai kʼoeená nga tsín kjoasi nojiaan yaoná. Kʼoa si̱jélee nga katabasenkaoná nga kui kʼoasʼiaan xi kixi tíjna (Santiago 1:5). Tsakui nichxin ndoyá si̱kasénná kʼoa tsa kjaʼaísa kjoañʼai kʼoainá nga kixi timangíntʼalee Niná. Tsa kʼoakoa̱ntʼeen si̱jélee je Jeobá nga katatsjoáná kjoanʼiojin josʼin kʼuínyaa anni nga tsín kjoasi nojinñá yaoná. ʼYañá nga je Jeobá koasenkaoná nga ska̱ná. Jngo choa̱ faʼaitʼa josʼin basenkaoná je kjoabʼetsʼoa ya Hechos 4:27-31 (tʼexkiai).

15. Jósʼin koasenkaoná je Biblia nga tsín kjoasi kuinójiaan yaoná (kʼoati chótsenlai rekuadro “ Jé Énle Niná tsakinyakao nga kixi koan”).

¹⁵ Je Jeobá kui xá kitsjoaniná je Biblia nga tsjoánganʼioná. Tjín testole Biblia xi koasenkaoná nga tsín kjoasi kuinójiaan yaoná. Tjínnele kʼoéyaa kjoafaʼaitsjenná testo jebi nga̱ koa̱nchjénná tsa tsín Biblia kichʼá. Je Biblia kʼoati basenkaoná nga ngisa makjainná jmeni xi tso Niná tʼatsʼe nichxin xi nroaján. Kjoachoya jebi kui xi koasenkaoná nga ska̱ná kʼianga ʼya xi koaitjenngikená (Romanos 8:25). Chjoéjiaan je testo xi kui nchja̱ni jokoa̱nchon ya ʼndenaxó kʼoa si̱kjaʼaitsjeen jmeni xi mená sʼiaan nga jeya tiyoaa.

16, 17. Jmé xi tsoyaná je choa̱le choʼndale Niná xi tsín kjoasi kitsjonjin yaole (chótsenlai sén xi fitsʼiani kjoaʼmiya jebi).

¹⁶ Xi mañoni koya josʼin tjen kuiyondaa ndʼaibi nga tsín kjoa polítika kuinójiaan yaoná kuinga si̱kjaʼaitsjeen jokisʼin  je choʼndale Jeobá nga kixi kitʼale. Nichxin kjoatse, nʼio nkjín choʼndale Niná xi nʼiojin koan kʼoa tsín kjoasi kitsjonjin yaole. Tobʼelañá Sadrac, Mesac kao Abednego alikui tsakʼétsʼoale je xkóson xi chjotaxále Babilonia kitsoyanile (tʼexkiai Daniel 3:16-18). * Nichxin xi tiyoaa ndʼaibi nʼio nkjín ndsʼee xi tjíobinyakao choa̱ jebi nga tjíosʼele kjoanʼiojin kʼoa tsín tjíobʼétsʼoale bandera. Kʼoalati si̱kjaʼaitsjeen je choa̱le Jesús. Alikui kjoa polítika kitsjonjin yaole kʼoa tsa jmesa kjoani xi chjota síxkoa̱ya. Bení nga nʼio kuinyakao je chjotale je choa̱le. Kuinga i̱ kitsosínile: “An jekisikinjele sonʼnde” (Juan 16:33).

¹⁷ Nichxin xi tiyoaa ndʼaibi nʼio nkjín testigole Jeobá xi tsín kjoasi tsjonjin yaole. Tjínkʼa xi nʼio tse kjoañʼai nikjaʼá, xi ndoyá nikatíoʼya kʼoa xi saʼnda nikʼien nga kixi fitʼale Jeobá. Choa̱le ndsʼee jebi nʼio binyakaoná nga nʼiojin maa. Jngo ndsʼee xi Turquía tsʼe i kitso: “Franz Reiter sʼaa xti kʼianga kinikʼien nga tsín ya kisijngokao yaole je chjotakjoajchánle Hitler. Je karta xi kiskile male kʼianga tojeme si̱kʼien bakó nga nʼio kisʼele kjoamakjain kʼoa nga nʼio kisinʼiotʼa je Jeobá. Mena nga kjuítjenngia choa̱le tsa kʼiani nga kʼoatjín kjoa kjoaʼatojian”.  ^[2]

18, 19. 1) Jósʼin koa̱n kuinyakaoná je ndsʼee nga tsín kjoasi kuinójiaan yaoná. 2) Jméni xi sʼiain ndʼaibi.

¹⁸ Je ndsʼee koaan kuinyakaoná nga tsín kjoasi kuinójiaan yaoná. Tsa jngo kjoa xi ñʼai tjín tibitjatojiaan kʼoéyanajmílee je xi chjotajchínga sʼin tjío. Ndsʼee jebi tsjoáná kjoafaʼaitsjen xi nroatʼa ya Biblia. Kʼoa tsa tjíojinle je ndsʼee xi tjío ya jinjtín jme xi kjimaná kʼoati tsjoánganʼioná tsanda je. Koaan kʼoakʼuínlee nga katabʼétsʼoantjainá. Tonga ñá kʼoati koa̱n kʼoainganʼiolee kʼoa kʼoétsʼoantjé je ndsʼee (Mateo 7:12). Ya jw.org faʼaitʼa je jaʼaínle ndsʼee xi ndoyá tjíoʼya. ^[3] Koaan chjoéjiaan je jaʼaínle ndsʼee xi ya faʼaitʼa kʼoa si̱jélee Jeobá nga katatsjoále kjoanʼiojin kʼoa nga kixi katama (Efesios 6:19, 20).

¹⁹ Nga jekjimachrianle nga kjoetʼa jme xi chonle sonʼnde je Na̱i, tsakui nichxin ngisa kʼoenená je chjotaxá nga jngo partido kʼoainganʼiolee. Kuinga nʼio machjénsíni nga tjen kuiyondaa ndʼaibi ánni nga tsín ʼya xi kʼoainganʼiosínilee i̱ Sonʼnde jebi.