1-3. 1) Jósʼin tjíobakó ngantsjai je choʼndale Niná nga nʼio bechjí je kjoajtín xi satíoná (chótsenlai sén xi faʼaitʼa ibi). 2) Jméni xi chótʼayajiaan i̱ kjoaʼmiya jebi.

KʼIANGA 17 nóle je Corinna, je male kindoaa, kjin kinikʼéjnanʼio kʼoa xáʼai kisʼin. Xijekoan, kʼoati nʼio kjin kichani je Corinna, yaa Siberia kichani. Jo choʼnda sʼin kisixá ya jñani tíjna jngo granja. Sakʼoaa tojinsén kisixá ninga nʼio nyʼán chon. Ninga kʼoalani, je Corinna kao ijngo tichjaa tsakʼéndajin nga koai jñani sʼejna je kjoajtín.

² Jekjimaxon ki kʼoa 25 kilómetro kjin kini ndso̱ko̱ saʼnda nga kicho jñani bitjo tren. Je Corinna itso: “Je tren las 2 kitjo nga tanjioya kʼoa jaon ora kisʼin. Kʼianga jekitjojainjin je tren, ngi 10 kilómetro kjin tsangin ijngokʼanijin ndso̱kuijin saʼnda nga kichuijin jñani sʼejna je kjoajtín”. Je Corinna nʼio tsjoa kisʼe kon nga kʼoakisʼin. Kʼoa itsosa: “Ya kjoajtín kichotʼayaníjin je Xo̱n xi Bájinkonná kʼoa kijndaníjin. Nʼio kisitaja kjoamakjainnajin”. Kʼiaa nga jekoan janni nichxin kicho ijngokʼani ya granja. Kʼoa je xi ya síkuinda  je granja tsín kisʼejinle kʼianga koantsín je tichjaa.

³ Xi choʼndale Niná maa nʼio ʼyachjiá je kjoajtín xi satíoná. Tobʼelañá, je chjotale Cristo xi títjon tsakatio nʼio tsjoake koan nga tsakatiojtín nga tsakʼétsʼoale je Jeobá kʼoa nga koansale xi tʼatsʼe (Hechos 2:42). Kʼoajinti nio tsjoachaa nga mangián je kjoajtín xi satíoná tsanda ñá. Tsakui nichxin tiyo kʼaa xi ñʼai maná nga mangián ngayeje kjoajtínná. Tsakui nichxin kuinga nʼio nkjín ora nixá, tsa nʼio tse xá tjínná kʼoa tsa nʼio kijtanáje̱. Jméni xi koasenkaoná nga tsín si̱chaa je kjoajtínná. ^[1] Jósʼin kʼoainganʼiolee je chjota xi ʼmiyalee Biblia kao xi kjaʼaí nga koai je kjoajtínná. Jan koya chótʼayajiaan i̱ kjoaʼmiya jebi. Xi títjon, jósʼin basenkaoná kʼianga mangián je kjoajtínná. Xi majaoni, jósʼin binyakao xi kjaʼaí kʼianga mangián je kjoajtínná. Xi majanni, ánni nga tsjoa sʼeni kon je Jeobá kʼianga mangián je kjoajtínná. ^[2]

4. Jósʼin basenkaoná je kjoajtín xi satíoná nga ngisa nda ʼyaa je Jeobá.

⁴ Ya kjoajtín ʼmiyaná. Je kjoajtín xi satíoná basenkaoná nga ngisa nda ʼyaa je Jeobá. Tobʼelañá, kui kichotʼayá je libro “Tosi tonda katasʼeno kjoatsjoachale Niná” kʼianga kisʼejna je kjoajtín Nga chotʼaya Biblia. Jókisʼe tokoán kʼianga kui kichobayañá jokjoan Niná kʼoa tsa kʼiaje̱ nga kinoʼyalee je ndsʼee nga kitsjoa énle. Sa tsjoacha sa tsjoachajin koaan je Jeobá. Xi ijngosani, kʼianga satíoná je kjoajtín ngisasa ʼyaa xi tʼatsʼe Biblia nga nda binyañoaa nga faʼa je kjoanokjoaya, nga faʼachoya je ndsʼee kʼoa nga maxkia testo xi tsʼe Biblia (Nehemías 8:8). Kʼoa nga xki̱ xomana nʼio tse xi majinná kʼianga biyondalee jñani maxkia je Biblia kʼoa nga noʼyalee nga tsjoá énle je ndsʼee.

5. Jósʼin tíbasenkaoli je kjoajtínná nga tinitjosuin jotso je Biblia kʼoa nga ngisa kjimali tiʼmiyasuin.

⁵ Je kjoajtín xi satíoná basenkaoná nga kʼoanʼia jmeni xi tso je Biblia (1 Tesalonicenses 4:9, 10). Tobʼelañá, tsakui nichxin kʼianga kichotʼayá Xo̱n xi Bájinkonná tsakasenkaoná nga ngisasa nda kinixálee je Jeobá, nga ngisa koanná josʼin tsakʼetsʼoaa kʼoa tsakuije̱ xi tsakasenkaoná nga kinichatʼalee jngo ndsʼee xi tjín xi kisikaoná. Je kjoajtín Tʼatsʼe chjotale Cristo kao Xále Niná basenkaoná nga ʼmiyasoán kʼoa nga ʼmiyalee je chjota jmeni xi tso je Biblia (Mateo 28:19, 20).

6. Jósʼin tsjoánganʼioná je kjoajtín xi satíoná.

⁶ Je kjoajtín tsjoánganʼioná. Jmeni xi chonle sonʼnde je Na̱i koaanle sikinroajen tokoán kao kjoamakjainná. Tonga je kjoajtín xi satíoná sínʼiojinná  kʼoa tsjoánganʼioná nga tosi tonda si̱xálee je Jeobá (tʼexkiai Hechos 15:30-32). Nkjín kʼa nga kui chotʼayajiaan tʼatsʼe josʼin tíbitjoson jmeni xi tongini kitso je Biblia. Kui xi basenkaoná nga ngisasa sʼejngo tokoán nga sitjoson je Jeobá jmeni xi tso. Xi ijngosani, tsjoánganʼioná je kjoanokjoaya xi faʼa, kʼoati tsjoánganʼioná nga tsjoá énle je ndsʼee kʼoa nga ñaki ni̱ma̱le nroajinni nga sele je Jeobá (1 Corintios 14:26). Kʼoati tsjoánganʼioná nga chjakaonajmiá je ndsʼee nga kjesa fitsʼiajin je kjoajtín kʼoa tsa kʼiaje̱ nga jefetʼa, nga̱ mandosin kjoaixile xi tʼatsaan (1 Corintios 16:17, 18).

7. Ánni nga nʼio chjínile nga kjuian je kjoajtín xi satíoná.

⁷ Kʼianga satíoná je kjoajtín, jé nganʼiotsjele Niná basenkaoná. Je Jesús kao nganʼiotsjele Niná bándiaanile je jtín. Kʼoakitso nga kuinóʼyalee “jo tsole je naxinandále Cristo je Espíritu Santo” (Apocalipsis 2:7). Je nganʼiotsjele Niná basenkaoná nga tsín ya tsaojiaan jmeni xi satíobasenná, nga kao kjoanʼiojin ʼmiyasoán kʼoa nga kui chjoejiaan jmeni xi ndatjín. Kuinga nʼio chjínile nga kʼoénelee yaoná nga kjuian ngantsjai je kjoajtín xi satíoná. Nga̱ kʼoasʼin koasenkaoniná je nganʼiotsjele Niná.

8. Jósʼin binyakao je ndsʼee kʼianga mangián je kjoajtínná, nga bʼé je énná kʼoa nga jndalee je Jeobá (kʼoati chótsenlai rekuadro “ Nʼio tsjoa tjínle nga bichóni ndʼiale”).

⁸ Nga mangián je kjoajtínná bakolee je ndsʼee nga tsjoachaa. Nkjín ndsʼee xi nʼio ñʼai kjoa tjíofaʼatojin. Je pastro Pablo i kitso: “Si̱kjaʼaitsjenjinnía xíngiaa nga jngójngoá” (Hebreos 10:24, 25). Kui xi kitsonile je Pablo nga tjínnele koa̱nndosinná xíngiaa. Kʼianga mangián je kjoajtínná, bʼainganʼiolee je ndsʼee kʼoa bakolee nga mená ya kuiyokoaa, nga chja̱kaonajmiá kʼoa nga mená jchaa josʼin tjíoni. Kʼoati bʼainganʼiolee kʼianga bʼé je énná kʼoa nga jndalee je Jeobá (Colosenses 3:16).

9, 10. 1) Jósʼin basenkaoná jmeni xi kitso je Jesús ya Juan 10:16 nga nʼio chjíle nga kjuian je kjoajtínná. 2) Nga mangián je kjoajtínná, jósʼin binyakoaa je ndsʼee xi tsín kotʼaya xínkjín.

 ⁹ Nga mangián je kjoajtínná bʼainganʼioñá nga jtín sʼin biyoaa (tʼexkiai Juan 10:16). Je Jesús kʼoasʼin kisingósonkao yaole josʼín jngo xi barré koʼnda kʼoa je chjotale yaa kisingósonkao je barré. Nga jngo nyʼoá mani je barré ñaki jtín batio ngantsjai kʼoa jé fitjenngile je xi koʼnda. Tsa jaolani barré xi ya tjíotsoma ya sonnindo, tsa jao xi ya tjíotsoma jña konga chon kʼoa tsa jngo xi xin tsoʼba, alikuijin tojngo nyʼoá mani nga aon barré jebi. Kʼoatisʼinni tsanda ñá, tsa mená nga “tojngo” jtín koaan kʼoa “tojngo koa̱n” xi koandiaaná, machjénní nga kjuian ngantsjai je kjoajtín xi satíoná ánni nga jtín sʼin kuiyosíñá kao je ndsʼee.

¹⁰ Je kjoajtínná basenkaoná nga jtín sʼin biyoaa joni jngo familia xi tsjoake xínkjín (Salmo 133:1). Tjínkʼa ndsʼee xi tsín titsjoakeni xijchále kʼoa tsa ndsʼe̱ nga testigole Jeobá koan. Tonga je Jesús kʼoakitso nga tsjoále je familia xi tsjoake koa̱n kʼoa xi sikuinda (Marcos 10:29, 30). Tsa kjuian ngantsjai je kjoajtínná, kʼoasʼin skoe̱ná je ndsʼee joni jngo nʼai, joni jngo na̱ kʼoa tsa joni jngo ndsʼe̱. Tsa si̱kjaʼaitsjeen jebi, kʼoénejinlee yaoná nga tsín si̱chaa je kjoajtín xi satíoná.

11. Jósʼin basenkaoná je kjoajtínná nga bʼailee je Jeobá jmeni xi bakinle.

¹¹ Nga mangián je kjoajtínná bʼailee je Jeobá jmeni xi bakinle. Nga je kisindaná  Jeobá, bakinle nga kʼoailee kjoanda, nga jchaxkoán kʼoa nga chʼa̱sjengʼaa (tʼexkiai Apocalipsis 7:12). Kʼoa kui xi nʼia ya kjoajtínná kʼianga bʼetsʼoalee, nga jndalee kʼoa nga nokjoañá xi tʼatsʼe. Kui kjoanda jebi tjínná nga xki̱ xomana nga kʼoasʼin ʼyaxkoán je Jeobá.

12. Jósʼe kon je Jeobá nga nitjosoán kʼianga kʼoatsoná nga kuiyojtián.

¹² Nga je kisindaná je Jeobá kʼoati bakinle nga si̱tjosonlee. Jé xotsoná nga kuiyojtián ngantsjai, ngisaa nga jemachrianle kjoafetʼa. Je Jeobá nʼio tsjoa sʼele kʼianga mangián kjoajtínná (1 Juan 3:22). Je Jeobá be kʼoa bechjí jokji bʼenelee yaoná nga mangián je kjoajtínná (Hebreos 6:10).

13, 14. Jósʼin basenkaoná je kjoajtín xi satíoná nga ngisasa machriantʼalee je Jeobá kao Jesús.

¹³ Nga mangián je kjoajtínná bakolee je Jeobá nga mená ngisasa koa̱nchriantʼalee je kʼoa kao ʼNdíle. Nga satíoná je kjoajtín Biblia chotʼayá kʼoa ngisasa nda ʼyaa jmeni xi mele Jeobá nga sʼiaan kʼoa josʼin kjuinkoaa yaoná (Isaías 30:20, 21). Nga bichó kjoajtín je chjota xi tsín testigole Jeobá ma bení nga je Jeobá tíbándiaaná (1 Corintios 14:23-25). Tʼatsʼe Jeobá tínroani jmeni xi ʼmiyaná ya kjoajtín, nga̱ kao nganʼiotsjele bándiaaniná. Kui noʼyalee jmeni xi tsoná je Jeobá, ʼyañá nga nʼio tsjoakená kʼoa ngisasa machriantʼalee.

¹⁴ Je Jesús, xi ngʼajko̱ tíjnale je jtín, i kitso: “Ya jña nga tojngo tjío jao axo jan xi tsʼan chjota, yaa tijnajin basenle nga je” (Mateo 18:20). Je Biblia kʼoati tso nga je Jesús “tsoʼba ngabasenle” je jtín (Apocalipsis 1:20–2:1). Alikui jao tjínná nga je Jeobá kao Jesús ya tjíokaoná kʼoa tsjoánganʼioná nga sʼená kjoajtín. Jósʼe kon je Jeobá kʼianga be jokji bʼenelee yaoná nga nichriantʼalee je kʼoa kao ʼNdíle.

15. Jméni xi bakolee je Jeobá kʼianga mangián je kjoajtínná.

¹⁵ Nga mangián je kjoajtínná bakolee je Jeobá nga mená si̱tjosonlee. Je Jeobá alikui kjoanʼio bʼénená nga koanngián je kjoajtínná (Isaías 43:23). Tsjoáʼndená nga ñá xi kuixónñá josʼiaan (Hechos 5:29). Tobʼelañá, jósʼiaan tsa je xi nainá mani kʼoakuitsoná nga tsesa si̱xá kʼoa tsa tsín tikʼoakoa̱nniná nga koanngián je kjoajtínná. Kʼoa jósʼiaan tsa je chjotaxá kʼoakuitsoná nga tjínnele kʼoéchjiá kʼianga kuiyojtián, tsa kʼoakuitsonáje̱ nga ndoyá koaikaoná kʼoa tsa kjaʼaísa kjoañʼai tsjoáná. Jósʼiaan tsakui ngisa koa̱nmená nga tokjaʼaíla xá sʼiaan ʼndele nga kjoajtínná koanngián. Tsa je Jeobá si̱tjosonlee, kʼoasʼin koakonilee nga tsjoachaa kʼoa nga ʼyaa nga tiʼndele kʼoakuitsoná josʼiaan (Romanos 6:17). Tsa kʼoasʼiaan nʼio tsjoa sʼe̱ kon je Jeobá (Proverbios 27:11).

16, 17. 1) Jósʼin ʼyañá nga nʼio kitsjoale kjoandosin nga tsakatioxkó je chjotale Cristo xi títjon tsakatio. 2) Jósʼin tsabekon je kjoajtín je ndsʼee xi George Gangas tsakʼin.

¹⁶ Kʼianga jejaʼato je sʼuí Pentecostés nga nó 33, je chjotale Cristo “kitjenngile je én josʼin kitsoya pastro, kʼoa nga tojngo koanxkó” (Hechos 2:42). Tosi tonda tsakatioxkó ninga kitjenngike je chjotaxá xi tsʼe Roma kao je naʼmitítjonle chjota judío. Ninga tsín choa ñʼai koanle, tosi tonda tsakatioxkó.

¹⁷ Nichxin xi tiyoaa ndʼaibi, bʼailee kjoanda je Jeobá nga ma biyoxkoá. Si̱kjaʼaitsjenla je choa̱le ndsʼee xi George Gangas tsakʼin, xi tsʼato 22 nó nga ya tsakʼejnajinle je Cuerpo Gobernante. Je ndsʼee kʼoakitso nga nʼio kitsjoanganʼiole nga ki kjoajtín kʼoa nga kui xi ngisa nʼio tsjoa tsakʼé kon. Tsakʼénele yaole nga je títjon kicho ya Ndʼia jña chotʼayá kʼoa nga je skan fini kʼianga jefetʼa kjoajtín. Nʼio tsjoa kisʼe kon nga tsakjákaonajmí je ndsʼee. Je ndsʼee jebi i kitso: “Kʼianga ya tijnakoa je ndsʼee joxi ndʼiana tijna mana, jo familiana mana”. Kʼoa kʼoakitso nga kui xi ngisa nʼio tsjoake koan nga ki je kjoajtín.

18. 1) Jósʼin ʼyatokuin je kjoajtínná. 2) Jméni xi meli nga tosi tonda kʼoasʼiain.

¹⁸ Tsa kʼoatisʼin ʼyatokuin je kjoajtín joni je ndsʼee Gangas, tosi tonda tʼenelai yaoli nga tʼin je kjoajtín xi satíoná, ninga sakʼoa ñʼai koa̱nli. Takolai je Jeobá nga kʼoati tjín tokuin joni je rey David nga kʼoakitso nga nʼio tsjoake koan ʼnde jñani tsaʼyaxkón je Jeobá (Salmo 26:8).