1, 2. 1) Jósʼin mangóson je sonʼnde jebi kao jngo chjota xi tojeme ni̱kʼien (chótsenlai sén xi faʼaitʼa ibi). 2) Kʼianga jeni̱kjeson sonʼnde jebi, jósa̱tío kon je xi ya tjío ngʼajmi kao i̱ Sonʼnde.

SI̱KJAʼAITSJENLA jngo chjota xi ndoyá tíjnaʼya xi nʼio tsʼen, xi jekʼoakaʼmile nga ni̱kʼien. Xijema, je polisía yaa fikao jñani ni̱kʼien. Ningalani tíjnakonsa je chjota jebi kʼoa tsín jme chʼin tjínle, tojeme ni̱kʼien.

² Je sonʼnde jebi yaa mangóson je chjota xi kanikʼaxkiaa xi tojeme ni̱kʼien. Je Biblia kʼoatso nga je sonʼnde jebi tokjoaʼato (1 Juan 2:17). Je Jeobá jeme sikjeson. Tonga tsín mangóson nga ni̱kjeson je sonʼnde jebi kao je chjota xi ndoyá tíjnaʼya xi toje ni̱kʼien. Tsakui nichxin tjínkʼa je chjota xi kʼoakuitso nga tsín ndasʼin kisʼendajin je kjoale chjota jebi kʼoa kʼoakuitso nga tsín katanikʼien. Tonga je Jeobá ñaki kixiní jmeni xi sʼín, kʼoa nga sikjeson sonʼnde jebi kixi tíjna (Deuteronomio 32:4). Tochoasa chale nga kjoeson sonʼnde jebi. Kʼianga jekʼoakoa̱n, je xi tjío ya ngʼajmi kao xi tjío i̱ Sonʼnde kʼoakuitso nga ñaki kixi tíjna jme xi kisʼin Jeobá. Nʼiojin tsjoa sa̱tío kon ngatsʼi.

3. Jméni xi ño koya tjóxin kʼianga jekoatexoma Chjotaxále Niná.

 ³ Jméni xi tjóxin kʼianga jeni̱kjeson sonʼnde jebi. Ngayeje kjoa xi bʼetʼaná tojeme tjóxin. Je énnda jebi yaa maxki̱kao “je énnda xi tʼatsʼe je kjoatéxomale ngʼajmi” (Mateo 24:14). I̱ kjoaʼmiya jebi, ño koya kjoa chótʼayajiaan xi tsín tisʼe̱ni kʼianga jekoatexoma je Chjotaxále Niná: Je chjotatsʼen, jtín xi tjín sonʼnde xi tsín kixi, je kjoatsʼen kao nga ñʼai tinijchá yaoná. Kʼianga chótʼayajiaan nga jngó jngó koya jebi, jchañá jósʼin bʼetʼaná, jméni xi sʼin je Jeobá kʼianga kʼoendajin kjoa jebi kʼoa jméni xi sʼe̱ nichxin xi nroaján.

4. Jósʼin bʼetʼaná jmeni xi sʼín je chjotatsʼen.

⁴ Jósʼin bʼetʼaná jmeni xi sʼín je chjotatsʼen. Je pastro Pablo kʼoakitso nga nʼio ñʼai koa̱nchon nga toje tífetʼa nichxin. Kʼoa kʼoakitso nga je chjota sa tsʼen sa tsʼeen koa̱n (2 Timoteo 3:1-5, 13). Jetíbitjoson jmeni xi tongini kitso je Biblia. Me ngatsʼiaa nga bitjatojiaan je kjoa xi tjín. Jolani nga nʼio tjín je ché kʼoa tsa jeje̱ chjota xi totaon be xi kjaʼaí kʼoa xi jtike xi kjaʼaísʼin tsen yaole. Tjínkʼa xi saʼnda kʼoasʼín sontsen xi chʼaotjín. Kʼoa tjínkʼa xi kʼoasʼin matsen nga binyakao xi kjaʼaí, tonga tsínni ñaki kʼoatjío kon. Kʼoa ningalani likui jme xi chʼaotjín títsaojiaan, kʼoati bʼakaotʼaná jmeni xi sʼín je chjotatsʼen. Alikui nda satío tokoán nga totaon ʼya ʼndíxti, chjotajchínga kao chjota xi tsín ma josʼin sítoánntjai yaole. Tjínkʼa je chjotatsʼen xi jo cho̱ sʼín kʼoa xi saʼnda jo na̱i sʼín (Santiago 3:15). Tonga je Énle Niná tsjoáná kjoachoya.

5. 1) Jméni xi títjoʼndesale nga sʼin je chjota. 2) Jméni xi koa̱nle je chjotatsʼen xi tsín sikʼantjaiya yaole.

⁵ Jméni xi sʼin je Jeobá. Nichxin xi tiyoaa ndʼaibi, je Jeobá títsjoáʼndele je chjotatsʼen nga katasíkʼantjaiya yaole (Isaías 55:7). Ningalani jeme ni̱kjeson je sonʼnde jebi, je chjotatsʼen kjesa jonikaojin. Tonga, jókoa̱ntʼain je chjota xi tsín sikʼantjaiya yaole kʼoa xi i̱ tsjoánganʼiole je sonʼnde jebi saʼnda nga koaitsʼia je kjoañʼai xi nʼio tse. Je Niná kʼoatso nga sikjeson (tʼexkiai Salmo 37:10). * Nʼio nkjín chjota xi nʼio maña josʼín nga tsín ʼyale nga chʼao sʼín kʼoa to chatʼale (Job 21:7, 9). Tonga je Biblia kʼoatso nga “je Niná tíkotsenle je ndiaale chjota, kʼoa tíkotsenle josʼin tíbasén ndso̱ko̱. Ninga nitje̱n kʼoa ninga nʼio njio chon alikui koa̱n koatioʼma je chjota xi chʼao sʼín” (Job 34:21, 22). Kuinga tsín ʼya xi koa̱n kʼoéjnaʼmanile je Niná. Be ngayeje jmeni xi sʼín je chjotatsʼen. Kʼianga jekjoaʼato Armagedón, likui tisʼe̱ni je chjotatsʼen (Salmo 37:12-15).

6. ʼYáni xi koatiokon kʼianga jeni̱kjeson je chjotatsʼen, kʼoa ánni nga nda tsoni je én jebi.

⁶ ʼYáni xi koatiokon kʼianga jeni̱kjeson je chjotatsʼen. Je Jeobá itso: “Tonga je xi ndʼé tsʼee koa̱n i̱ sonʼnde, kʼoa ñaki kʼoetsaojin jokji nyʼán sʼin koatio”. Kʼoa xijema itso: “Je xi kixi tsʼee koa̱n sonʼnde, kʼoa i koatioson ngantsjai nichxin” (Salmo 37:11, 29). Je “xi ndʼé” ʼmile jéní chjota xi nangitokon xi kjimajinle tʼatsʼe Jeobá kʼoa xi sítjosonle. Kʼoati “xi kixi” ʼmile, nga̱ kui kʼoasʼín jmeni xi kʼoatso je Jeobá nga ndatjín.  Nichxin xi tiyoaa ndʼaibi, ngisaa nʼio nkjín chjota xi chʼao sʼín tikʼoajinni je xi nda sʼín. Tonga kʼianga jeʼndenaxó koa̱n i̱ Sonʼnde tojé koatio je chjotandʼé kao xi kixi. Jé chjota jebi xi ʼndenaxó sikao i̱ Sonʼnde.

7. Jósʼin bʼakaotʼaná jmeni xi sʼín je jtín xi tjín sonʼnde xi tsín kixi.

⁷ Jósʼin bʼakaotʼaná jmeni xi sʼín je jtín xi tjín sonʼnde xi tsín kixi. Nʼio nkjín koya jmeni xi ma xi tsín tojngo chjota tjínle jée, jé sakʼoa sʼele jée je jtín xi tjín sonʼnde xi tsín kixi. Tjín je relijión xi miyón chjota bʼanachale. Alikui tsoya ʼyáni je Niná kʼoa jméni xi koa̱nle je Sonʼnde kao je chjota. Kʼoati tso nga tsín koa̱n koa̱nkjainná jmeni xi tso je Biblia. Kʼoa tjín je chjotaxá xi tsín kixi xi kjoajchán batío kʼoa xi totaon be je chjota xi kjaʼaí kjaʼaísʼin tsen yaole. Je chjotaxá jebi totaon be je xi ma̱ tjío kʼoa xi tsín ma josʼin sítoánntjai yaole. Kʼoa sa nyiná sa nyiná kjima kʼoa sa tse sa tsee nganʼio tjíosʼele, tokʼaa chjota xi fijtakao kʼoa tsín kixi jmeni xi sʼín. Kʼoa tjío je empresa xi nʼio yʼai xi nʼio chi̱nga̱le tao̱n, xi tsínkui fini nga tjíosíjndí je Sonʼnde kʼoa tjíosíkitsón jmeni xi tjín. Totaon be je chjota nga tokʼa xi nyiná kjima. Nga kʼoasʼín, kʼoati kuinga kjoañʼai tjínni nichxin xi tiyoaa ndʼaibi.

8. Tojo tso je Biblia, jméni xi koa̱nle je jtín xi tjín i̱ sonʼnde xi tse nganʼio tjínle sʼin matsen.

⁸ Jméni xi sʼin je Jeobá. Kʼiaa koaitsʼia je kjoañʼai xi nʼio tse kʼianga je chjotaxá kʼoetʼale je relijión ndiso. Ya Biblia chjoónchajngi tsole je Babilonia xi nʼioje (Apocalipsis 17:1, 2, 16; 18:1-4). Je relijión ndiso tondiaa nikjeson. Tonga jméni xi koa̱nle je jtín xi ngikʼa xi tsín kixi. Je Biblia kʼoatso nga ya mangóson je nindo kao ʼnde xi tjíojin ndáchikon nga nʼio tse nganʼio tjínle (tʼexkiai Apocalipsis 6:14). * Tonga kʼoati tso nga je chjotaxá kao je jtín xi tsín ya tsjoánganʼiole je Chjotaxále Niná ni̱kjeson. Kʼiaa ni̱kjeson nga toje tífikjetʼa je kjoañʼai xi nʼio tse (Jeremías 25:31-33). Kʼoa likui tikʼia sʼe̱ni je jtín xi tjín sonʼnde xi tsín kixi.

9. Ánni nga tsín jao tjínniná nga sixá chʼin chʼin je xi koatio ya sonʼnde chjotse.

⁹ Jméni xi sʼe̱ ngajaole je jtín xi tjín sonʼnde xi tsín kixi. A sʼe̱jnaa jngo jtín i̱ Sonʼnde kʼianga jekjoaʼato Armagedón. Je Biblia itso: “Tichoyalee ngʼajmi chjotse kao sonʼnde chjotse, jña nga tíjnantsjai xi kjoakixi, josʼin nga kitsjoa tsʼoa Niná” (2 Pedro 3:13). Je xi ngʼajmi jchá ʼmile, jéní je chjotaxá xi tjín xi tsín kixi. Kʼoa je xi sonʼnde jchá ʼmile, jéní chjota xi kjinentsja. Kʼoa nga jeni̱kjeson jé koationgajaole “ngʼajmi chjotse kao sonʼnde chjotse”. Je xi ngʼajmi chjotse ʼmile, jéní Chjotaxále Niná. Chjotaxá jebi jéní Jesucristo kao xi 144,000 mani xi ya koatexomakao. Je xi sonʼnde chjotse ʼmile, jéní chjota xi je koanentsja. Je Jesús kao xi koatexomakao nʼio ndasʼin koandiaale nga sixá chʼin chʼin, nga̱ jé skénngile je Jeobá (1 Corintios 14:33). Je chjota xi kuinyatítjonle je xá xi koa̱n i̱ Sonʼnde ndʼé koa̱n kʼoa kui koaitjenngi josʼin koandiaa je Jesús kao xi  144,000 mani (Salmo 45:16). Si̱kjaʼaitsjenla josʼin kuiyoaa kʼianga tsín tisʼe̱ni je jtín xi tjín sonʼnde xi tsín kixi. Nga kʼia, tojngoo jtín sʼe̱ xi jtín koatio kʼoa xi kixi koa̱n ngantsjai.

10. Jmé kjoani xi tjín ya jñani tsi, kʼoa jósʼin bʼetʼali ji kʼoa kao familiali.

¹⁰ Jósʼin bʼetʼaná je kjoatsʼen xi tjín ndʼaibi. Nichxin xi tiyoaa ndʼaibi ñaki to kjoachajngi sʼín je chjota, tsín kixi jmeni xi sʼín kʼoa nʼio tsʼen kjima. Je kjoasʼetsaojin xi bʼasje chjota alikui chʼaosʼin be kjoa jebi kʼoa saʼnda besin je kjoatéxomale Jeobá tʼatsʼe xi ndatjín kao xi chʼaotjín (Isaías 5:20). Jé xi xijchá ma xi ngisa tjínnele sikuinda je ʼndíxtile nga tsínkui kjoa xi tjín sonʼnde skénʼndóbʼakjá. Kʼoa ngatsʼiñá xi chjotale Cristo maa xi machjén nga kʼoénelee yaoná nga si̱kuindaa je kjoamiyo xi tjínná kao Jeobá, nga̱ je chjota xi tjín ndʼaibi alikui bexkón je kjoatéxomale Jeobá.

11. Jméni xi bakóyaná jokisikao Jeobá je Sodoma kao Gomorra.

¹¹ Jméni xi sʼin je Jeobá. Kataʼyala jmeni xi kisʼin kʼianga tsabe jmeni xi koan ya Sodoma kao Gomorra (tʼexkiai 2 Pedro 2:6-8). * Je Lot chjotakixi koan, kʼoa nʼio tse kjoañʼai tsakjaʼá xi totʼatsʼe nga nʼio chʼao kisʼin je chjota xi tsakatio jñani tsʼe. Nga tsakjaʼáxin Jeobá ngayeje kjoa xi chʼaotjín kjima kisikjeson ʼnde jebi. Tonga kʼoati kuinga kʼoakisʼinni nga jngo choa̱ tsakʼéjna jokoa̱n nichxin xi sʼa nroa nga sʼe̱jinkon je chjota xi chʼao tjíosʼín ndʼaibi. Tojo kisʼin je Jeobá nga tsakjaʼáxin je kjoachajngi xi kisʼe nichxin kjoatse, kʼoatisʼin nichxin xi tiyoaa ndʼaibi kʼianga sikjeson je sonʼnde jebi.

12. Jmé xi meli sʼiain kʼianga tsín tisʼe̱ni je kjoatsʼen.

¹² Jméni xi sʼe̱jnangajaole je kjoatsʼen. Kʼianga jeʼndenaxó koa̱n nʼio nkjín koya jmeni xi ndatjín kʼoasʼiaan. Tobʼelañá, ʼndenaxó si̱koaa je Sonʼnde kʼoa kʼoéndañá je niʼyaná kʼoa kao tsʼe xíngiaa. Kʼoati ñá chjoéyaa je chjota xi miyón mani xi kjoaʼáyanile kʼoa kui kʼuínyalee tʼatsʼe Jeobá kʼoa jmeni xi tísʼín xi tʼatsʼe chjotasonʼnde (Isaías 65:21, 22; Hechos 24:15). Nʼio tse xá sʼe̱ná xi nʼio tsjoa koaya tokoán kʼoa xi kʼoasjengʼa je Jeobá.

13. Jmé kjoa xi tjín nga yátsʼi̱n tsakinyále Jeobá je Na̱i, Adán kao Eva.

¹³ Jósʼin bʼetʼaná nga ñʼai tinijchá yaoná. Nichxin xi tiyoaa ndʼaibi nʼio ñʼai tiyoaa xi totʼatsʼe kjoatsʼen xi tjín kʼoa xi totʼatsʼe je jtín xi tjín sonʼnde xi tsín kixi. Ngatsʼiñá nga bʼetʼaná nga kjoajchán sʼe, nga ma̱ tinijchá yaoná, nga bʼasjengi xínkjín chjota, je chʼin kao kjoabiya. Kʼiaa kinroatsʼiani kjoa jebi nga kʼoasʼin yátsʼi̱n tsakinyále Jeobá je Na̱i, Adán kao Eva. Kʼoa kjoañʼai tichjaʼá ngatsʼiaa xi totʼatsʼe nga kʼoakisʼin.

14. Jméni xi sʼin je Jeobá tʼatsʼe kjoa xi tiyojiaan ndʼaibi.

¹⁴ Jméni xi sʼin je Jeobá. Tobʼelañá, kʼoatso nga kjoaʼaxin je kjoajchán  (tʼexkiai Salmo 46:8, 9). * Kjoaʼaxin je chʼin (Isaías 33:24). Tondiaa kjoaʼaxin je kjoabiya (Isaías 25:8). Kʼoa tsín tima̱ si̱jcháñá yaoná (Salmo 72:12-16). Je Jeobá kjoaʼaxin ngayeje kjoañʼai xi tiyojiaan ndʼaibi. Kʼoa kʼoati kjoaʼaxin je Na̱i kao ánkje tsʼenle (Efesios 2:2).

15. Jméni xi tsín tisʼe̱ni kʼianga jekjoaʼato Armagedón.

¹⁵ Si̱kjaʼaitsjenla jokoa̱nchon kʼianga tsín tisʼe̱ni je kjoajchán, chʼin kao kjoabiya. Alikui tisʼe̱ni chjotakjoajchán, ki̱cha̱ xi síkʼienni xínkjín chjota, hospital, chjinexki kʼoa kao nyʼoákʼen. Kʼoa nga tsín tisʼe̱ni je chjotatsʼen, alikui tikoa̱nchjénni nga polisía sʼe̱ kʼoa tsa alarma sa̱tío. Tsakui nichxin saʼnda tsín tikoa̱nchjénni nga kʼoéchjoandee ndʼianá kʼoa tsa yabe kʼoéchjoañá. Tondiaa tjóxin ngayeje jmeni xi síkjáojinná.

16, 17. 1) Jósa̱tío kon je chjota xi kuinje̱ngile yaole kʼianga jekjoaʼato Armagedón. Jngo choa̱ tʼejnai. 2) Jméni xi tjínnele sʼiaan nga kuinje̱ngilee yaoná kʼianga ni̱kjeson sonʼnde jebi.

¹⁶ Jósa̱tío tokoán kʼianga tsín tikui kjoa kuiyojinñá jochon ndʼaibi. Tsakui nichxin likui ñaki majinná ndʼaibi jokoa̱nchon, nga̱ jenʼio kjoatse nga ñʼai tinijchá yaoná kʼoa tsakui nichxin likui tiʼyañá jókji tísíkiʼaonná. Tobʼelañá, je chjota xi ya tjío ya chrian carretera jñani nʼio nkjín karro faʼa, mangakaole nga ñaki to karro kifane ʼndeʼnde. Kʼoa je chjota xi ya chrian tsʼe jñani sʼejten tjé tsakui nichxin kʼoati jemangakaole nga chʼao nje̱. Tonga tsa tsín tijme xi kjuinrʼoénile kʼoa tsa tsín tichʼao kuinje̱ni, ñaki ndajin sa̱tío kon. Tikʼoasʼinni, ñaki nda sa̱tío tokoán kʼianga kjoaʼaxin Jeobá jme kjoa xi tiyojiaan ndʼaibi.

¹⁷ Jméni xi sʼe̱jnangajaole nga nʼio nikjáojiaan nichxin xi tiyoaa ndʼaibi. Ya Salmo 37:11 kʼoatso nga “je xi ndʼé tsʼee koa̱n i̱ sonʼnde, kʼoa ñaki kʼoetsaojin jokji nyʼán sʼin koatio”. A tsí kjoaixi nga nʼio tsjoánganʼioná jotsoná je Jeobá. Nga nʼio tse kjoanikjáojin tjín ndʼaibi, kʼoénelee yaoná nga chrian kuiyolee je Jeobá kao je jtínle. Kjitʼa si̱kjaʼaitsjeen je kjoachoya xi tjínná, nga̱ nʼio chjíle. Alikui jao kʼoé tokoán nga ñaki kʼoakoa̱n kʼoa chja̱kaonajmíñá xi kjaʼaí tʼatsʼe jmeni xi choyalee (1 Timoteo 4:15, 16; 1 Pedro 3:15). Tsa kʼoasʼiaan, kuinje̱ngilee yaoná kʼianga kjoeson sonʼnde jebi kʼoa nʼio tsjoa sa̱tío tokoán ngantsjai nichxin.