1, 2. 1) Jókitso je Elifaz kao Bildad tʼatsʼe josʼin be Niná kʼianga nixálee. 2) Jókitso je Jeobá tʼatsʼe jmeni xi kitso chjota jebi.

NICHXIN kjoatse, jan chjota kichokjákaonajmí jngo choʼndale Niná xi Job tsakʼin. Je xi Elifaz tsakʼin, itso xi kiskonangile je Job: “A koa̱nchjénle Niná jngo chjota. Ninga je xi tjínle kjoachjine, a koaanle koasenkao Niná. Je Niná xi ngisasa tse nganʼio tjínle, a tsjoa sʼe kon kʼianga kixi kjimai, axo jmé xi njele je Niná kʼianga kui ndiaa xi kixi tiʼmiyai” (Job 22:1-3). Je Elifaz kʼoasʼin kisikjaʼaitsjen nga tsín josʼin machjénlee je Niná. Xi kʼoati kichokjákaonajmí je Job jé xi Bildad tsakʼin. Kʼoakitso nga tsín jokoa̱nnile nga kixi skoe̱kon Niná je chjotasonʼnde (tʼexkiai Job 25:4). *

² Je Elifaz kao Bildad kui xi koanmele nga kʼoasʼin katasíkjaʼaitsjen je Job nga toxitsjoani nga je Jeobá tísíxále. Nga kʼoasʼin katamakjainle nga ngixko̱n Niná, yaa mangósoán joni tsa cho̱ndo kʼoa tsa cho̱kixo (Job 4:19; 25:6). A  kuinga nangitokon koan chjota jebi nga kʼoakitsoni (Job 22:29). Kjoaixi nga nʼio ngʼa tíjna je Jeobá tikʼoajinni ñá. Kʼianga ya tjen chotsenñá ya jngo sonnindo kʼoa tsa avión tiyoyá, majinná nga nʼio ʼndí kjoaan kʼoa nga tochoa chjíná. Tonga a kʼoasʼin bekonná je Jeobá kʼianga nixálee kʼoa nga bʼainganʼiolee je Chjotaxále. Mai. Je Jeobá kʼoakitsole je Elifaz, Bildad kao Zofar nga to énndiso jmeni xi kitso. Xijekoan, je Niná kʼoakitso nga ndatjín kon xi tʼatsʼe Job, kʼoa choʼndana kitsole (Job 42:7, 8). Kuinga tsín jao tjínniná nga bechjí Niná jmeni xi nʼia.

3. Jméni xi kitso je Elihú tʼatsʼe jokji bʼenelee yaoná kʼianga nixálee je Jeobá, kʼoa jókitsonile nga kʼoakitso.

³ Jngo ti xi Elihú tsakʼin, tínrʼoé kʼianga tjíofáonajmí je Job kʼoa kao nga jan chjota xi kichokonle. Kʼianga jekinchja̱ ngatsʼi, je Elihú itso xi kiskonangile je Job tʼatsʼe Jeobá: “Ningalani kixi kjimai, jméni xi kʼoailai Niná, axo jméni xi skoé xi tʼatsi tínroani” (Job 35:7). A kui xi kitsonile je Elihú nga toxitsjoani jokji bʼenelee yaoná kʼianga nixálee je Niná. Mai. Je Jeobá alikui tsakatekjáyale je Elihú, tojo kisikao je xi ngi jan. Kui xi kitsonile je Elihú nga tsín machjénle je Niná kʼianga kʼoétsʼoalee. Saʼnda likui jme xi machjénle xi tʼatsaan. Jmeni xi sʼiaan alikui kui xi ngisa nyiná sikao kʼoa tsa ngisasa tse nganʼio sʼe̱le. Jokjoaan kʼoa tojmeni xi maná nʼia xi ndatjín, tʼatsʼe Niná tínroani kʼoa je Niná kui kotsenle josʼin nichjén jebi.

4. Jósʼe kon je Jeobá kʼianga kui xi ndatjín kʼoanʼia tʼatsʼe xi kjaʼaí.

⁴ Je Jeobá be kʼianga bakolee kjoatsjoacha xi kixi je choʼndale. Kʼianga kui xi ndatjín kʼoanʼia tʼatsʼe choʼndale Niná, joxi jéni Niná xi kʼoatinikoaa. Proverbios 19:17 itso: “Je xi bakóle kjoanda je xi ma̱ tíjna jé Jeobá síkinyale, kʼoa jé tsjoángajaonile jmeni xi sʼín”. Je Jeobá be kʼianga bakolee kjoamatokon tsa ʼyani. Ningalani je kisinda ngayeje xi tjín, kʼianga kui xi ndatjín kʼoanʼia tʼatsʼe xi kjaʼaí joxi nikinyalee je Niná, kʼoa je kao kui bʼéchjíniná nga nʼio tse kjoanichikontʼain tsjoáná. Je ʼNdíle Niná kitsoyaa nga ñaki kʼoatjín jebi (tʼexkiai Lucas 14:13, 14). *

5. Jmé kjoachjonangi xi chótʼayajiaan.

⁵ Nichxin kjoatse, je Jeobá kʼoakitsole je profeta Isaías nga je katanchja̱ngajaole kʼoa nga katasíxále (Isaías 6:8-10). Je Isaías kao kjoatsjoa nga i̱ kitso: “I tijna. An tikasénnái”. Nichxin xi tiyoaa ndʼaibi, je Jeobá kʼoati tsole je choʼndale xi kixi tjíofitʼale nga katasíxákao. Jmi mani je ndsʼee xi kʼoatisʼin tjíonda joni je Isaías. Nkjín koya josʼin síxále je Niná, tjíondaa tojñani ni̱kasén ninga ñʼai ma sakʼoale. Tsakui nichxin sakʼoa i̱ bixoán:  “Tsjoaña kjoanda nga títsjoáʼndena je Jeobá nga tisixále. Tonga a chjíle jmeni xi sʼian. A tsí je Jeobá xosʼin nga tojo kuitjoson je xá xi kjima”. Nga koa̱njinná xi tʼatsʼe jebi. Kuila chótʼayajiaan jmeni xi kisʼin je choʼndale Jeobá xi Débora kao xi Barac tsakʼin.

6. Ánni nga kʼoasʼin koantsenni nga je chjotakjoajchánle Jabín ngotjo sikinjenile je chjota israelita.

⁶ Je Barac jé tsakasentítjonle chjotakjoajchán israelita, kʼoa je Débora tʼatsʼe Niná kinchja̱ya. Je rey cananeo xi Jabín tsakʼin 20 nó nga totaon tsabe je chjota israelita. Je chjotakjoajchánle Jabín nʼio tsʼen koan, saʼnda tjínkʼa je chjota israelita xi tsín kitso kon nga kitjo niʼyale. Je chjotakjoajchánle Jabín 900 koanni je karreta kjoajchánle xi ki̱cha̱ʼba̱ tjíotʼa ya ruedale. Tonga je chjota israelita tsín kisʼele ki̱cha̱ xi kisitoánntjaini yaole (Jueces 4:1-3, 13; 5:6-8). *

7, 8. 1) Jméni xi kitsole Jeobá je Barac nga sʼin. 2) Je chjota israelita, jósʼin kisikinjele chjotakjoajchánle Jabín (chótsenlai sén xi fitsʼiani kjoaʼmiya jebi).

⁷ Je chjotakjoajchánle Jabín alikui koanngóson kao chjota israelita, nga̱ je chjota israelita tsín kisʼele ki̱cha̱ xi kisitoánntjaini yaole, kʼoa ngotjojin koa̱n si̱kinjenile. Tonga je Jeobá jé Débora kisichjén nga kʼoakitsole je Barac je én jebi: “Tʼin ya nindo Tabor, kʼoa 10,000 chjota tʼinkoai xi tsʼe Neftalí kao Zabulón. Yaa kuichokaotʼale je Sísara, je xi séntítjonle chjotakjoajchánle Jabín, kao karreta kjoajchánle kʼoa kao chjotale ya xo̱ngá Cisón, kʼoa yaa yandsai tsjoaya” (Jueces 4:4-7).

⁸ Kisʼe én nga chjota machjén xi tsjoánganʼio. Kʼoa 10,000 chjota koanxkó ya nindo Tabor. Kʼoa je Barac kao xi 10,000 mani kikján kao chjotakontrale ya jñani Taanac tsakʼin (tʼexkiai Jueces 4:14-16). * A tsakasenkao Jeobá je chjota israelita. Jaon. Nga̱ toxijña tsakʼa jtsínʼio kʼoa ya jñani tjíokján ndási kixinya. Kui xi tsakinyakao je chjota israelita. Je Barac kitokatjenngile je chjotakjoajchánle Sísara saʼnda jñani Haróset tsakʼin, xi 24 kilómetro kjin tíjna. Kʼoa yaa yandiaa kisʼejnajinnʼio ndási je karretale Sísara. Kuinga kitjojenni karretale kʼoa kitokachjingaa saʼnda Zaananim. Yaa tsakʼejnaʼma ya ndʼianajñole jngo chjoón xi Jael tsakʼin. Nga nʼio kijtale, tokjoan kisʼefé. Kʼianga kijnafé, je Jael kiskoé kjoanʼiojin kʼoa kisikʼieen (Jueces 4:17-21). Jé Jeobá tsakasenkao je chjota israelita nga kisikinjele je chjotakontrale. *

9. Jméni xi tsoyaná Jueces 5:20, 21 jokoan kʼianga kiskan je chjota israelita kao Sísara.

⁹ Ya kapítulo 5 xi tsʼe Jueces tsoyasa  jmeni xi bʼéyanajmí ya kapítulo 4. Jueces 5:20, 21 itso: “Je niño kiskaan saʼnda tjen ngʼajmi, kiskaan kao Sísara saʼnda ya tjen jña kjio ndiaale. Yaa xo̱ngá Cisón kixjajin”. A kui xi tsonile jebi nga je ánkje tsakinyakao je chjota israelita kʼianga tjíokján, axo kui xi tsonile nga kui xi meteorito ʼmi kitsaoni ngʼá. Je Biblia alikui kʼoatso. Tonga nga je Jeobá tsakasenkao je naxinandále, jé xokisʼin nga kʼiakjoán tsakʼa jtsínʼio ya ʼnde jña tjíokján je chjota israelita kao chjotakontrale. Je karreta kjoajchán xi 900 mani, alikui tikoan josʼin kini. Ya Jueces 4:14, 15 jan kʼa síkʼaxki̱ nga je Jeobá tsakasenkao je chjota israelita nga kinjele je kjoajchán. Nijngojin je chjota xi 10,000 mani xi kʼoakitso nga totʼatsʼe nga kinjele.

10, 11. Jméni xi Meroz tsakʼin, kʼoa ánni nga kinokjoaʼaonnile.

¹⁰ Kataʼyala jmesani xi koan kʼianga kiskan je chjota israelita kao chjotakontrale. Kʼianga jekinjele kjoajchán je chjota israelita, je Débora kao Barac kisele je Jeobá nga tsakʼasjengʼa. Itso xi kise: “Tinókjoaʼaonlao je Meroz, kitso je ánkjele Jeobá, tinókjoaʼaonlao chjota xi ya tsʼe, nga̱ tsín tsakinyakao je Jeobá, tsín tsakinyakao je xi tjínle nganʼio xi tsʼe Jeobá” (Jueces 5:23).

¹¹ Jméni xi Meroz tsakʼin. Alikuikjoan ʼyaa jmeni. Tonga nga kinokjoaʼaonle ñaki tondiaa kicha. Tsakui nichxin je xotsakʼin jngo naxinandá xi tsín kitsjoanganʼiole je Barac kʼianga ki kjoajchán. Si̱kjaʼaitsjenla nga 10,000 mani chjota xi kitsjoanganʼio nga kikján kao chjota cananeo. Kʼoa je chjota xi Meroz tsʼe kʼoajinti kinrʼoé nga chjota machjén xi tsjoánganʼio. Je xi Meroz tsakʼin tsakuije̱ jngo naxinandá jñani jaʼa je Sísara kʼianga títokachjinga. Koanjin kitsoa tsakai, tonga tsín kʼoakisʼin. Si̱kjaʼaitsjenla jokisʼin je chjota xi ya tsʼe, nga tokiskotsenle je Sísara nga jaʼatojin je naxinandá kʼianga títokachjinga. ʼNdele nga je Jeobá tsjoánganʼiole chjota jebi, alikui jme xi kisʼin. Tsa kitsjoanganʼiolani, je Jeobá tsejin kjoanichikontʼain kitsjoale. Je chjota xi Meroz tsʼe alikui kʼoakisʼin jokisʼin je Jael nga nʼiojin koan (Jueces 5:24-27).

12. 1) Jméni xi tsín mangóson jokisʼin je chjota xi síkʼaxki̱ ya Jueces 5:9, 10. 2) Jmé xi tsoyaná jmeni xi koan.

¹² Ya Jueces 5:9, 10 kʼoatso nga je chjota xi 10,000 mani alikui kʼoakisʼin jokisʼin je chjota xi tsín kitsjoanganʼio. Je Débora kao Barac tsakʼasjengʼaa je xi tsakinyatítjonle naxinandá Israel xi kitsjoanganʼio. Alikui kʼoakisʼin jokisʼin je xi ngʼa tsakʼasje yaole nga kʼoasʼin kisikjaʼaitsjen nga tsín koa̱n kjoajchán koaijin. Je Biblia kʼoatso nga nʼio kisʼele tsojmi chjota jebi kʼoa nga nda tsakatio. Tonga je chjota xi kitsjoanganʼiole je Barac nga ki kjoajchán, ki ya nindo Tabor kao ya Cisón, jñani nangi ndási chon. Je xi to yaole kini kʼoa tsín ki kjoajchán, kʼoatsakʼinle nga katasíkjaʼaitsjenjin  nga kitjoʼndele tsakai nga je Jeobá kitsjoanganʼiole. Nichxin xi tiyoaa ndʼaibi, kʼoati machjén nga si̱kjaʼaitsjenjiaan jótjín tokoán nga tinixánilee je Jeobá.

13. Ánni nga tsín koanngósonni jokisʼin je ntje̱le Rubén, Dan kao Aser kʼoa kao jokisʼin je ntje̱le Zabulón kao Neftalí.

¹³ Je chjota xi 10,000 mani xi kitsjoanganʼio nga ki kjoajchán, tsabee nga je Jeobá xi batéxomale ngayeje. Koan kitsoyale xi kjaʼaí jmeni xi kisʼin je Jeobá (Jueces 5:11). Tonga je chjota xi ya kitjenni ntje̱le Rubén, Dan kao Aser ngisaa koanndosinle je barréle, chitso xi kisʼele kao jñani kisikáyo tikʼoajinni nga je Jeobá sixále (Jueces 5:15-17). Tonga tojosʼin tiʼyaa, alikui tongatsʼi nga kʼoakisʼin, je xi ya kitjenni ntje̱le Zabulón kao Neftalí, likui yaole kini nga kitsjoanganʼiole je Débora kao Barac (Jueces 5:18). Nʼio tse xi bakóyaná jokisʼin je xi kitsjoanganʼio kʼoa kao xi tsín kʼoakisʼin.

14. Nichxin xi tiyoaa ndʼaibi, jósʼin bakoá nga bʼainganʼioá nga toje Jeobá xi batéxomale ngayeje.

¹⁴ Nichxin xi tiyoaa ndʼaibi, alikui kjoajchán kjuian nga kʼoainganʼiolee je Jeobá. Bʼainganʼiolee kʼianga kao kjoanʼiojin kʼoa kao kjoatsjoa ʼmiyasoán. Nichxin xi tiyoaa ndʼaibi, ngisaa nʼio machjén nga si̱xálee je Jeobá. Miyón mani je ndsʼee kao tichjaa xi tjíonda nga ñaki to xále Niná tjíosʼín. Tobʼelañá, nkjín mani xi precursor sʼin tjíosíxá, xi Betel tjíosíxá kʼoa xi ya tjíotsjoánganʼio nga sʼenda Ndʼia jña chotʼayá. Kʼoa nkjín ndsʼee xi tsjoánganʼio nga satío kjoajtíntse. Tjínkʼa xi chjotajchínga sʼin tjío xi nʼio síxá xi ya tjíojin je Comités de Enlace con los Hospitales kʼoa xi ya tsjoánganʼio nga satío kjoajtíntse. Alikui jao tjínná nga bechjí je Jeobá nga kao kjoatsjoa nixálee. Alikuikʼia sichajin jokji tibʼenelee yaoná nga tinixálee (Hebreos 6:10).

15. Jósʼin jchañá tsa tsín titsjoa tjínniná nga tinixálee je Jeobá.

 ¹⁵ Machjén nga si̱kjaʼaitsjeen tsa ñaki kʼoatjín tokoán nga tinixálee je Jeobá. Chjónangilee yaoná jebi: “A tojé xi ngikʼa banele nga ngisa tse katasíxá. A ngisaa kui makjájonna nga nʼio nkjín tsojmi sʼe̱na tikʼoajinni tsa je Jeobá sixále. Axo bakoña nga tjínna kjoamakjain kao kjoanʼiojin nga kʼoasʼin sichjén ngayeje jmeni xi tjínna nga je Jeobá sixále, tojo kisʼin je Barac, Débora, Jael kʼoa kao xi 10,000 chjota xi kitsjoanganʼio. A kʼoasʼin tisikjaʼaitsjen nga xin naxinandá kjuía nga ngisa tse tao̱n kuinje̱na kʼoa nga ngisa ndasʼin koatejna. Kʼiatsa jaon, a sijéle je Jeobá nga katabasenkaona nga skoe jósʼin kʼoakaotʼale je familiana kao je jtín”. *

16. Ningalani tsʼe ngayeje je Jeobá, jméni xi koa̱n kʼoailee.

¹⁶ Je Jeobá kui kjoanda títsjoáná nga kʼoainganʼiolee nga je batéxomale ngayeje. Saʼnda nichxinle je Adán kao Eva, je Na̱i kui xi mele nga kontra katabatiole Jeobá je chjota. Tonga kʼianga je bʼainganʼiolee josʼin batéxoma Jeobá, bakolee je Na̱i nga je Niná bʼainganʼiolee. Nga tjínná kjoamakjain kʼoa nga kixi maa, kui xosíkaoná nga nixálee je Jeobá, kʼoa kʼoasʼin fayatsjoañá je ni̱ma̱le (Proverbios 23:15, 16). Kui bʼangini je Jeobá nga bʼainganʼiolee kʼoa nga nitjosonlee nga bʼékjaoʼakao je Na̱i (Proverbios 27:11). Kʼianga nitjosonlee je Jeobá, nʼio bechjí kʼoa nʼio tsjoa sʼe kon.

17. Jméni xi tsoyaná Jueces 5:31 tʼatsʼe jmeni xi koa̱n nichxin xi nroaján.

¹⁷ Jetochoasa chale nga toje koatio i̱ Sonʼnde chjota xi je Jeobá tsjoánganʼiole. Jemená nga kʼoakatama. Kʼoati tjío tokoán jokisatio kon je Débora kao Barac, xi i̱ kitso nga kise: “Kʼoasʼin katabiya ngatsʼi xi jtikeli Jeobá, kʼoa je xi tsjoakeli kʼoakatama joma nga bitjo je tsʼuí” (Jueces 5:31). Je én jebi kʼiaa kuitjoson kʼianga jekjoaʼaxin Jeobá je sonʼnde tsʼenle Na̱i. Kʼianga jekoaitsʼia je kjoajchán xi tsʼe Armagedón, je Jeobá alikui ñá sijéná nganʼio kʼianga sikjeson je kontrale. Alikui ñá kuixkan, tosaa tochótseen josʼin kʼoasjentjainá je Jeobá (2 Crónicas 20:17). Tonga nga kjesa kʼoamajin, kui kjoanda tjínná nga kao kjoanʼiojin kʼoa kao kjoatsjoa kʼoainganʼiolee je Jeobá.

18. Jósʼin kuinyakao xi kjaʼaí kʼiatsa ñaki tiyondaa nga je Jeobá si̱xálee.

¹⁸ Kʼianga jekinjele kjoajchán, je Débora kao Barac jé Jeobá tsakʼasjengʼa nga kise, ali tsa jejin chjota tsakʼasjengʼa. I kitso nga kise: “Xi totʼatsʼe je xi kao kjoatsjoa kitsjoanganʼio, chʼa̱sjengʼao je Jeobá” (Jueces 5:1, 2). Ñá kʼoati koa̱n kʼoasʼin si̱xálee Jeobá josʼin mele. Tsa kʼoasʼiaan, tsakui nichxin kʼoati sʼin xi kjaʼaí nga je Jeobá kʼoasjengʼa.