NICHXIN nginó, jmi mani testigole Jeobá xi tjío jngo tjíjtsa Sonʼnde xi kui xá tsakʼaile nga chjotajchínga kʼoa tsa siervo ministerial koatio ya jinjtín. Nʼiojin tsjoa tjín tokuin tsa ji xi kui xá tsakʼaili.

Tsakui nichxin nokjuin nga kui xá tsakʼaili, tonga toxá kʼoamani. Jngo ndsʼee xi sʼa xti xi chjotajchínga sʼin tíjna xi Jason ʼmi itso: “Kʼianga kʼoatsakʼinna nga chjotajchínga sʼin koatejna ya jinjtín kʼoasʼin kisikjaʼaitsjen nga likui kuitjosonna”. ʼYani xi kʼoati kisatio kon jéní Moisés kao Jeremías kʼianga kitsjoaxále je Jeobá (Éx. 4:10; Jer. 1:6). A sakʼoaa kʼoasʼe tokuin. Jmé xi koasenkaoli nga ngisa nda si̱tjosuin je xá xi tjínli ya jinjtín, kataʼyala choa̱le je Timoteo (Hech. 16:1-3).

Tsakui nichxin kʼia 20 nóle Timoteo kʼianga kikao Pablo nga kjin kikakóyason. Nga tosʼa choa nóle tochajinle kʼoasʼin kisikjaʼaitsjen nga tsín kuitjosonle je xá xi tsakʼaile ya jinjtín (1 Tim. 4:11, 12; 2 Tim. 1:1, 2, 7). Nga jete nó jaʼato, je Pablo itso xi kiskile je jtín xi tíjna ya Filipos: “Tonga tikoyale tsa mele Nainá Jesús, nga xítí sikasénno Timoteo [...]. Niʼyajin xi tjínna xi tikʼoasʼin ngóson tjínkon joni Timoteo” (Filip. 2:19, 20).

Je Timoteo nʼio nda kisitjoson je xále nga chjotajchínga sʼin tsakʼejna. Jókisʼinnile. Jósʼin koa̱n chjénngilai. Jaonla koya kataʼyaa.

1. Nʼio koanndosinle tʼatsʼe xi ngikʼa. Je Pablo kʼoakitsole je ndsʼe̱ xi tjío ya Filipos nga je Timoteo nʼio koankjáojinle xi tʼatsʼe (Filip. 2:20). Je Timoteo nʼio koanndosinle chjota, kui xi koanmele nga tsakasenkao xi ngikʼa nga nda katabatio ngixko̱n Niná, nʼio tsakʼénele yaole nga kʼoakisʼin ningalani tse kjoama̱ tsakʼéngi.

Ali kʼoajin nʼiai josʼín je chjota xi karro síxákao nga tokui fini nga ndi̱to̱n kuicho jñani fayo je karro tikʼoajinni nga chjota kʼoa̱. Je William, jngo ndsʼee xi jekan nó nga chjotajchínga sʼin tíjna, itsole xi tosa tsakʼaile xá ya jinnaxinandále Jeobá: “Tjao katamali je ndsʼee, kuenta tʼiain jmeni xi machjénle kʼoa ali tsa tokuijin ʼmini je xá xi kjineli”.

2. Kui títjon xále Niná kisikʼéjna. Je Pablo kʼoakitso nga je Timoteo alikui kʼoakisʼin josʼín xi ngikʼa, i kitso: “Ngatsʼi xikʼa básjai xi titsʼeni, ali tsa jejin xi tsʼe Cristo Jesús” (Filip. 2:21). Kʼianga kiski Pablo én jebi ya Roma, tsabe nga to xále tjíofini je ndsʼe̱ xi ya tjío kʼoa alikui tsakʼénele yaole nga kʼoakisʼin je xále Niná. Tonga je Timoteo nda kisixále Niná. Nʼio kitsjoale kjoandosin kʼianga kitsoyason, jé choa̱le Isaías kiskenngile, je xi i̱ kitso: “I tijna. An tikasénnái” (Is. 6:8).

Jméni xi koa̱n sʼiain nga koa̱n kuitjosonli je xá xi tsi kʼoa kao xi tsʼe Niná. Xi títjon, kuenta tʼiain jméni xi ngisa nʼio tjínle kjoandosin. Je Pablo kʼoakitso jméni xi ngisa nʼio tjínle kjoandosin (Filip. 1:10). Kui katamandosinli jmeni xi ngisa mandosinle Niná. Xi majaoni, tokatamanili josʼin nga kuijnai, alikuijin kʼoanʼiai jmeni xi to nichxin fáʼaná kʼoa kao  xi to nganʼioná nikjelee. Pablo i kitsole je Timoteo: “Tisenxinlai kjoaskáyale xti. Kʼoasʼin tʼinkoai yaoli kao xi kjoakixi, kao xi makjainná, kao xi kjoatjaocha, kao xi kjoanyʼántakon” (2 Tim. 2:22).

3. Nʼio tsakʼénele yaole nga kisixále Jeobá. Je Pablo i kitsole je chjota xi Filipos tsʼe: “Jetsaʼyao jo tjín kjoakixile Timoteo, joni tsa ʼndína, kʼoasʼin kisixákaona xi tʼatsʼe je énnda tʼatsʼe Cristo” (Filip. 2:22). Je Timoteo nʼio kisixá, ñatjen kitsoyason kao Pablo kʼoa kui xi tsakinyakao nga nʼio miyo koannile xínkjín.

Nʼio tse xá tjín ya jinnaxinandále Jeobá xi koa̱n kʼoasʼiain, xá jebi koasenkaoli nga tsjoa sʼe̱ tokuin kʼoa nga koa̱nchriantʼasalai je ndsʼee, kuinga tʼenenilai yaoli nga ngisa tse tixálai Niná (1 Cor. 15:58).

4. Kʼoakisʼin jmeni xi tsakʼinyale. Pablo itso xi kiskile je Timoteo: “Ji koanchoyali je kjoafaʼaitsjenna, josʼin tsakakoyale jo kisʼian, jme xi tsakʼamje kasje, josʼin koankjainna, josʼin kisikjen, josʼin koantsjoake, josʼin kichokjoana” (2 Tim. 3:10). Je Timoteo kʼoakisʼin jmeni xi tsakʼinyale kuinga koan kichotjenngini nga ngisa tse xá tsakʼaile (1 Cor. 4:17).

A tíjna jngo ndsʼee xi koa̱n si̱jélai kjoafaʼaitsjen. Je Tom, xi jekjoatse nga chjotajchínga sʼin tíjna, itso: “Jngo ndsʼee xi chjotajchínga sʼin tíjna xi jenʼio tjínle kjoafaʼaitsjen koanndosinle xi tʼatsʼan kʼoa je kitsoyana. Kjitʼa kisijéle kjoafaʼaitsjen kʼoa jmeni xi kitsoyana kʼoakisʼian, kui jebi xi tsakasenkaona nga kisʼejngo tokoan”.

5. Tosi tonda kiskotʼaya je Énle Niná. Pablo i kitsole je Timoteo: “Chʼa̱sjai nganʼioli xi tʼatsʼe nga jchaxkuín Niná” (1 Tim. 4:7). Je chjota xi síská tjínle ʼyani xi síkotʼaya, tonga kʼoati tjínnele skótʼaya nga toje. Je Pablo i kitsole je Timoteo: “Kʼoasʼin tʼexkiai, tʼenai, takoyai [...]. Chótʼayakoai je kjoabi, tokui xá tʼiain, jméni nga skoe̱síni ngatsʼi josʼin nga ʼmitítjuin” (1 Tim. 4:13-15).

Kʼoati machjénli nga tosi tonda si̱ndayai yaoli. Ali tobʼejngojin tokuin jmeni xi jemali, kʼoasʼin tʼintjenngi jmeni xi tso je naxinandále Jeobá. Ali to yaolijin ʼmini. Ali kʼoajinsʼin nikjaʼaitsjain nga jenʼio tjínli kjoafaʼaitsjen nga koa̱nli kʼoéndajin tojme kjoani ninga tsín kjoásjaiyai. Chjénngilai Timoteo, kuenta tʼiain jmeni xi chotʼayai kʼoa kao jmeni xi bakoyai (1 Tim. 4:16).

6. Kui nganʼiotsjele Jeobá kisinʼiotʼa. Nga kisikjaʼaitsjenjin Pablo josʼin kitsoyason Timoteo, i kitso: “Xi totʼatsʼe je Espíritu Santo xi tíjnajin ni̱ma̱ná, nda tʼejnatjoai je xi [tsakʼaili]” (2 Tim. 1:14). Nga koan kʼoakisʼin jebi Timoteo tjínnele nga kui kisinʼiotʼa josʼin bándiaa je nganʼiotsjele Niná.

Je Donald, xi jenʼio nkjín nó nga chjotajchínga sʼin tíjna, itso: “Je ndsʼee xi xá tjínle ya jinjtín, tjínnele nga chjí skoe̱kon kʼoa sikuinda josʼin tjío ngixko̱n Niná. ʼYani xi kʼoasʼín jé Jeobá tsjoále nganʼio. Kʼiatsa tsjoáʼnde nga je nganʼiotsjele Niná koandiaale kʼoa sʼe̱le je kjoanda xi tsjoá, nʼio ndasʼin koasenkao je ndsʼee” (Sal. 84:7; 1 Ped. 4:11).

Nʼio tsjoa maná nga nkjín ndsʼee xi chriansʼa tsakʼaile xá ya jinjtín nga nda tjíosíxále Niná. Je Jason xi kanikʼaxki̱ná i̱ kjoaʼmiya jebi, itso: “Jokjitse nga chjotajchínga sʼin tijna, nʼio tse jmeni xi kjimajinna kʼoa ndʼaibi ngisaa tjínjngo tokoan. Tsjoa mana nga kui xá tjínna kʼoa chjí ʼbekoan”.

Tosi tonda kʼoatʼiain je xále Niná. Tʼenelai yaoli nga tʼintjenngi je choa̱le Timoteo, kʼiatsa kʼoasʼiain nʼio ndasʼin kuisenkoai je naxinandále Niná.