1, 2. 1) Jméni xi sʼín je chjota nga mele ndái koatio. 2) Jósʼin bichómani.

NICHXIN xi tiyoaa ndʼaibi, je chjota kui nʼio nchja̱ni tʼatsʼe nga mele ndái koatio kʼoa nga tongóson sʼin kataʼyatokon. Kui xi mele je chjota nga tsín tikjoañʼai kjoaʼani, nga tsín chʼa̱sjengi kʼoa nga tsín tima̱ sijcháni yaole. Tjínkʼa xi kui mele nga tjóʼndele nga kʼoakuitso josʼin síkjaʼaitsjen kʼoa nga kʼoasʼin tojmeni xi mele.

² Kʼianga mele ndái koatio je chjota, marcha batío, kjoasi sʼe kʼoa saʼnda kjoajchán bichómani. Ninga kʼoasʼín alikui nda batio, to kjoañʼai faʼá kʼoa saʼnda biyaa kʼa. Tíbitjoson jmeni xi kitso je rey Salomón, kʼianga itso xi kiski: “Je chjota tjíobatéxomale xínkjín nga tjíosíkiʼaon” (Ecl. 8:9).

3. Jméni xi sʼiaan nga ñaki tsjoa sa̱tío tokoán.

³ Je Santiago kʼoakitso jmeni xi tjínnele sʼiaan nga nda sa̱tío tokoán. Kʼoakitso nga nda chótʼayajiaan “je kjoatéxoma xi ñaki kjoakixi, xi síkʼéyondaíná” (Sant. 1:25).  Jé Jeobá kitsjoa kjoatéxoma jebi kʼoa jé xi ngisa nda be jmeni xi machjénná nga tsjoa sa̱tío tokoán kʼoa nga ndasʼin kuiyoaa. Tobʼelañá, je Adán kao Eva kitsjoale ngayeje jmeni xi koanchjénle nga tsjoa sa̱tío kon kʼoa kitsjoale kjoandái.

4. Jmé kjoandái xi kisʼele je Adán kao Eva (chótsenlai sén xi fitsʼiani kjoaʼmiya jebi).

⁴ Je xi títjon jao kapítulo xi tsʼe Génesis kui tsoya jokoanchon ya ʼndenaxó, nga nʼio kisʼe tsojmi xi ma chine, tsín jme kjoajkon kisʼe kʼoa tsín jme kjoañʼai kisʼe. Je Adán kao Eva alikui jme xi kisikjáojin tʼatsʼe xá, chʼin kao kjoabiya (Gén. 1:27-29; 2:8, 9, 15). A koan kʼoakisʼin tojmeni xi koanmele. Kataʼyala.

5. Jméni xi machjén nga ndái sʼin kuiyoaa.

⁵ Tjínkʼa chjota xi kʼoasʼin síkjaʼaitsjen nga je xi ñaki kjoandái ʼmile kui tsoyanile nga ma kʼoanʼia tojmeni xi mená. Jngo enciclopedia xi kʼoatso nga je xi kjoandái ʼmile kui tsoyanile nga “ñá chjoejiaan jmeni xi mená sʼiaan” (The World Book Encyclopedia). Tonga kʼoati tso nga sʼele kjoandái je chjota kʼiatsa tjen ndiaale je kjoatéxoma xi bʼasje je chjotaxá. Jebi kui xi tsonile nga tsín koa̱n nga ñaki to tjóʼndená kʼoasʼiaan tojmeni xi mená. Tonga ʼyáni xi koa̱n kʼoakuitso jmeni xi tjen ndiaale nga kʼoasʼin je chjota.

6. 1) Ánni nga toje Jeobá xi tiʼndenile nga kʼoasʼin tojmeni xi mele. 2) Jmé kjoandái tjínná xi chjotaa, kʼoa ánni.

⁶ Nʼio tjínle kjoandosin nga kataʼyaa nga toje Jeobá xi tjínle ʼnde nga kʼoasʼin tojmeni xi mele, nga̱ jé kisinda ngayeje jmeni xi tjín, nʼio tjínle nganʼio kʼoa jé batéxoma ya ngʼajmi kao i̱ Sonʼnde (1 Tim. 1:17; Apoc. 4:11). Tokuila si̱kjaʼaitsjeen jotso én xi kiski je rey David, xi ya tjítʼa 1 Crónicas 29:11, 12 * (tʼexkiai). Testo jebi kʼoatso jokji jeya tíjna je Jeobá kʼoa je kjoandái xi tjínle alikui mangóson kao je kjoandái xi tjínle xi tjío ya ngʼajmi kao Sonʼnde. Machjénní nga jchaa nga toje Jeobá xi tjínle ʼnde nga kʼoakuitso jmeni xi kixi tíjna. Kʼianga kisinda je chjota xi títjon tsakatio kʼoasʼin tsakʼéndajin jmeni xi kixi tíjna kʼoa jmeni xi mai.

7. Tikʼaxki̱ kʼai jmeni xi toxá tjínneniná nga kʼoasʼiaan kʼoa xi basenkaoná nga tsjoa satío tokoán.

⁷ Kʼianga sʼa koannda Adán kao Eva nʼio tse kjoandái kisʼele, tonga je Jeobá kʼoati kitsole jmeni xi tsín koa̱n kʼoasʼin. Tobʼelañá, nga koa̱n koatiokon tjínnele nga skénjta, koakjen kʼoa kjoáyofe. Kʼoa nga kui jebi tjínnele kʼoasʼin alikui kʼoasʼin kisikjaʼaitsjen nga tsín kisʼele kjoandái, nga̱ je Jeobá kʼoasʼin tsakʼéndajin nga tsjoa sa̱tíole nga kʼoasʼin jebi nga nyaon nyaon (Sal. 104:14, 15; Ecl. 3:12, 13). A tsí kjoaixi nga tsjoachaa ngatsʼiaa nga chjenjtá je ntjao̱ xi tsje, nga bichaa kʼoa nga nikjáyaa. Alikui ñʼai maná nga kʼoanʼia jebi, tosaa kao kjoatsjoa kʼoanʼiañá, kʼoajinti kisatio kon je Adán kao Eva.

8. Jmé kjoatéxoma kitsjoale Jeobá je Adán kao Eva, kʼoa ánni nga kui kjoatéxoma kitsjoanile.

 ⁸ Je Jeobá kui kjoatéxoma kitsjoale je Adán kao Eva nga katasʼele xti kʼoa nga katasíkuinda Sonʼnde (Gén. 1:28). Kʼianga kui kjoatéxoma tsakʼaile, alikui kui xi tsonile nga tsín tikisʼenile kjoandái, nga̱ je kjoatéxoma jebi kitsjoaʼndele ngatsʼi chjota nga kʼoasʼin josʼin tjínndajinle Niná nga sonʼndenaxó katasíkao i̱ Sonʼnde kʼoa nga koa̱n koatio ngantsjai nichxin (Is. 45:18). Nichxin xi tiyoaa ndʼaibi, je xi tsín mele bixan kʼoa je xi tsín mele nga xti sʼe̱le, alikui kontra batiole jmeni xi mele Niná. Ninga kʼoalani, nʼio nkjín chjota xi bixan kʼoa xi sʼele xti ninga tse kjoa batiojin (1 Cor. 7:36-38). Kui kʼoasʼínni nga̱ kui xi mele nga tsjoa sa̱tío kon (Sal. 127:3). Tojosʼin tiʼyaa, je Adán kao Eva koan ndasʼin tsakatio ngantsjai nichxin kao xtile.

9. A tsín kixi tíjna je kjoatéxoma xi kitsjoa Niná tojo tso ya Génesis 2:17.

⁹ Je Jeobá ijngo kjoatéxoma kitsjoale Adán kao Eva kʼoa kʼoakitsole jmeni xi koa̱nle kʼiatsa tsín sitjoson, i kitsole: “Je tole yá xi tsʼe kjoankjíntokon xi ndatjín kao xi chʼaotjín, alikui koa̱n chi̱nai, nga̱ nichxin nga kui chi̱nai, kuiyání” (Gén. 2:17). A tsín kixi tíjna je kjoatéxoma xi tsakʼaile. A tsín tikitsjoaʼndenile nga ndái tsakatio. Nʼio nkjín chjota xi kʼoatso nga tjen ndiaale jmeni xi tsakʼinle je Adán kao Eva. Tobʼelañá, jngo chjota xi tʼatsʼe Biblia kotʼayason kʼoatso nga ya Génesis 2:16, 17 kui bakóyaná nga “tojé Niná xi be jmeni xi nda [...] sikatío je chjota kʼoa jmeni xi mai [...]. Kʼianga ndasʼin koatio je chjota tjínnele nga Niná sinʼiotʼa kʼoa nga sitjosonle. Tsa tsín kʼoasʼin, tojejin kʼoa̱ yaole nga skoéjin jmeni xi ndatjín [...] kʼoa jmeni xi mai”. Tonga alikui kʼoakoa̱nle je chjota nga kʼoasʼin nga̱ tsínkui xá koanndani.

10. Kʼianga tjínná kjoandái, a kui xi tsonile nga ñá kʼoakuixoán jmeni xi ndatjín kʼoa jmeni xi mai.

¹⁰ Nichxin xi tiyoaa ndʼaibi, nʼio nkjín chjota xi kʼoatso nga je kjoatéxoma xi kitsjoale Niná je Adán kao Eva tsakʼéchjoale nga kʼoakisʼin jmeni xi koanmele. Tonga jebi alikui kʼoatjín. Alikui mangóson nga tjínná kjoandái kao nga ñá kʼoabixoán jmeni xi ndatjín kʼoa jmeni xi mai. Je Adán kao Eva kisʼele kjoandái nga kiskoejin tsa je Niná sitjosonle kʼoa tsa mai. Tonga tojé Jeobá xi tiʼndele nga kʼoakuitso jmeni xi ndatjín kʼoa jmeni xi mai. Jebi kui kitsoyanile je “yá xi tsʼe kjoankjíntokon xi ndatjín kao xi chʼaotjín” xi kisasenjna ya ʼndenaxóle Edén (Gén. 2:9). Tjínnele kuenta sʼiaan nga tsín tongantsjai nga ndasʼin bichómani kʼoa tsa koasenkaoná jmeni xi chjoéjiaan. Kuinga nʼio tse kjoa batiojinni je chjota ninga ndatjín male jmeni xi kjoéjin (Prov. 14:12). Kʼoa kui kʼoamani nga tochoa bichó kjoafaʼaitsjenná. Kʼianga kjoatéxoma kitsjoale Jeobá je Adán kao Eva kui tsakakóyale nga tjínnele sitjosonle ánni nga sʼe̱ kjoaixinile je kjoandái. A kisitjoson.

11, 12. Ánni nga tsín ndasʼin kichomani jmeni xi kiskoejin Adán kao Eva. Jngo choa̱ tʼejnai.

¹¹ Je Adán kao Eva alikui kisitjosonle Niná. Je Eva kisasenle nga i̱ kitsole je Na̱i: “Tjóxʼángi xkon kʼoa koa̱nngósonño kao Niná, nga jchao xi ndatjín  kao xi chʼaotjín” (Gén. 3:5). Je Adán kao Eva alikuini ndái tsakatio. Jmeni xi kitsole je Na̱i alikuini kʼoasʼin kitjoson. Nga tsakʼasjengi jmeni xi kitsole Niná kʼoa nga toje tsakʼa yaole tsee kjoa tsakatiojin (Gén. 3:16-19). Ánni. Kuinga tsín kʼoasʼin kisinda Jeobá je chjota nga je skoéjin jmeni xi ndatjín kʼoa jmeni xi mai (tʼexkiai Proverbios 20:24; * Jeremías 10:23 *).

¹² Kataʼyala choa̱le jngo chjota xi avión síxákao. Kʼianga nda kuicho je avión ya ʼnde jñani tífi, je chjota xi tísíxákao kui fitjenngi josʼin tjínnele koa̱nxákao je avión kʼoa sítjoson jmeni xi tsole je chjota xi tjíosíkuinda jñani kuichokajna je avión. Tonga tsa tsín koaitjenngi chjota jebi jmeni xi ʼmile kʼoa tsa tokʼoasʼin koaikao je avión josʼin mele, nʼiojin tse kjoa kuichomani. Jmeni xi kisʼin Adán kao Eva yaa mangóson kao je choa̱ jebi. Nga tsakʼasjengi jmeni xi kitsole Niná alikui ndasʼin kichomani, nga̱ jée kisʼele kʼoa kjoabiya kichomani, kʼoa kʼoati kui jebi kisikakinle je ntje̱le (Rom. 5:12). Nga kʼoakisʼin josʼin koanmele kisichaa je xi ñaki kjoandái ʼmile.

13, 14. Jósʼin nga ñaki ndái kuiyo ijngokʼá.

¹³ Nʼio nkjín chjota xi kʼoasʼin síkjaʼaitsjen kʼianga ngisa ndasʼin koatio kʼiatsa tse kjoandái tjínle. Tonga jebi yaa mangóson joni je ki̱cha̱ xi nʼio yao. Kjoaixiní, kʼianga tjínná je kjoandái tsee kjoanda tjenkao. Tonga jósʼin koatio je chjota tsa to tjóʼndeyejele jmeni xi sʼin. Je enciclopedia xi kanikʼaxki̱ná ya párrafo 5 kʼoatso nga ngatsʼi naxinandá toxá tjínnile kjoatéxoma xi binyakao je chjota tonga xi kʼoati batéchjoale tsa jmeni. Nʼio nkjín mani je kjoatéxoma xi bʼasje chjota, kʼoa nkjín abogado kao jues machjén nga kuitjoson je kjoatéxoma jebi.

 ¹⁴ Je Jesús kʼoakitso josʼin koa̱n sʼe̱ná je xi ñaki kjoandái ʼmile, i kitso: “Tsa énna si̱kitjosonntsjao, jon nío xi ñaki chjotana. Jchanío xi kjoakixi, kʼoa je xi kjoakixi sikatíondaíno” (Juan 8:31, 32). Kʼianga kjuintjenngiaa je kjoafaʼaitsjen jebi, jao koya tjínni xi sʼiaan. Xi títjon, nga koa̱nkjainná je kjoakixi xi tsakakóya kʼoa xi majaoni, nga chjotale katamaa. Kʼiatsa kʼoasʼiaan jebi, ñaki ndái sʼin kuiyoaa. Je Jesús i kitsosa: “Ngatsʼi xi bajngi jée, síxángile jée. Kʼia tsa kʼoasʼin je ʼndíle Niná sikatíondaíno, ñaki kjoakixi nga kuiyondáo” (Juan 8:34, 36).

15. Ánni nga ñaki ndái sʼin sikatíoniná je Jesús.

¹⁵ Je kjoandái xi kitsole Jesús je chjotale nga tsjoále, alikui mangóson je kjoandái xi mele sʼe̱le chjota nichxin xi tiyoaa ndʼaibi. Kʼianga kʼoakitso je Jesús nga ñaki ndái sikatíoná kui xi kitsonile nga tsín tichoʼndale jée koa̱nñá. Je jée xi kichʼá kui xosíkaoná nga kui kʼoanʼia xi chʼaotjín kʼoa kʼoati tsín tsjoáʼndená nga kui kʼoanʼia xi ndatjín. Kui xi tsonile nga choʼndale jée maa, nʼio tse kjoañʼai síkatíojinná kʼoa saʼnda kjoabiya bichókaoná (Rom. 6:23). Je pastro Pablo nda koanjinle josʼin tíjna nga choʼndale jée maa (tʼexkiai Romanos 7:21, 24, 25). * Tokʼiaa nga jendái kuiyolee je jée nga sʼe̱ ijngokʼaná je kjoandái xi kisicha je Adán kao Eva.

16. Jmé xi sʼiaan nga ñaki ndái sʼin kuiyoaa.

¹⁶ Kʼianga kʼoakitso Jesús nga tjínnele si̱tjosoán je énle kui xi kitsonile nga tjín xi machjén nga sʼiaan ánni nga ndái sikatíoniná. Ñá xi chjotale maa xi jetsakʼaitʼalee yaoná, alikui toñá mangínñá yaoná kʼoa nitjosonñá jmeni xi kitsole Jesús je chjotale (Mat. 16:24, TNM). Tojo kitso je Jesús, ñaki ndái sʼin kuiyoaa kʼianga so̱koná je kjoanda xi tjenkao je kjoabʼechjíntjai.

17. 1) Jméni xi ndasʼin sikatíoná kʼoa xi tsjoa koaya tokoán. 2) Jméni xi chótʼayajiaan ya kjoaʼmiya xi ijngo.

¹⁷ Kʼiatsa si̱tjosoán jmeni xi kitso Jesús ndasʼin kuiyoaa kʼoa ñaki ndái sʼin kuiyolee je jée kao kjoabiya (tʼexkiai Romanos 8:1, 21). * Je kjoaʼmiya xi ijngo kui chótʼayajiaan jósʼin si̱chjén je kjoandái xi tjínná ndʼaibi nga jchaxkoán ngantsjai je Jeobá, je Niná xi tsjoá kjoandái.