Kʼianga én hebreo koaan jao koya josʼin koa̱njinná. Je xi fisani kui tsoyaná jokjoansʼin tínchja̱ni.

1. Jotso je én xi faʼaitʼasa je salmo jebi. Kʼianga kui én síchjén xi “kuinga” tso ya bersíkulo 12, kui xi tsonile nga je kjoanichikontʼain xi síkʼaxki̱ ya bersíkulo 12 saʼnda 14 nga je xoʼmile je chjota xi kixi, je xi kʼoasʼin síjé nga chʼa̱sjentjai tʼatsʼe chjotatsʼen (bersíkulo 11). Kʼoa ya bersíkulo 15, nga jngo naxinandá xi “nʼio tsjoa tjínle” síkʼaxki̱, tojo jé nchja̱ni chjota xi kixi, je chjota xi “Ninále mani je Jeobá”.

2. Je bersíkulo jebi mangóson kao xi kjaʼaí testole Biblia xi kui nchja̱ni je kjoanichikontʼain xi kʼoaile naxinandále Niná. Je salmo jebi kui nchja̱ni je kjoachoya xi kisʼele David. Kʼianga jetsakʼasjentjai Niná je naxinandá Israel, kisichikontʼain nga tsjoa kisatio kon kʼoa ndasʼin tsakatio (Lev. 26:9, 10; Deut. 7:13; Sal. 128:1-6). Tobʼelañá, Deuteronomio 28:4 itso: “Koa̱nchikontʼain je xtili kʼoa koa̱nchikontʼain je tsojmintjeli, koa̱nchikontʼain je ʼndíle cho̱ntjeli kʼoa koa̱nchikontʼain je nra̱ja̱ʼndíli kʼoa kao je barréʼndíli”. Kʼianga tsakatéxoma je Salomón, xi tile koanni je David, je naxinandá ndasʼin tsakatio kʼoa lijme kjoajchán kisʼele. Saʼnda kui kitsoyanile josʼin koatio je chjota kʼianga jekoatexoma je Jesús i̱ Sonʼnde (1 Rey. 4:20, 21; Sal. 72:1-20).

Tojosʼin tiʼyaa, je Salmo 144 kui tsoya jmeni xi jenʼio kjoatse tjíokoyale je choʼndale Niná: nga kjoaʼaxin Niná je chjotatsʼen, nga kjoanyʼán kjoaʼaíkao kʼoa nga nʼio nda kuiyoaa ngantsjai nichxin (Sal. 37:10, 11).