1, 2. 1) Jméni xi nʼio koankjáojinle je chjota kʼianga nichxinle Pablo. 2) Tojo kitso Pablo, jñá nroani xi ñaki kjoandái ʼmile.

JE CHJOTA xi ya Roma tsakatio nʼio ngʼa koanle nga kisitoánntjai je kjoatéxoma, nga kisitoánntjai xi kixi tjín kʼoa nga ndái katabatio je chjota. Tonga je nganʼio kao kjoajeya xi kisʼele chjota jebi totʼatsʼení nga nʼio nkjín xi choʼndale kisikao. Nga kui nichxin, kʼianga jan chjota jngoo xi choʼnda kinikao. Je xi toxkia chjota kʼoa kao chjotale Cristo xi ya tsakatio nʼio koankjáojinle xi tʼatsʼe nga choʼnda kinikao je chjota kʼoa nga tsín kisʼele kjoandái.

² Je Pablo nʼio kinchja̱ni tʼatsʼe kjoandái. Tonga ali tsakuijin tʼatsʼe kjoandái xi mele je chjota nga kui nichxin. Je Pablo kao chjotale Cristo xi ngikʼa nʼio tsakʼénele yaole nga kitsoyale je chjota xi tʼatsʼe Chjotaxále Niná kʼoa jokji chjíle je kjoabʼechjíntjaile Cristo. Je Pablo kʼoakitsole je ndsʼe̱ jña nroani xi ñaki kjoandái. Tobʼelañá, je karta xi majaoni xi kiskile je chjotale Cristo xi ya Corinto tsakatio kʼoakitsole nga Jeobá espírituní, kʼoa i kitsosale: “Jña nga tjín je Espíritu Santo xi tsʼe Nainá, [...] tjín kjoandaí” (2 Cor. 3:17).

3, 4. 1) Jméni xi kitso Pablo nga kjesa síkʼaxki̱jin jmeni xi tso 2 Corintios 3:17. 2) Jméni xi sʼiaan nga ndasʼin si̱chjén je kjoandái xi kitsjoaná Jeobá.

 ³ Xi tikuini karta xi kiskile Pablo je chjotale Cristo xi ya tsʼe Corinto, kʼoakitsole jmeni xi koanle je Moisés kʼianga jetsakjákao je ánkjele Jeobá ya nindo Sinaí. Je nkjaín ñaki koanfate. Kʼianga tsabe je chjota israelita kitsokjon kʼoa je Moisés jngoo najño tsakʼéʼmani nkjaín (Éx. 34:29, 30, 33; 2 Cor. 3:7, 13). Je Pablo kʼoakitso nga je chjota xi síkʼófayatʼanile Jeobá, jngoyale tjoxin “je najño xi kjijtsa” (2 Cor. 3:16). Jósʼin tsoyanile jebi.

⁴ Tojosʼin tsaʼyaa ya kjoaʼmiya xi jaʼato, tojé Jeobá xi tjínle kjoandái nga kʼoasʼin tojmeni xi mele, nga̱ jé kisinda ngayeje jmeni xi tjín. Kuinga tjínni kjoandái ya jñani tíjna Jeobá. Nga koasenkaoná je kjoandái xi tsjoá tjínnele nga si̱chriantʼalee, xi tsonile nga je si̱miyoaa. Je chjota israelita xi ya tsakʼetsoma ya ʼndekixí alikui kʼoasʼin kisikjaʼaitsjen josʼin síkjaʼaitsjen je Jeobá. Jngoyale jngo najño kisʼejtsa kjoafaʼaitsjenle kao ni̱ma̱le, nga̱ tokʼoasʼin kisichjén je kjoandái xi kisʼele nga kui kʼoakisʼin jmeni xi kisimekon (Heb. 3:8-10).

5. 1) Jmé kjoandái xi tsjoáná je Jeobá. 2) Jómani ʼyaa nga koa̱n sʼe̱le kjoandái xi tsjoá Jeobá saʼnda je chjota xi choʼnda sʼin tjío kʼoa kao xi ndoyá tjíoʼya. 3) Jmé kjoachjonangi xi chótʼayajiaan i̱ kjoaʼmiya jebi.

⁵ Je kjoandái xi tsjoáná je Jeobá alikui mangóson kao kjoandái xi tjínná. Nga̱ ndái síkatíoná xi tʼatsʼe jée kao kjoabiya kʼoa kʼoati ndái tibiyolee je relijión ndiso kʼoa kao kostumbre xi tjínle. Tsa toñá, alikui koa̱nná nga kʼoasʼin kuiyoaa (Rom. 6:23; 8:2). Kjoandái jebi nʼio naskánatjín, saʼnda je chjota xi choʼnda sʼin tjío kʼoa kao xi ndoyá tjíoʼya koaan ndái koatio (Gén. 39:20-23). Kʼoakoan je ndsʼee Eric Frost kao ndsʼee Horst Henschel, nkjín nó nga ndoyá kinikatíoʼya xi totʼatsʼe kjoamakjainle. Koaan chótsenlee kʼoa kuinóʼyalee josʼin bʼéyanajmí ya JW Library (VIDEOS > ENTREVISTAS Y EXPERIENCIAS > SE ENFRENTAN A PRUEBAS). I̱ kjoaʼmiya jebi kui chótʼayajiaan kjoachjonangi jebi: Jósʼin bakoá nga ʼyachjiá je kjoandái xi tjínná, kʼoa jméni xi sʼiaan nga ndasʼin si̱chjén.

6. Jósʼin tsakakó je chjota israelita nga tsín tsabechjí je kjoandái xi kitsjoale Jeobá.

⁶ Kʼianga ʼya xi jngo kjoatjao tsjoáná bʼailee kjoanda. Je chjota israelita alikui tsabechjí je kjoandái xi kitsjoale Jeobá nga tsakʼaonsjeni ya Egipto. Kʼianga jejaʼato jngo jao sá nga kinikatíondái nga choʼnda sʼin tjío, kui kisimekon je tsojmi xi ma chine kʼoa jmeni xi kiʼyo ya Egipto kʼoa tsín kisasenle jmeni xi je Jeobá kitsjoale. Saʼnda kʼoakitso nga mele koai ijngokʼani ya Egipto. Kui ngisa kisimekon je jti̱, pepino, sandía, oxo̱ kao tontsjo tikʼoajinni je kjoandái xi kisʼele nga je Jeobá kʼoetsʼoale. Kuijin nga nʼio koanjtinile Jeobá xi kao chjota israelita (Núm. 11:5, 6, 10; 14:3, 4). Nʼio tjínle kjoandosin jmeni xi tsoyaná choa̱ jebi.

7. 1) Jósʼin kisitjoson Pablo je kjoafaʼaitsjen xi kitsjoa ya 2 Corintios 6:1. 2) Jósʼin koa̱n kjuintjenngiaa je kjoafaʼaitsjen jebi.

⁷ Je pastro Pablo kʼoakitsole je chjotale Cristo nga tsín to katabʼéjngole kon tʼatsʼe kjoandái xi tsjoáná je Jeobá xi totʼatsʼe Jesucristo (tʼexkiai  2 Corintios 6:1). * Je Pablo alikui nda kisʼe kon nga choʼndale jée kao kjoabiya koan. Tosaa kui kitjenngi je kjoafaʼaitsjen xi kitsjoa nga i̱ kitso: “Tsjoale kjoanda Niná xi totʼatsʼe Jesucristo Nainá”. Kʼoa i kitsosa: “Je kjoatéxoma xi tsʼe Espíritu Santo, je xi tsjoá kjoabijnachon, nga tiyokoaa Cristo Jesús. Kisikʼéjnandaínina kjoatéxoma xi tsʼe jée, kʼoa xi tsʼe kjoabiya” (Rom. 7:24, 25; 8:2). Ñá, kʼoati tsín koa̱n tokʼoéjngoaa tokoán nga ndái kisikatíoná Jeobá xi tʼatsʼe jée kao kjoabiya. Kʼoa nga tsakʼéchjíntjainá koaan nda sʼe̱ tokoán nga si̱xálee (Sal. 40:8).

8, 9. 1) Jmé kjoafaʼaitsjen kitsjoa je pastro Pedro tʼatsʼe josʼin nichjén je kjoandáiná. 2) Jmé kjoa xi bitjatojiaan ndʼaibi.

⁸ Kʼianga bʼailee kjoanda Niná tʼatsʼe kjoandái xi kitsjoaná, kʼoati chósonnilee nga tsín chʼaosʼin si̱chjén je kjoandáiná. Je pastro Pedro kʼoakitso nga tsín koa̱n kʼoasʼin si̱chjén je kjoandái xi tjínná nga tokui kʼoasʼiaan jmeni xi nʼio nimetokoán (tʼexkiai 1 Pedro 2:16). * Jebi kui síkjaʼaitsjenjinná jmeni xi kisʼin chjota israelita nga tsakʼetsoma ya ʼndekixí. Ndʼaibi, ngisaa nʼio machjén nga si̱kuindaa yaoná nga̱ je Na̱i kao sonʼndele kui tsjoátʼaná jmeni xi nʼio nimetokoán, jolani tsa najño, tsojmi xi ma chine, xi ʼyoá, kjoasʼetsaojin kʼoa xi kjaʼaísanile, kʼoa je síchjén chjota xi nʼio ʼyale tojoni nga kui kuindá jmeni xi tsínni ñaki machjénná. Nʼio choa ñʼai tíjna nga ska̱yaa che̱n jebi kʼoa nga chʼaosʼin si̱chjén je kjoandáiná.

⁹ Je kjoafaʼaitsjen xi kitsjoa Pedro kʼoati nʼio machjénná josʼin tinijchá yaoná, jolani jmeni xi chotʼayá kʼoa kao xáná. Tobʼelañá, je xi sʼa xti nʼio sʼenele ya ndʼiaskuela ánni nga koa̱n ya skótʼayani ya universidad xi nʼio ʼyale. Kʼoaʼmile nga ngisa nda xá so̱kole kʼoa nga ngisa nda kuinjele kʼiatsa ngʼa skuela skótʼaya. Kʼoati ʼmile nga je chjota xi ya kotʼaya universidad jebi ngisaa nda njele tao̱n tikʼoajinni je xi xin kotʼaya. Tsakui nichxin kui nʼio símekon je xi sʼa xti nga kʼoaʼmile, tonga jmeni xi skoéjin kui xi kuitsoni josʼin koatio nga koa̱nskanni. Jméni xi kuenta sʼin je xi sʼa xti kʼoa kao xijchále.

10. Jméni xi kuenta sʼiaan kʼianga tjín xi chjoéjiaan.

¹⁰ Tjínkʼa chjota xi kʼoatso nga tiʼndená nga ñá kʼoakuixoán jmeni xi mená sʼiaan tsa tsjoáʼndená je kjoafaʼaitsjenná. Tsakui nichxin kui síkjaʼaitsjen jmeni xi kitsole Pablo je chjota xi Corinto tsʼe tʼatsʼe tsojmi xi chinee, nga i̱ kitso: “Jmé chjíle kjoandaína tsa kʼoasʼin sʼe̱le kjoañʼai xi totʼatsʼe kjoafaʼaitsjenle xi kjaʼaí” (1 Cor. 10:29). Kjoaixi nga tiʼndená nga ñá chjoéjiaan jmeni xi chótʼayá kʼoa jme xá xi sʼiaan. Tonga kuenta sʼiaan nga sakʼoa likui nda bichómani jmeni chjoejiaan. Kuinga i̱ kitsoni Pablo: “Ngayije tjoʼndená, tonga likui ngayije machjénná. Ngayije tjoʼndená, tonga likui ngayije nda síkinngʼaná” (1 Cor. 10:23). Jebi basenkaoná nga ʼyaa kʼianga tsínkui xi nʼio chjíle jmeni xi toñá mandosinná.

11. Jmé xá kisikatíondáininá je Jeobá.

¹¹ Kʼianga kʼoakitso Pedro nga tsín chʼaosʼin si̱chjén je kjoandáiná, kʼoati  kitso nga ngisa ndatjín nga kʼoasʼin si̱chjén nga Niná si̱xálee. Je Jeobá, jé Jesús kisichjén nga ndái kisikatíoná xi tʼatsʼe jée kao kjoabiya ánni nga toje si̱xánilee.

12. Jmé choa̱ xi tsakʼéjnaná je Noé kao familiale.

¹² Kʼianga nʼio kʼoailee kjoandosin je xále Niná, kui xi koasenkaoná nga tsín chʼaosʼin si̱chjén je kjoandái xi tjínná, nga tsín choʼndale koaan jmeni xi nimetokoán kʼoa jmeni xi tjín sonʼnde (Gál. 5:16). Kataʼyala je choa̱le Noé kao familiale. Ningalani nʼio chʼao kisʼin kʼoa tsʼen koan chjota nga kui nichxin, je Noé kao familiale alikui kui kisimekon jmeni xi koanndosinle je chjota. Jméni xi tsakinyakao. Kuinga kui kʼoakisʼin jmeni xi kitsole Jeobá, nga tsakʼénda je arca, nga tsakinyáxkó je tsojmi xi ski̱ne kʼoa kao xi tsjoále je cho̱ kʼoa nga tsakájinkon je chjota jmeni xi koa̱n. Je Biblia itso: “Je Noé kʼoakjoán kisʼin ngayeje jmeni xi tsakʼénele Niná. Ñaki kʼoakjoán kisʼin” (Gén. 6:22). Je Noé kao yaniʼyale kitjontjaile yaole nga kʼoakisʼin (Heb. 11:7).

13. Jmé xá xi tíbánená je Jeobá.

¹³ Jmé xá xi tíbánená je Jeobá. Ñá xi chjotale Cristo maa ʼyañá nga kui xá tíbánená je Jeobá nga kʼuínyasoán (tʼexkiai Lucas 4:18, 19). * Nichxin xi tiyoaa ndʼaibi, me ngatsʼi je chjota nga je Na̱i tíbʼéchjoangi kjoafaʼaitsjenle kʼoa choʼnda sʼin tjíole je relijión, xi tʼatsʼe tao̱n kʼoa kao jmeni xi chon sonʼnde (2 Cor. 4:4). Ñá tjínná kjoanda nga je Jesús timangíntjenngilee kʼoa nga tibisenkoaa je chjota nga katabe xi tʼatsʼe Jeobá kʼoa katasíxále, je Niná xi tsʼe kjoandái (Mat. 28:19, 20). Xá jebi alikui choa ñʼai tíjna. Tjín naxinandá  jñani je chjota tsín timandosinnile tʼatsʼe Niná kʼoa saʼnda tsʼeen kʼa. Koaan si̱kjaʼaitsjenjiaan tsa koa̱n kʼoasʼin si̱chjén je kjoandái xi tjínná nga ngisasa tse si̱xálee Niná.

14, 15. Jméni xi tjíosʼín kʼa je choʼndale Jeobá (chótsenlai sén xi fitsʼiani kjoaʼmiya jebi).

¹⁴ Nʼio tsjoánganʼioná nga ʼyaa nga nʼio nkjín choʼndale Jeobá xi kjimajinle nga jenʼio chrian tíjna je kjoafetʼa kʼoa to kjimanile josʼin tjíosíjchá yaole nga ñaki to xále Niná tjíosʼín (1 Cor. 9:19, 23). Tjínkʼa xi tojo ya tjío ya ʼndele kʼoa tjínkʼa xi ya tjíotsjoánganʼio jñani ngisa machjén xi tsoyason. Je xi aon nó tífaʼato tsʼato 250,000 ndsʼee xi precursor sʼin tjíosíxá. Ndʼaibi jetsʼato 1,100,000 mani xi kʼoasʼin tjíosíxá. Nʼio ndasʼin tíbichómani nga kʼoasʼin tinichjén je kjoandáiná nga je Jeobá nixálee (Sal. 110:3).

¹⁵ Jméni xi tjíobinyakao je ndsʼee jebi. Kataʼyala je choa̱le John kao Judith. Je xi 30 nó tífaʼato, jenkjín naxinandá kikakóyason. Je ndsʼee kʼoatso jmeni xi tsakʼinle kʼianga tosʼa kisʼejnatítjon je Skuela xi tsʼe Precursor nga nó 1977, kʼoatso nga kʼoatsakʼinle je xi ki skuela jebi nga ya katafitsjoánganʼio jñani ngisa machjén xi tsoyason. Je John kʼoatso nga nkjín kʼa kisikʼantjaiya je xá xi sʼín nga tokoannile josʼin tsakʼejna kʼoa nga tsín kisikʼéjna je xá xi tsʼe precursor. Xi koanskanni, xin naxinandá kikakóyason. Kʼianga jeya tjío, nkjín koya jmeni xi ñʼai koanle, tonga kʼoati tsabe josʼin tsakinyakao je Jeobá kʼianga tsakʼétsʼoale kʼoa nga je kisinʼiotʼa yaole, jolani nga koanle je én xi kjaʼaí, nga koanngale josʼin beni chjota kʼoa nga koanngale jochon je ʼnde. Jósʼin tsakasenkao ndsʼee jebi jokji nó tífaʼato nga Jeobá tjíosíxále. Je John itso: “ʼBeña nga kui xá xi ngisa ndatjín xi tisʼian. Ñaki tsen mana nga tíjna je Jeobá, jngoyale jngo nʼai xi nʼio tsjoake xtile. Ndʼaibi ngisaa nda majinna jmeni xi tso Santiago 4:8, nga itso: Tichriantʼalao Niná, kʼia kʼoati je sichriantʼano nga jon. Tokui jebi xi tsjoa bʼé tokoan kʼoa ʼbeña jme xá tijnaña”.

16. Jósʼin tjíosíchjén je kjoandái xi tjínle je ndsʼee.

¹⁶ Tjínkʼa ndsʼee xi tsín kʼoamale nga ñaki to xále Niná sʼín. Tonga nʼio nkjín xi tjíonda nga ya fitsjoánganʼio nga sʼenda ndʼia jñani ʼyaxkón je Jeobá. Tobʼelañá, 27,000 koanni ndsʼee xi kisixá nga kisʼenda je oficina xi tíjnatítjon xi tsʼe testigole Jeobá ya Warwick (Nueva York). Tjínkʼa xi to jao xomana kichotsjoánganʼio, tjínkʼa xi nkjín sá ki, kʼoa tjínkʼa xi jngo nó kʼoa tsa tsʼatosa kisíxá. Nʼio nkjín ndsʼee jebi xi kisikatío choatse jmeni xi tjíosʼín nga ya kitsjoánganʼio. Ngatsʼi nʼio nda choa̱ tsakatíoná nga nda si̱chjén je kjoandáiná nga je Jeobá chʼa̱sjengʼaa kʼoa jchaxkoán.

17. Kʼiatsa ndasʼin si̱chjén je kjoandái xi kitsjoaná Niná, jméni xi choyalee nichxin xi nroaján.

¹⁷ Nʼio bʼailee kjoanda je Jeobá nga ʼyaa xi tʼatsʼe kʼoa nga tjínná kjoandái nga ma bʼetsʼoalee. Koakoá nga chjí ʼyaa je kjoandái xi kitsjoaná. Kʼoasʼin si̱chjén je kjoandái xi tjínná nga je Niná si̱xálee jokji tjen kʼoakoa̱nná. Tsa kʼoasʼiaan, so̱koná je kjoanda xi tsjoáná Niná. Je Biblia itso: “Ngayije xi kisʼenda sonʼndebi, kuitjondaíle je kjoa xi kʼoasʼin bʼénʼiole xi tofitson. Kʼoaile nga kʼoéyondaí kao kjoajeya xi tsʼe ʼndíle Niná” (Rom. 8:21).