1, 2. Ánni nga nʼio kisikjáojinni je Jesús.

NICHXIN nga tokʼoatjínsa tsakʼejna je Jesús i̱ Sonʼnde nʼio kisikjáojin. Nga̱ tojeme tsoa̱ je chjotakontrale nga sikjaʼá kjoañʼai josaʼnda nga sikʼien. Tonga je xi ngisa koankjáojinle je Jesús kuinga nda kʼoéjna ngixko̱n Nʼaile nga̱ nʼio tsjoake. Je Jesús be nga ndasʼin kuichomani tsa ska̱le je kjoañʼai xi kjoaʼatojin. Nga̱ kʼoasʼin kuitjotsjeni je jaʼaínle Niná. Xi ijngosani, tsjoake koan je chjota, kʼoa be nga tsa kixi koa̱n saʼnda nga ni̱kʼien kʼoasʼin sokoniná je kjoanda nga koa̱n kuiyoaa ngantsjai nichxin i̱ Sonʼnde.

² Ninga nʼio tse kjoañʼai tsakʼejnajin je Jesús tojo nyʼán kisʼe kon. Kʼoa nga tongini i kitsole je chjotatjenngile: “Josʼin nga nyʼán tijna, kʼoasʼin tsjoano” (Juan 14:27). Kisʼele je “kjoanyʼántakonle Niná”, xi tsonile, nda kisʼe kon nga nda tíjna ngixko̱n je Jeobá. Nyʼán kisʼe je kjoafaʼaitsjenle kao ni̱ma̱le (Filip. 4:6, 7).

3. Jméni xi chótʼayajiaan i̱ kjoaʼmiya jebi.

³ Ñá xi chjotaa likuijinkʼia ska̱ná je kjoañʼai xi tsakjaʼá je Jesús. Tonga ngatsʼiaa xi chjotale Cristo maa toxá tse kjoañʼai kuitjátojinñá (Mat. 16:24, 25, TNM; Juan 15:20). Kʼoajinti sakʼoa nʼio si̱kjáojiaan joni je Jesús. Jmé xi machjén nga sʼiaan nga tsínkui kjoanikjáojin kjoaʼaná je kjoanyʼán xi tjínná. Janla koya chótʼayajiaan jme xi kisʼin je Jesús kʼianga kitsoyason kʼoa jósʼin chjénngilee kʼianga kjoa kuitjátojiaan.

4. Tojo tso 1 Tesalonicenses 5:17, jósʼin ʼyañá nga nkjín kʼa tsakʼétsʼoa je Jesús nichxin xi tokʼoatjínsa tsakʼejna i̱ Sonʼnde.

⁴ (Tʼexkiai 1 Tesalonicenses 5:17). * Kʼianga tokʼoatjínsa tsakʼejna je Jesús i̱ Sonʼnde, nkjín kʼa tsakʼétsʼoa. Kʼianga tsakakóyale je chjotatjenngile josʼin sikjaʼaitsjenya je kjoabiyale, títjon tsakʼétsʼoa kʼoa kʼiaa kitsjoale je nioxtila, kʼoa kʼoati kisʼin kʼianga kje tsjoájinle je vino (1 Cor. 11:23-25). Kʼoati tsakʼétsʼoa kʼianga jekini ya ʼnde jñani tsakʼéjna je sʼuí Paxko (Juan 17:1-26). Kʼoa kʼianga jekicho ya nindo xi Olivos ʼmi nkjín kʼa tsakʼétsʼoa (Mat. 26:36-39, 42, 44). Kʼoa ninga kʼia nga toje kuiyá kʼoati tsakʼétsʼoale je Nʼaile (Luc. 23:46). Tojosʼin tiʼyaa, jé Jeobá tsakʼétsʼoale Jesús tʼatsʼe jmeni xi koan nichxin nga tokʼoatjínsa tsakʼejna i̱ Sonʼnde.

5. Ánni nga tsín nʼiojin koanni je chjotatjenngile Jesús.

⁵ Xi tsakasenkao je Jesús nga kiskale ngayeje kjoa xi jaʼatojin, kuinga je Nʼaile tsakʼétsʼoale nga kisijéle nganʼio. Tonga je chjotatjenngile alikui kʼoakisʼin nga kui nitje̱n, kuinga tsín nʼiojin koanni kʼianga jekicho ora nga kichotʼayakao (Mat. 26:40, 41, 43, 45, 56). Xi bakóyaná jebi kuinga tokʼia kixi koaan tsa kjitʼa kʼoétsʼoaa tojo kisʼin je Jesús. Jméni xi koa̱n si̱jé kʼianga kʼoétsʼoaa.

6. Jósʼin koasenkaoná je kjoamakjain nga nyʼán sʼe̱ tokoán.

⁶ Koaan si̱jélee je Jeobá nga tsesa kjoamakjain katatsjoáná (Luc. 17:5; Juan 14:1). Nga̱ kui xi kuinyakaoná ngatsʼiaa kʼianga  skótʼayakaoná je Na̱i (Luc. 22:31). Kui kjoamakjain koasenkaoná nga nyʼán sʼe̱ tokoán ninga kjitʼa kjoa kuitjátojiaan. Ánni. Nga̱ yaa ntsja Jeobá si̱kʼéjnayaa jmeni xi tsín kʼoakoa̱nná ñá kʼoéndajiaan. Tjínjngoo tokoán nga je Jeobá ngisa koa̱nle nda kʼoendajin tikʼoajinni ñá, kʼoa koasenkaoná nga nyʼán sʼe̱ kjoafaʼaitsjenná kao ni̱ma̱ná (1 Ped. 5:6, 7).

7. Jmé xi bakóyaná jme xi bʼéyanajmí je Robert.

⁷ Je kjoabʼetsʼoa basenkaoná nga nyʼán sʼe tokoán ninga tojme kjoa xi bitjatojiaan. Kataʼyala choa̱le je Robert, jngo xi chjotajchínga sʼin tíjna ya jinjtín xi 80 nóle. Je ndsʼee jebi nʼio nda tísíxále Jeobá kʼoa bʼéyanajmí jme xi basenkao nga nyʼán sʼe kon, itso: “Jokjitse jetisijchá yaona, je kjoafaʼaitsjen xi tsjoá ya Filipenses 4:6, 7 kui xi tíbasenkaona nga tíchókjoajinna jme kjoa xi tifaʼatojian. Xi ñʼai kjimana kui je kjoale tao̱n, kʼoa kisʼe nichxin nga tsín tichjotajchínga sʼin tsakatejnaña”. Je ndsʼee jebi itsosa: “Jé Niná bʼetsʼoale kʼianga jme xi sikjáojian. Kʼianga ngisa kjitʼa bʼetsʼoa ngisaa nyʼán sʼe tokoan”.

8. Tojo tso ya Juan 8:29, ánni nga nyʼán kisʼeni kon je Jesús.

⁸ (Tʼexkiai Juan 8:29). * Je Jesús nyʼán kisʼe kon ninga chjota kitjenngike. Ánni. Kuinga be nga tsjoa tsakáya kon je Nʼaile. Kisitjosonle je Nʼaile ninga kʼia nga tse kjoa  jaʼatojin. Nga tsjoake koan je Jeobá, nʼio kitsjoale kjoandosin nga je kisixále. Nga kjesa faʼaijin i̱ Sonʼnde, jé tsakasenkao je Nʼaile nga kisinda jmeni xi tjín (Prov. 8:30). Kʼoa kʼianga jaʼai i̱ Sonʼnde kao kjoatsjoa kitsoya jokjoantjínni xi tʼatsʼe Nʼaile (Mat. 6:9; Juan 5:17). Nʼio tsjoa kisʼe kon nga kʼoakisʼin (Juan 4:34-36).

9. Jósʼin basenkaoná nga nyʼán satío tokoán kʼianga ʼmiyasoán.

⁹ Jé Jesús chjenngilee nga nitjosonlee je Jeobá kʼoa nga kʼoanʼia jotso je Biblia, nga tso: “Ngisa tse tixásalao Nainá ngantsjai” (1 Cor. 15:58). Je chjotale Cristo xi nʼio bʼénele yaole nga tsoyason alikui kui nʼio síkjáojin je kjoa xi tjínle (Hech. 18:5). Ánni. Nga̱ je chjota xi ʼmiyasonlee ngisaa tse kjoa faʼatojin tikʼoani ñá. Tonga kʼianga jebe tʼatsʼe Jeobá kʼoa nga kui xi ndatjín kʼoasʼín, ngisaa nda batio kʼoa ngisaa tsjoa satío kon. Kʼoa kʼianga kʼoama, ngisaa sʼejngo tokoán nga je Niná sikuindaná. Kʼoa kui xi basenkaoná nga nyʼán satío tokoán. Kui xi tíbasenkao jngo tichjaa xi depresión tjínle kʼoa xi kʼoasʼin síkjaʼaitsjen sakʼoa nga tsín jme chjíle. Itso: “Nga nʼio xinyasoan kui xi basenkaona nga nda sʼe tokoan kʼoa tsjoa sʼena. Kʼoa ngisaa machriantʼale je Jeobá nga kʼoasʼian”.

10. Jmé xi bakóyaná jotso je Brenda.

¹⁰ Kataʼyala choa̱le je tichja xi Brenda ʼmi. Je tichjaa kao tsotiʼndíle kui chʼin xi esclerosis múltiple ʼmi tjínle. Je Brenda silla de ruedas síchjén kʼoa choaa nganʼio tjínle. Kʼianga kʼoamale xki̱ ndʼia xki̱ ndʼia tsoyason, tonga je xi ngisa sʼín kuinga carta kji. Itso: “Kʼianga koanjinna nga tsín koa̱nnda nichxin xi tiyoaa ndʼaibi, ngisaa kitsjoale kjoandosin nga kixinyasoan. Nga xinyasoan chajinna je kjoanikjáojin xi tjínna. Kui xi basenkaona nga fakaonajmíña Énle Niná je chjota jñani bʼakaole tsoyason je jtín. Nga kʼoasʼian kui xi basenkaona nga kui sikjaʼaitsjen je kjoachoya xi tjínná”.

11-13. 1) Jósʼin tsakakó nga miyole koanni je Jesús je pastrole kao xi ngikʼa chjotatjenngile. 2) Jósʼin tsakinyakao je miyole Jesús.

¹¹ Kʼianga kitsoyason je Jesús kʼoati nkjín kjoa jaʼatojin. Tonga je pastrole xi kixi kitʼale, tsakakó nga ñaki miyole koanni, joni je xi síkʼaxki̱ Proverbios 18:24, jñani tso: “Tíjnaa jngo miyo xi ngisa tsjentʼalee tikʼoajinni jngo xi ñaki ndsʼee mani”. Je Jesús nʼio chjí tsabekon je miyole. Nga kui nichxin nijngojin xi ndsʼe̱ mani xi koankjainle tʼatsʼe (Juan 7:3-5). Kʼoa ñandia nga kʼoasʼin kisikjaʼaitsjen je xínkjín nga koanskáyale (Mar. 3:21). Tonga je chjotatjenngile xi kixi kitʼale alikui kʼoakoankjoan. Jngo nitje̱n tongini nga jeni̱kʼien je Jesús i kitsole: “Jonño xi tsakiyokaonáo ngantsjai kʼianga kichotʼayakaona” (Luc. 22:28, TNM).

¹² Sakʼoaa tsín nda kisʼin je chjotatjenngile, tonga alikui kui nʼio kuenta kisʼin jñani kisatengi, tosaa kui kuenta kisʼin nga kisʼele kjoamakjain (Mat. 26:40; Mar. 10:13, 14; Juan 6:66-69). Kʼianga tokʼoatjínsa tsakʼejnakao je chjotatjenngile xi kixi kitʼale, i kitsole: “Miyona kixinno, nga̱ kʼoasʼin kixinyano ngayije kjoa xi kinrʼoele Nʼaina” (Juan 15:15). Je miyole nʼio kitsjoanganʼiole, kʼoa josʼin tsakinyakao nga kitsoyason nʼio tsjoa kisʼe kon je Jesús (Luc. 10:17, 21).

¹³ Ali tsa tojejin pastrole xi miyole koanni, kisʼesale miyo xi kjaʼaí, xi xʼin kao xi yánchjín xi tsakinyakao nga kitsoyason. Tjínkʼa xi  kʼoakitsole nga kikjenkao ya niʼyale (Luc. 10:38-42; Juan 12:1, 2). Kʼoa tjínkʼa xi kikao nga xin ʼnde kitsoyason kʼoa kitsjoale jmeni xi tjínle (Luc. 8:3). Ánni nga nʼio nda kisʼinni je miyo xi kisʼele Jesús. Kuinga kʼoati tsakasenkao tsanda je. Tsakasenkao kʼoa alikui nʼio tse jmeni xi kisijéle. Ningalani chjotajée koan je miyole Jesús, kitsjoale kjoanda josʼin tsakinyakao. Kʼoa alikui jao tjínná nga nʼio tsakasenkao je Jesús nga nyʼán kisʼe kon.

14, 15. 1) Jmé xi machjén nga sʼiaan nga sʼe̱ná miyo. 2) Jósʼin kuinyakaoná.

¹⁴ Je miyo xi nda sʼín binyakaoná nga kixi mangíntʼalee je Jeobá. Tsa mená nga sʼe̱ná je miyo, machjén nga ñá títjon si̱miyoaa (Mat. 7:12). Tobʼelañá, je Biblia kʼoatso nga chʼa̱sjeʼaa je nichxinná nga kuinyakoaa je xi ngikʼa, ngisaa je xi nganʼio machjénle (Efes. 4:28). Si̱kjaʼaitsjeen je ndsʼee xi nganʼio machjénle ya jinjtín. Tobʼelañá, tsa jngo ndsʼee xi ñʼai male nga jña fi, koa̱njin tsa ñá kjuinkindálee jmeni xi machjénle. Tsakui nichxin kʼoati koa̱n kʼoailee xi ski̱ne je familia xi ñʼai kjimale tao̱n. Tsa maná nichjén je página jw.org^® kao aplicación JW Library^® koa̱njin kuinyakao kʼaa je ndsʼee ya jinjtín nga kʼuínyalee josʼin nichjén. Tsa kuinyakoaa xi kjaʼaí, tsjoajin sa̱tío tokoán (Hech. 20:35).

¹⁵ Je miyo xi sʼe̱ná kuinyakaoná kʼianga kjoa kuitjátojiaan kʼoa nga nyʼán sʼe̱ tokoán. Tojo kisʼin je Elihú nga kinrʼoéle jmeni xi koankjáojinle je Job, je miyoná kʼoati kjuinrʼoéná nga kʼoéyanajmílee jmeni  xi makjáojinná (Job 32:4). Ningalani tsín je kʼoakuitsoná jmeni xi sʼiaan, nda koasenkaoná tsa kuinóʼyalee je kjoafaʼaitsjen xi tsjoáná xi ya Biblia yʼangini (Prov. 15:22). Kʼoa kʼianga kjoa kuitjátojiaan, kjuintjenngiaa je choa̱le rey David, nga tsínkui kjoangʼakon kisikinjele, kitsjoaʼnde nga tsakinyakao je miyole (2 Sam. 17:27-29). Je miyo xi kʼoasʼín jngoo kjoatjao xi je Jeobá tsjoáná (Sant. 1:17).

16. Tojo tso Filipenses 4:6, 7, tʼeyanajmí jósʼin nga nyʼán sʼe̱ tokoán.

¹⁶ (Tʼexkiai Filipenses 4:6, 7). * Ánni nga kʼoatsoni je Jeobá nga totʼatsʼe je Jesús sʼe̱niná je kjoanyʼán xi tsjoá. Kuinga tokʼia nyʼán sʼe̱ tokoán kao ya jinni̱ma̱ná kʼiatsa sʼe̱ná kjoamakjain kʼoa koa̱njinná jme xá xi tjínle je Jesús nga kuitjoson jmeni xi tjínndajinle je Niná. Tobʼelañá, sínʼio tokoán nga majinná nga chatʼa je jéená xi totʼatsʼe nga tsakʼéchjíntjainá je Jesús (1 Juan 2:12). Kʼoa xi ijngosani, tsjoáná kjoachoya nga ʼyaa nga je Jesús Rey sʼin tíjnale je Chjotaxále Niná kʼoa nga kjoaʼaxin tojme kjoañʼai xi kuitjátojiaan xi totʼatsʼe je Na̱i kao jmeni xi chonle sonʼnde (Is. 65:17; 1 Juan 3:8; Apoc. 21:3, 4). Kʼoa sínʼiojinná nga ʼyaa kʼianga je Jesús tíbasenkaoná nga tíbitjosonná jme xá xi tíbánená nichxin fetʼa xi tiyoaa ndʼaibi (Mat. 28:19, 20). Nga ʼyaa xi tʼatsʼe Jesús, sínʼio tokoán, sʼená kjoachoya kʼoa nʼiojin maa, kʼoa kui jebi xi binyakaoná nga nyʼán sʼe tokoán.

17. 1) Jmé xi koa̱n sʼin jngo chjotale Cristo nga nyʼán sʼe̱ kon. 2) Tojo tso Juan 16:33, jósʼin kuichomani tsa kʼoasʼiaan.

¹⁷ Tojosʼin tiʼyaa, tsa chjénngilee je Jesús kui xi kuinyakaoná nga nyʼán sʼe̱ tokoán kʼianga tse kjoa kuitjátojiaan. Xi títjon, ntsjaintsjai kʼoétsʼoaa. Xi majaoni, si̱tjosonlee je Jeobá kʼoa kao kjoatsjoa kʼuínyasoán ninga kjoa kuitjátojiaan. Kʼoa xi majanni, kʼoaiʼndee nga kuinyakaoná je miyoná. Tsa kʼoasʼiaan, je kjoanyʼán xi tsjoá Niná sikuinda je kjoafaʼaitsjenná kao ni̱ma̱ná. Kʼoa joni je Jesús, chókjoajinná nga kuitjátojiaan tojme kjoani (tʼexkiai Juan 16:33). *