KʼIANGA nichxinle Pablo, alikui kisʼe chitso xi ñaki kui xá kisʼin nga chjota kitsokjón. Kʼianga tjín jña ki je chjota, títjon kiskonangi jñani bitjo je chitso xi chʼá bʼa kʼoa kjonangi tsa koa̱n nga ya kʼoéjnaya (Hech. 21:2, 3). Ninga tsínkjoan ya tífi je chitso ʼnde jña tífi je chjota, maa kui fikao kʼoa jñani bichókajna yaa kjoé ijngo xi bichókaochrian ʼnde jña tífi (Hech. 27:1-6).

Alikui tongantsjai nga kitjo je chitso kʼoa alikui jngokjoan hora tjínle jochon kitjo. Sakʼoaa tsín kitjo je chitso kʼiatsa tsín nda chon, kʼoa tjínkʼa je chjota xi kʼoasʼin kisikjaʼaitsjen nga tsín koa̱n kuitjo je chitso kʼiatsa jngo nraa tíse xi ya tíjnason je chitso kʼoa tsa chxʼoále chitso beje̱. Je chjota xi chitso kisixákao tokʼiaa kikao je chitsole tsa kʼoasʼin kitjen je ntjao̱ josʼin tjíofi. Kuinga je chjota xi chitso koanmele tsakʼejnaya nga tjín jña ki, yaa ki jñani bitjo je chitso kʼoa yaa kiskoya saʼnda nga kitjo jngo chitso.

Je chjotachjine xi Lionel Casson ʼmi, itso: “Je chjota xi Roma tsʼe ndasʼin tsakʼéndajin josʼin kitjo je chitso, ánni nga tsín ñʼai koannile je chjota xi chitso koanmele kikao kʼianga tjín jña ki. Yaa kitjoni je chitso jña tíjna je xo̱ngá Tíber. Kʼoa ya naxinandá Ostia jngo ʼnde kisʼejna jñani nʼio nkjín oficina kisatio. Xinxin ʼnde ki je chitso xi ya kitjo: xi ya tsʼe Narbona [jñani Francia ʼmi ndʼaibi], xi ya tsʼe Cartago [jñani Túnez ʼmi ndʼaibi], [...] kʼoa nkjínsa ʼnde jñani ki. Je chjota xi chitso kikao nga tjín jña ki, yaa oficina kikjonangi jñánile je chitso xi kitjo”.

Nga chitso tsakʼemakao je chjota ngisaa ngotjo kichoni jñani ki, tonga kʼoati xkón sʼin tsakʼema. Tobʼelañá, je pastro Pablo nkjín kʼa kiskangindá je chitso xi tsakʼejnaya kʼianga kjin kikakóyason (2 Cor. 11:25).