1, 2. Ánni machjénni nga koanchjíntjé.

CHJOTATSJE koan tsakai je Adán. Tonga kʼianga tsakajngijée, kisichaa je kjoanda xi kisʼele nga koa̱n kʼoéjna ngantsjai nichxin. Kʼoa kʼoati kisicha kjoanda jebi je xtile. Bakinle je Adán nga kinikʼien, nga̱ toxá kisʼinni nga tsakajngijée. Tonga je xtile alikui je tjínle jée jmeni xi kisʼin je Adán (Rom. 5:12, 14). Jméni xi kisʼin je Jeobá nga koa̱n koatio ngantsjai nichxin je xtile Adán. Kʼoakitso josʼin kʼoasjentjai xi tʼatsʼe jée kao kjoabiya (Gén. 3:15). Je Jeobá kʼoakitso nga je ʼNdíle sikasén nga “tsjoá kjoabijnachonle nga nkjín chjota kʼoechjíntjai” (Mar. 10:45, TNM; Juan 6:51).

² Kʼianga kʼienntjainá je Jesús kʼoasʼin tsakʼéchjíni jmeni xi kisicha je Adán (1 Cor. 15:22). Ánni machjénni nga kʼoasʼin koanchjíntjé. Kuinga kʼoatso je kjoatéxomale Jeobá nga tjínnele kjoabijnachon kʼoaingajaoni tsa kjoabijnachon kicha (Éx. 21:23, 24). Nga chjotatsje koan tsakai je Adán kʼoati machjén nga chjotatsje xi kʼoechjíntjainá. Kuinga koanchjénni nga je Jesús kitsjoa kjoabijnachonle nga̱ kʼoati chjotatsje tsanda je (Rom. 5:17). Nga kʼoakisʼin, Nʼaile mani ngantsjai xi makjainle nga tsakʼéchjíntjainá (Is. 9:6; Rom. 3:23, 24).

3. Tojo tso Juan 14:31 kao 15:13, ánni nga tsakʼéchjíntjaininá je Jesús.

³ Kitsjoaa kjoabijnachonle je Jesús nga̱ nʼio tsjoake je Nʼaile kʼoa kʼoati nʼio tsjoakená tsanda ñá (tʼexkiai Juan 14:31; * 15:13 *). Kʼoati kui kjoatsjoacha xokisikao nga  kixi kitʼanile Niná saʼnda nga kʼien kʼoa kisitjoson josʼin mele je Nʼaile. Nga kʼienntjainá je Jesús, kʼoasʼin kuitjosonni jmeni xi mele je Jeobá saʼnda ngasʼa xi tʼatsʼe chjota kao tʼatsʼe Sonʼnde. I̱ kjoaʼmiya jebi kui jchaa ánni kitsjoaʼndeni Niná nga kʼoasikji kjoañʼai tsakjaʼá je Jesús nga kjesa biyajin. Kʼoati chótʼayajin choaa tʼatsʼe pastro Juan, xi nʼio tsabechjí nga tsakʼéchjíntjainá je Jesús. Kʼoa xi tofetʼani, kui chótʼayajiaan jméni xi sʼiaan nga ngisasa chjí jchatokoán jmeni xi kisʼin je Jeobá kao Jesús xi totʼatsaan.

4. Tʼeyanajmí josʼin kinikʼien je Jesús.

⁴ Cha̱niyala jkoaa jokoan nga tokʼoatjínsa tsakʼejna je Jesús i̱ Sonʼnde. Koanjin nga je ánkje kisijéle nganʼio, tonga alikui kʼoakisʼin, tosaa kitsjoaʼnde kʼianga kitsoa je sondado romano (Mat. 26:52-54; Juan 18:3; 19:1). Je nʼó xi tsakichon ñaki tsakʼasjekaya yaole. Kʼoa xijekoan, jngo yá xi nʼio ai kinikásonxja. Je Jesús yaa kichokao yá jebi saʼnda jñani kinikʼien. Kʼoa je sondado romano kjoanʼio kisʼinle jngo chjota nga tsakʼakao je yá xi kjisonxja je Jesús (Mat. 27:32, TNM). Kʼianga jekichokao yá je Jesús jñani ni̱kʼien, je chjota xó tsakinyá ntsja kao ndso̱ko̱ kʼianga tsakátʼa je yá, kʼoa ngisaa tikitsiʼaonngáni je Jesús nga yá kisʼetʼa. Je chjota judío totsabesin kʼianga kjitʼa je yá, tonga je miyole kʼoa kao na̱le tjíokjiʼndá (Luc. 23:32-38, TNM; Juan 19:25, TNM). Nkjín hora nga kʼoasʼin kisʼetʼa yá je Jesús. Je ni̱ma̱le tsín tikichokjoanile kʼoa chaan tsín tinanda koan kiskenjtani. Nga be kʼianga kixi kitʼale je Jeobá tsakʼétsʼoale, kʼoa xijekoan kʼien (Mar. 15:37; Luc. 23:46; Juan 10:17, 18, TNM; 19:30). Nʼio tse kjoañʼai kinikjaʼá je Jesús nga kinikʼien.

5. Jméni xi ngisa aon koanle je Jesús tikʼoajinni josʼin kinikʼien.

⁵ Ningalani tse kjoañʼai tsakjaʼá je Jesús nga kinikʼien ali tsakuijin xi ngisa aon koanle, je xi ngisa aon koanle kuinga kui jée kisʼene nga tsín tsakakóle kjoaxkóntokon je Niná (Mat. 26:64-66). Je Jesús nʼio aon koanle nga kʼoatsakʼinle kʼoa kui xi koanmele nga tsín katatsjoáʼnde je Nʼaile nga tosi tonda kui jée sʼe̱ne (Mat. 26:38, 39, 42). Janla koya kataʼyaa ánni kitsjoaʼndeni Jeobá nga kjoañʼai kinikjaʼá je ʼNdíle kʼoa nga kinikʼien.

6. Ánni nga yá kinikʼientʼani je Jesús.

⁶ Xi títjon, kʼianga yá kʼientʼa je Jesús jé chjota judío kisikatíondái tʼatsʼe jée xi kisʼene (Gál. 3:10, 13). Kuinga jée kisʼeneni nga kʼoakitso nga sitjoson je kjoatéxomale Niná, tonga tsínni kʼoakisʼin. Kʼoa kʼoati ya koanjngokao je jée xi tsakajngi Adán (Rom. 5:12). Je kjoatéxoma xi kitsjoale Niná chjota israelita kʼoatso nga tjínnele kinikʼien jngo chjota xi tse jée tsakajngi. Kʼoa kʼianga jenikʼien, tjínkʼa xi yá kisʼetʼa (Deut. 21:22, 23; 27:26). * Kʼianga yá kisʼetʼa je Jesús nga kinikʼien, kʼoani titse kjoanda kisokole je chjota judío.

7. Jñánile xi majaoni koya anni nga kitsjoaʼndeni Niná nga kjoañʼai tsakjaʼá je ʼNdíle.

⁷ Xi majaoni koya anni nga kitsjoaʼndeni Niná nga kjoañʼai tsakjaʼá je ʼNdíle, kuinga Naʼmitítjon koa̱n Jesús ya ngʼajmi. Kʼianga kjoañʼai jaʼatojin je Jesús koanjinle nga tsín choa ñʼai tíjna kʼianga nitjosonlee  je Niná. Kʼianga tse kjoañʼai tíjnajin je Jesús kisijéle nganʼio je Nʼaile kʼoa saʼnda kiskiʼndá. Nga tse kjoañʼai tsakjaʼá je Jesús, majinle josatío tokoán kʼianga kjoañʼai bitjatojiaan kʼoa tíjnandaa nga koasenkaoná. Nʼio bʼailee kjoanda je Jeobá nga je Jesús xi Naʼmitítjon sʼin kisikʼéjna nga̱ majinle josatío tokoán (Heb. 2:17, 18; 4:14-16; 5:7-10).

8. Jñánile xi majanni koya anni nga kitsjoaʼndeni Niná nga kjoañʼai jaʼatojin je ʼNdíle.

⁸ Xi majanni koya anni nga kitsjoaʼndeni Jeobá nga kjoañʼai tsakjaʼá je Jesús, kuinga kʼoasʼin tsakakóni nga koa̱n kixi koaitʼale Niná jngo chjota ninga nʼio tse kjoañʼai ni̱kjaʼá. Je Na̱i kʼoatso nga to yaoná mangínñá nga Niná nixálee. Kʼoatisʼin síkjaʼaitsjen nga tsín tsjoachaa je Jeobá, joni je Adán (Job 1:9-11; 2:4, 5). Je Jeobá ñaki kʼoatsakʼé kon nga kixi koaitʼale je ʼNdíle, kuinga kitsjoaʼndeni nga tse kjoa jaʼatojin. Nga kixi kitʼale Niná je Jesús kʼoasʼin tsakakóni nga ndiso je Na̱i.

9. Jmé choa̱ xi kisikʼéjnaná je pastro Juan.

⁹ Ñá xi chjotale Cristo maa, nʼio binyakaoná kʼianga majinná nga tsakʼéchjíntjainá je Jesús. Tjínkʼa je ndsʼee xi tosi tonda tjíotsoyason ninga chjota fitjenngike kʼoa tjíochókjoajinle ninga tse kjoa tjíofaʼatojin. Kataʼyala je choa̱le pastro Juan. Tsʼato 60 nó kitsoyason jokjoantjínni tʼatsʼe Cristo kao tʼatsʼe nga tsakʼéchjíntjainá. Jeme 100 nóle kʼianga ya ʼnde xi tíjnajin ndáchikon xi Patmos ʼmi kichosíkʼéjnanʼio je chjotaxá romano. Kuinga kʼoakoantʼainni nga tʼatsʼe Niná kao tʼatsʼe Cristo kitsoyason (Apoc. 1:9). Nʼio nda choa̱ tsakʼéjnaná je pastro Juan nga kichokjoajinle kʼoa nga nʼio kisʼele kjoamakjain.

10. Jósʼin tsakakó je Juan nga chjí tsabekon nga tsakʼéchjíntjainá je Jesús tojosʼin faʼaitʼa ya libro xi kiski.

¹⁰ Je libro xi kiski Juan yaa tsoya nga nʼio tsjoake je Jesús kʼoa nga nʼio chjí bekon nga tsakʼéchjíntjainá. Tsʼato 100 kʼa síkʼaxki̱ josʼin basenkaoná nga tsakʼéchjíntjainá je Jesús. Tobʼelañá, itso xi kiski: “Tsa jngo xi tsajngi jée, tíjnajngoná xi fajinná ngixko̱n Nʼainá, je Jesucristo xi tjínle kjoakixi” (1 Juan 2:1, 2). Kʼoati kitso nga nʼio tjínle kjoandosin nga tʼatsʼe Jesús ʼmiyasoán (Apoc. 19:10). Je Juan nʼio chjí tsabekon nga tsakʼéchjíntjainá je Jesús. Kʼoa ñá, jósʼin bakoá nga chjí ʼyatokoán.

11. Jméni xi koasenkaoná nga tsín jée jtsaojiaan.

¹¹ Alikui kuijnyíjée. Tsa chjí ʼya kjoaixiaa nga tsakʼéchjíntjainá je Jesús alikui koa̱n nga i̱ kuixoán: “Alikuila machjén nga kʼoechjoale yaona kʼianga kui kʼoasʼian xi chʼaotjín. Koaan koanjngijée kʼoa skan sijé kjoanichatʼa”. Kʼianga kui sʼejnabasenná xi chʼaotjín tosa i̱ kuixoán: “Alikui koa̱n nga kui xi chʼaotjín kʼoasʼian nga̱ nʼio tse jmeni xi kisʼin je Jeobá kao Jesús xi totʼatsʼan”. Kʼoati koa̱n kʼoétsʼoalee je Jeobá kʼoa kʼoakʼuínlee nga katabasenkaoná nga tsín kuijnyíjée (Mat. 6:13).

12. Jósʼin kjuintjenngiaa je kjoafaʼaitsjen xi tsjoá 1 Juan 3:16-18.

¹² Tsjoacha katamaa je ndsʼee. Kʼianga tsjoachaa je ndsʼee kʼoatisʼin bakoñá nga chjí ʼyatokoán nga tsakʼéchjíntjainá je Jesús, nga̱ tsín tsa toñájin kʼienntjainá, kʼoati kʼienntjai ngatsʼi je ndsʼee. Kuinga kʼientjaininá je Jesús  nga̱ nʼio tsjoakená nga jngó jngoá (tʼexkiai 1 Juan 3:16-18). * Josʼin ʼyatokoán je ndsʼee kʼoasʼin bakoñá nga tsjoachaa (Efes. 4:29, 31–5:2). Binyakaoñá kʼianga chʼin tsaotʼale kʼoa nga tse kjoa faʼatojin, jolani jñani kjoaxkón sʼe. Tonga jósʼiaan tsakui kʼoasʼin kʼoa tsakui kʼoakuitsoná jngo ndsʼee xi tsín nda kʼoe tokoán.

13. Ánni machjénni nga si̱chatʼalee xíngiaa.

¹³ A bʼengijtiñá tokoán kʼiatsa ʼya xi jotsoná kʼoa tsa josíkaoná (Lev. 19:18). Tsa kʼoanʼia, koasenkaoná je kjoafaʼaitsjen xi tsjoá Biblia, nga tso: “Tosa nda tikao xíngio. Katasʼeno kjoamatakon. Tichatʼalao xíngio, josʼin nga Niná kisichatʼano nga tiyokao Cristo” (Efes. 4:32). Kʼianga nichatʼalee je ndsʼee, kʼoasʼin bakonilee Jeobá nga chjí ʼyatokon kjoaixiaa nga tsakʼéchjíntjainá je Jesús. Jósʼiaan nga ngisasa chjí jchatokoán je kjoanda xi kitsjoaná Niná nga tsakʼéchjíntjainá je ʼNdíle.

14. Jmé xi koasenkaoná nga ngisasa chjí jchatokoán nga tsakʼéchjíntjainá je Jesús.

¹⁴ Kʼoailee kjoanda je Jeobá nga tsakʼéchjíntjainá je Jesús. Je Joanna, xi 83 nóle, xi ya naxinandá India tíjna, itso: “Tsjoale kjoanda je Jeobá nga nyaon nyaon kʼianga tsakʼéchjíntjainá je Jesús”. Kʼianga kʼoétsʼoalee je Jeobá kʼoakʼuínlee jñani tsín nda kanʼia kʼoa kʼoakʼuínlee nga katasíchatʼaná. Kʼoa tsa ai jée kabijnyaa, kʼoéyanajmílee je xi chjotajchínga sʼin tjío. Je xi chjotajchínga sʼin tjío kjuinrʼoéná kʼoa ngasin nganda tsjoáná kjoafaʼaitsjen xi ya Biblia yʼangini. Xi ijngosani, kʼoétsʼoaa kʼoa si̱jélee je Jeobá nga katasíchatʼaná xi totʼatsʼe nga tsakʼéchjíntjainá je Jesús ánni nga nda kuiyo ijngokʼañá ngixko̱n Niná (Sant. 5:14-16).

15. Ánni machjénsíni nga chʼa̱sjeʼaa nichxin nga kʼoéxkiaa kʼoa si̱kjaʼaitsjenjiaan nga tsakʼéchjíntjainá je Jesús.

¹⁵ Si̱kjaʼaitsjenjiaan nga tsakʼéchjíntjainá je Jesús. Jngo tichjaa xi 73 nóle, xi  Rajamani ʼmi, itso: “Ñaki nroajen ndáxkoan kʼianga kui bʼexkia jokji kjoañʼai tsakjaʼá je Jesús”. Tsakui nichxin kʼoati satío tokoán tsanda ñá kʼianga nikjaʼaitsjenjiaan jokji kjoañʼai tsakjaʼá je ʼNdíle Niná. Kʼianga chotʼayá nga jngó jngoá, koaan kui chótʼayajiaan nga tsakʼéchjíntjainá je Jesús. Tsa kʼoasʼiaan, ngisasa tsjoacha koaan je Jeobá kao Jesús.

16. Jósʼin basenkaoná nga ʼmiyalee xi kjaʼaí nga tsakʼéchjíntjainá je Jesús (chótsenlai sén xi faʼaitʼa ya portada).

¹⁶ Kʼuínyalee xi kjaʼaí nga tsakʼéchjíntjainá je Jesús. Kʼianga kui ʼmiyalee xi kjaʼaí, ngisasa chjí ʼyatokoán nga tsakʼéchjíntjainá je Jesús. Kjioná je xo̱n kao video xi binyakaoná nga ʼmiyalee je chjota ánni nga kʼientjaininá je Jesús. Tobʼelañá, koaan si̱chjén ya kjoaʼmiya 4 xi tsʼe folleto Énnda chjotse xi tʼatsʼe Niná tínroani ya jñani “ʼYákjoánni je Jesucristo” tso. Kʼoati koa̱n si̱chjén ya kjoaʼmiya 5 xi tsʼe libro Jmé kjoanni xi bakóya je Biblia jñani “Jósʼin tsakʼéchjíntjainá Niná” tso. Kʼoa sa chjí sa chjí ʼyatokoán nga tsakʼéchjíntjainá je Jesús nga xki̱ nó kʼianga mangián nga faʼaitsjenya je kjoabiyale kʼoa nga kʼoaʼmilee xi kjaʼaí nga kʼoati katafi tsanda je. Kui kjoanda títsjoáná je Jeobá nga ʼmiyalee xi kjaʼaí chjota tʼatsʼe ʼNdíle.

17. Ánni nga nʼio chjínile je kjoatjao xi kitsjoaná Niná nga tsakʼéchjíntjainá je Jesús.

¹⁷ ʼYañá jokji kjoanda tjenkao nga tsakʼéchjíntjainá je Jesús, kuinga nʼio chjí ʼyatokonñá. Nga kʼoakisʼin, koaan miyoná koa̱nni je Jeobá ninga chjotajée maa. Kʼoa nga kʼoasʼin tsakʼéchjíntjainá je Jesús, kuixo̱ya je xále Na̱i (1 Juan 3:8). Xi ijngosani, kuitjoson jmeni xi tjínndajinle Niná saʼnda ngasʼa, nga ʼndenaxó koa̱n Sonʼnde kʼoa nga toje koatio je chjota xi tsjoake kʼoa xi toje sixále. Kuinga machjénsíni nga nyaon nyaon koakoá nga chjí ʼyatokoán nga tsakʼéchjíntjainá je Jesús, je kjoatjao xi nʼio chjíle xi kitsjoaná Niná.