Tejanla nóna nga tsín tinda kisixánile je Jeobá. Kʼoasʼin kisikjaʼaitsjen nga je xti xi ñatjen fia skuela totiʼndele jmeni xi sʼín kʼoa kʼoati kui xi mena kisʼian tsanda an. Kʼoasʼin kisikjaʼaitsjen nga nʼio tse jmeni xi bʼéchjoana je Biblia kʼoa tsín tikoanmenina nga kia kjoajtín kʼoa nga kixinyasoan. Kʼoati nʼio tse jmeni xi tsakʼéchjoana je xijchána. Ningalani koankjainna nga tíjna je Niná, alikui tikoanndosinnina xi tʼatsʼe.

Ningalani kixinyasoan nga xki̱ sá, totsakʼenele yaona nga kʼoakisʼian. Alikuikʼia tsakatejnanda nga kixinyasoan, kuinga ñʼai koannina nga tsakjakaonajmíña chjota xi tʼatsʼe Niná. Alikui kisatejian chjota xi koanndosinle tʼatsʼe Biblia kʼoa alikui ʼya xi estudio kitsjoale. Alikui tsjoa kisʼe tokoan nga kixinyasoan, kʼoa ngisaa tikinroajenngáni tokoan. Kui kisikjaʼaitsjen nga tsín kʼoakoa̱nna nga xki̱ jin nichxin xínyasoan kʼoa nga xki̱ sá.

 Kʼianga kichona 17 nó, koanmena nga toʼan tsakʼa yaona. Kuinga ya Australia kiña, ningalani ba kisatio kon je xijchána kʼoasʼin kisikjaʼaitsjen nga tojo ndasʼin sixále je Niná.

Kʼianga kichoa ya Australia alikui tikitsjoanile kjoandosin xi tʼatsʼe Niná kʼoa alikui tikiña kjoajtín, jé tsakajta xti xi nʼio tsjoake nga sʼuí fi kʼoa xi tosakʼoa fi kjoajtín. Kʼianga sikjaʼaitsjenjian jmeni xi kisʼian, sʼani majinna nga kʼoakji kisixále je Niná kʼoa kʼoakji kʼoakisʼian jmeni xi chon sonʼnde, tonga nijñajinla nga tsjoa kisʼe tokoan.

Jaola nó koanskanni, jngo tichjaa tsaʼbexkoan xi nʼio tsakasenkaona. Aon koanni tichjaa xi ñatjen tsakiyuijin, kʼoa kʼianga bichósíxatʼanajin je superintendente, kʼoaʼmilaijin nga ya katabationi. Tamara ʼmi je chjoónle ndsʼee. Kʼoa kʼianga kuila xá sʼín je ndsʼee jme xá xi tjín ya jinjtín, je tichjaa yaa bʼejnakaonajin, kʼoa kisasenna josʼín. Alikuikʼia kʼoasʼin kisikjaʼaitsjen tsa kʼoani sikji tsjoakjoa jngo chjota xi nda tísíxále je Niná.

Je Tamara nʼio tsjoa tjínle nga ñaki to xále Niná tísʼín. Tonga an alikui tsjoa tjín tokoan nga̱ tochoaa tisixále je Niná. Nʼio tsakasenkaona nga nʼio tsjoa tjínle je tichjaa nga tísíxále je Jeobá. Koanjinna nga kui xi mele je Niná nga kao kjoatsjoa si̱xánilee (Sal. 100:2).

Koanmena nga kʼoati tsjoa sʼe̱ tokoan joni je Tamara, ninga ñʼai koanna, tobijbi nda kisixá ijngokʼanile je Niná. Tsakatejnandaña nga kixinyasoan kʼoa sakʼoaa precursora auxiliar sʼin kisixá, alikui tinanda kitsokjonña kʼoa tsjoa kisʼe tokoan.  Nʼio tsjoa kisʼe tokoan nga kui Biblia kisichjén, kʼoa precursora auxiliar sʼin kisixá ʼndeʼnde.

Jé kisimiyoa je ndsʼee xi nʼio nda tjíosíxále Niná. Nʼio tsakasenkaona nga kui ngisa kitsjoale kjoandosin jmeni xi ngisa chjíle kʼoa nga kiskotʼaya je Énle Niná. Sa tsjoa sa tsjoa kisʼe tokoan nga kixinyasoan, kʼoa chaan precursora regular sʼin kisixá. Nʼio tsjoa kisʼe tokoan nga ya tsakatejna ya jinjtín.

Jngo nó koanskanni, kʼiaa tsaʼbexkoan je Alex, jngo ndsʼee xi nʼio nda chjota kʼoa xi nʼio nda tísíxále Niná. Siervo ministerial sʼin tíjna kʼoa jejaon nó nga precursor sʼin tísíxá. Kʼoati kikakóyason choatse ya naxinandá Malaui, jñani nʼio machjén je xi tsoyason. Nga ya kitsoyason kiskajin kʼa ndsʼee xi misionero sʼin tjíosíxá kʼoa nʼio nda tsakinyakao nga to xále Niná tjíosʼín.

Kʼiaa nga nó 2003 chixainjin, kʼoa ñaki to xále Niná tinʼiaijin. Nʼio nkjín koya jmeni xi kjimajinnajin, kʼoa nʼio tísíchikontʼainnajin je Jeobá.

Kʼianga nó 2009 kʼoatsakʼinnajin nga misionero sʼin si̱xáijin, kʼoa yaa kinikasénnajin jngo naxinandáʼndí xi Timor Oriental ʼmi, xi tíjna ya Indonesia. Tokʼoakoannajin nga kʼoatsakʼinnajin, tonga kʼoati tsjoa kisatio kaoni tokuinjin. Aon sá koanskanni yaa kichuijin ya Dili.

Kjaʼaísʼin ngale je chjota jñani kichuijin, kjaʼaí én male, kjaʼaí kjoan tsojmi xi kjine kʼoa tjínnele nga kiningalaijin yaonajin.  Kʼianga tsakʼinyasuinjin kisatejinníjin je chjota xi ma̱ tjío, xi tsín male bʼéxkia kʼoa xi totaon tjíoʼya. Nʼio nkjín chjota kisatejinjin xi aon tjío kon, xi tsín chajinle jmeni xi koantʼain kʼianga kjoajchán kisʼe. *

Je chjota xi ya tsʼe nʼio nda nrʼoé je Énle Niná. Tobʼelañá, ñandia nga jngo tsotiʼndí kisatejian xi 13 nóle, xi María ʼmi * kʼoa xi nʼio ba tjín kon. Jekʼien je male kʼoa je pale alikui nanda bichósíxatʼa. Tojo sʼín je xti xi kʼoatjín nóle, je María alikui be jmeni xi sʼin. Ñandia nga ñaki kiskiʼndá nga tsakʼéyanajmína jotjín kon. Nga kʼia, kje nanda majinna je én xi nchja̱ kʼoa alikui koanjinna jmeni xi kitso, kuinga tsakʼetsʼoanile je Jeobá nga koa̱n koasenkoa. Tsakʼexkia kʼale texto nga tsakasenkoa. Kʼianga jeki nó kisikʼantjaiyaa yaole je María kʼianga kiskotʼaya je Énle Niná. Xijekoan, kisʼenngindá, kʼoa ndʼaibi kʼoati jenkjín mani je chjota xi tsoyale Biblia. Kʼoa nʼio tsjoa tjín kon nga naxinandále Niná tíjnajinle.

Je Jeobá tísíchikontʼain nga tíʼmiyason ya Timor Oriental. Ninga tosʼa te nó tjínle nga nkjín mani xi tjíofisʼenngindá, jenkjín mani je xi precursor sʼin tjíosíxá, xi siervo ministerial sʼin tjío kʼoa xi chjotajchínga sʼin tjío. Nʼio nkjín mani je xi ya tjíotsjoánganʼio nga tífaʼatoya je én xi ya nokjoa. Nʼio tsjoa sʼe tokoan kʼianga ʼbe nga se ya jinjtín kʼoa nga kʼoati tsjoa tjío kon nga tjíosíxále Niná.

Ninga tsín kʼoachon ya Timor Oriental jochon ya Australia, nʼio tsjoa kisʼe tokoan nga ya kisixá. Sakʼoaa nkjín chjota kisatejinjin nga tsakiyoyaijin carro, je xi jti̱ fikatse kʼoa xi nkjínsa tsojmi fikatse. Nʼio sjeya ma ya ʼnde jebi. Kʼoa kʼianga ʼmiyalaijin je chjota, sakʼoaa xo̱ʼnda̱ bichó. Ninga kʼoalani, nʼio tsjoa kisʼe tokoan.

Kʼianga sikjaʼaitsjenjian jmeni xi kisʼian nga sʼa xtia, nʼio tsjoale kjoanda je xijchána nga tsakinyakaona. Tiʼbeña josʼin tíbitjoson jmeni xi tso Proverbios 22:6. Je xijchána nʼio tsjoa tjíole nga ñaki to xále Niná tinʼiaijin. Saʼnda tjen nó 2016, superintendente xi tsʼe circuito sʼin tinixáijin ya ʼnde xi kjinentsja je sucursal xi tíjna ya Australasia.

Tokʼoamana nga kʼoasʼin sikjaʼaitsjen nga tsín tsjoake̱ koan je Énle Niná tsakai, tonga ndʼaibi kui xi ngisasa tsjoa bʼé tokoan. Ninga tojme kjoa kuitjátojiaan, je xi ngisa tsjoa bʼé tokoán kʼiaa nga je Jeobá nixálee. Je xi jexjaʼaonjan nó tífaʼato, nʼio tsjoa tjío tokuinjin nga ñaki toje Jeobá tinixálaijin. Sʼani majinna ndʼaibi jmeni xi kitsole David je Jeobá, nga i̱ kitso: “Ngatsʼi xi ji sínʼiotʼali tsjoa sa̱tío kon; tsjoa sʼe̱le ngantsjai [...], kʼoa je xi tsjoake jaʼaínli tsjoa sa̱tío kon” (Sal. 5:11).