Ánni nga kui kʼoakitsoni je Jesús jme xi tso Salmo 22:1 kʼianga to jekuiyá

Tojo tso Mateo 27:46, kʼianga to jekuiyá je Jesús i kitso: “Ninána, Ninána, ánni nga kanjiotakonsíninái”. Kʼoasʼin kisitjosonni jmeni xi kitso je David tojosʼin faʼaitʼa ya Salmo 22:1 (Mar. 15:34). Ali tsakuijin kʼoakuitsoni nga ba kisʼe kon kʼoa nga tsín tikisʼenile kjoamakjain. Be ánni nga ni̱kʼienni kʼoa tíjnandaa nga kʼoakoa̱ntʼain (Mat. 16:21; 20:28, TNM). Kʼoati be nga tsín tije Jeobá sikuindani kʼianga tojeme ni̱kʼien (Job 1:10). Kitsjoaʼnde je Jeobá nga katabakó je Jesús nga kixi koa̱n ninga tse kjoañʼai kjoaʼa nga ni̱kʼien (Mar. 14:35, 36).

Ninga tsínkjoan ʼyaa ánni nga kʼoakitsoni, chótʼayajinla jme xi tso Biblia xi sínkjínle tokoán. *

Tsakui nichxin kui kʼoakitsoni je Jesús nga tsín je Jeobá kʼoechjoa nga ni̱kʼien. Alikui koan nga je Jeobá tsakasenkao nga tsakʼéchjíntjainá. Ñaki chjota koan joni tsa ñá, kʼoa tjínnele kinikʼien xi totʼatsʼe ngatsʼi chjota (Heb. 2:9).

Tsakui nichxin kui kʼoakitso choani jmeni xi tso Salmo 22 ánni jaʼaitsjensínile  je chjota jme xi tso ngayeje salmo jebi. Nga kui nichxin, kʼoasʼin ngale je chjota judío nga nʼio nkjín salmo tsakʼéjinkon. Tsa jngo versículo kinikʼaxki̱le, ndi̱to̱njin jaʼaitsjenle jmeni xi tso ngakjijngo salmo. Tsakuilani xi koanmele je Jesús, kʼoajinsʼin tsakasenkaoni je chjotatjenngile nga jaʼaitsjenle je én xi tongini kinokjoa xi faʼaitʼa ya salmo jebi tʼatsʼe nga ni̱kʼien (Sal. 22:7, 8, 15, 16, 18, 24). Jña fetʼani salmo jebi bʼasjejeya je Jeobá kʼoa kʼoatso nga toje xi bakinle batéxoma jngo tjíjtsa Sonʼnde (Sal. 22:27-31).

Nga kui kʼoakitso jmeni xi kiski David, tsakui nichxin kui kʼoakitsoni je Jesús nga tsín jme jée tsakajngi. Nga kjesa nikʼienjin je Jesús, alikui kixi tíjna josʼin kisʼendajinle kjoa kʼoa énndiso kisʼene (Mat. 26:65, 66). Kʼiaa nga njio kinijtsoʼa kʼoa tokjoaxátiya xi koan. Kʼoa xi ijngosani, jaʼatone kjoatéxoma je chjota xi tsakʼéndajinle kjoa je Jesús (Mat. 26:59; Mar. 14:56-59). Kʼianga i̱ kitso je Jesús: “Ninána, Ninána, ánni nga kanjiotakonsíninái”, tsakui nichxin kui kʼoakitsoni nga tsín bakinle nga kjoañʼai kʼoaile nga̱ tsín jme jée tsakajngi.

Tsakui nichxin kui xi koanmele je Jesús nga kjoaʼaítsjenle je xi tjíonrʼoéle nga ningalani kjoañʼai tífaʼá David, xi kiski salmo jebi, ali tsakuijin xi tsonile nga tsín tinda tsakʼejnani ngixko̱n Jeobá. Je David alikui kinroajen kjoamakjainle xi tʼatsʼe Jeobá, nga̱ kʼianga jekoanni kʼoakitso nga je Jeobá bʼasjentjai je choʼndale. Kʼoa je Jeobá tosi tonda kisichikontʼain (Sal. 22:23, 24, 27). Tikʼoasʼinni je Jesús, je “ʼNdíle David”, kʼianga kjoañʼai tífaʼá nga kjitʼa yá, ali tsakuijin xi tsonile nga tsín tinda tsakʼejnani ngixko̱n Jeobá (Mat. 21:9).

Tsakui nichxin kui kʼoakitsoni je Jesús nga nʼio aon koanle nga tsín tije Jeobá sikuindani nga koako nga kixi koaitʼale. Alikui kui xi mele tsakai je Jeobá nga kjoañʼai kjoaʼa je ʼNdíle kʼoa nga ni̱kʼien. Kui kʼoakoanni nga tsakajngijée je Adán kao Eva. Ningalani tsínkui xi chʼaotjín kisʼin je Jesús, tjínnele kjoañʼai tsakjaʼá kʼoa kinikʼien, kʼoa kʼoasʼin kitjondisoni je Na̱i, ñá tsakʼéchjíntjainá kʼoa koaan nda kuiyo ijngokʼañá ngixko̱n Niná (Mar. 8:31; 1 Ped. 2:21-24, TNM). Kʼianga kitjosonle Jesús jebi tjínnele nga tsín tije Jeobá kisikuindani.

Kʼoa tsakui nichxin kui kʼoakitsoni je Jesús nga koa̱njinle je chjotatjenngile ánni kitsjoaʼndeni je Jeobá nga kʼoasʼin ni̱kʼien. * Je Jesús koanjinle nga nʼio nkjín xi sa̱téngi nga kʼoasʼin yá ni̱kʼientʼa (1 Cor. 1:23, TNM). Tonga tsa kuenta sʼin je chjotatjenngile ánni nga kuiyáni je Jesús koa̱njinjinle ánni nga kʼoakjimatʼainni (Gál. 3:13, 14). Tsa kʼoalani, alikuijin kʼoasʼin sikjaʼaitsjen nga kui kʼoakjimatʼainni nga tsín kixi tíjna jme xi kisʼin, tosajin kʼoasʼin sikjaʼaitsjen nga je Jesús xi kʼoasjentjai.

Ningalani tsín ʼyaa anni kʼoakitsoni je Jesús nga tjenbʼatʼa yá, koanjinle nga kui kʼoatísʼín josʼin mele je Jeobá. Kʼianga jekʼoakitso je én xi faʼaitʼa ya salmo, i kitso: “Jejitjoson ngayije” (Juan 19:30; Luc. 22:37). Nga kʼiakjoan, alikui tije Jeobá kisikuindani, kʼoasʼin kisitjosonni jme xá jaʼaini i̱ Sonʼnde kʼoa kʼoasʼin kitjosonni je én xi tongini kichji xi tʼatsʼe ya “kjoatéxomale Moisés, kʼoa ya xo̱nlibrole chjota xi kinchja̱ya tʼatsʼe Niná, kʼoa ya xo̱n xi Salmo ʼmi” (Luc. 24:44).