”Ali tsa tojejin chjota xi nda síkao, kʼoati nda kisikao je níana. Ñandia nga ya tíjnaʼnda je xi ma xinyáya xo̱n jngo chjoón xi Elaine ʼmi, galleta kitsjoale nga jao níana. Kʼianga ya faʼa̱ ñaki kjenʼndóna je níana kʼianga fi jñani bʼaile galleta.

”Kʼianga jeki nichxin, je níana nʼio tsjoa kisatiole kʼianga galleta bʼaile, kʼoa an kʼoati tsjoa kisʼena nga ñandia ñandia tsakjakaonajmía je testigole Jeobá. Tonga alikui nʼio kisindosian jmeni xi bakóya. Jetsʼato 70 nóna nga kʼia, kʼoa alikui nanda ʼbe jmeni xi bakóya je testigole Jeobá. Nga tsín kisasenna jmeni xi ma ya yo̱ngo̱, kʼoasʼin kisikjaʼaitsjen nga ngisa nda nga toʼan skotʼaya Biblia.

”Nga kʼia ngaʼi̱ ngaján tsaʼbe je testigole Jeobá nga nyaʼnda je xi ma xinyáya xo̱n kʼoa nda chjota ngatsʼi. Kao Biblia kʼoatsonina jmeni xi kjonangile kʼoa chaan koankjainna jmeni xi kitsona.

”Ñandia nga i̱ kitsona je Elaine: A jé Niná kitsjoakjoatjaoná je cho̱. Kʼoakixinle nga je kitsjoaná. Kʼoa kui tsakʼéxkiana jotso Isaías 11:6-9. Nga kʼia jengisa koankjainna jmeni xi kitsona, ninga kje bʼajian je xo̱n xi síkʼabí.

”Nga jeki nichxin kui kichobanajmínijin tʼatsʼe xi nʼio tjínle kjoandosin kao Elaine kʼoa kao Brent je xi xʼinle mani. Kʼoakitsona nga kʼoexkia Mateo saʼnda Hechos ánni nga koa̱njinnina jósʼin tíjna nga mangíntjenngiaa choa̱le Cristo. Kʼoakisʼian jokitsona. Xi koanskanni, je Brent kao Elaine kitsoyana Biblia. Kʼiaa kiskotʼaya nga tjenbasen nó 2016.

”Ñaki kao kjoatsjoa kiskotʼaya nga xki̱ xomana je Biblia kʼoa kiña kjoajtín xi satío ya Ndʼia jña chotʼayá. Nda kisʼe tokoan nga koanjinna jmeni xi tsoya je Biblia. Totsʼato ñanó jaʼato nga kisʼe̱nngindá. Ndʼaibi 79 nóna, kʼoa ʼbeña nga kui ndiaa xi kixi tifiya. Je Jeobá kui kjoanda títsjoána nga ya tijnajinle chjota xi je tjíosíxále jngo tjíjtsa Sonʼnde”.