Tojo tso jngo diccionario, kʼianga jngo juramento bʼé, kui xi tsonile “nga tíbe Niná [...] jmeni xi bixoán kʼoa nga si̱tjosoán énná” (Diccionario de uso del español, xi tsʼe María Moliner). Kʼianga juramento bʼé koaan tsa kuinókjoaa kʼoa tsa xo̱n chjítʼaa.

Tjínkʼa xi kʼoatso nga chʼaotjín kʼianga juramento bʼé, nga̱ je Jesús i kitso: “Nitojmejin xi tʼatsʼe bʼai énli, […] katajaonli tsa jaonli, kʼoa tsa mai maili. Je xi faʼatosa jebi, yaa nroani xi chʼao tjín” (Mat. 5:33-37). Je Jesús be kʼianga kʼoatso kjoatéxomale Moisés nga sakʼoa tjínnele juramento kitsjoa chjota israelita kʼoa nga kʼoati tsakatio choʼndale Niná xi kʼoati kisʼin (Gén. 14:22, 23; Éx. 22:10, 11). Kʼoati be nga kʼoati kitsjoa juramento je Jeobá (Heb. 6:13-17). Je Jesús ali tsakuijin xi kitsonile nga tsínkʼia koa̱n juramento kʼoee. Kui xi kitsonile nga tsín koa̱n juramento kʼoee tsa tosʼani choa kjoa jmeni xi sʼiaan. Tjínnele nga ñaki kʼoakjoansʼin si̱tjosoán je én xi kanokjoaa, nga̱ kui xi mele je Jeobá nga kʼoasʼiaan.

Jósʼiain tsa ʼya xi kʼoakuitsoli nga tjínnele jngo juramento kʼoai. Títjonkjoanla chósonnilai tsa kuitjosonli jmeni xi sí. Kʼoa tsa ʼyai nga tsín kuitjosonli tosa lijojin si. Je Énle Niná itso je kjoafaʼaitsjen xi tsjoá: “Ngisaa nda nga tsín énli kʼoai tikʼoajinni tsa énli kʼoai kʼoa tsínni si̱tjosuin” (Ecl. 5:5). Xijekoa̱n, chótʼayajin jotso kjoafaʼaitsjen xi tsjoá Biblia tʼatsʼe juramento xi kʼoai, kʼoa kʼoatʼiain jotso xi koa̱njinli. Kataʼyala kʼa je kjoafaʼaitsjen xi tsjoá Biblia.

Tjínkʼa juramento xi sasénle je Niná. Tobʼelañá, kʼianga bixan je testigole Jeobá, jmeni xi tso nga tsjoá énle yaa mangóson jngo juramento. Je xʼin kao je chjoón kʼoatso ngixko̱n Niná kao ngixko̱n chjota nga tsjoake koa̱n xínkjín, nga sikuinda kʼoa skoe̱xkónngañá xínkjín jokjitse koatio i̱ Sonʼnde. (Tjínkʼa xi tsínkjoan ñaki kʼoatso én xi síchjén, tonga kʼoati jetjíotsjoá énle ngixko̱n Niná). Kʼoa jngo xʼin jngo chjoón jema, kʼoa tjínnele koatiokao xínkjín jokjitse koatio (Gén. 2:24; 1 Cor. 7:39). Kʼianga tsjoá je énle xi bixan, kixi tíjna kʼoa sasénle je Niná.

Kʼoati tjínkʼa juramento xi tsín sasénle Niná. Tobʼelañá, je chjotatjenngile Cristo alikui juramento tsjoá nga kʼoatso nga sitoánntjai jngo naxinandá kʼoa tsa kʼoakuitso nga tsín Niná bexkón. Tsa kʼoalani sʼin, kjoaʼatonejin kjoatéxomale Niná. Alikui kjoasi tsjonjin yaole je chjotale Cristo (Juan 15:19; Is. 2:4; Sant. 1:27).

Sakʼoa ñá xi bixónñá tsa jngo juramento kʼoee. Kʼianga kjesa tsjoájin jngo juramento  je chjotale Cristo tjínnele sikjaʼaitsjenjin jmeni xi kitso Jesús, nga i̱ kitso: “Tʼailao tsokʼoa César je xi tsʼe César, kʼoa tʼailao Niná je xi tsʼe Niná” (Luc. 20:25).

Tobʼelañá, tsa jngo chjotatjenngile Cristo xi xin naxinandá mele koaikʼejna kʼoa tsa jngo pasaporte kʼoa̱sje, tonga tsa tjínnele jngo juramento tsjoá nga kʼoakuitso nga kixi koa̱nle je naxinandá jñani koai. Tonga tsa kontra tíjnale jotso kjoatéxomale Niná je juramento xi tsjoá, alikuijin kʼoakuitso. Tsakui nichxin tsjoáʼndele je gobierno nga koa̱n kʼoantjaiyajin jokuitso nga tsjoá je juramento ánni nga tsín chʼao sʼe̱ni kon.

Tsa jekasíkʼantjaiyajin chjotaxá koaan sikitjoson jokuitso nga tsjoá juramento nga̱ be nga je Niná xi kʼoasʼin bʼéne nga si̱tjosonlee je chjotaxá tojo tso Romanos 13:1, nga i̱ tso: “Ngatsʼi chjota katasítjosonle chjota xi xá tjínle”. Tsakui nichxin kʼoakuitso jngo chjotale Cristo nga tsín chʼaotjín nga juramento tsjoá nga̱ tokui tísítjoson nga kʼoatso Niná nga tjínnele sitjosonle chjotaxá.

Kʼiatsa kʼoakʼuínná nga tjín xi si̱chjén kʼoa tsa ndsaa si̱kjaan kʼianga kʼoee jngo juramento, ñá xi kuixónñá tsa kʼoasʼiaan. Nichxin kjoatse, je chjota romano kao chjota escita espadale kisichjén kʼianga kitsjoa jngo juramento. Nga kʼoakisʼin, kui xi tsonile nga ñaki sitjoson je énle, kʼoa jé kisijéle nganʼio je ninále kjoajchán. Kʼoa je chjota griego ngʼá tsakjén ntsja kʼianga kitsjoa jngo juramento. Nga kʼoakisʼin, kui kitsoyanile nga tíjna jngo niná xi tsabe jmeni xi kitso kʼoa jmeni xi kisʼin, kʼoa xi kuenta tsjoále.

Tonga je choʼndale Jeobá alikuijin tsa bandera kʼoa tsa jmesani xi bexkón chjota sichjén kʼianga tsjoá jngo juramento. Tonga jméni xi koa̱n sʼin tsa ya kuichokasen ya ngixko̱n chjotaxá kʼoa kʼoakʼuínle nga ya katabájnason ntsja jngo Biblia nga tsjoá jngo juramento nga ñaki tokuikjoan kʼoakuitso xi ñaki kʼoatjín. Koa̱njin kʼoasʼin tsa je xi mele, nga̱ ya Biblia síkʼaxki kʼa choʼndale Niná xi tjín xi kisʼin kʼianga kitsjoa jngo juramento (Gén. 24:2, 3, 9; 47:29-31). Tsa kʼoati sʼiaan tsanda ñá, xi tjínnele ni̱kjaʼaitsjeen kuinga ngixko̱n Niná tibʼé je énná kʼianga kui kʼoakuixoán je xi ñaki kʼoatjín. Kuinga ñaki tokui kʼoakuixónsíñá xi ñaki kʼoatjín tojmeni xi chjónanginá.

Nga nʼio ʼyachjiá josʼin tiyoaa ngixko̱n Jeobá, tjínnele nga kʼoétsʼoaa kʼoa ndakjoanla si̱kjaʼaitsjeen nga kjesa jngo juramento bʼaijian. Tsín mená nga chʼao sʼe̱ kjoafaʼaitsjenná kʼoa tsín mená kuitjátoné kjoatéxomale Niná. Tsa jngo juramento kʼoee, tjínnele ñaki kʼoakjoansʼin si̱tjosoán (1 Ped. 2:12).