Kʼianga kʼoasʼín jngo chjotale Cristo, je jtín tjínnele kʼoasʼin sikjaʼaitsjen nga kʼia fetʼa kjoabixanle xi títjon kʼianga jekjaʼaí xi bixankao ijngokʼa, kʼoa nga chjíle ngixko̱n kjoatéxoma kʼianga bixan ijngokʼa. Kʼianga koa̱njinná ánni nga kʼoabixónsíñá, kataʼyala jmeni xi kitso je Jesús tʼatsʼe nga tsjion xínkjín chjota kʼoa nga bixan ijngokʼa.

Je Jesús kʼoakitso kʼiani nga koa̱n tsjión xínkjín xi jechixan tojo tso ya Mateo 19:9, jñani tso: “Toʼyani xi tsjión chjoónle, tsa tsín tsa xi totʼatsʼe nga chjoónle kisichajngitʼale, kʼoa tsa kjaʼaí chjoón kuixankao, je xʼinbe síchajngitʼale chjoónle”. Jao koya tjínni xi bakóyaná jmeni xi kitso je Jesús. Xi títjon, nga tokʼia koa̱n tsjión xínkjín xi jechixan kʼiatsa kasíchajngitʼale xínkjín. Xi majaoni, tísíchajngi jngo chjota kʼiatsa tsín ya Biblia kʼoangini nga tsjión je chjoónle kʼoa tsa kjaʼaí xi kuixankao. a

Kʼiatsa jngo chjota sichajngi kʼoa tsjión je chjoónle, a kui xi kitsonile Jesús nga koa̱n kuixan ijngokʼa. Mai. Kʼiatsa jngo chjota sichajngitʼale je chjoónle, jé chjoón xi kuitsoni tsa sichatʼale xʼinle kʼoa tsa mai. Tonga tsa tsín sichatʼale kʼoa kʼoenda xo̱n ngixko̱n kjoatéxoma jñani kʼoatso nga tsjión xínkjín, nga jao tjínle ʼnde nga kuixan ijngokʼa.

Kʼoa sakʼoajin je chjoón xi tsín koa̱nmele tsjión je xʼinle kʼoa kʼoakuitsole nga sichatʼale ninga kasíchajngi. Tonga jókoa̱n tsa koa̱nkaile je xʼinle nga tosi tonda koatiokao xínkjín kʼoa kʼoenda xo̱n ngixko̱n kjoatéxoma nga tsjión xínkjín. Tsa tíjnanda je chjoónle nga sichatʼale kʼoa nga mele tosi tonda koatiokao xínkjín, je xi xʼin tsínle ʼnde nga kuixan ijngokʼa. Tsa kjoanʼio koa̱nmele nga kjaʼaí xi kuixankao ijngokʼa, ninga tsín tsjoáʼnde je Biblia nga kʼoasʼin, kui xi tsonile nga tísíchajngi ijngokʼa. Je xi chjotajchínga sʼin tjío tjínnele ijngo comité judicial kʼoenda ánni nga kʼoendajinni kjoa jebi (1 Cor. 5:1, 2; 6:9, 10).

Kʼiatsa kjaʼaí xi kuixankao ijngokʼa je xi xʼin tonga tsa tsínle ʼnde nga kʼoasʼin tojo tso Biblia, jósʼin tjínnele sikjaʼaitsjen je ndsʼee xi tjío ya jinjtín tʼatsʼe kjoabixanle xi títjon kao xi maskanni. A tojo chjíle ngixko̱n Niná je kjoabixan xi títjon. A tojo jé chjoónle xi chixankao nga títjon xi kuitsoni tsa sichatʼale kʼoa tsa mai. A tojo tísíchajngi je xi xʼin kʼiatsa jekjaʼaí xi kabixankao ijngokʼa.

Je jtín kʼoasʼin síkjaʼaitsjen nga tísíchajngi je xi xʼin kʼianga jekjaʼaí xi chixankao ijngokʼa, nga̱ sʼasa tíjnakon je chjoónle xi títjon, nga̱ tsín kjaʼaí xi tíbixankao kʼoa tsín tísíchajngi. Tonga je Jesús alikui je kisikʼaxki̱ je xi tsín jme jée tjínle kʼianga kui kinchja̱ni tʼatsʼe nga tsjion xínkjín chjota kʼoa nga bixan ijngokʼa. Je Jesús kui xi kitso nga tísíchajngi jngo chjota kʼiatsa tsín ya Biblia kʼoangini nga tsjión xínkjín kʼoa kjaʼaí xi kuixankao. Je Jesús kʼoakitso nga síchajngi jngo chjota  kʼianga tsjion xínkjín kʼoa nga kjaʼaí xi bixankao ijngokʼa, kʼoa nga kʼoama to jeya fetʼa je kjoabixanle xi títjon.

Kʼianga tsjion xínkjín kʼoa kjaʼaí xi bixankao ijngokʼa jngo chjota, alikui tije chjoónle xi kuitsoni tsa sichatʼale kʼoa tsa mai. Je chjoón alikui tije kjinenile nga kʼoakuitso xi tʼatsʼe jebi. Josʼin jchatokon je chjota xi síchajngitʼale je chjoónle kʼoa xi bixan ijngokʼa, ali tsakuijin xi kuitsoni josʼin tíjna je chjoónle xi títjon, ni sʼa tíjnakon, ninga tojé kʼoéjna kʼoa ninga sichajngi. b

Tojosʼin kaʼyaa nga títjon, je xi xʼin kisichajngi kʼoa kuinga kitsjionni xínkjín. Tonga jósʼin tíjna tsa tokjoatjao tsjión je chjoónle kʼoa kjaʼaí xi kuixankao ijngokʼa. Kʼoa tsa tosa kʼia sichajngi nga jekatsjion chjoónle kʼoa kjaʼaí xi kuixankao ijngokʼa ningalani kisichatʼale tsakai je chjoónle. Kʼianga tsjion xínkjín chjota kʼoa nga kjaʼaí xi bixankao ijngokʼa, jesíchajngi kʼoa toyaa tjen fetʼa je kjoabixanle xi títjon. Kʼianga bixan ijngokʼa chjíle kjoabixan jebi ngixko̱n kjoatéxoma. Je revista La Atalaya xi tsʼe 15 de febrero de 1980, página 30, kʼoakitso nga je chjota xi kabixan ijngokʼa “nga tsín koa̱n tsjión xínkjín kʼoa nga tsín tikoa̱n je kʼoéjnakao ijngokʼani xi sa jekitsjion; je kjoabixan xi títjon jeya tjen jetʼa nga kitsjion xínkjín, nga kisichajngitʼale xínkjín kʼoa nga chixan ijngokʼa”.

Jmeni xi tso i̱bi ali tsa kuijin xi tsonile tsa tsín chjí ʼyaa je kjoabixan kʼoa tsa tokjoaská tjenkao je kjoachajngi. Kʼiatsa jngo chjota xi toxkia tsjión chjoónle kʼoa kjaʼaí xi kuixankao ijngokʼa, je xi chjotajchínga sʼin tjío jngoo comité judicial kʼoenda, nga̱ tísíchajngi chjota jebi nga kʼoatísʼín. (Kʼiatsa chjotale Cristo ma je chjoón xi kabixankao ijngokʼa, kʼoati jngo comité judicial sʼe̱ndale nga̱ kʼoati tísíchajngi tsanda je). Ningalani tsín kʼoasʼin jchatokon nga kjoachajngi tjíosʼín, tonga tjíofaʼatone kjoatéxomale Niná. Nʼio nkjín nó kjoaʼato nga tsín jme xá kʼoaile je chjota jebi ya jinjtín. Kʼiaa saʼnda kʼoaile xá nga tsín tiʼya xi chʼaosʼin sikʼaxki̱ni tʼatsʼe jmeni xi kisʼin. Xi ijngosani, kʼoati kuenta koa̱n josʼin tíjnani je xi chjoónle koanni kʼoa josʼin tjíoni ʼndíxti xi kisikatío nga kʼoakisʼin (Mal. 2:14-16).

Nga kuenta nʼia josʼin bichómani nga tokjoatjao tsjion xínkjín chjota kʼoa nga kjaʼaí xi bixankao ijngokʼa, jé Jeobá chjenngilee ñá xi chjotale Cristo maa nga xkón sʼin ʼyatokoán je kjoabixan (Ecl. 5:4, 5; Heb. 13:4).