A ʼyaní
Ánni nga ya tsakatiojinnile je chjotakjoajchánle David je chjota xi xin naxinandále
NKJÍN xi tsín chjota israelita xi ya tsakatiojinle chjotakjoajchánle David. Tobʼelañá, je Zéleq xi chjota ammonita koan, je Urías xi chjota hitita koan, kʼoa Itmá xi chjota moabita koan (1 Crón. 11:39, 41, 46). a Kʼoati ya tsakatiojinle je chjota keretita, peletita kao chjota guitita (2 Sam. 15:18). Tsakui nichxin je chjota keretita kao chjota peletita ya tjenni je chjota filisteo (Ezeq. 25:16). Kʼoa je chjota guitita tochajinle ya kinroani naxinandále chjota filisteo jñani Gat ʼmi (Jos. 13:2, 3; 1 Sam. 6:17, 18).
Ánni nga kitsjoaʼndeni je David nga ya tsakatiojinle chjotakjoajchánle je xi tsín chjota israelita. Kuinga be nga kixi koaitʼale je Jeobá kʼoa kʼoati kixi koaitʼale je. Tobʼelañá, je xo̱n xi ʼmi The New Interpreter’s Dictionary of the Bible kʼoatso nga je chjota keretita kao peletita kixi kitʼale David kʼianga nʼio tse kjoa jaʼatojin nga je tíbatéxoma. Je chjota israelita alikui tije David kitsjoanganʼionile, tosaa je Seba kitjenngile. Tonga je chjota keretita kao chjota peletita jé David kitsjoanganʼiole kʼoa kikján kao Seba (2 Sam. 20:1, 2, 7). Xi ijngosani, kʼianga je tile David xi Adonías tsakʼin koanmele nga rey sʼin kʼoéjna, je chjota keretita kao chjota peletita alikui kitsjoaʼnde, tosaa ya kitsjoanganʼiole je David kʼoa tsakinyakao kʼianga toje Salomón xi rey katama, nga̱ be nga je Jeobá kiskoéjin nga rey sʼin kʼoéjna (1 Rey. 1:24-27, 38, 39).
Ijngosa chjota xi kitsjoanganʼiole David jé chjota guitita xi Ittái tsakʼin. Chjota jebi kao xi 600 chjotakjoajchánle kitsjoanganʼiole David kʼianga tijeni tile xi Absalón tsakʼin kontra sʼin tsakʼejnale kʼoa nkjín chjota israelita xi ya kitʼale. Kui xi koanmele Absalón nga rey sʼin kʼoéjna. Kʼianga kʼoakoan, je David kʼoakitsole Ittái nga likui kjoanʼio tjínnele nga je koasenkao nga xin naxinandále. Tonga je Ittái i kitso: “Josʼin nga tíjnakon Jeobá kʼoa kao je rey, tojñani nga koai je rey kʼoati ya koai je choʼndali ninga kʼoéjnakon kʼoa ninga si̱kʼien” (2 Sam. 15:6, 18-21).
Je Ittái kixi kitʼale David, je rey xi Jeobá kiskoéjin
Ningalani xin naxinandále je chjota keretita, chjota peletita kao chjota guitita tsabe nga je Jeobá xi ñaki Niná kʼoa nga je David kiskoéjin nga rey koa̱n. Nʼiojin tsjoa kisʼe kon je David nga nkjín chjota xi kixi kitʼale kʼoa kitsjoanganʼiole.
a Je kjoatéxomale Niná xi faʼaitʼa ya Deuteronomio 23:3-6 kʼoatso nga nijngojin chjota ammonita kao chjota moabita koa̱n ya kjoaʼasʼen ya naxinandá Israel. Jebi kui xi tsonile nga koan ya tsakatio ya naxinandá Israel ninga tsín naxinandále Jeobá koan. Chótʼai je libro Perspicacia para comprender las Escrituras, tjasjai jñani “Ammonitas” tso, kʼoa xijekoa̱n tjasjai jñani “Se casan con israelitas” tso.
