KJOAʼMIYA XI CHOTʼAYA 16
KJOAJNDA 64 Kao kjoatsjoa kʼoéxkoá chjota
Jósʼiaan nga ngisa tsjoa sa̱tío tokoán nga kʼuínyasoán
“Kao kjoatsjoa tixálao je Jeobá” (SAL. 100:2).
XI TÍNCHJA̱NI
I̱ kjoaʼmiya jebi kui chótʼayajiaan jósʼiaan nga ngisa tsjoa sa̱tío tokoán nga kʼuínyasoán.
1. Jósatío kon je ndsʼee kʼianga fitsoyason (kʼoati chótsenlai sén xi faʼaitʼa).
KUINGA ʼmiyasonñá nga tsjoachaa je Jeobá kʼoa mená nga katabexkon je chjota. Tjínkʼa xi nʼio tsjoake nga tsoyason tonga tjínkʼa xi tsín tso kon kʼianga fákaonajmíni chjota Énle Niná. Kʼoa tjínkʼa xi tsín tso kon nga fikonle chjota ya ndʼiale nga̱ tsín toxá kanchja̱nile. Tjínkʼa xi tsokjón tsa tsín kjuinrʼoéle chjota kʼoa tsa koa̱njtile. Kʼoa tjínkʼa xi kʼoasʼin tsakʼinyale nga tsín koa̱n jokuitsole chjota ninga tsín kʼoatjín jmeni xi kuitso. Nga tsjoake Jeobá ndsʼee jebi kjitʼaa bitjotsoyason ninga ñʼai male nga fákaonajmíni Énle Niná je chjota. Nʼiojin tsjoa sʼe kon je Jeobá nga kʼoasʼín.
A tsjoa sʼe tokuin nga ʼmiyasuin (Chótsenlai párrafo 1)
2. Ánni nga tosi tonda kʼuínyasonñá ninga sakʼoa ñʼai maná nga chjakaonajmíñá Énle Niná je chjota.
2 Tosi tonda tʼinyasuin ninga ñʼai mali nga chjakaoni Énle Niná je chjota. Kuinga sakʼoa kʼoasatíoni tokoán nga nangitokon maa, nga̱ tsín mená nga toñá nʼio kʼoaxkiaa kʼoa tsín mená kʼoékjaoʼakoaa chjota tsa jmeni xi kuitsoná. Alikui nda satío tokoán nga tsín nrʼoéná je chjota nga̱ kui xi mená nga kuinyakoaa tsakai. Tonga je Jeobá be jme kjoa xi bitjatojiaan nga ʼmiyasoán kʼoa tíjnandaa nga koasenkaoná (Is. 41:13). I̱ kjoaʼmiya jebi aon koya tjínni xi chótʼayajiaan jósʼiaan nga tsjoa sa̱tío tokoán kʼianga kʼuínyasoán.
KOASENKAONÁ JOTSO ÉNLE NINÁ
3. Jmé xi tsakasenkao Jeremías nga nʼiojin koan nga kitsoyason.
3 Jokji tífaʼato nichxin kui Énle Niná tjíobinyakao choʼndale Niná nga bitjosonle je xá xi sʼenele. Kataʼyala jokoan Jeremías. Kʼianga kʼoakitsole Jeobá nga katafitsoyason kitsokjon kʼoa i kitso: “Alikui ʼbe joxían nga̱ tosʼa xtia” (Jer. 1:6). Kui Énle Niná tsakasenkao nga nʼiojin koan, i kitso: “Je énle kʼoakoan joni lʼí xi tíbʼájnga̱ xi tíjnajin nindana. Kʼoa alikui tikichokjoanina nga toʼan tsakʼejinkoan” (Jer. 20:8, 9). Nʼio chʼao koankjoan je chjota jñani kitsoyason je Jeremías. Tonga tikui tsakasenkaoni je én xi kitsoyason nga nʼiojin koan.
4. Jósʼin bichómani nga bʼexkiaa Énle Niná kʼoa nga nikjaʼaitsjenjiaan jmeni xi tso (Colosenses 1:9, 10).
4 Kʼoati basenkaoná ñá jotso je Énle Niná. Kʼianga kiskile Pablo je chjotale Cristo xi Colosas tsʼe kʼoakitsole nga tikui kuinyakaoni nga skoe̱ jokjoantjínni xi tʼatsʼe Niná nga kʼoasʼin koaikao yaole josʼin mele Niná kʼoa nga kui kʼoasʼin je xá xi ndatjín (tʼexkiai Colosenses 1:9, 10). a Nʼio ndatjín je xá xi nʼia kʼianga ʼmiyasoán. Ngisaa manʼiotʼaa je Jeobá kʼianga bʼexkiaa je Énle, nga nikjaʼaitsjenjiaan jmeni xi tso kʼoa ngisaa sʼejngo tokoán nga nʼio tjínle kjoandosin nga kʼuínyasoán.
5. Jméni xi sʼiaan nga ngisa nda koa̱njinná jmeni xi tso Biblia.
5 Kʼianga koa̱njinná jmeni xi tso Énle Niná alikui koa̱n nga xitso xiská kʼoéxkiaa. Kʼiatsa tsín koa̱njinná jme xi tínchja̱ni jngo texto alikui koa̱n nga tokʼoéjngoaa tokoán, tosa ya kjoásjaiyaa ya Índice de las publicaciones Watch Tower kao Xo̱n xi síchjén je testigole Jeobá nga jme xi básjaiya. Kʼiatsa nda chótʼayajiaan Énle Niná ngisaa sʼe̱jngo tokoán nga ñaki kʼoatjín jmeni xi tso (1 Tes. 5:21). Kʼoa ngisaa koa̱nmená kʼuínyalee xi kjaʼaí tʼatsʼe Biblia.
TONGINI CHÓTʼAYAJIN JMENI XI SÍ KʼIANGA KʼUÍNKʼINYASUIN
6. Ánni machjénni nga tongini chótʼayajiaan jmeni xi kuixoán kʼianga kʼuínyasoán.
6 Ngisaa kuitso tokuin nga chja̱kaonajmíni Énle Niná je chjota tsa tongini chótʼayajin jmeni xi sí. Je Jesús tongini kitsoyale je chjotale jokuitso kʼianga kuitsoyason (Luc. 10:1-11). Kʼoa nga kʼoakisʼin jmeni xi kitsole Jesús, nʼio tsjoa kisatio kon nga kitsoyason (Luc. 10:17).
7. Jméni xi sʼiaan nga tongini kuiyondaa nga kʼuínyasoán (kʼoati chótsenlai sén xi faʼaitʼa).
7 Si̱kjaʼaitsjenjiaan jokʼuínlee je chjota nga chja̱kaonajmíñá Énle Niná kʼoa tongini kuiyondaa tsa totseni jme xi kuitsoná. Tsa kʼoasʼiaan, ngisaa tsjoa sʼe̱ tokoán nga chja̱kaonajmíñá chjota je Énle Niná.
Tongini chótʼayajin jme xi sí nga kʼuínyasuin (Chótsenlai párrafo 7)
8. Jósʼin mangósoán xi chjotale Cristo maa kao jngo tii niʼnde.
8 Je Pablo jngo choa̱ kisichjén kʼianga kitsoya jme xá xi kjinená kʼianga ʼmiyasoán. I kitso: “Tjínnajin je kjoabi xi nʼio nda joni tsa jayale jngo tii xi niʼnde” (2 Cor. 4:7). Jmé xi kinchja̱ni kʼianga kjoa xi nʼio nda kitso. Kui kinchja̱ni je én xi ʼmiyasoán tʼatsʼe Chjotaxále Niná nga̱ kui xi kuinyakao chjota nga kuitjontjaile yaole (2 Cor. 4:1). Kʼoa jmé xi kinchja̱ni nga tii niʼnde kisikʼaxki̱. Jé tsoyanile choʼndale Niná nga tsoyason. Kʼianga tsakʼejna Pablo, je chjota xi tsojmi tsakaténa tii niʼnde tsakinyá je vino, tsojmi xi ma chine kao tao̱n. Nichxin xi tiyoaa ndʼai, kʼoati nʼio chjíle je xá xi títsjoáná Jeobá kʼianga ʼmiyasoán je Énle. Tijé Jeobá koasenkaoniná nga kuitjosonná je xá xi tíbánená.
KʼOAKʼUÍNLEE JEOBÁ NGA NʼIOJIN KATAMAA
9. Jósʼiaan tsa chjota nokjonlee kʼoa tsa kʼoasʼin nikjaʼaitsjeen nga tsín kjuinrʼoéná (kʼoati chótsenlai sén xi faʼaitʼa).
9 Jméni xi koa̱n sʼiaan tsa chjota nokjonlee kʼoa tsa kʼoasʼin nikjaʼaitsjeen nga tsín ʼya xi kjuinrʼoéná nga kʼuínyasoán. Si̱kjaʼaitsjenjiaan jokitso je pastrole Jesús nga tsakʼétsʼoale Niná kʼianga kʼoatsakʼinle nga tsín tikatabakóyasonni. ʼNdele nga tso̱kjon tosaa kui kisijéle Niná nga katabasenkao nga nʼiojin katama nga tosi tonda kuitsoyason. Kʼoa je Jeobá kinrʼoéle nga tsakʼétsʼoale (Hech. 4:18, 29, 31). Kʼiatsa chjota nokjonlee kʼoati si̱jélee nganʼio Jeobá nga katabasenkaoná. Kʼoakʼuínlee nga katabasenkaoná nga tsjoachaa koaan chjota kʼoa nga tsín kuinókjonlee.
Kʼoatʼinlai Niná nga nʼiojin katamai nga kʼuínyasuin (Chótsenlai párrafo 9)
10. Jósʼin basenkaoná Jeobá nga bitjosonná je xá xi kjinená nga testigole maa (Isaías 43:10-12).
10 Jé Jeobá xi kʼoasʼin mele nga testigole maa (tʼexkiai Isaías 43:10-12). b Kʼoatsoná nga je koasenkaoná nga nʼiojin koaan. Ñola koya kataʼyaa josʼin basenkaoná Jeobá. Xi títjon, jé Jesús bándiaaná kʼianga ʼmiyasoán (Mat. 28:18-20). Xi majaoni, kui xá tsjoále Jeobá je ánkje nga kuinyakaoná (Apoc. 14:6). Xi majanni, kui nganʼiotsjele Jeobá basenkaoná nga faʼaitsjenná jmeni xi chotʼayá (Juan 14:25, 26). Kʼoa xi mañoni, jé ndsʼee síchjén Jeobá nga ñatjen ʼmiyasoán. Nʼiojin maa nga ʼmiyasoán nga binyakaoná Jeobá kao je ndsʼee.
KUI CHJA̱KAONAJMÍNI CHJOTA JMENI XI MANDOSINLE
11. Jméni xi sʼiaan nga ngisa nkjín chjota chja̱kaonajmíñá Énle Niná (kʼoati chótsenlai sén xi faʼaitʼa).
11 Tsa tsín nkjín chjota satéjiaan nga mangínchonlee niʼyale, si̱kjaʼaitsjenjiaan jñáni nga ngisa nkjín sa̱téjiaan (Hech. 16:13). Koaan ya yandiaa kʼuínyasoán tsa bele tokoán nga sa̱téjiaan je chjota xi fisíxá kʼoa tsa tsojmi fikatse. Jngo ndsʼee xi Joshua ʼmi itso: “Ngisaa nkjín chjota fakaonajmíña Énle Niná kʼianga ya fixinyasoan ya jñani nʼio nkjín chjota faʼa”. Kʼoa ngisaa nkjín chjota tsaojin je ndsʼee jebi kao chjoónle nga kʼia fitsoyason kʼianga jemaxon, tsa kʼiaje̱ nga taingo nga jefaʼato nyisen (Efes. 5:15, 16).
Kui chja̱kaonajmíni chjota jmeni xi mandosinle (Chótsenlai párrafo 11)
12. Jósʼin jchañá jme xi makjáojinle chjota kʼoa jme xi mandosinle.
12 Kʼiatsa tsín nanda nrʼoéná je chjota kʼianga chjakaonajmíñá Énle Niná si̱kjaʼaitsjenjiaan jméni xi makjáojinle kʼoa jméni xi mandosinle. Je Joshua kao Bridget yaa kjoenile nga fákaonajmí je chjota jmeni xi tso je tratado. Tobʼelañá, kʼianga kui síchjén je tratado Jósʼin ʼyatokuin je Biblia itsole je chjota: “Tjínkʼa xi kʼoatso nga tʼatsʼe Niná jaʼaini je Biblia kʼoa tjínkʼa xi kʼoatso nga to kjoafaʼaitsjenle chjota nya, jósingái ji”. Kʼianga kʼoasʼín je ndsʼee ngisaa nkjín chjota fákaonajmíni Énle Niná.
13. Ánni kʼoabixónñá nga tsjoa sa̱tío tokoán kʼianga kʼuínyasoán ninga tsín ʼya xi kjuinrʼoéná (Proverbios 27:11).
13 Je xi ngisa chjíle ali tsakuijin tsa kjuinrʼoéná chjota kʼoa tsa mai. Je xi chjíle kuinga si̱tjosoán jmeni xi tsoná je Jeobá kao Jesús nga kʼuínyasoán (Hech. 10:42). Ningalani tsín kjuinrʼoéná chjota nga kʼuínyasoán kʼoa ninga tsín sa̱téjiaan, je xi tsjoa kʼoe tokoán kuinga tinitjosoán jmeni xi mele je Jeobá (tʼexkiai Proverbios 27:11). c
14. Jósatío tokoán kʼianga kajin je ndsʼee jngo chjota xi mandosinle Énle Niná kʼoa ánni.
14 Kʼoati tsjoa satío tokoán nga tsaojin je ndsʼee je chjota xi nrʼoé Énle Niná. Tojo tso je Xo̱n xi Bájinkonná kʼianga ʼmiyasoán yaa mangóson joma kʼianga jngo tiʼndí cha. Ninga nʼio nkjín mani chjota xi básjai. Kʼianga jemasjai tiʼndí xi kacha ali tsa tojejin tsjoa sʼe̱le je xi kamasjaile. Tsjoa satío kon ngatsʼi. Tikʼoasʼinni tsanda ñá, binyakaongañáñá xíngiaa kʼianga ʼmiyasoán. Tsjoa satío tokoán ngatsʼiaa kʼianga jebichó kjoajtín jngo chjota xi tosʼa tíkotʼaya Biblia.
TSJOACHA KATAMAA JE JEOBÁ KAO CHJOTA
15. Jósʼiaan nga ngisa tsjoa sa̱tío tokoán (Mateo 22:37-39; kʼoati chótsenlai sén xi faʼaitʼa ya ).
15 Ngisaa tsjoa sa̱tío tokoán nga kʼuínyasoán tsa tsjoachaa Jeobá kʼoa tsa tsjoachaa je chjota (tʼexkiai Mateo 22:37-39). d Nʼio tsjoa sʼe kon je Jeobá kʼianga ʼmiyasoán. Kʼoati nʼio tsjoa sa̱tío kon je chjota xi skótʼaya Énle Niná, kʼoa je xi Niná sixále kuitjontjaile yaole (Juan 6:40; 1 Tim. 4:16).
Ngisaa tsjoa sʼe̱ tokuin nga kʼuínyasuin tsa tsjoachai Jeobá kʼoa tsa tsjoachai chjota (Chótsenlai párrafo 15)
16. Ningalani tsín koa̱n kuitjoaa ndʼianá, jméni xi koa̱n sʼiaan nga tsjoa sa̱tío tokoán nga kʼuínyasoán. Jngo choa̱ tʼejnai.
16 Tsa tsín ma bitjui ndʼiali kʼoati koa̱n koakui nga tsjoachai je Jeobá kao chjota. Kʼianga koan chʼin COVID-19 tojo kitsoyason je Samuel kao Dania ninga tsín tikoan kitjoni ndʼiale. Teléfono kinchja̱le chjota nga tsakjákaonajmíni Énle Niná, carta kisikasénle kʼoa zoom kisichjén nga kitsoyale Biblia je chjota. Cáncer tjínle je ndsʼee kʼoa tsakjákaonajmíni Énle Niná je chjota xi ya síxá ya clínica jña koanxkile. Itso: “Kʼianga kjoa bitjatojiaan alikui tichókjoaniná nga jme xi nʼia, nʼio nikjáojiaan kʼoa alikui choa ñʼai maná nga je Jeobá nixálee. Kuinga machjénni nga je Jeobá si̱xálee nga̱ kui xi tsjoa bʼé tokoán”. Je Dania kiskandijao kʼoa jan sá nga to nachan tsakajnason. Xijekoan, jaon sá nga silla de ruedas tsakʼejnaya. Itso: “Kʼoakisʼian jokji tjen kʼoakoanna. Tsakjakaonajmíña Énle Niná je chjoón chjinexki xi jaʼaikonna kao chjota xi jaʼaikaona je tsojmi xi tsakatse. Kʼoati tsakjakaonajmíña Énle Niná jngo chjoón xi ya síxákao chjinexki kʼianga kinchjale teléfono”. Ningalani tse kjoa jaʼatojin je Samuel kao Dania tsjoa kisatio kon nga kitsoyason jokji tjen kʼoakoanle.
17. Jósʼiaan nga ngisa nda koasenkaoná jme xi kachotʼayajiaan i̱ kjoaʼmiya jebi.
17 Ngisaa nda koasenkaoná tsa kʼoasʼiaan ngayeje jmeni xi kachotʼayajiaan. Yaa mangóson je tsojmi xi chinee, tsa kʼoéjiaan ngayeje xi machjénle nʼio nda chi̱ne. Tsa kʼoasʼiaan ngayeje jme xi kachotʼayajiaan nʼiojin koaan nga kʼuínyasoán kʼoa ngisaa tsjoa sa̱tío tokoán.
JÓSʼIN BASENKAONÁ JEBI NGA NGISA TSJOA SʼE TOKOÁN NGA ʼMIYASOÁN
-
Nga tongini chótʼayajiaan jme xi kuixoán nga kʼuínyasoán.
-
Nga kʼoakʼuínlee Jeobá nga nʼiojin katamaa nga kʼuínyasoán.
-
Nga tsjoacha koaan Jeobá kao chjota.
KJOAJNDA 80 Kataʼyao nga nda chjota Jeobá
a Colosenses 1:9, 10: “Xi kui kjoa saʼnda nichxin nga kinoʼyaijin, likui nichajinjin tibʼetsʼoantjailaijin. Kʼoasʼin tinijáijin nga ñaki nda kataʼyao ngayije josʼin mele Niná, kao ngayije kjoaʼisentakonle kao kjoafaʼaitsjenle Espíritu Santo, 10 jméni nga kʼoasʼin kuimanio josʼin nga bakinle Nainá, jñale ngayije xi sasénle nga je. Ngisa tse katitjosonno jñale xá xi nda tjín, nga ngisa nda jchao Niná”.
b Isaías 43:10-12: “Jonño testigona kui xi tso je Jeobá, je choʼndana xi kiskoejian, kʼianga kataʼyanáo kʼoa nga katamakjainno xi tʼatsʼan, kʼoa nga katamajinno nga tojo anña. Tsín Niná xi koannda títjonna an kʼoa xi koanskanni tojo liʼya xi kisʼe. 11 An, anña Jeobá, kʼoa tsínsa xi kjaʼaí xi male bʼasjentjai. 12 An xokixian, an tsakʼasjentje kʼoa an kixinyano kʼianga kjesa ʼyajion niná xi kjaʼaí. Kuinga jonsíño testigona, kui xi tso je Jeobá, kʼoa anña Niná”.
c Proverbios 27:11: “Chjine katamai, ’ndítá, kʼoa tjayatsjoai ni̱ma̱na, ánni nga koa̱n k’oekjao’akaosíña je xi tíbesinna”.
d Mateo 22:37-39: “Jesús kʼoakitsole: Katamatsjoachai Naili Nináli. Katamatsjoachani ngayije ni̱ma̱li, kao ngayije kjoatsjoali, kʼoa kao ngayije kjoafaʼaitsjenli. 38 Jébi xi títjon, xi ngisa ngʼa kjoatéxoma. 39 Kʼoa je xi majaoni kʼoatisʼinni jebi: Katamatsjoachai xikʼa joni nga tijini”.
