1. Jósʼin tiyoaa nga ya naxinandále Jeobá tiyojiaan, kʼoa jméni xi ñaki kʼoatjín tokoán nga sʼiaan.

 NICHXIN xi tiyoaa ndʼaibi nʼio nkjín mañá xi je Jeobá tiʼyaxkoán kʼoa kui kʼoatinʼia xi ndatjín. Nga ya tiyojiaan naxinandále Jeobá jtín sʼin tiyoaa kʼoa kʼoasʼin tiʼyaxkoán josʼin mele. Ñaki kʼoatjío tokoán nga toje Jeobá jchaxkoán ngantsjai. Kui xi mená nga nkjínsa chjota katabexkón Jeobá ánni nga naxinandále katabatiojinni.

2. Ánni nga toʼi̱ni jinnaxinandále Niná nga ndasʼin tiyoaa.

² Jé Jeobá xi jtín sʼin tjíosíkatío choʼndale ninga xkoa̱ya sʼin tjío je chjota kʼoa ninga jtike xínkjín (1 Juan 5:19; Apoc. 12:12). Je Jeobá be nga chʼao chon sonʼnde nga je Na̱i tíbatéxoma tonga i̱ jinnaxinandále nda tiyoaa. Nga nʼio tsjoakená kuinga i̱ tiyojinñá naxinandále kʼoa kao kjoatsjoa nixálee. Nga jtín tiyoaa kʼoa nga nda tiyoaa yaa mangóson tojo chon jñani kjintje naxó jñani nda sasénndále (Is. 4:6; 58:11). Je xi naxinandále Niná tjíojin tsjoa tjío kon kʼoa nda tjío ningalani nʼio chʼao chon sonʼnde ndʼaibi (Is. 54:14; 2 Tim. 3:1).

3. Jósʼin kitjoson títjon jmeni xi tso ya capítulo 65 xi tsʼe Isaías.

³ Tojo tso ya capítulo 65 xi tsʼe Isaías, je Jeobá tongini kʼoakitso josʼin kuiyoaa nga jinnaxinandále tiyojiaan. Je én jebi kʼiaa kitjoson títjon nga nó 537 tongini nga nó 1. Je chjota judío xi tsakationʼio ya Babilonia kʼiaa kitjoʼndele nga kui nó nga ki ijngokʼani ya ʼndele. Nga jekicho ijngokʼani, jé Jeobá tsakinyakao nga tsakʼéndaya ijngokʼa Jerusalén kʼoa nga naskánakisichon. Tsakʼéndayaa je yo̱ngo̱ nga ya jchaxkón ijngokʼa Jeobá (Is. 51:11; Zac. 8:3).

4. Jósʼin tíbitjoson ndʼaibi jmeni xi tso ya capítulo 65 xi tsʼe Isaías.

 ⁴ Kʼiaa kitjoson ijngokʼa nga nó 1919 jmeni xi tso ya capítulo 65 xi tsʼe Isaías kʼianga kitjojinle religión ndiso je chjotale Cristo. Saʼnda nga kʼia, sa nkjín sa nkjín kjimani chjota xi je Jeobá tjíobexkón. Kʼianga nʼio tsakʼénele yaole nga kitsoyason ngisaa ngotjo koannkjínni je jtín. Tjíosíndayaa yaole je chjota xi nʼio tsʼen koan ngasʼa kʼoa xi tsín nda kikao yaole, kʼoa kui kʼoatjíosʼín josʼin mele Niná (Efes. 4:24). Nʼio nkjín koya jmeni xi kisikʼaxki̱ je Isaías xi kʼia kuitjoson kʼianga jeʼndenaxó koa̱n sonʼnde. Tonga ndʼaibi kʼoati tse kjoanda tísʼená nga Jeobá tinixálee. Kataʼyala je kjoanda xi tjínná ndʼaibi kʼoa jósʼiaan nga tsínkʼia kuinjíotokoán.

KJOANDA XI TJÍNNÁ NGA YA TIYOJIAAN NAXINANDÁLE JEOBÁ

5. Tojo tso Isaías 65:​13, jmé kjoanda xi tjínná nga naxinandále Jeobá tiyojiaan.

⁵ Ndatjío tokoán kʼoa lijme xi tíchaná xi tʼatsʼe Niná tínroani. Je Isaías kʼoakitso josʼin tiyoaa xi ya naxinandále Niná tiyojiaan kʼoa josʼin tjío xi tsín ya tjíojin (tʼexkiai Isaías 65:13). a Ñá xi choʼndale Jeobá maa títsjoáyejená jmeni xi machjénná. Títsjoáná je nganʼiotsjele, kitsjoaná je Biblia, kʼoa nʼiosa nkjín koya jmeni je xi títsjoáná (tingósonkoai Apocalipsis 22:17). Tonga je chjota xi tsín ya tjíojin naxinandále Jeobá jngoyale kjinrá tjíofaʼá, fatile kʼoa kjoasoa tjíojin nga̱ tsín be xi tʼatsʼe Niná (Amós 8:11).

6. Tojo tso ya Joel 2:​21-24, jméni xi títsjoáná Jeobá kʼoa jósʼin basenkaoná.

⁶ Je profeta Joel tongini kʼoakitso nga je Jeobá tsjoáná jmeni xi ngisa koa̱nchjénná ánni nga nʼio sa̱tíoni je kjoamakjainná (Joel 2:​21-24). Tobʼelañá, je Jeobá kitsjoaná je Biblia, títsjoáná je xo̱n xi Énle yʼangini, jmeni xi faʼaitʼa ya jw.org, kʼoa satíoná kjoajtín kao kjoajtíntse. Nga tjínná ngayeje jebi nʼio binyakaoná.

7. Ánni nga tsjoa tjíoni tokoán (Isaías 65:14).

⁷ Tsjoa tjío tokoán. Tsjoa satío tokoán nga bʼailee kjoanda je Jeobá (tʼexkiai Isaías 65:14). b Kuinga tsjoa tjíoni tokoán nga ʼyaa jokjoantjínni xi tʼatsʼe Niná kʼoa nga tsakʼéchjíntjainá je Jesús ñaki tjínjngoo tokoán nga sitjoson jmeni xi tso je Niná. Kʼoa tsjoa satío tokoán nga kui chobayañá jebi kao je ndsʼee (Sal. 34:8; 133:​1-3).

8. Jñánile nga jao koya je xi ngisa nʼio bakó je choʼndale Jeobá.

⁸ Jao koya tjínni je xi ngisa nʼio bakó je choʼndale Jeobá. Kuinga jtín tjío kʼoa nga tsjoakengañá xínkjín. Kʼoa nichxin xi nroaján ngisaa jtín kuiyoaa kʼoa ngisaa tsjoacha koaan xíngiaa (Col. 3:14). Jngo tichjaa xi kʼoatso jokisʼe kon kʼianga tsabexkon je testigole Jeobá. Itso: “Alikui tsjoa tjín tokoan tsakai kʼoa saʼnda tsín ʼbe jósʼin koakole kjoatsjoacha je xíngia. Nga tsaʼbexkoan je testigole Jeobá tsaʼbeña nga tsjoake xínkjín”. Tsa mená nga tsjoa sʼe̱ tokoán machjén nga ya kuiyojiaan naxinandále Jeobá. Ninga tsín sasénle chjota jonʼia, ndasʼin  tiyoaa ngixko̱n Jeobá, kʼoa jtín sʼin tiyoaa kao ngatsʼi ndsʼee xi tjío jngo tjíjtsa Sonʼnde (Is. 65:15).

9. Tojo tso Isaías 65:​16, 17, jósikao Niná je kjoañʼai xi tjínná ndʼaibi.

⁹ Tsín jme xi nʼio nikjáojiaan. Ya Isaías 65:14 kʼoatso nga je xi tsín ya tjíojin naxinandále Jeobá ba sa̱tío kon kʼoa skíʼndá. Tonga ñá xi choʼndale Jeobá maa alikui tikjoañʼai chja̱ʼañá nichxin xi nroaján. Je Jeobá itso: “Tsín tikui kjoaʼaítsjennino je kjoañʼai xi kitjatojion ngasʼa; kʼoa alikui tikui kjoaʼaítsjennina” (tʼexkiai Isaías 65:​16, 17). c Je Niná kjoaʼaxin kjoa xi tjínná ndʼaibi kʼoa ñaki tondiaa jchajinná jmeni xi kjoañʼai síkjaʼáná.

10. Ánni nga tse kjoanda tjínniná nga tjío je ndsʼee xi ñatjen ʼyaxkoán Jeobá (kʼoati chótsenlai sén xi faʼaitʼa).

¹⁰ Nda sʼe tokoán nga biyojtián nga̱ tsín tsakui nikjáojiaan jmeni xi chon sonʼnde. Jósʼin kʼoainganʼioá nga jtín sʼin kuiyoaa kao je ndsʼee. Kʼiaa nga koakolee xíngiaa je kjoanda xi tsjoáná je nganʼiotsjele Niná, jolani kjoatjaocha, kjoatsjoa, kjoa xi nyʼán tjín kao kjoandʼé (Gál. 5:​22, 23). Tsee kjoanda tjínná nga i̱ tiyojiaan naxinandále Jeobá. Kʼiatsa tsín kuinjiótokoán naxinandále Niná jchañá josʼin sitjoson Niná nga kʼoatso nga sichjotseya je sonʼnde kao ngʼajmi.

11. Tojo tso Isaías 65:​18, 19, jósatío tokoán nga naxinandále Jeobá tiyojiaan, kʼoa ánni.

¹¹ Tsjoa tjín tokoán kʼoa bʼaiñá kjoanda. Je Isaías kʼoatso ánni nga tsjoa tjíoni tokoán ñá xi choʼndale Jeobá maa. Kuinga je Jeobá xi kʼoasʼin mele nga jtín sʼin kuiyoaa kʼoa nga nda kuiyoaa (tʼexkiai Isaías 65:​18, 19). d Kuinga ñá kʼoatsoniná je Jeobá nga kʼuínyalee je chjota nga katabe xi tʼatsʼe ánni nga ya katabatiojinni naxinandále. Tsjoa satío tokoán nga ʼyaa xi tʼatsʼe Jeobá kʼoa mená kuinyakoaa xi kjaʼaí nga kʼoati katabe xi tʼatsʼe (Jer. 31:12).

12. Jósʼe tokoán kʼianga bʼexkiaa jme xi tso Isaías 65:​20-24, kʼoa ánni.

 ¹² Nga naxinandále Jeobá tiyojiaan tsjoa tjío tokoán tʼatsʼe kjoachoya xi tjínná kʼoa bʼaiñá kjoanda. Si̱kjaʼaitsjenla josʼin kuiyoaa kʼianga jesonʼndenaxó koa̱n Sonʼnde. Je Biblia itso: “Alikui totjíchoa̱ nichxin koatio je ʼndílee kʼoa je chjotajchínga tsee koa̱nle”. Kʼoati tso nga je chjota “kʼoenda niʼya kʼoa yaa koatioʼya; kʼoentje xka̱totsee kʼoa jé ski̱ne tole”. Xi ijngosani, alikui tokjoatjao nga sixá chjota, nga̱ jé Jeobá sichikontʼain. Kʼoati tso Jeobá nga nda sa̱tío tokoán kʼoa nga nda kuiyoaa. Tsjoáná jmeni xi si̱jélee kʼoa itso: “Saʼnda nga kje nchja̱jinna, kjuinrʼoele jotjíotso” (Is. 65:​20-24; Sal. 145:16).

13. Tojo tso Isaías 65:​25, jméni xi tjíosʼín je chjota xi je Jeobá tjíosíxále.

¹³ Ndasʼin tiyoaa kʼoa alijme xi nokjonlee. Kui nganʼiotsjele Niná tjíobinyakao chjota nga tjíosíndaya yaole je xi tsʼen koan ngasʼa kʼoa xi chʼao kisʼin (tʼexkiai Isaías 65:25). e Tjíosíkʼantjaiya yaole jokoankjoan ngasʼa (Rom. 12:2; Efes. 4:​22-24). Ninga kʼoalani, nga chjotajée maa sakʼoajin kui kʼoasʼiaan xi tsín ndatjín. Je Jeobá jtín sʼin tjíosíkatíoná ngatsʼiaa nga tsjoacha katamaa xíngiaa kʼoa nga nda kuiyoaa (Tito 2:11). Tojé Jeobá xi kjimale nga jtín sʼin tísíkatíoná.

14. Jósʼin kitjoson jmeni xi tso Isaías 65:25 xi kao jngo ndsʼee.

¹⁴ Jngola choa̱ kataʼyaa xi bakó nga koa̱n si̱kʼantjaiyaa yaoná. Jngo ti xi 20 nóle xi nʼio tsʼen koan kʼoa alikui nda kikao yaole. Nkjín kʼa nga ndoyá kichani nga carro kisiché kʼoa nga tsesa kjoa tsakajngi. Nga nʼio kjan koanle ñaki to kjoa tsakʼejnajin. Kʼianga kinrʼoé Énle Niná kʼoa ki je kjoajtín xi satíoná ñaki kisʼejngo kon, koanjinle nga tjínnele toje Jeobá skoe̱xkón. Kʼianga jekisʼenngindá kui kisikjaʼaitsjenjin josʼin tíbitjoson Isaías 65:25 xi kao je. Chjota jebi kisindaya yaole ninga tsʼen koan ngasʼa.

15. Ánni meniná kuinyakoaa chjota nga kʼoati ya katabatiojin naxinandále Niná kʼoa jósʼin binyakoaa.

¹⁵ Ya Isaías 65:13 itso én xi fitsʼiani: “Kui jebi xi títso je Jeobá xi batéxomale ngayeje”. Jmeni xi tso bitjoson ngantsjai (Is. 55:​10, 11). Ñaki tíbitjoson ndʼaibi jmeni xi tongini kitso Jeobá. Jtín sʼin tiyoaa kʼoa ndasʼin tiyoaa. Nga naxinandále tiyojiaan nyʼán tiyoaa kʼoa alikui jme xi nokjonlee ningalani nʼio chʼao chon sonʼnde (Sal. 72:7). Kʼoa kuinga meniná kuinyakoaa chjota nga ya naxinandále Niná katabatiojin. Kʼoa kʼiaa binyakoaa nga ʼmiyalee je Énle Niná ánni nga chjotale Cristo katamani (Mat. 28:​19, 20).

JÓSʼIN KUINYAKOAA CHJOTA NGA KʼOATI YA NAXINANDÁLE NINÁ KATABATIOJIN

16. Jmé xi kuinyakao je chjota nga ya katabatiojin naxinandále Niná.

¹⁶ Ngatsʼiñá nga koa̱n kuinyakoaa chjota nga ya katabatiojin naxinandále Niná. Koaan chjénngilee josʼín je Jeobá. Je Jeobá alikui kjoanʼio bʼénele chjota nga ya katabatiojin naxinandále (Jer. 31:3; Juan 6:44). Tosaa tsoyale jokjoan kʼoa je chjota xi ndatjío ni̱ma̱le makjainle xi tʼatsʼe. Kʼoa ñá, jmé xi koa̱n sʼiaan  xi kuinyakao chjota nga ya katabatiojin naxinandále Niná.

17. Jméni xi sʼiaan nga kuinyakoaa chjota nga ya katabatiojin naxinandále Niná.

¹⁷ Kʼianga tsjoachaa je ndsʼee kʼoa nga bakolee kjoanda kʼoasʼin binyakaoñá chjota nga ya batiojin naxinandále Niná. Mená nga kʼoakatasʼín chjota jokisʼin chjota xi ya Corinto tsʼe nga ki kjoajtín kʼoa nga i̱ kitso: “Ñaki kjoakixi Niná tíjnajinno” (1 Cor. 14:​24, 25; Zac. 8:23). Kuinga tjínnenile si̱tjosoán kjoafaʼaitsjen jebi xi tso: “Nyʼán tiyokao xíngio” (1 Tes. 5:13).

18. Jméni xosíkao chjota nga ya naxinandále Niná batiojinni.

¹⁸ Kʼoati tjínnele kʼoasʼin jchatokoán je ndsʼee josʼin bekon Jeobá. Nga kui kuenta sʼiaan jñani nda sʼín kʼoa tsín kuenta sʼiaan jñani chʼao sʼín, nga̱ tsín tikʼoasʼinni nichxin xi sʼa nroaján. Nga tsjoachaa je xíngiaa nichatʼalee tsa tjín xi katsoná kʼoa tsa tjín xi kasíkaoná. Mangíntjenngiñá kjoafaʼaitsjen jebi nga tso: “Nda tikao xíngio. Katasʼeno kjoamatakon. Tichatʼalao xíngio” (Efes. 4:32). Je chjota xi mele nga kʼoakoa̱ntʼain faʼaikatiojin naxinandále Niná. f

TOSI TONDA YA KUIYOJIAAN NAXINANDÁLE NINÁ

19. 1) Jótso je xi faʼaikatiojin ijngokʼani naxinandále Niná (chótsenlai recuadro “ Tsakinyatʼaxinle naxinandále Niná tonga jaʼaikatiojin ijngokʼani”). 2) Jmé xi tjínnele sʼiaan (kʼoati chótsenlai sén xi faʼaitʼa).

¹⁹ Tsee kjoanda tjínná nga naxinandále Jeobá tiyojiaan, nga̱ jtín tiyoaa kʼoa  sa kjimankjín sa kjimankjín choʼndale Jeobá. Bʼailee kjoanda Jeobá nga jngo naxinandá tíjnale. Machjén nga tosi tonda ya kuiyojiaan tsa mená nga tsjoa sa̱tío tokoán, nga ndasʼin kuiyoaa kʼoa nga tsín jme xi si̱kjáojiaan. Alikʼia kuinyatʼaxinlee. Tonga kʼoati machjén nga si̱kuindaa yaoná nga̱ je Na̱i kui xi mele nga si̱kjinlee naxinandále Niná (1 Ped. 5:8; Apoc. 12:9). Alikui kʼoaiʼndee nga je Na̱i katabʼanachaná. Tosi tonda ya kuiyojiaan naxinandále Niná. Jtín sʼin kuiyoaa, kʼoainganʼioá nga tsje sʼin katabʼejna naxinandále Niná, kʼoa nda koanngínkoaa xíngiaa.