KJOAʼMIYA XI CHOTʼAYA 15
KJOAJNDA 124 Kixi kjuítʼale ngantsjai
Tosi tonda si̱nʼiotʼaa naxinandále Jeobá
“Tikjaʼaitsjenjinnío je xi bándiaano, je xi kinchja̱yano je énle Niná” (HEB. 13:7).
XI TÍNCHJA̱NI
Jméni xi sʼiaan nga tsín jao kʼoé tokoán tʼatsʼe naxinandále Jeobá kʼoa nga tosi tonda si̱nʼiotʼaa.
1. Jósʼin kisʼendajin nga kisixá choʼndale Jeobá kʼianga siglo 1.
KʼIANGA xá tsjoále Jeobá je choʼndale kui xi mele nga nda sixá kʼoa nga sixá chʼin chʼin (1 Cor. 14:33). Tobʼelañá, kui xi mele nga katasakóyason jngo tjíjtsa Sonʼnde (Mat. 24:14). Jé Jesús tíbánele nga katabitjoson xá jebi. Kʼoa je Jesús ndasʼin tíbʼéndajin josʼin sakóyason. Tobʼelañá, kʼianga siglo 1 ya Jerusalén jé pastro kao xi chjotajchínga sʼin tsakatio tsakjáoyani josʼin tjínnele koa̱nxá kʼoa jé kʼoakitsole je jtín jmeni xi tjínnele sʼin (Hech. 15:2; 16:4). Kʼianga jekisʼendajin josʼin koa̱nxá jé xi chjotajchínga sʼin tjío kʼoatsakʼinle nga tsakájinkon nga jngó jngó jtín (Hech. 14:23). Nga kisitjoson jmeni xi tsakʼinle chjotale Cristo ngisaa nʼio kisatio kjoamakjainle kʼoa tosi tonda koannkjínya (Hech. 16:5).
2. Saʼnda tjen nó 1919, jósʼin tíbándiaale Jeobá je choʼndale kʼoa jósʼin tíbakóyale.
2 Nichxin xi tiyoaa ndʼaibi tojo kʼoasʼin tíbándiaale Jeobá naxinandále. Kʼianga nó 1919, jngo jtín chjota kiskoejin Jesús xi ya tjínle kjoachoya ya ngʼajmi nga koandiaale josʼin sa̱kóyason kʼoa nga kuitsoyale Énle Niná je chjotale Cristo (Luc. 12:42). a Kʼoa je Jeobá tísíchikontʼain jmeni xi tjíosʼín chjotale Cristo jebi (Is. 60:22; 65:13, 14).
3, 4. 1) Jngo choa̱ tʼejnai jmé kjoanda xi tjenkao kʼianga nda tjínndajin josʼin kjimaxá jinnaxinandále Niná. 2) Jmé xi chótʼayajiaan i̱ kjoaʼmiya jebi.
3 Kʼiatsa tsín ndasʼin sʼe̱ndajin josʼin koa̱nxá likuijin kuitjosonná je xá xi tíbánená Jesús (Mat. 28:19, 20). Kʼiatsa tsínlani tsen tsen bʼakaoná jñani ʼmiyasoán, to ngaʼi̱ ngajánjin kjuinkʼinyasoán, kʼoa tsa maije̱ tiya tiyajin kʼuínyasonñá. Alikuijin kʼuínyasoán jña xin ʼnde. Jósasʼin bichómani nga jtín sʼin tinixá.
4 Nichxin xi tiyoaa ndʼai, je Jesús kʼoatisʼin tíbándiaale je naxinandále Niná josʼin tsakándiaale je chjotale kʼianga jaʼai i̱ Sonʼnde. I̱ kjoaʼmiya jebi kui chótʼayajiaan je choa̱ xi tsakʼéjna Jesús, kʼoati jchaa jósʼin fitjenngi naxinandále Niná choa̱ jebi. Kʼoati chótʼayajiaan jósʼin koakoá nga ninʼiotʼaa je naxinandále Niná.
JE NAXINANDÁLE NINÁ KUI CHOA̱LE JESÚS FITJENNGI
5. Jósʼin fitjenngi naxinandále Niná je choa̱le Jesús (Juan 8:28).
5 Jé Jeobá kiskenngile Jesús jmeni xi kisʼin kʼoa jmeni xi kitso. Kʼoati sʼín naxinandále Niná ndʼaibi, yaa Énle Niná bʼangini xi bakóya (tʼexkiai Juan 8:28; b 2 Tim. 3:16, 17). Kuinga kjitʼa kʼoaʼmininá nga ntsjaintsjai kʼoéxkiaa Énle Niná kʼoa nga si̱tjosoán jmeni xi tso. Jósʼin basenkaoná nga kʼoanʼia.
6. Jósʼin basenkaoná nga chotʼayá Biblia.
6 Nʼio nda basenkaoná nga chotʼayá je Biblia kʼianga kui nichjén je xo̱n xi bʼasje naxinandále Niná. Tobʼelañá, kʼianga ya ningósonkoaa jmeni xi tso Biblia josʼin tíbándiaaná naxinandále Niná ñaki sʼejngo tokoán nga ya Biblia bʼangini jmeni xi tsoná kʼoa ngisaa ninʼiotʼaa (Rom. 12:2).
7. Jmé tʼatsʼeni xi kitsoyason Jesús kʼoa jósʼin mangíntjenngiaa choa̱le nichxin xi tiyoaa ndʼaibi.
7 Je Jesús kitsoyason énnda xi tʼatsʼe Chjotaxále Niná (Luc. 4:43, 44). Kʼoati kitsole chjotatjenngile nga kʼoati katabakóyason (Luc. 9:1, 2; 10:8, 9). Ngatsʼiaa xi naxinandále Niná tiyojiaan kʼoati kui tʼatsʼe Chjotaxále Niná ʼmiyasoán tojñani tiyoaa kʼoa tojme xá xi kjinená.
8. Jmé kjoanda xi tjínná.
8 Nʼio tse kjoanda tjínná nga ma ʼmiyasoán Énle Niná. Tonga ali tsa tongatsʼijin nga kui kjoanda tjínle. Tobʼelañá, kʼianga tsakʼejna Jesús i̱ Sonʼnde alikui kitsjoaʼnde nga je sénnichxin xi chʼaokjoan kuinchja̱ni xi tʼatsʼe (Luc. 4:41). Nichxin xi tiyoaa ndʼaibi, kʼianga koa̱n kuitsoyason Énle Niná jngo chjota tjínnele kʼoasʼin koaikao yaole josʼin mele Niná. Kʼianga ʼmiyaa je Énle Niná tojñani tiyoaa kʼoa tojo tjen kji kʼoamaná yaa bakoñá nga ʼyachjiá je kjoanda xi tjínná nga ma ʼmiyasoán. Tojo kisʼin Jesús, kui xi mená nga katabe je chjota jókjoántjínni xi tʼatsʼe Niná. Kuinga ʼmiyasonnilee (Mat. 13:3, 23; 1 Cor. 3:6).
9. Jméni xi tísʼín naxinandále Niná nga títsoya joʼmi Niná.
9 Je Jesús kitsoyaa joʼmi Niná. Kʼianga tsakʼétsʼoale je Nʼaile i kitso: “Kixinyale je jaʼaínli” (Juan 17:26, TNM). Tojo kisʼin Jesús kʼoati sʼín je naxinandále Niná. Bakóyale chjota joʼmi Niná kʼoa kui Traducción del Nuevo Mundo síchjén. Biblia jebi faʼaitʼa je jaʼaínle Niná jñani jaʼaitʼa je xo̱njchá xi kisʼeyo ngasʼa. Jetsʼato 270 én jaʼatoya Biblia jebi, nkjín én xi jejaʼatoya ngakjijngo kʼoa tjín jñani tosʼa choa jaʼatoya. Ya folleto Xo̱n xi basenkaoná nga chotʼayajiaan Énle Niná ya kjoaʼmiya 1 kao 2 tsoya nga yakjoan faʼaitʼa jaʼaínle Niná jñani tjínnele sa̱tíotʼa. Kʼoa ya Biblia de estudio ya apéndice C, nkjín choa̱ faʼaitʼa nga tjínnele 237 kʼa kjoaʼaítʼa jaʼaínle Niná ya Mateo saʼnda Apocalipsis.
10. Jméni xi bakóyaná jokitso jngo chjoón xi ya Myanmar tsʼe.
10 Kʼoati mená sʼiaan jokisʼin Jesús nga kʼuínyalee chjota joʼmi je Niná. Ya Myanmar jngo tichjaa kitsoyale jngo chjoón xi jejankan kao ñato nóle nga Jeobá ʼmi Niná. Ñaki kinroajen ndáxko̱n chjoón jebi nga kisʼejinle joʼmi Niná. I kitso: “Tosʼaa kanrʼoe títjoan nga kʼoaʼmi Niná. Nisaʼyajinla xi kʼoatso xi tsoyana jojekji tse tisijchá yaona”. Choa̱ jebi kui bakó nga nʼio binyakao je chjota nga be joʼmi je Niná.
TOSI TONDA SI̱NʼIOTʼAA JE NAXINANDÁLE NINÁ
11. Jósʼin bakóni je xi chjotajchínga sʼin tjío nga sínʼiotʼa je naxinandále Niná (kʼoati chótsenlai sén xi faʼaitʼa).
11 Kʼianga sítjoson jmeni xi tso je naxinandále Niná je xi chjotajchínga sʼin tjío kʼoasʼin bakóni nga sínʼiotʼa. Tobʼelañá, je xi chjotajchínga sʼin tjío kʼoaʼmile jósʼin tjínnele sa̱kóya ya jinjtín, jósʼin tjínnele sʼe̱tsʼoa kʼoa jósʼin tjínnele sikuinda je chjotale Cristo. Kʼianga fitjenngi je xi chjotajchínga sʼin tjío jmeni xi tso je naxinandále Niná kʼoasʼin ʼyañá nga je Jeobá tísíkuindaná kʼoa nga tsjoakená.
Je xi chjotajchínga sʼin tjío binyakaoná nga nitjosoán josʼin bándiaaná naxinandále Jeobá (Chótsenlai párrafo 11) e
12. 1) Ánni nga si̱tjosonñá jmeni xi tsoná je xi bándiaaná (Hebreos 13:7, 17). 2) Ánni nga kui kuenta sʼianñá jñani nda sʼín je ndsʼee xi bándiaaná.
12 Tjínnele si̱tjosoán kʼianga jme xi tsoná je xi chjotajchínga sʼin tjío. Kʼianga kʼoanʼia kʼoati nda sítjoson je xá xi kjinele. Je Biblia kʼoatsoná nga si̱tjosonlee kʼoa nga nangi kuiyolee je xi bándiaaná (tʼexkiai Hebreos 13:7, 17). c Tonga sakʼoa ñʼai maná nga nitjosoán nga̱ je xi chjotajchínga sʼin tjío kʼoati chjotajée ma joni tsa ñá. Kui kuenta sʼiaan ngantsjai jñani nda sʼín. Kʼiatsa tokui kuenta sʼiaan jñani chʼao sʼín ndsʼee jebi, nʼiojin tsjoa koa̱nle je xi kontra tjíole naxinandále Niná. Ánni kʼoabixónsíñá. Kʼiatsa chʼaosʼin si̱kʼaxkiaa je xi chjotajchínga sʼin tjío, yajin kjuinroani nga tsínti si̱nʼiotʼañá naxinandále Niná kʼoa kuikjoán xi mele xi kontra tjíoná nga kʼoasʼiaan. Tonga jósʼiaan nga tsínkui si̱siaan je énndiso xi kaníbason je xi kontraná mani.
ALIKUI SI̱SIAAN JE ÉNNDISO XI SʼENE NAXINANDÁLE NINÁ
13. Jósʼin síkʼaxki̱ naxinandále Niná je xi kontra tjíoná.
13 Je chjota xi kontraná mani alikui sasénle jmeni xi tsoyaná Jeobá. Je Biblia kʼoatso nga tsje sʼiaan, nga nda koanngínkoaa yaoná, kʼoa nga kʼoasʼin jchaxkoán Jeobá josʼin mele. Kʼoati tso nga kuichonsjejin ya jinjtín je chjota xi tsín nda fikao yaole, xi tsín kʼoamanile jéele (1 Cor. 5:11-13; 6:9, 10). Kʼianga nitjosoán kjoatéxoma jebi kʼoatso je xi kontra tjíoná nga nʼio tsje chʼasjee yaoná, nga tsín tsjoachaa chjota kʼoa nga tsʼeen.
14. ʼYáni xosʼín nga kʼoasʼin énndiso sʼene naxinandále Niná.
14 Kuenta sʼiaan ʼyáni xi kontra tíjnaná. Jé Na̱i xosʼín nga énndiso sʼene naxinandále Niná (Juan 8:44; Gén. 3:1-5). Kʼoa chjota síchjén nga énndiso kaníbason. Kʼoatisʼin énndiso kisʼene je chjotale Cristo xi tsakatio ngasʼa.
15. Jméni xi kisʼin je chjota xi tsakinyatítjonle religión nga kitjenngike Jesús kao chjotatjenngile.
15 Ninga chjotatsje koan Jesús kʼoa nkjín kjoaxkón tsakatío jé Na̱i xokisʼin nga énndiso kisʼene. Tobʼelañá, je chjota xi tsakinyatítjonle religión kʼoakitso nga kui nganʼiole Na̱i kisichjén Jesús nga koan tsakʼaonsjejinle chjota je sénnichxin xi chʼaokjoan (Mar. 3:22). Kʼianga tínijtsoʼa Jesús, je chjota xi nyatítjonle religión kʼoakitsole chjota nga Niná kinchja̱ʼaonle je Jesús kʼoa nga tjínnele ni̱kʼien (Mat. 27:20). Nga koanskanni, nga kitsoya Énle Niná je chjotale Cristo je chjotakontrale kʼoasʼin tsakinyáʼa chjota nga katafitjenngike (Hech. 14:2, 19). Kʼianga kui kinchja̱ni Hechos 14:2 je revista La Atalaya xi tsʼe 1 de diciembre de 1998 kʼoakitso nga je chjota judío tsín kisisin Énle Niná. Kʼoati kikaoson énndiso jñani xin naxinandá nga tsín ʼya xi katanrʼoéle je chjotale Cristo nga kuitsoyason Énle Niná.
16. Jméni xi sʼiaan tsakui sʼe̱jinná nga énndiso tísʼene naxinandále Niná.
16 Tojo kʼoatísʼín Na̱i josʼín ngantsjai nga bʼanachale chjota nga énndiso kaníbason (Apoc. 12:9). Kʼiatsa énndiso sʼe̱jinná xi tʼatsʼe naxinandále Niná kʼoa tsa tʼatsʼe ndsʼee xi bándiaaná kuenta sʼiaan nga kʼoakoantʼain je Jesús kao chjotatjenngile xi tsakatio nga siglo 1. Je Jesús kʼoakitso nga chjota koaitjenngikená kʼoa nga énndiso koanená (Mat. 5:11, 12). Alikui makjainná je énndiso xi kaníbason kontraná nga̱ ʼyañá nga tʼatsʼe Na̱i tínroani. Tonga jósʼin si̱kuindalee yaoná jebi.
17. Jósʼiaan kʼiatsa énndiso sʼe̱jinná (2 Timoteo 1:13; kʼoati chótsenlai recuadro “ Jósʼiaan tsa énndiso sʼe̱jinná”).
17 Likui énndiso si̱siaan. Ya 1 Timoteo 1:3, 4, je pastro Pablo kʼoakitso nga tsín koa̱n nga énndiso si̱siaan. Kʼoa itso kjoafaʼaitsjen xi kitsjoale Timoteo: “Je xi toxkia én xi bʼasjengi kjoale Niná, xi tsínjme chjíle, tisenxinlai” (1 Tim. 4:7). Tobʼelañá, nga jngo tsojmi masjaijinʼndele jngo ʼndílee tokjoan yaa tsʼoa bʼéʼa. Tonga jngo xi jechjotajchínga alikuijin kʼoasʼin nga̱ be nga tsjoáchʼinle tsojmi jebi. Tikʼoasʼinni, tosaa kui kuenta nʼia xi tʼatsʼe Niná tínroani alikui nisiaan xi to énndiso (tʼexkiai 2 Timoteo 1:13). d
18. Jósʼin koakoá nga ninʼiotʼaa naxinandále Niná.
18 I̱ kjoaʼmiya jebi janla koya kaʼyaa jósʼín naxinandále Niná nga fitjenngi choa̱le Jesús. Kʼianga chotʼayajiaan je Biblia nkjínsa choa̱ masjaijinná josʼín je naxinandále Niná. Machjén nga tosi tonda kuinyakoaa je ndsʼee nga katasínʼiotʼa naxinandále Niná kʼoa tosi tonda kixi kjuintʼalee Jeobá. Kʼoa tsín kʼoaiʼndee nga jme xi sikjinná je naxinandále nga̱ kui tísíchjén nga katabitjoson josʼin mele (Sal. 37:28). Nʼio tse kjoanda tjínná nga ya tiyojiaan naxinandále Niná nga̱ tsjoachañá xíngiaa kʼoa nda tiyoaa.
JMÉ XI KAMAJINLI
-
Jósʼin fitjenngi choa̱le Jesús je naxinandále Niná.
-
Jósʼin koakoá nga ninʼiotʼaa naxinandále Niná.
-
Jósʼiaan tsa énndiso sʼe̱jinná tʼatsʼe naxinandále Niná.
KJOAJNDA 103 Xi bándiaaná jngoo kjoatjao xi tsʼe Niná
a Chótʼai je recuadro xi “¿Y por qué 1919?” ʼmi, xi faʼaitʼa libro La adoración pura de Jehová: ¡por fin restaurada!, página 102 kao 103.
b Juan 8:28: “Kʼia Jesús kʼuikitsole: Kʼia nga chjómitjaon ʼndíle chjota, kʼiaa koa̱nchoyano nga an nía ʼndíle chjota. Nijmejin xi sʼian nga toʼannía. Josʼin kitsoyana Nʼainá, kʼoasʼin nchja”.
c Hebreos 13:7, 17: “Tikjaʼaitsjenjinnío je xi bándiaano, je xi kinchja̱yano je énle Niná. Chjénngilao josʼin makjainle, nda tikjaʼaitsjenjion jme xi kisakole josʼin kikao yaole. 17 Titjosonlao je xi bándiaano, kʼoa nangi tiyolao nga je, nga̱ tijeni batiokontʼain xi tʼatsʼe ni̱ma̱no, nga̱ tjínnele nga tsjoá kuinda. Titjosonlao jméni nga kʼoasʼinsíni kao kjoatsjoa, nga tsín tsa kao kjoafáo, nga̱ jebi likui josʼin koa̱nchjénno”.
d 2 Timoteo 1:13: “Nda tʼejintakuin jo tso je én xi nda, xi an kinoʼyanái. Tʼejintakuin josʼin nga makjainná, kʼoa josʼin nga tjaochaa nga tiyokoaa Cristo Jesús”.
e XI TÍNCHJA̱NI SÉN XI FAʼAITʼA.: Je xi chjotajchínga sʼin tjío batiojtín nga fáoyani jósʼin kʼuínyason jñani nkjín chjota faʼa. Xijema, jngo ndsʼee xi superintendente xi tsʼe grupo sʼin tíjna kʼoatsole je tichjaa nga ya katabinya jña séjna xjáo nga kuinyaʼnda je carrito.
