Jmeni xi bʼéyanajmí je Mateo kao Lucas tʼatsʼe nga tosʼa koanjchínga je Jesús alikui mangóson, nga̱ kjaʼaí kjaʼaísʼin bʼéyanajmí nga jngó jngó.

Je Mateo kui ngisa nchja̱ni xi tʼatsʼe José. Kui bʼéyanajmí jókisʼin kʼianga kisʼejinle nga ʼndí yʼa je María, nga jngo ánkje tsakʼéyanajmíle ya yanijñále ánni nga ʼndí yʼani je María kʼoa jósʼin kitjenngi jmeni xi kitsole je ánkje (Mat. 1:19-25). Je Mateo kʼoati bʼéyanajmí nga jngo ánkje kʼoakitsole je José ya yanijñále nga ya katafi ya Egipto kao familiale kʼoa je José kisitjoson. Xi ijngosani, kʼoati tso nga ijngo nijñá tsakʼaile jñani kʼoatsakʼinle nga kjuinroa ijngokʼani ya Israel, kʼoa je José kinroani kʼoa yaa kisijchá yaole ya Nazaret (Mat. 2:13, 14, 19-23). Je xi títjon jao kapítulo xi tsʼe Mateo, ñato kʼa síkʼaxki̱ je jaʼaínle José, kʼoa tsʼe María to ño kʼa síkʼaxki̱.

Je Lucas kui ngisa nchja̱ni xi tʼatsʼe María. Kʼoatso nga je ánkje Gabriel kichosíxatʼa kʼoa nga je María ya kikonle je Elizabet kʼoa jokitso nga tsakʼasjengʼa je Jeobá (Luc. 1:26-56). Kʼoati bʼéyanajmí jmeni xi kitsole Simeón je María tʼatsʼe kjoañʼai xi kjoaʼatojin je Jesús. Kʼoa kʼianga bʼéyanajmí je Lucas jmeni xi koan nga 12 nóle je Jesús, kʼianga kicho ya yo̱ngo̱ kao xijchále, kui bʼéyanajmí jmeni xi kitso je María, alikui kui bʼéyanajmí jmeni xi kitso je José. Kʼoati tso nga je María nʼio tsakasenkao ngayeje jmeni xi koan (Luc. 2:19, 34, 35, 48, 51). Je xi títjon jao kapítulo xi tsʼe Lucas, je jaʼaínle María 12 kʼa faʼaitʼa, tonga tsʼe José to jan kʼa faʼaitʼa. Je Mateo kui ngisa nchja̱ni jmeni xi kisikjaʼaitsjen kʼoa jokisʼin je José, tonga je Lucas kui ngisa nchja̱ni jmeni xi kisikjaʼaitsjen kʼoa jmeni xi kisʼin je María.

Kʼoa nga kui síkʼaxki̱ je ntje̱ jña jaʼaini je Jesús, kʼoati kjaʼaí kjaʼaísʼin bʼéyanajmí. Je Mateo kui síkʼaxki̱ je chjotajchíngale José kʼoa tsoya nga tjínle ʼnde je Jesús nga kʼoéjnason je yáxilele David nga koatexoma. Ánni. Kuinga je José yaa ntje̱le David jaʼaini. Je xi chjotajchíngale koanni, jé Salomón (Mat. 1:6, 16). Tonga je Lucas kui síkʼaxki̱ je chjotajchíngale María kʼoa kʼoati tso nga tjínle ʼnde je Jesús nga kʼoéjnason je yáxilele David nga koatexoma (Rom. 1:3). Ánni. nga̱ je María yaa kitjenni je tile David xi Natán tsakʼin (Luc. 3:31, 32). Tonga tsa je María xi tsotile Elí mani, ánni kʼoatsosíni je Lucas nga je José xi tile mani. Kuinga tojé jaʼaínle xi xʼin faʼaitʼa nga bʼaxki̱ jña ntje̱ jaʼaini je chjota. Kʼianga kʼoatso je Lucas nga tile Elí mani je José, kui xi tsonile nga xkaʼndale koanni (Luc. 3:23).

Jmeni xi tso je Mateo kao Lucas nga kui síkʼaxki̱ je ntje̱ jña jaʼaini je Jesús, bakó nga jé Jesús je Mesías xi tíchoyale. Saʼnda je chjota fariseo kao chjota saduceo tsabee nga ya ntje̱le David jaʼaini je Jesús. Nichxin xi tiyoaa ndʼaibi, je Evangelio xi tsʼe Mateo kao Lucas, basenkaoná nga sʼená kjoamakjain kʼoa nga tsín jao sʼe tokoán nga sitjoson je Niná jmeni xi tso.