JE PASTRO Pablo ñajan koya kisikʼaxki̱ je kjoanda xi tsjoáná je nganʼiotsjele Niná (Gál. 5:22, 23). Nga ñajan koya “kjoanda xi tsjoájin ni̱ma̱ná je Espíritu Santo” * tojngo mani ngayeje kʼoa kui kjoanda jebi xi sʼele je chjotale Cristo (Col. 3:10). To joma jngo yá kʼianga nda makuinda, bale to, tikʼoasʼinni, kʼianga je nganʼiotsjele Niná síxájinle je chjota, bakó je kjoanda xi tsʼe nganʼiotsje (Sal. 1:1-3).

Je xi títjon kisikʼaxki̱ Pablo kui je kjoatjaocha. Tonga jókji chjíle kjoanda jebi. Je Pablo kʼoakitso nga tsín jme chjíle kʼiatsa tsín koakoá kjoatjaocha (1 Cor. 13:2). Tonga jméni xi kjoatjaocha ʼmi, kʼoa jósʼiaan nga nyaon nyaon koakoá kjoatjaocha.

Ninga tsínkjoan ʼyaa josʼin tíjna je kjoatjaocha, ya Biblia kʼoatso josʼin tjínnele koakoá. Tobʼelañá, kʼoatso nga je kjoatjaocha “tsejtaní, kʼoa tjínle kjoanda” kʼoa “sítsjoanile yaole kao xi kjoakixi” kʼoa “síkjaínle ngayije, makjainle ngayije, koyale ngayije, ngayije jchókjoakaole”. Xi ijngosani, je chjota xi bakó kjoatsjoacha, tsjoake kʼoa mandosinle je xi ngikʼa kʼoa ñaki miyo ma. Tonga je xi tsín bakó kjoatsjoacha, chi̱ni̱ní, ngʼakon, likui kixi jme xi sʼín, bʼéngijti kon kʼoa tsín síchatʼa. Kʼianga tsínkui kʼoasʼiaan jebi, tjínnele koakoá kjoatsjoacha kʼoa tsín to yaoná kjuinñá (1 Cor. 13:4-8).

Je Biblia kʼoatso nga je Jeobá, “jé Niná xi kjoatjaocha” (1 Juan 4:8). Ngayeje xále kʼoa kao jmeni xi sʼín kui bakó nga tjínle kjoatsjoacha. Kʼianga ngisa tsakakó je kjoatjaocha, kʼiaa nga kisikasén ʼNdíle i̱ Sonʼnde, nga tsakjaʼá kjoañʼai kʼoa nga kʼienntjainá. Je pastro Juan itso xi kiski: “Kʼoasʼin koanchoyale ni̱ma̱ná josʼin nga Niná tjaokená, nga̱ kisikasén i̱ sonʼndebi je ʼndíle xi tojngo mani, jméni nga kuiyochonsínía xi totʼatsʼe. Kʼuisʼin tjín xi kjoatjaocha: Ali kuijin nga ñá xi koantsjoachaa Niná, tonga je Niná xi koantsjoakená nga ñá. Kisikasén ʼndíle xi jéentjainá koanle” (1 Juan 4:9, 10). Nga kʼoasʼin koantsjoakená Niná, chatʼaná jéená, tjínná kjoachoya kʼoa koaan kuiyoaa ngantsjai nichxin.

Je Jesús tsakakó nga tsjoake koan chjotasonʼnde kʼianga kao kjoatsjoa jaʼai i̱ Sonʼnde nga kisitjoson jme xi mele Nʼaile. Je Pablo i kitso: “Kʼoasʼin koanmele Niná nga tsje koannía xi totʼatsʼe je yaole Jesucristo xi kitsʼaitʼa, nga tojngo kʼa ndiaa kʼoasʼin koan” (Heb. 10:9, 10). Kui kjoatsjoacha jebi xi ngisasa bakó jngo chjota. Je Jesús i kitso: “Liʼyasa xi ngisa tsjoake joni jngo xi tsjoántjai  ni̱ma̱le [kjoabijnachonle] xi tʼatsʼe miyole” (Juan 15:13). Ningalani chjotajée maa, jósʼin chjénngilee je kjoatsjoacha xi bakó Jeobá kao Jesús. Kataʼyala.

Je Pablo itso: “Chjénngilao Niná, joni tsa ʼndí xi kjaínga tjaocha. Kao kjoatjaocha timakao xíngio, josʼin Cristo koantsjoakená, kitsjoantjainá yaole” (Efes. 5:1, 2). Machjén nga kʼoasʼiaan ngantsjai kʼoa kao xáná bakoñá nga tjínná kjoatsjoacha. Je pastro Juan i kitso: “Ngatsʼio ʼndíxtina, ñaki nda tjaocha katama xíngiaa. Ali toʼén kuinókjoaa, tonga je kjoatjaocha xi kjoakixi xi sʼiaan” (1 Juan 3:18). Tobʼelañá, kʼianga tsjoachaa je Jeobá kao chjota kao kui bakoñá nga ʼmiyasoán je énnda chjotse (Mat. 24:14; Luc. 10:27). Kʼoati bakoá kjoatsjoacha kʼianga tsejta maa, nga nda chjota maa, kʼoa nga maná nichatʼa. Kuinga i̱ tsoni je Biblia: “Jokisʼin Jeobá nga kao kjoatsjoa kisichatʼano, kʼoati tʼiaon tsanda jon” (Col. 3:13, TNM).

Kʼianga tjínná kjoatsjoacha, alikui kui xi tsonile nga tokʼoaiʼndelee tojmeni xi sʼin je xi tsjoachaa. Tobʼelañá, je xijchá xi totsjoáʼnde, tsakui nichxin tsjoále ngayeje xi sijé je xtile tojoni nga jyó koatio. Tonga je xijchá xi ñaki tsjoake je xtile, batekjáyale jña tjen ndiaale. Kʼoatisʼinni, je Jeobá batekjáyale je xi tsjoake (Heb. 12:6). Kʼianga bichakjáyaa kui xi tsonile nga tibakoá kjoatsjoacha (Prov. 3:11, 12). Tonga xi kuenta sʼiaan kuinga chjotajée maa, sakʼoaa likui kao kjoatsjoacha kʼoanʼia tsa jmeni. Ninga kʼoalani, koaan si̱ndayá yaoná. Janla koya kataʼyaa jokoa̱n sʼiaan.

Xi títjon. Si̱jélee Niná nga katatsjoáná je nganʼiotsjele. Je Jesús kʼoakitso nga je Jeobá “tsjoále je Espíritu Santo je xi sijéle” (Luc. 11:13). Kʼianga kʼoétsʼoalee Niná si̱jélee je nganʼiotsjele kʼoa kʼoénelee yaoná nga tosi tonda kʼoasʼiaan kʼoa nga koakoá kjoatsjoacha (Gál. 5:16). Tobʼelañá, je xi chjotajchínga sʼin tjío, koaan sijéle Jeobá je nganʼiotsjele nga kao kjoatsjoacha tsjoá kjoafaʼaitsjen. Kʼoa je xi xijchá ma koaan sijéle Niná je nganʼiotsjele nga ndasʼin koatekjáyale je ʼndíxtile.

Xi majaoni. Si̱kjaʼaitsjenjiaan nga tsakakó kjoatsjoacha je Jesús ninga kʼianga taon tsaʼya (1 Ped. 2:21, 23). Je choa̱le Jesús koasenkaoná kʼiatsa ʼya xi chʼao kuitsoná kʼoa tsakui xi tsín kixi tíjna koa̱ntʼeen. Kʼiatsa kui kjoa tibitjatojiaan koaan chjónangilee yaoná jebi: “Jósʼin tsa jelani Jesús xi kʼoakjimatʼain”. Jngo tichjaa xi Leigh ʼmi, kui jebi xi tsakasenkao kʼianga kjoa jaʼatojin. Itso: “Ñandia, kʼianga je chjoón xi ñatjen sixá, jngo correo electrónico kisikasénle je xi ngikʼa nga chʼaosʼin kisikʼaxki̱na kʼoa xi tʼatsʼe xána. Nʼio aon koanna nga kʼoakisikaona. Kʼoa i kixian. Jósʼin Jesús tsa jelani xi i̱ kjimatʼain. Kʼianga kisikjaʼaitsjenjian jokisʼin tsa jelani Jesús, tosaa tokisichajian jmeni xi koan. Skaanni kisʼejinna, nga je chjoón jebi nga nʼio táo chʼin xi kiskatʼale kʼoa nga nʼio tísíkjáojin. Koanjinna nga tsínjin toxá kisʼinni. Kʼianga kui kisikjaʼaitsjenjian nga tsakakó kjoatsjoacha je Jesús ningalani taon tsaʼya, tsakasenkaona nga kʼoatisʼin kisikjaʼaitsjen joni je, kʼoa nga tsakakole kjoatsjoacha je chjoón xi ñatjen sixá”. Kʼiatsa je Jesús chjénngilee koakojián kjoatsjoacha ngantsjai.

Xi majanni. Alikui to yaoná kjuinñá nga koakoá kjoatsjoacha. Nga kʼoanʼia kʼoasʼin bakoñá nga ñaki chjotale Cristo maa (Juan 13:34, 35). Je Biblia kʼoatso nga kui katasʼená je “kjoafaʼaitsjen xi kisʼele Cristo”. Kʼianga jaʼai i̱ Sonʼnde, kisikʼéjnaa ngayeje xi tjínle ya ngʼajmi kʼoa kao kjoatsjoa kitsjoa yaole nga kʼienntjainá (Filip. 2:5-8, TNM). Kʼiatsa chjénngilee je Jesús nga tsín to yaole kini kʼoa nga tsakakó kjoatsjoacha, kʼoati sʼiaan  tsanda ñá. Jé títjon si̱kjaʼaitsjeen xi ngikʼa, ʼndele nga to yaoná kjuinñá. Jmé kjoanda xi sʼená nga bakoá kjoatjaocha.

Kʼianga bakoá kjoatsjoacha nʼio tse kjoanda sokóná. Jaola koya kataʼyaa.

• JTÍN SʼIN BIYOAA KAO NGATSʼI NDSʼEE XI TJÍO JNGO TJÍJTSA SONʼNDE. Kʼianga tsjoachaa xíngiaa, ʼyañá kʼianga nda skoéyaná je ndsʼee tojñani jtín nga kuichoaa. Alikui jao tjínná, nga tsjoakená je ndsʼee xi tjío jngo tjíjtsa Sonʼnde (1 Ped. 5:9). Tojé naxinandále Jeobá xi kʼoasʼin bakó kjoatsjoacha.

• NYʼÁN SʼIN BIYOAA. Kʼianga tsejta maa kao xíngiaa nyʼán sʼin biyoaa (Efes. 4:2, 3). Kʼianga mangián je kjoajtínná kʼoa kao kjoajtíntsená, bakoñá nga nyʼán sʼin tiyoaa. Tojé naxinandále Niná xi kʼoasʼin tjío, nga̱ i̱ Sonʼnde xkoa̱ya tjío je chjota (Sal. 119:165; Is. 54:13). Kʼianga bʼenelee yaoná nga nda mangínkoaa xíngiaa, bakoñá nga tsjoachaa kʼoa nga kʼoanʼia bayatsjoañá kon je Nʼainá xi tíjna ngʼajmi (Sal. 133:1-3; Mat. 5:9).

Je Pablo i kitso: “Je kjoatjaocha síkinngʼa” (1 Cor. 8:1). Jósʼin tsoyanile je én jebi. Ya kapítulo 13 xi tsʼe 1 Corintios, nkjín xi “kjoajnda xi tsʼe kjoatsjoacha” tsole, je Pablo kʼoakitso josʼin tsoyanile je én jebi. Kʼoakitso nga je kjoatsjoacha alikui to yaole fini (1 Cor. 10:24; 13:5). Xi ijngosani, je kjoatsjoacha tsejtaa, kuenta sʼín xi ngikʼa kʼoa ndʼéní. Kʼoa kui jebi xi binyakao je xi tjío ya yaniʼya nga ndasʼin batio kʼoa nga tsín xkoa̱ya sʼin bʼejna je jtín (Col. 3:14).

Tsínsa jmeni xi mangóson jokji tsjoachaa je Niná. Kjoatsjoacha jebi kui xi tjíobinyakao nga tojngo tjíosíxájtín ngatsʼi je chjota xi xinxin naxinandále, xi kjaʼaí kjaʼaísʼin tsen yaole kʼoa xi kjaʼaí kjaʼaí én male nga tjíobexkón je Jeobá (Sof. 3:9). Kʼoénelee yaoná nga koakoá kjoatjaocha nga nyaon nyaon nga̱ tʼatsʼe Niná nroani je kjoatjaocha.