1. Jósʼin koa̱n si̱xákoaa je Jeobá.

KʼIANGA kisindaná je Jeobá, kui xi koanmele nga ya si̱xákoaa kʼianga kuitjoson jmeni xi tjínndajinle. Ningalani chjotajée maa, koaan si̱xákoaa je Niná nga nyaon nyaon. Tobʼelañá je Biblia kʼoatso nga tojngo nixákoaa je Niná kʼianga ʼmiyasoán kʼoa kʼianga chjotale Cristo nikoaa je chjota (1 Cor. 3:5-9). Nʼio tse kjoanda tjínná nga je nixákoaa Niná xi nʼio tse nganʼio tjínle xi kisinda ngayeje jmeni xi tjín ya ngʼajmi kao i̱ Sonʼnde. Nkjín koya josʼin koa̱n si̱xákoaa je Jeobá. I̱ kjoaʼmiya jebi kui jchaa jósʼin nixákoaa je Niná kʼianga binyakoaa je familianá kʼoa kao je ndsʼee, kʼianga chjoeyaa je xíngiaa, kʼianga bʼainganʼioá josʼin kjimaxá jinnaxinandále kʼoa nga ngisasa nda nixálee (Col. 3:23).

2. Ánni nga tsín koa̱n je xíngiaa si̱ngósonkaosíñá yaoná josʼin tjíosíxále Niná kʼoa jotinʼia ñá.

² Kʼianga chótʼayá je kjoaʼmiya jebi, alikui koa̱n je xíngiaa si̱ngósonkoaa yaoná josʼin tjíosíxále Niná kʼoa jotinʼia ñá, nga̱ tsín tongóson kji bichó je nganʼioná nga jngó jngoá. Tobʼelañá, tjínkʼa ndsʼee xi jetjínle nó, tjínkʼa xi chʼin bʼetʼale, kjaʼaí kjaʼaí kjoa tjínná kʼoa kjaʼaí kjaʼaí xá xi maná nʼia. Je pastro Pablo i kitso: “Kʼoasʼin jngójngó katakotʼa xi titsʼeni xá. Kʼiaa sʼe̱le kjoajeya xi  totʼatsʼe xáleʼni. Ali totʼatsʼe xále xikʼajin bʼasjejeyani yaole” (Gál. 6:4).

3. Ánni kʼoabixónsíñá nga je Jeobá tinixákoaa kʼianga nikuindaa je familianá.

³ Je Jeobá kui xi mele nga si̱kuindaa je familianá. Tobʼelañá, tjínkʼa xi je kjinele bajngiʼa familiale kʼoa machjén nga sixá. Nʼio nkjín mani je tichjaa xi ya ndʼiale batio nga síkuinda je xtiʼndíle. Kʼoa tjínkʼa je ndsʼee xi je síkuinda xijchále. Je Biblia itso: “Tsa jngo xi tsín tsa síkuinda xínkjín, basentsʼiakjoanni je xi tsʼe niʼyale, totsakʼejnaʼmakao kjoa xi koankjainle. Tongisa chʼao síkʼéjna yaole kaoni xi tsín tsa makjainle” (1 Tim. 5:8). Tsa kʼoati kui xá kjinená tochajinle tsín tsjoáná nichxin nga kʼoasʼin si̱xálee Niná josʼin mená tsakai. Tonga tsín koa̱n kui si̱kʼajenñá tokoán, nga̱ je Jeobá sasénle nga nikuindaa je familianá (1 Cor. 10:31).

4. Jósʼin je xi xijchá ma nga kui títjon sikatío je xále Niná, kʼoa jósʼin kuichomani tsa kʼoasʼin.

⁴ Je xi xijchá ma ñatjen síxá kao je Jeobá kʼianga kʼoatsole je xtile nga xále Niná katasʼín. Kʼianga jefi nichxin, nkjín xti xi to xále Niná sʼín kʼoa xin ʼnde fitsjoánganʼio. Tjínkʼa xi misionero ma, xi precursor sʼin síxá ya ʼnde jñani ngisa machjén je xi tsoyason kʼoa tjínkʼa xi ya Betel tsjoánganʼio. Je xi xijchá ma, ningalani tsín kjitʼa be je xtile, kʼoatsole nga tosi tonda katasíxále Niná. Kuinga kʼoatsoni je xi xijchá ma nga̱ kʼoati tsjoa satío kon kʼianga kui títjon síkatío je xtile xále Niná (3 Juan 4). Tsakui nichxin kʼoati satío kon je xi xijchá ma jokisʼe kon je Ana, kʼianga kʼoakitso nga kitsjoa je Samuel, je ʼndíle, kʼianga je Jeobá sixále. Je xi xijchá ma machjén nga sikjaʼaitsjenjin nga nʼio tse kjoanda tjenkao kʼianga kʼoasʼin nixákoaa je Niná (1 Sam. 1:28).

5. Jósʼin koa̱n kʼoainganʼioá ya jinjtín (chótsenlai sén xi fitsʼiani kjoaʼmiya jebi).

⁵ Jméni xi koa̱n sʼiaan kʼiatsa tsínkui xá kjinená je xi jekanikʼaxkiaa. Koaan kuinyakoaa je ndsʼee xi jetjínle nó, xi chʼin tjínle kʼoa tsa ʼyasa xi nganʼio machjénle. Tonga kʼoati koa̱n kuinyakoaa je xi síkuinda ndsʼee jebi. A faʼaitsjenná tsa ʼyani xi nganʼio machjénle ya jinjtín. Tobʼelañá, tsa jngo tichjaa xi je síkuinda je nʼaile kʼoa tsa na̱le xi jetjínle nó, a koaan nga ñála si̱kuinda ngotjoá, ánni nga tjóʼndenile je tichjaa nga kʼoasʼin xi kjaʼaí xá. Kʼoati koa̱n kuisenkoaa tsa ʼyani xi nganʼio machjénle nga koai kjoajtín, koaan kjuinchótsenlee tsa ʼyani xi hospital kijna, tsa ʼyani xi nganʼio machjénle nga kjuinkindálee tsojmi kʼoa tsa jmesani xi machjénle. Tsa kʼoasʼiaan, tsakuini nichxin tibʼainganʼioá nga tíbitjoson je kjoabʼetsʼoale je ndsʼee kʼianga nganʼio síjéle je Jeobá (tʼexkiai 1 Corintios 10:24). *

6. Jósʼin tsoyanile nga chjoeyaa xíngiaa.

⁶ Je xi Niná síxákao nda kjoeya je xínkjín. Ya Escrituras Griegas Cristianas je én xi tʼaiʼndelao “je xi fichókonno” tso, kui nchja̱ni nga bakolee kjoanda je chjota xi tsín ʼyaxkoaan (Heb. 13:2). Ya Biblia nkjín kʼa faʼaitʼa jñani tsoyaná jósʼin tjínnele chjoéyaa je xíngiaa (Gén. 18:1-5). Kuinga tjínnenile chjoéyaa je xi kjaʼaí, ni je xi ngóson sʼin makjainná kʼoa ni je xi mai (Gál. 6:10).

7. Ánni nga tjínnenile nda chjoéyaa je ndsʼee xi ñaki to xále Niná sʼín kʼianga faʼaisíxatʼa je jtín.

⁷ Jngo koya josʼin koa̱n si̱xákoaa je Niná kʼiaa nga nda chjoéyaa je ndsʼee xi ñaki to xále Niná tjíosʼín xi faʼaisíxatʼa je  jtín (tʼexkiai 3 Juan 5, 8). * Kʼianga kʼoasʼin síxatʼaná je ndsʼee bʼainganʼiongañálee xíngiaa (Rom. 1:11, 12). Kataʼyala jokoan jngo ndsʼee xi Olaf ʼmi. Kʼianga sʼa xti, je superintendente xi tsʼe circuito xi kichosíxatʼa tsín jña kisokoʼndele jñani tsakʼejnani. Je xijchále Olaf tsín testigole Jeobá mani, tonga kisijékjoale tsa koa̱n nga ya ndʼiale kʼoéjnani je ndsʼee. Koanjyole je xijchále, tonga kʼoatsakʼinle je Olaf nga toya sillon koájnane je. Je Olaf kʼoatso nga nʼio tsjoa kisʼe kon nga kui xomana. Itso: “Je superintendente xi tsʼe circuito kao an, nʼio tanjio tsakisotjainjin nga nyaon nyaon, kʼoa kʼianga bichijin nga tanjio kui kichobayanijin je xi nʼio tjínle kjoandosin. Kui jebi xi tsakasenkaona nga kʼoasʼin kisikjaʼaitsjen nga ñaki to xále Niná sʼian”. Je Olaf jeñachan nó nga misionero sʼin tísíxá jñani xinxin ʼnde.

8. Ánni nga ndatjínsíni nga koakoá kjoanda ninga tsín skoe̱chjí sakʼoa je chjota. Jngo choa̱ tʼejnai.

⁸ Nkjín koya josʼin koa̱n koakolee kjoanda je chjota xi tsín ʼyaxkoaan ningalani tsín chjí skoe̱ nga títjon je kjoanda xi koakolee. Jngola choa̱ kataʼyaa. Ya naxinandá España, jngo tichjaa xi estudio tsjoále jngo chjoón xi Ecuador tsʼe, xi Yésica ʼmi. Kʼianga títsjoále je estudio toxijña kiskiʼndá je chjoón jebi. Je tichjaa kiskonangile ánni nga kiskiʼndáni. Je Yésica tsakʼéyanajmíle jme xi koan ñandiale kʼianga kjesa fijin ya España. Kʼoakitso nga tsín tsakjen tsʼajnda nichxin kʼoa nga to nandá kitsjoale je tsotiʼndíle. Nga jetísíkájnafe je tsotiʼndíle, tsakʼétsʼoaa. Tochoatsee jaʼato nga jao testigole Jeobá kichosíkjanetʼa je ndʼiale. Je Yésica alikui nda kiskoeya kʼoa saʼnda tsakasénjnda je rebista xi tsakʼaile. I kitso: “A kui jebi koakje̱n je tsotiʼndína”. Ningalani koanmele je tichjaa nga tsakinyakao, alikui kinrʼoé je Yésica. Xijekoanni, jngo ni̱si̱nyá tsojmi xi ma chine kichosíkʼéjnale ya jchxo xo̱ntjoale. Je Niná kinrʼoéle kjoabʼetsʼoale je Yésica, tonga je tsín kuenta kisʼin. Kʼoa kʼianga jetíbʼaile estudio, kui jebi jaʼaitsjenle, kuinga kiskiʼndáni. Tonga ñaki kʼoatjín kon ndʼaibi nga je Jeobá sixále xi totʼatsʼe nga tsakakóle kjoanda je tichjaa (Ecl. 11:1, 6).

9, 10. 1) Tikʼaxki̱ kʼai kʼiáni koanchjén nga kitsjoanganʼio je chjota israelita. 2) Tikʼaxki̱ kʼai jmé xá xi tjín ya jinjtín nichxin xi tiyoaa ndʼaibi.

⁹ Nichxin kjoatse nkjín koya josʼin koan kitsjoanganʼio je chjota israelita (Éx. 36:2; 1 Crón. 29:5; Neh. 11:2). Kʼoa nichxin xi tiyoaa ndʼaibi, kʼoati nkjín koya josʼin koa̱n kuinyakoaa je ndsʼee. Tobʼelañá, nga si̱kʼayalee nichxinná, nga kuinyakoaa kao jmeni xi tjínná kʼoa kao je xá xi maná nʼia. Tsa kʼoasʼiaan, nʼio tsjoa sa̱tío tokoán kʼoa tsee kjoanichikontʼain sʼe̱ná.

¹⁰ Je Énle Niná kʼoatsole je ndsʼee xi sʼa xti nga katasíxákao je Jeobá, koaan nga siervo ministerial kʼoa tsa chjotajchínga sʼin sixá (1 Tim. 3:1, 8, 9; 1 Ped. 5:2, 3). Je xi kʼoasʼin síxá kao kjoatsjoa binyakao je ndsʼe̱ nga tsoyale je Énle Niná kʼoa nga binyakao tsa jme nganʼio machjénle (Hech. 6:1-4). A sakʼoaa kʼoatsoná je xi chjotajchínga sʼin tjío tsa koa̱n nga ñá si̱katíondaa je xi faʼai kjoajtín, nga ñá si̱katíondaa kʼoa ñá si̱kʼabiá je xo̱n xi síkasénná naxinandále Niná, tsa ñá sʼe̱nenáje̱ je territorio, tsa koa̱n nga kʼoainganʼioá nga matsje ya Ndʼia jña chotʼayá kʼoa tsa jmesa xá xi kjaʼaínile kʼoainá. Je xi kui xá  kjinele kʼoakuitsoná nga nʼio tsjoa báya tokoán kʼianga kui xá nʼia nga bʼainganʼiolee xi ngikʼa.

11. Jósʼin tsakasenkao jngo tichjaa nga je kisimiyo tichjaa xi ñatjen kisixá nga kisʼenda Ndʼia jña chotʼayá.

¹¹ Je xi kʼoasʼin tsjoánganʼio jme xá xi tjín jinnaxinandále Niná sʼele miyo. Kataʼyala jokoan je Margie, jngo tichjaa xi 18 nó kitsjoanganʼio jñani sʼenda Ndʼia jña chotʼayá. Jokji jaʼato je nó, nkjín tichjaa xi sʼa xti kitsoyale. Je tichjaa jebi kʼoatso nga tsakinyakaongañá xínkjín kʼianga koantajasa je kjoamakjainle nga kʼoasʼin kisixá (Rom. 1:12). Kʼoa kʼianga nganʼio koanchjénle tichjaa jebi, kitsjoanganʼiole ngatsʼi je miyole. A saje tsakʼainganʼioá kʼianga kʼoasʼin sʼenda ndʼia jñani ʼyaxkón je Jeobá. Koaan kʼoainganʼioá tojme xáni xi maná nʼia.

12. Jósʼin koa̱n kʼoainganʼioá kʼianga kjoaxkón bichóne je ndsʼee.

¹² Ijngo koya josʼin koa̱n si̱xákoaa je Niná kʼiaa nga kʼoainganʼiolee je ndsʼee xi kjoaxkón bichóne. Tobʼelañá, koaan tao̱n kʼoee kʼianga kuinyakoaa (Juan 13:34, 35; Hech. 11:27-30). Kʼoati koa̱n kʼoainganʼioá nga koa̱ntsje kʼoa tsa sʼe̱ndaya je ndʼiale ndsʼee. Tobʼelañá, je tichjaa xi Gabriela ʼmi, xi Polonia tsʼe, kisichaa je niʼyale kʼianga kitsendá ya ʼndele. Tonga tsjoa kisʼe kon kʼianga tsakinyakao je ndsʼee xi ya chrian tsʼe. Je Gabriela itso: “Alikui mena kui kʼoeyanajmía tʼatsʼe jmeni xi kisicha, tosaa kui mena kʼoaxián jme kjoanda xi kisokona. Nga tsakinyakaona je ndsʼee kui xi ngisa tsakʼéjngo tokoan nga nʼio tse kjoanda tjínna nga ya naxinandále Jeobá tijnajian kʼoa kui jebi xi nʼio tsjoa báya tokoan”. Nʼio nkjín ndsʼee xi kjoaxkón bichóne xi kʼoati tso kʼianga kʼoasʼin bʼainganʼiole. Kʼoa je ndsʼee xi tsjoánganʼio kʼoati nʼio tsjoa satío kon, nga̱ jé Jeobá síxákao kʼianga kʼoasʼín (tʼexkiai Hechos 20:35; * 2 Corintios 9:6, 7 *).

13. Kʼianga kao kjoatsjoa bʼainganʼioá, jósʼin basenkaoná nga tosi tonda tsjoacha maa je Jeobá. Jngo choa̱ tʼejnai.

 ¹³ Jngo tichjaa xi Stephanie ʼmi kʼoa kao xi kjaʼaísa ndsʼee, nʼio tsjoa kisatio kon kʼianga tsakinyakao je ndsʼee xi ya Estados Unidos kichokatio, xi kitjo naxinandále kʼianga kjoajchán kisʼe. Je Stephanie tsakásjai kʼoa kisindachon jñani koan tsakationi je ndsʼee jebi. Itso: “Je ndsʼee nʼio tsjoa kisatio kon kʼoa kitsjoaa kjoanda kʼianga kisakole kjoatsjoacha. Kʼoasʼin síkjaʼaitsjen nga je tsakʼainganʼiolaijin, tonga jéni xi kitsjoanganʼionajin. Je kjoatsjoacha xi bakó je ndsʼee, je kjoamakjainle kʼoa nga je Jeobá sínʼiotʼa yaole, kui xi basenkaoná nga ngisasa tsjoacha maa je Niná. Kʼoa kui jebi xi basenkaoná nga ngisasa chjí ʼyaa jmeni xi tsjoáná je Jeobá”.

14, 15. 1) Jókitso je profeta Isaías. 2) Jósʼin koa̱n chjénngilee je choa̱le Isaías.

¹⁴ A mená nga ngisasa tse si̱xákoaa je Jeobá. A tiyondañá nga xin ʼnde kjuinkʼinyasoán. Ningalani tsín tjínnele xin ʼnde kjuian kʼianga si̱xálee Niná, tjínkʼa je ndsʼee xi kao kjoatsjoa fi jñani xin ʼnde nga fitsoyason. Kʼoatisʼin síkjaʼaitsjen jokitso je Isaías kʼianga i̱ tso xi kiskonangi je Jeobá: “ʼYáni xi sikasén kʼoa ʼyáni xi koaingajaoná”. Kʼoa je Isaías i kitso: “I tijna. An tikasénnái” (Is. 6:8). A kʼoati tiyondaa tsanda ñá nga kʼoainganʼioá jme xá xi tjín jinnaxinandále Niná. Jósʼin koa̱n kʼoainganʼioá nichxin xi tiyoaa ndʼaibi.

¹⁵ Kʼianga kui kinchja̱ni je Jesús nga sa̱kóyason kʼoa nga chjotale si̱koaa je chjota, i kitso: “Nʼio tse xi majchá, tonga tochoa mani xi síxá. Tʼetsʼoalao tsokʼoa je Nainá xi tsʼe je xi kjimajchábe, nga katasíkasén chjota xi síxá xi tʼatsʼe xi majchále” (Mat. 9:37, 38). A koaan nga precursor sʼin si̱xá jñani ngisa machjén je xi tsoyason. Axo koaan kuisenkoaa tsa ʼyani nga koa̱n kʼoasʼin sixá. Nʼio nkjín ndsʼee xi precursor sʼin tjíosíxá ya ʼnde jñani ngisa machjén je xi tsoyason. A tjínsa josasʼin koa̱n si̱xálee je Niná. Tsa kʼoasʼiaan, nʼiojin tsjoa sa̱tío tokoán.

16, 17. Jmésani xi koa̱n sʼin ʼyani xi mele nga ngisasa tse sixále je Jeobá.

¹⁶ A tiyondañá nga ya Betel si̱xá kʼoa tsa yaje̱ jñani sʼenda ndʼia jña ʼyaxkón Jeobá. Ninga nkjín sá ya si̱xá kʼoa ninga tojngo kʼoa tsa jao nichxin ya si̱xá nga jngo xomana. Machjén ngantsjai je ndsʼee kʼoa kao tichjaa xi tjíonda nga tsjoánganʼio tojñani kʼoa tojme xá xi kʼoaile, ningalani sakʼoa tsínkui xá bʼainá jme xá xi maná nʼia. Je Jeobá bechjí ʼyani xi kao kjoatsjoa tsjoánganʼio (Sal. 110:3).

¹⁷ Tsa mená nga ngisasa tse si̱xálee je Jeobá, tsakui nichxin koa̱n kjuian je Skuela xi síchjine je xi bakóyason tʼatsʼe Chjotaxále Niná. Yaa skuela jebi ʼmiyale je ndsʼee kao tichjaa xi ñaki to xále Niná tjíosʼín nga koa̱n ngisasa tse sixá jinnaxinandále Niná. Je xi ya fi skuela jebi tjínnele koai jñani si̱kasén kʼianga jekjoetʼale. A tiyondañá kʼianga kjuian je skuela jebi (1 Cor. 9:23).

18. Jmé kjoanda xi so̱koná tsa je Jeobá si̱xákoaa nga nyaon nyaon.

¹⁸ Je choʼndale Jeobá tjotʼaa jmeni xi tjínle, bakó kjoanda kao kjoatsjoacha. Koaan koakoá jebi kʼianga nyaon nyaon kʼianga kuinyakoaa je xi kjaʼaí. Tsa kʼoasʼiaan, sʼeená kjoanyʼán kʼoa tsjoa sa̱tío tokoán (Gál. 5:22, 23). Tojosʼin tiyoaa nga jngó jngoá, tsjoa sa̱tío tokoán kʼiatsa chjénngilee je Jeobá jokjoan kʼoa tosi tonda je si̱xákoaa (Prov. 3:9, 10).