NʼIO ñʼai kjimachon nichxin xi tiyoaa ndʼaibi, kuinga kjoatsejta machjénniná xi choʼndale Jeobá maa (2 Tim. 3:1-5). Me ngatsʼi je chjota nga to yaole tsjoake, alikui jme xi sasénle kʼoa alikui male kjoéxkó yaole. Kuinga ndatjínni nga chjónangilee yaoná jebi: “A kʼoati sʼian josʼín je chjota nga tsín bakoa kjoatsejta. Jósʼin tsoyanile nga tsejta maa. Jméni xi koa̱n sʼian kʼianga tsejta koa̱n ngantsjai”.

Je kjoatsejta ali tsa tokuijin tsoyanile nga kʼoéjngoaa je tokoán kʼianga jme kjoa bitjatojiaan. Kʼoati kui xi tsoyanile nga kaná kʼoa nga tsín nichajiaan je kjoachoya xi tjínná. Kʼianga tjínná kjoatsejta alikui to yaoná mangínñá kʼoati kuenta nʼia je xi ngikʼa, saʼnda je chjota xi tsín nda bekonná. Fasjailee josʼin nga nda kuiyoaa kao chjota jebi. Kuinga kʼoatsoni Biblia nga je kjoatsejta yaa nroani je kjoatjaocha (1 Cor. 13:4). * Je kjoatsejta kʼoati ya tíjnajin je kjoanda xi tsjoáná je nganʼiotsjele Niná (Gál. 5:22, 23). Tonga jméni xi machjén nga koa̱n sʼe̱ná je kjoatsejta.

Nga koa̱n sʼe̱ná je kjoatsejta tjínnele nga si̱jélee nganʼiotsjele je Jeobá, nga̱ tsjoále ʼyani xi je sínʼiotʼa (Luc. 11:13). Ningalani koa̱nle koasenkaoná je nganʼiotsje tonga kʼoati machjén nga kui kʼoasʼiaan joʼmilee je Jeobá (Sal. 86:10, 11). Jebi kui xi tsonile nga kʼoénelee yaoná nga tsejta katamaa nichxin nganyaon ánni nga katamanganiná nga kʼoasʼiaan. Tonga jmésa xi machjén nga tondiaa katasʼená je kjoatsejta.

Tsa chjénngiaa choa̱le Jesús sʼeená kjoatsejta. Kʼianga kui kinchja̱ni Pablo tʼatsʼe josʼin mele Niná nga koa̱nkjoaan, jolani nga tsejta katamaa, i kitsole chjotale Cristo: “Je kjoanyʼántakonle Niná katabatéxomale ni̱ma̱no” (Col. 3:10, 12, 15). Kʼianga je kjoanyʼántokon jebi “katabatéxomale” ni̱ma̱ná machjénní nga kʼoati katamakjainná joni Jesús kʼianga je Niná kʼiaa kʼoendajin jmeni xi chon sonʼnde kʼianga kuichoka choa̱le. Tsa chjénngiaa choa̱le Jesús tsejta koaan ninga tojmeyeje xi koa̱n (Juan 14:27; 16:33).

Ningalani kui tichoyalee nga sindachon Niná je sonʼnde, ngisaa tsejta maa kʼianga kui nikjaʼaitsjenjiaan jokji kjoatsejta tíbakóná Jeobá. Je Biblia kʼoatso nga je Jeobá alikui sítseya kao jmeni xi tongini  tso nga sʼin, “josʼin síkjaʼaitsjen kʼa nga matseyale, tonga tjínle kjoatsejta xi tʼatsaan. Kaile nga jngo xi cha̱. Tomele nga kjuicho síkʼantjaiya kjoafaʼaitsjenle ngatsʼi” (2 Ped. 3:9). Kʼianga kui nikjaʼaitsjenjiaan jokji kjoatsejta tíbakó Jeobá basenkaoná nga kʼoati bakolee kjoatsejta je xi ngikʼa (Rom. 2:4). Kuila chótʼayajin kʼaa kʼiáni nga machjén nga tsejta koaan.

Je kjoa xi bitjatojiaan nga nyaon nyaon kui bakó tsa tjínná kjoatsejta. Tobʼelañá, tsa ʼyani xi tjíofáonajmí kʼoa tsa tjín xi mená kuixoán machjén nga tsejta katamaa kʼoa tsín tokjoan kuinókjoaa (Sant. 1:19). Kʼoajinti machjén nga tsejta koaan kao je ndsʼee xi kui kʼoasʼín jmeni xi tsín sasénná, ʼndele nga koa̱njtiná machjén nga si̱kjaʼaitsjenjiaan jokji tsejta je Jeobá kʼoa kao Jesús xi kao ñá. Alikui tokui kotsenle jmeni xi chʼao tinʼia, kui kuenta sʼín jokji bʼenelee yaoná nga nikʼantjaiyaa jokjoaan (1 Tim. 1:16; 1 Ped. 3:12).

Kʼoati ya ʼyanile tsa tjínná kjoatsejta kʼianga ʼya xi énndiso bánená kʼoa tsa ʼya xi kʼoakuitso nga chʼaotjín jmeni xi kanʼia. Tsakui nichxin ngotjo koa̱njtininá kʼoa kuinókjoantjé yaoná, tonga je Énle Niná itso: “Ngisaa nda je xi tsejta tikʼoajinni je xi ngʼakon. Ali ngotjojin nijtinilai yaoli, nga̱ je xi síjtile yaole to chjotachininí” (Ecl. 7:8, 9). Ningalani tsín kʼoatjín jmeni xi tísʼené, nda chósonnilee jokuixoán. Kʼoakisʼin je Jesús kʼianga je chjota chʼaosʼin kinchja̱ni xi tʼatsʼe (Mat. 11:19).

Je xi xijchá ma kʼoati machjén nga tsejta koa̱n kʼianga sikixiyanda josʼin síkjaʼaitsjen xtile kʼoa tsa jñani sakʼoa tsín nda sʼín. Tobʼelañá, jngo ndsʼee xi ya tísíxá Betel xi tsʼe Escandinavia xi Mattias ʼmi, kʼianga sʼa tsoʼba skuela nʼio tsabesin xtixínkjín xi totʼatsʼe jmeni xi makjainle. Kʼianga sʼa títjon je xijchále alikui kisʼejinle tsakui kjoa tífaʼatojin, tonga tsee kjoa kichomani nga kʼoasʼin tsaʼyasin je Mattias, nga̱ chaan jao kisʼe kon tʼatsʼe jmeni xi makjainle. Je nʼaile xi Gillis ʼmi itso: “Tsee kjoatsejta koanchjénnajin, je Mattias sakʼoaa i̱ kitso, ʼyáni je Niná, tsa tsínni ñaki Énle Niná xi nya je Biblia, jómani ʼyaa nga je Niná xi kʼoatítsoná jmeni xi sʼiaan”. Saʼnda i kitsole nʼaile: “Alikui koa̱n jokʼuínnáo tsa mena skotʼaya Biblia kʼoa tsa mai”.

Itsosa je Gillis: “Sakʼoaa nʼio jtile je tinajin kʼianga tsakjákaonajin, tonga ali tsa jin xi kinchjaʼaonnajin, jé Énle Niná xi chʼaosʼin kinchja̱ni”. Jmé xi kisʼin je Gillis. Itso: “Sakʼoaa nga nkjín ora tsakjakaonajmía”. Kinrʼoele jme xi kitsona, kʼoa sakʼoaa kiskonangile nga nda koa̱njinna jotjín kon kʼoa josʼin síkjaʼaitsjen. Sakʼoaa jngo nichxin tsjoale nga katasíkjaʼaitsjenjin jmeni xi xinyale. Kʼoa tjín nichxin nga kʼoakixinle nga sikjaʼaitsjenla  jmeni xi tsona. Nga kjitʼa kichobanajmíjin je Mattias chaan koanjinle kʼoa ñaki koankjainle jmeni xi tso Biblia tʼatsʼe je kjoabʼechjíntjai, nga toje Jeobá xi bakinle nga koatexoma kʼoa nga nʼio tsjoakená. Ningalani tse kichomani kʼoa sakʼoa ñʼai koannajin, tonga tobijbi tsjoake koan je Jeobá. Nʼio tsjoa tjínnajin kao je chjoónna nga tsejta koainjin kao je Mattias kʼianga sʼa koanjchínga nga̱ nda kichomani.

Kʼianga kʼoasʼin kao kjoatsejta tsakinyakao tile, je Gillis kao chjoónle ñaki kʼoatsakʼé kon nga je Jeobá tsjoánganʼiole. Je Gillis itso: “Nkjín kʼa kʼoakixinle je Mattias nga nʼio tsjoachaijin, nga kuinga nijénilaijin je Jeobá nga katabasenkao nga katamajinle jotjínni xi tʼatsʼe”. Nʼio tsjoá kjoanda je xijchá jebi nga kʼoasʼin tsejta koan xi kao tile.

Je chjotale Cristo kʼoati machjén nga katasʼele kjoatsejta kʼianga je síkuinda xínkjín kʼoa tsa miyole xi tsín timandani je chʼin xi tjínle. Kataʼyala jmeni xi koanle je Ellen, * xi kʼoati Escandinavia tsʼe.

Jela jin nó nga je xʼinle Ellen jao kʼa nga njín kixinyajin xokoajko̱, xi totʼatsʼe nga kʼoakoan alikui tima bakóni kjoamatokon, alikui titsjoa sʼenile kʼoa alikui tiʼaon sʼeni kon. Xi totʼatsʼe jebi nʼio ñʼai kjimale Ellen. Itso: “Nʼio tse kjoatsejta kjimachjénna kʼoa nʼio bʼetsʼoa”. Kʼoa kʼoatso nga je testo xi ngisa tsjoánganʼiole kui Filipenses 4:13 (TNM), jñani kʼoatso nga koa̱nná tojmeni nga̱ jé Niná tsjoáná nganʼio. Xi totʼatsʼe je nganʼio xi tsjoále Jeobá, je Ellen alikui tísíxa̱nle kʼoa tosi tonda tsejta kjima kʼoa kʼoati ñaki kʼoatjín kon nga je Jeobá tíbasenkao (Sal. 62:5, 6).

Tonga xi ngisasa bakó kjoatsejta jé Jeobá (2 Ped. 3:15). Nkjín kʼa faʼaitʼa ya Biblia jñani tsoyaná josʼin tsakakó kjoatsejta (Neh. 9:30; Is. 30:18). Tobʼelañá, jókisʼin je Jeobá kʼianga kiskonangile Abrahán ánni nga sikjesonni naxinandá Sodoma. Alikui ndi̱to̱n jokitsole, tosaa kao kjoatsejta kinrʼoéle Abrahán kʼianga kʼoakitsole jmeni xi kjimakjáojinle. Kʼianga kisikʼaxki̱ ngindia Jeobá jmeni xi kitso Abrahán yaa tsakakóni nga kinrʼoéle kʼoa kʼoakitsole nga likui sikjeson Sodoma tsa te chjota tjío xi kixi (Gén. 18:22-33). Choa̱ jebi bakóná nga je Jeobá tjínle kjoatsejta kʼoa kosonnile jmeni xi sʼín.

Ngatsʼiaa xi chjotale Cristo maa machjén nga katasʼená kjoatsejta. Tsa kʼoénelee yaoná nga sʼe̱ná kjoatsejta chʼa̱sjengʼañá je Nʼainá xi tíjna ngʼajmi xi nʼio tsjoakená kʼoa xi bakóná kjoatsejta, kʼoa yaa kuiyojinlee je chjota “xi bʼaile je kjoatjao xi tongini ʼmile xi totʼatsʼe nga tjínle kjoamakjain kao kjoatsejta” (Heb. 6:10-12, TNM).