1. Jósʼin bakó jmeni xi koannda nga tjotʼa je Jeobá.

TOJÉ Jeobá tíjna ngasʼa kʼianga kjesa síndajin jmeni xi tjín. Kʼoa koanmele kitsjoale kjoabijnachon je xi tjío ya ngʼajmi kao xi tjío i̱ Sonʼnde. Je Jeobá, jngoo “Niná xi tsjoa tjínle” kʼoa kao kjoatsjoa tsjoá xi ndatjín (1 Tim. 1:11, TNM; Sant. 1:17). Nga mele nga kʼoati tsjoa sa̱tío tokoán, bakóyaná jósʼiaan nga kʼoati tjótʼaa jmeni xi tjínná (Rom. 1:20).

2, 3. 1) Ánni nga tsjoa satíoni tokoán kʼianga tjotʼaa jmeni xi tjínná. 2) Jméni xi chótʼayá i̱ kjoaʼmiya jebi.

² Je Niná kʼoasʼin kisindaná jokjoan je (Gen. 1:27). Tsa mená nga tsjoa sa̱tío tokoán, machjén nga chjénngilee jokjoan, jolani, nga koa̱nndosinná je xíngiaa kʼoa nga tjótʼaa jmeni xi tjínná (Filip. 2:3, 4; Sant. 1:5). Ánni nga tjínnenile kʼoasʼianñá. Kuinga toxá kʼoasʼin kisindaniná je Jeobá. Ningalani chjotajée maa, koaan chjénngilee jokjoan je Jeobá, nga̱ je nʼio tjotʼa.

³ I̱ kjoaʼmiya jebi, kui chótʼayajiaan jótso je Biblia tʼatsʼe nga tjotʼaa jmeni xi tjínná. Kui jchaa nga ndasʼin biyoaa ngixko̱n Jeobá kʼianga tjotʼaa. Kʼoati jchaa jósʼin basenkaoná jebi kʼianga  ʼmiyasoán, kʼoa ánni nga tsjoa satíoni tokoán kʼianga tjotʼaa. Kʼoati jchaa ánni nga machjénsíni nga tosi tonda tjótʼaa jmeni xi tjínná.

4, 5. Jósʼin batíoná choa̱ je Jeobá kao Jesús nga nʼio tjotʼa.

⁴ Je Jeobá kui xi mele nga kui choa̱le kjuintjenngiaa, kuinga tsjoa sʼeni kon kʼianga tjotʼaa jmeni xi tjínná (Efes. 5:1). Kui xi mele Niná nga tsjoa katasatío tokoán. Yaa ʼyañá jebi josʼin kisindaná kʼoa nga nkjín koya tsojmi kisinda (Sal. 104:24; 139:13-16). Kʼianga binyakoaa xi kjaʼaí nga tsjoa satío kon, jé Jeobá chʼasjengʼaa.

⁵ Kʼianga jo chjota sʼin tsakʼejna je Jesús i̱ Sonʼnde nʼio nda choa̱ tsakʼéjnaná kʼianga tsakasenkao je chjota. Je Jesús i kitso: “Je ʼNdíle chjota tsínkui xá jaʼaini nga si̱xále, tosaa je sixá kʼoa tsjoá kjoabijnachonle nga nkjín chjota kʼoechjíntjai” (Mat. 20:28, TNM). Kʼoa je pastro Pablo i kitsole je chjotale Cristo: “Katasʼeno nga jon jñale kjoafaʼaitsjen xi kisʼele Cristo Jesús. Kitsjionkon yaole, tochoʼnda tsabekon yaole” (Filip. 2:5, 7). Koaan chjónangilee yaoná jebi: “A koaan nga ngisasa nda kjuítjenngia je choa̱le Jesús” (tʼexkiai 1 Pedro 2:21). *

6. Jméni xi kitsoya je Jesús kʼianga kui choa̱ tsakʼéjna xi tʼatsʼe je chjota samaritano (chótsenlai sén xi fitsʼiani kjoaʼmiya jebi).

⁶ Ndasʼin kuiyoaa ngixko̱n Jeobá kʼiatsa kjuintjenngiaa je choa̱ xi bʼéjnaná kʼoa tsa kʼoati kjuintjenngiaa je choa̱le Jesús. Nga kʼoasʼiaan, machjén nga koa̱nndosinná xi kjaʼaí kʼoa kuinyakoaa kʼiatsa nganʼio machjénle. Je Jesús jngo choa̱ tsakʼéjna xi tʼatsʼe jngo chjota samaritano xi nda chjota koan. Kʼoa kao kui choa̱ jebi tsakakóyani je Jesús nga kui xi mele nga kuinyakoaa toʼya chjotani jokji tjen kʼoakoa̱nná (tʼexkiai Lucas 10:29, 30, 33-35). * Kʼiaa kisikʼéjna je choa̱ jebi Jesús kʼianga jngo chjota judío xi i̱ tso xi kiskonangile: “ʼYáni xi xíngia”. Tojo kitso je Jesús, kʼiatsa mená nda kuiyoaa ngixko̱n Niná tjínnele kuinyakoaa xi kjaʼaí tojo kisʼin je chjota samaritano.

7. Jósʼin koakoá nga ñaki tjínjngo tokoán nga kui xi ngisa ndasʼin bichómani kʼianga kui kʼoanʼia jmeni xi tso je Jeobá.

⁷ Nkjín koya anni nga tjínnenile tjótʼaa jmeni xi tjínná. Si̱kjaʼaitsjenjinla jmeni xi kitso je Na̱i ya ʼndenaxóle Edén. Kʼoakitsole je Adán kao Eva nga ngisa nda koatio tsa tsín sitjosonle Niná. Je Adán kao Eva to yaole kini. Je Eva kui xi koanmele nga jo Niná sʼin kʼoéjna. Kʼoa je Adán tosaa jé chjoónle tsakʼaʼénle tikʼoajinni je Jeobá (Gén. 3:4-6). Tonga tsín ndasʼin kichomani nga kʼoakisʼin. Alikui tsjoa sʼe tokoán kʼianga to yaoná mangínñá. Tsa tjótʼaa jmeni xi tjínná, kʼoasʼin koakoñá nga ngisa ndasʼin bichómani kʼianga kui kʼoanʼia jmeni xi tso je Jeobá.

8. Je Adán kao Eva, ánni nga kʼoati tjínnenile kisikjaʼaitsjen tsakai je ntje̱le.

⁸ Je Adán kao Eva tjínnele kisikjaʼaitsjen tsakai je chjota xi koatio nga koa̱nskanni. Je Niná kisichikontʼain kʼoa kʼoakitsole nga nkjínya katama nga sitse i̱ Sonʼnde kʼoa nga je koanentsja (Gén. 1:28). Nga mandosinle je Niná jmeni xi kisinda, kʼoajinti tjínnele koanndosinle tsakai je Adán kao Eva jósʼin nga tsjoa sa̱tío kon je ntje̱le. Je Jeobá kui xi koanmele nga je Adán kao Eva kʼoa kao ngatsʼi xtile ñatjen sixá nga ʼndenaxó sikao ngakjijnda Sonʼnde. Kʼoa tsejin xá kitjenkao nga kuitjosonle jebi.

9. Ánni nga tsjoa kisationi kon je Adán kao Eva kʼiatsa kitsjoanganʼio nga ʼndenaxó koan i̱ Sonʼnde.

⁹ Kʼianga ʼndenaxó sikao jngo tjíjtsa Sonʼnde je Adán kao Eva tjínnele ñatjen kisixá kao Jeobá. Tsa kʼoalani kisʼin koanjin jaʼasʼenjin je kjoanikjáyale Niná (Heb. 4:11). Nʼiojin tsjoa kisatio kon tsa kʼoakisʼin. Xi ijngosani, je Jeobá tsejin kjoanichikontʼain kitsjoale tsa tsín to yaole kini.

10, 11. Jósʼin nitjosoán je xá xi kjinená kʼianga ʼmiyasoán kʼoa nga chjotatjenngile Cristo nikoaa je chjota.

¹⁰ Nichxin xi tiyoaa ndʼaibi kui xá títsjoáná je Jeobá nga kʼuínyasoán kʼoa nga chjotatjenngile Cristo si̱koaa je chjota. Nga kuitjosonná xá jebi, machjén nga ni̱ma̱ná kjuinroajinni nga mená nda koatio xi kjaʼaí. Tonga tokʼiaa kuitjosonná jebi kʼiatsa tsjoachaa je Niná kʼoa kao xíngiaa.

¹¹ Je pastro Pablo kʼoakitso nga je kʼoa kao chjotale Cristo nga tojngo kisixákao Niná, nga̱ kitsoyason kʼoa tsakakóyaa xi tʼatsʼe Chjotaxále Niná (1 Cor. 3:6, 9). Nichxin xi tiyoaa ndʼaibi, jósʼin koa̱n si̱xákoaa je Niná. Kʼiaa nga kao kjoatsjoa kʼoee jmeni xi tjínná, jolani nichxinná, nganʼioná kʼoa kao tsojmi xi tjínná kʼianga si̱tjosoán je xá xi tíbánená je Niná. Nʼio tse kjoanda tjínná nga je Niná nixákoaa.

12, 13. Jósingái ji, jmé kjoanichikontʼain sokóná kʼianga chjotale Cristo nikoaa je chjota.

¹² Nʼio tsjoa satío tokoán kʼianga kao kjoatsjoa bʼé je nichxinná kao nganʼioná kʼianga ʼmiyasoán. Nʼio nkjín je ndsʼee kao tichjaa xi kʼoatso nga tsínsa jme xi ngisasa tsjoa báya tokoán jokji tsjoa sʼená nga Biblia ʼmiyalee je chjota. Nʼio tsjoa satío tokoán kʼianga je xi tiʼmiyalee majinle jmeni xi tsoya je Biblia, nga sʼele kjoamakjain, nga síkʼantjaiya yaole kʼoa nga fákaonajmíni xi kjaʼaí jmeni xi majinle. Kʼianga tsabe je Jesús nga nʼio tsjoa tjío kon kʼianga jejaʼaini nga kikakóyason je chjotatjenngile xi 70 mani, kʼoati nʼio tsjoa kisʼe kon tsanda je (Luc. 10:17-21).

¹³ Jngo tjíjtsa Sonʼnde, je ndsʼee kao tichjaa  nʼio tsjoa satío kon kʼianga tjíobinyakao chjota je Énle Niná. Tobʼelañá, jngo tichjaa xi sʼa xti, xi Anna ʼmi, yaa ki jngo ʼnde xi tíjna Europa jñani ngisasa machjén je xi tsoyason. * Je tichjaa jebi itso: “Nʼio tsjoa sʼe tokoan nga kʼoasikji chjota xi mamele kotʼaya je Énle Niná. Tsjoa báya tokoan kʼianga xinyasoan. Kʼianga bichoa ya ndʼiana saʼnda tsín maʼana nga kui sikjaʼaitsjen jmeni xi makjáojinna. Kui ngisa sikjaʼaitsjen je chjota xi tsjoale estudio, jme kjoa xi tjíofaʼatojin kʼoa kao jmeni xi makjáojinle. Basjaile josʼin koa̱n tsjoanganʼiole kʼoa josʼin koasenkoa. Ñaki tiʼbeña nga ngisa tsjoa sʼe tokoán kʼianga bʼé kaoni nga chjoe” (Hech. 20:35).

14. Jósʼin nga tsjoa sa̱tío tokoán ningalani tochoa chjota kjuinrʼoé kʼianga ʼmiyasoán.

¹⁴ Ningalani tsín kuinyaño chjota je Énle Niná jñani nga ʼmiyasoán. Tonga machjén nga kʼoénelee yaoná kʼoa nga chja̱kaonajmíñá je Énle Niná tojñani nga sa̱téjiaan. Ningalani tsín kjuinrʼoéná, tsjoa satío tokoán nga fajinkoaan xi tʼatsʼe je énnda chjotse. Je xá xi kjinená yaa mangósonkao je xá xi tsakʼaile je profeta Ezequiel. Je Jeobá kʼoakitsole nga katabájinkon je chjota xi tʼatsʼe ni kjuinrʼoé kʼoa ni mai (Ezeq. 2:7; Is. 43:10). Tjínkʼa chjota xi tsín chjí be je Énle Niná tonga ʼyañá nga chjí be Niná jokji bʼenelee yaoná kʼianga ʼmiyasoán (tʼexkiai Hebreos 6:10). * Jngo publicador xi i̱ kitso: “Tibʼentjéñá, tibʼejtenngilee nandá kʼoa tibʼetsʼoañá kʼianga je Jeobá sitaja je kjoamakjainle chjota” (1 Cor. 3:6).

15. A tokʼiaa tjótʼaa kʼiatsa nda sa̱sénle je chjota. Tʼeyanajmí.

¹⁵ Je Jesús kui xi mele nga tsjoa sa̱tío tokoán. Kuinga i̱ tsoniná: “Tʼao, kʼoa kʼoaino. Kʼoasʼin tsjoáno nga kʼoéjtétjonno jchʼáono, jngo choa̱ xi nda, xi tíkjitsenʼio, xi sʼetsaojneya, xi nʼio kitse saʼnda tsaontjai. Je choa̱ xi bʼechoyao, tikuini xi sʼe̱choyanino ngindia” (Luc. 6:38).  Ningalani tjotʼaa jmeni xi tjínná, alikui tongatsʼi je chjota nga sa̱sénle. Tonga je xi tsjoá kjoanda kʼoati sʼin tsanda je. Kuinga machjénsíni nga tosi tonda tjótʼaa jmeni xi tjínná ningalani tsín skoe̱chjí je chjota. Kʼianga kʼoanʼia nʼio ndasʼin bichómani.

16. ʼYáni xi koakolee kjoanda, kʼoa ánni.

¹⁶ Je xi ñaki ni̱ma̱le nroajinni nga tjotʼa jmeni xi tjínle, alikui jme xi koya ngajaonile. Je Jesús i kitso: “Tonga kʼia nga sʼuí nosjai, tinókjoalai chjotayo̱ma̱, kʼoa xi yo̱ma̱ kjoan yaole, xi chjiʼngé, xi xka̱. Jó tonda koa̱nli, nga tsín tsa koa̱nle kʼoechjí ngindianili” (Luc. 14:13, 14). Je Biblia kʼoatso nga je chjota xi tjotʼa koa̱nchikontʼain. Kʼoa itsosa: “Tsjoa tjínle je xi bakóle kjoamatokon je xi ma̱ tjío” (Prov. 22:9; Sal. 41:1). Tsjoa satío kjoaixi tokoán kʼianga binyakoaa xi kjaʼaí.

17. Jméni xi koa̱n kʼoee nga tsjoa sa̱tío tokoán.

¹⁷ Kʼianga kui kisikʼaxki̱ je Pablo nga kʼoakitso je Jesús nga ngisa ndani nga kʼoee tikʼoani nga chjoé, ali tokuijin xi kitsonile tsa kʼoee je tsojmi xi tjínná, kʼoati kui kinchja̱ni nga si̱nʼioá kon xíngiaa kʼoa nga kuinyakoaa je xi nganʼio machjénle (Hech. 20:31-35). Jmeni xi kitso kʼoa jmeni xi kisʼin je pastro Pablo kui bakóyaná nga kʼoee jmeni xi tjínná, jolani je nichxinná, nganʼioná, nga koa̱nndosinná kʼoa nga koakolee kjoatsjoacha xíngiaa.

18. Jótso kʼa je chjotachjine.

¹⁸ Je chjotachjine kʼoatso nga tsjoa satío tokoán kʼianga tjotʼaa jmeni xi tjínná. Jngo xo̱n xi kitjo kʼoatso nga kui xi tsjoa batío kon je chjota kʼianga binyakao je xi kjaʼaí. Kʼoati tjín je chjotachjine xi kʼoatso nga tiñá binyakaoñá yaoná kʼianga binyakoaa xi kjaʼaí, nga̱ nda satío tokoán kʼianga kʼoanʼia. Kʼoa tjínsa je chjotachjine xi kʼoatso nga mandaya je chjota xi chʼin tjínle kʼianga ni̱ma̱le nroajinni nga síxá kjoatjao. Alikui tokʼoamaná jebi, nga̱ je Jeobá kʼoatsoná ngantsjai nga kui xi tsjoa báya tokoán kʼianga tjotʼaa (2 Tim. 3:16, 17).

19, 20. Jméni xosikaoná nga nda chjota koaan kʼoa nga tjótʼaa jmeni xi tjínná.

¹⁹ Kʼianga ʼyaa nga to yaole fini je chjota, tsakui nichxin kui xosikaoná nga ñʼai koa̱nná kʼianga tjótʼaa. Tonga je Jesús kʼoakitso nga je kjoatéxoma xi ngisasa títjon tjío kuinga tsjoacha koaan je Jeobá kao ngayeje ni̱ma̱ná, kao ngayeje kjoabijnachonná, kao ngayeje kjoafaʼaitsjenná kʼoa kao ngayeje nganʼioná, kʼoa nga tsjoacha koaan je xíngiaa joni yaoná (Mar. 12:28-31). Tojosʼin tiʼyaa i̱ kjoaʼmiya jebi, je xi tsjoake Niná bʼénele yaole nga kjenngile. Je Jeobá kao Jesús nʼio tjotʼa, kʼoa kʼoatsoná nga kʼoati sʼiaan tsanda ñá, nga̱ kui xi tsjoa koaya kjoaixi tokoán. Kʼiatsa tjótʼaa jmeni xi tjínná xi kao Niná kʼoa kao xíngiaa, jé Jeobá chʼa̱sjengʼaa kʼoa tsee kjoanda sʼe̱ná ñá kʼoa kao xíngiaa.

²⁰ Alikui jao tjínná nga tibinyakoaa je xíngiaa, kʼoa ngisaa je xi ndsʼee mani (Gál. 6:10). Tsa tosi tonda kʼoasʼiaan, tsjoájinná kjoanda je chjota kʼoa tsjoajin sa̱tío tokoán. Je Proverbios 11:25 itso: “Je chjota xi tjotʼa jme xi tjínle ngisaa ndasʼin kʼoéjna, kʼoa je xi tsjoánganʼiole xi kjaʼaí kʼoati kʼoainganʼiole”. Nkjín koya josʼin koa̱n kuinyakoaa xíngiaa nga nyaon nyaon kʼoa kʼianga ʼmiyasoán, tobʼelañá, nga tjótʼaa jmeni xi tjínná, nga ndʼé si̱koaa kʼoa nga kao kjoatsjoa kuinyakoaa xíngiaa. Kui tʼatsʼe jebi jcha kʼaa ya kjoaʼmiya xi ijngo.