KJOAʼMIYA XI CHOTʼAYA 31
Alikui si̱xa̱nlee
“Likui maʼindanijin” (2 COR. 4:16).
KJOAJNDA 128 Katakaná saʼnda nga kjoetʼa
XI TÍNCHJA̱NI *
1. Jméni xi tjínnele sʼiaan xi chjotale Cristo maa nga tjoéná je kjoanda xi tsjoáná Niná.
ÑÁ XI chjotale Cristo maa jngoyale titokanachaa kʼoa je kjoatjao xi kuinjená kui je kjoabijnachon xi tsínkʼia fetʼa. Ninga jekjoatse kʼoa ninga tosʼa choatse nga Niná tinixálee, tjínnele nga tosi tonda kʼoasʼiaan josaʼnda nga tjoéná je kjoanda xi tsjoáná Niná. Je kjoafaʼaitsjen xi kitsjoale pastro Pablo je chjotale Cristo xi ya Filipos tsakatio, koasenkaoná nga tsín si̱xa̱nlee. Kʼianga siglo 1, tjínkʼa je chjotale Cristo xi jekjoatse nga Jeobá tjíosíxále kʼianga kichole je carta xi kiski Pablo. Ningalani ndasʼin tjíosíxále Niná, je Pablo kʼoakitsole nga tosi tonda kao “kjoatsejta” kʼoakatasʼín. Kʼoa kui xi koanmele nga choa̱le katafitjenngi ánni nga tjoésínile je kjoanda xi tsjoále Niná (Filip. 3:14).
2. Ánni nga nʼio tsakinyakaoni je kjoafaʼaitsjen xi kitsjoale Pablo je chjotale Cristo xi Filipos tsʼe.
2 Nʼio tsakinyakao je kjoafaʼaitsjen xi kitsjoale Pablo je chjotale Cristo xi Filipos tsʼe, nga̱ nʼio kitjenngike chjota saʼnda nga títjon. Kʼiaa nga nó 50 kʼoatsakʼinle je Pablo kao Silas nga ya katafitsoyason ya Macedonia (Hech. 16:9). Nga kicho kiskajin jngo chjoón xi Lidia ʼmi xi nda kinrʼoéle. Jé Jeobá xokisʼin nga nda kinrʼoéni je énnda chjotse (Hech. 16:14). Kʼoa tochoatsee jaʼato nga kisʼenngindá je Lidia kao ngatsʼi xi tjío ya niʼyale. Tonga je Na̱i alikui jyó tsakʼejna, nga̱ je chjota xi ya tsʼe ñaki tsakájbe je Pablo kao Silas nga kikao ngixko̱n chjotaxá, kʼoa énndiso tsakáne. Kʼoa kuinga tsakichonni je Pablo kao Silas, ndoyá kinikatíoʼya kʼoa kʼoatsakʼinle nga katabitjo ya naxinandá (Hech. 16:16-40). Tonga alikui kisikʼajenle kon ninga kʼoakinikao. Kʼoati tsín kisikʼajenle kon je chjotale Cristo xi Filipos tsʼe. Alikui jao tjínná nga tsakinyakao je choa̱le Pablo kao Silas.
3. Jósʼin tsakakó Pablo nga tsínkʼia kisikʼajenle kon nga kisixále Niná, kʼoa jmé xi chótʼayajiaan i̱ kjoaʼmiya jebi.
3 Ñaki kʼoatsakʼé kon Pablo nga tsínkʼia sikʼajenle kon (2 Cor. 4:16). Tonga kʼoati koanjinle nga tjínnele tosi tonda je Niná sixále nga tjoéle je kjoanda xi tsjoá Niná. Jmé xi bakóyaná jokisʼin je Pablo. Jmé choa̱ xi tjín ndʼaibi xi binyakaoná nga chókjoajinná ninga kjoa bitjatojiaan. Kʼoa jósʼin basenkaoná je kjoachoya xi tjínná nga tsínkʼia si̱kʼajenlee tokoán.
JÓSʼIN BASENKAONÁ CHOA̱LE PABLO
4. Jmé xi kisʼin Pablo ningalani tsakʼejnanʼio.
4 Kataʼyala josʼin tíjna Pablo kʼianga kiskile carta je chjotale Cristo xi Filipos tsʼe. Kʼianga tíjnanʼio Pablo ya Roma alikui koan kitsoyason. Ninga kʼoalani, kitsoyale je chjota xi kichosíxatʼa kʼoa carta kiskile je chjotale Cristo xi kjintʼa tjío. Tikʼoasʼinni nichxin xi tiyoaa ndʼaibi, nkjín ndsʼee xi ñʼai male nga bitjotsoyason, tonga fákaonajmíni Énle Niná je xi bichókonle ya ndʼiale. Kʼoati kji carta xi síkasénle je chjota xi tsín tsaojin.
5. Tojo tso Filipenses 3:12-14, jméni xi tsakasenkao Pablo nga tosi tonda nda kisixánile je Niná.
5 Je Pablo alikui kui ngisa kitsjoale kjoandosin jmeni xi kisʼin ngasʼa kʼoa tsínkui tsakʼéjinkon jñani tsín nda kisʼin. Kʼoakitso nga nʼio tjínle kjoandosin nga kisichajin “je xi jejaʼato”, ánni nga nda kitjosonnile je xále Niná (tʼexkiai Filipenses 3:12-14). * Xi títjon, je Pablo alikui kui kisimekon ijngokʼa nga ndasʼin tsakʼejna ngixko̱n chjota judío, kʼoa ninga tse kjoachjine kisʼele kʼoakitso nga joni tjé sʼin tsabekon (Filip. 3:3-8). Xi majaoni, alikui kitsjoaʼnde nga kui kisikʼajennile kon nga chjotale Cristo kitjenngike ngasʼa. Kʼoa xi majanni, alikui kʼoasʼin kisikjaʼaitsjen nga jenʼio tse jmeni xi kisʼin nga kisixále Niná, ningalani nʼio tse kjoa jaʼatojin. Jolani nga ndoyá tsakʼejnaʼya, nga kinikiʼaon, nga la̱jao̱ kisasenle, nga kiskangindá, nga sakʼoa tsín kisʼele jmeni xi kiskine kao jmeni xi tsakʼakjá (2 Cor. 11:23-27). Ningalani nʼio nda kisixále Niná kʼoa ninga tse kjoa jaʼatojin, tosi tonda tsakʼénele yaole. Kʼoati tjínnele kʼoasʼiaan tsanda ñá.
6. Jméni “je xi jejaʼato” xi machjén nga si̱chajiaan.
6 Jósʼin koa̱n si̱chajiaan “je xi jejaʼato” tojo kisʼin je Pablo. Tsakui faʼaitsjenná jme jée xi tsakijnyaa ngasʼa, je xi koasenkaoná kuinga si̱kjaʼaitsjenjiaan nga jetsakʼéchjíntjainá je Jesús. Kʼianga chótʼayá kʼoa si̱kjaʼaitsjenjiaan xi tʼatsʼe jebi, kʼoa nga kʼoétsʼoaa koasenkaoná nga tsínkui nʼio kʼoéjintokoán jme jée xi tsakijnyaa ngasʼa. Kʼoa koasenkaojinná nga nyʼán sʼe̱ tokoán nga tsín tikui kʼoéjinkonñá nga̱ jekisichatʼaná je Jeobá. Kataʼyalasa xi tʼatsʼe pastro Pablo. Kʼianga ngisasa tse tjíosíxále Niná, tjínkʼa je ndsʼee xi kisikatío je xále jñani nda machjíle tsakai. Kʼianga si̱chajiaan jmeni xi jekinikatioá kui xi tsonile nga tsínkui si̱metokon ijngokʼá (Núm. 11:4-6; Ecl. 7:10). “Je xi jejaʼato” kitsole Pablo kʼoati kui josʼin kinixálee Jeobá ngasʼa kʼoa tsakuije̱ kjoa xi kitjatojiaan. Kʼianga nikjaʼaitsjeen josʼin tísíchikontʼainná je Jeobá jokji tífaʼato nó ngisaa machriantʼalee. Tonga alikui koa̱n nga tokʼoéjngoaa tokoán kʼoa kʼoasʼin si̱kjaʼaitsjeen nga jetse kinixálee Jeobá (1 Cor. 15:58).
Alikui kʼoaiʼndee nga jme xi kʼoechjoaná nga Niná si̱xálee kʼoa kui kuenta sʼiaan je kjoanda xi tsjoáná Niná (Chótsenlai párrafo 7)
7. Tojo tso ya 1 Corintios 9:24-27, jmé xi sʼiaan nga koa̱n kuiyoaa ngantsjai nichxin. Jngo choa̱ tʼejnai.
7 Je Pablo nʼio nda koanjinle jmeni xi kinchja̱ni je Jesús kʼianga kʼoakitso nga nʼio kʼoénelee yaoná (Luc. 13:23, 24). Tojo kisʼin je Jesús, je pastro Pablo koanjinle nga kʼoati tjínnele kʼoenele yaole ngantsjai nichxin. Kuinga kui kisingósonkaoni josʼin nixálee Niná kao nga tokanacha je chjota (tʼexkiai 1 Corintios 9:24-27). * Je chjota xi tokanacha kui kuenta sʼín nga kuinjele kʼoa alikuila xin kotsen. Tobʼelañá, tsa ya ndiaa kjoaʼa jñani tienda tjín, alikuijinla ya koase̱n nga skótsenle jmeni xi tísaténa, nga̱ kui xi mele nga kuinjele. Tikʼoasʼinni tsanda ñá, nga tinixálee je Niná alikui koa̱n nga kui kuenta sʼiaan jme xi tjín sonʼnde. Tojo kisʼin Pablo, tsa nʼio kʼoénelee yaoná nga tjoéná je kjoatjao xi tsjoáná Niná, kui kjoanda sʼe̱ná nga koa̱n kuiyoaa ngantsjai nichxin.
ALIKUI SI̱XA̱NLEE NINGA KJOA KUITJATOJIAAN
8. Jméni xi jan koya chótʼayajiaan.
8 Janla koya chótʼayajiaan jmeni xosikaoná nga si̱kʼajenlee tokoán. Nga tsín ndi̱to̱n bitjoson jmeni xi choyalee, nga nroajen nganʼioná kʼoa nga kjoa bitjatojiaan. Nga jchaa josʼín kʼa je ndsʼee kʼianga kui kjoa faʼatojin kʼoati kuinyakaoná tsanda ñá (Filip. 3:17).
9. Jósa̱tío tokoán tsa tsín ndi̱to̱n kuitjoson jmeni xi choyalee.
9 Nga tsín ndi̱to̱n bitjoson jmeni xi choyalee. Toxá choyanilee nga kuitjoson jmeni xi tso Niná. Kʼianga kʼoakitso je profeta Habacuc nga tsín mele nga tosi tonda kjoatsʼen sʼe̱ ya Judá, je Jeobá kʼoakitsole nga tjenyatokon katabʼejna (Hab. 2:3). Tsínjin titsjoa sa̱tíoni tokoán tsa kʼoasʼin si̱kjaʼaitsjeen nga tsín ndi̱to̱n tíbitjoson jmeni xi choyalee kʼoa saʼnda kjuinroajenjin tokoán (Prov. 13:12). Kʼoakoan kʼianga siglo 20, nʼio nkjín je chjotale Cristo xi kui kiskoyale nga kʼia koai ngʼajmi kʼianga nó 1914. Jméni xi kisʼin je chjotale Cristo xi kixi kitʼale Niná kʼianga tsínni kʼoakoan jmeni xi kiskoyale.
Jmeni xi kiskoyale je Royal kao Pearl Spatz alikui kʼia kitjoson nga nó 1914, tonga tosi tonda kixi kitʼale Niná (Chótsenlai párrafo 10)
10. Jméni xi kisʼin jngo ndsʼee kao chjoónle kʼianga tsínni kitjoson jmeni xi kiskoyale.
10 Kataʼyala jokoan jngo ndsʼee kao jngo tichjaa xi Royal kao xi Pearl Spatz ʼmi. Je ndsʼee Spatz kʼiaa kisʼenngindá nga nó 1908, nga 20 nóle. Alikui jao kisʼe kon nga tojeme koai ngʼajmi nga kʼia. Kʼianga nó 1911 nga kʼoakitsole je Pearl nga katabixankao, i kitsole: “Jeʼyai jmeni xi koa̱n nga nó 1914. Tosa kuixan ndi̱toaan”. A kisikʼajenle kon nga tsínni ya ngʼajmi ki nga nó 1914. Mai, nga̱ kui ngisa kuenta kisʼin nga kixi koaitʼale Niná tikʼoajinni je kjoatjao xi kʼoaile. Ñaki kʼoatsakatío kon nga tosi tonda sixále Niná tojmeni xi koa̱n. Kʼoa tosi tonda je Niná kisixále kʼoa kixi kitʼale saʼnda nga kʼien. Kui xi mená nga kuitjotsje je jaʼaínle Niná kʼoa nga jchale nga toje xi tiʼndele koatexoma, kʼoa nga sitjoson jmeni xi tongini tso. Jé Niná xi ngisa be kʼiáni kʼoakoa̱n ngayeje jebi. Nga kjesa kʼoamajin, tosi tonda si̱xálee kʼoa tsínkui si̱kʼajennilee tokoán tsa tsín ndi̱to̱n kuitjoson jmeni xi choyalee.
Ningalani jejchínga Arthur Secord tosi tonda nda kisixále Niná. (Chótsenlai párrafo 11)
11, 12. Ánni machjénni nga tosi tonda si̱xálee Niná ninga tsín tikʼoakji bichóni nganʼioná jokinʼia ngasʼa. Jngo choa̱ tʼejnai.
11 Nga nroajen nganʼioná. Je chjota xi tokanacha nganʼio machjénle nga nda tóka. Tonga ñá, ali tsakuijin je nganʼio xi tjínná xi ngisa machjén nga tosi tonda si̱xálee Niná. Nʼio nkjín je ndsʼee kao tichjaa xi jetjíonroajen nganʼiole xi ñaki kʼoatjío kon nga tosi tonda je Niná sixále (2 Cor. 4:16). Kataʼyala je choa̱le ndsʼee Arthur Secord. * Kʼianga je 55 nó nga ya Betel tísíxá kʼoa nga 88 nóle, je tichjaa xi tísíkuinda i kitsole: “Jekinikjelai nganʼioli nga kinixálai Jeobá”. Tonga je ndsʼee Arthur alikui tokui kini jmeni xi kisʼin ngasʼa nga kisixále Jeobá. Kuinga i̱ kitsonile je tichjaa: “Jaon, kʼoatjín kjoaixi. Tonga je xi ngisa chjíle kui jmeni xi sʼiaan ndʼaibi, ali tsakuijin jmeni xi jekʼoakinʼia”.
12 A jenʼio nkjín nó nga tinixálee Jeobá kʼoa a jetsín tikʼoakji bichóni nganʼioná jokinʼia ngasʼa. Ningalani jetínroajen nganʼioná, alikui si̱kʼajenlee tokoán. Je Jeobá nʼio chjí be josʼin kinixálee ngasʼa (Heb. 6:10). Kʼoa jotinʼia ndʼaibi kʼoati nʼio chjí be, kʼoa kui kuenta sʼín nga tsjoachaa, ali tsakuijin jokji si̱xálee. Nga̱ kʼoasʼin bakonilee nga tsjoachaa kʼianga tosi tonda nixálee jokji tjen kʼoamaná (Col. 3:23). Majinle jokji tjen bichó nganʼioná kʼoa alikui kui síjéná jmeni xi tsín kʼoakoa̱nná (Mar. 12:43, 44).
Je Anatoly kao Lidiya Melnik kixi kitʼale Niná ninga nʼio tse kjoa jaʼatojin (Chótsenlai párrafo 13)
13. Jmé kjoa xi jaʼatojin je Anatoly kao Lidiya, kʼoa jósʼin basenkaoná je choa̱le nga tosi tonda je Niná si̱xálee ninga tse kjoa kuitjátojiaan.
13 Kjoa xi bitjatojiaan. Tjínkʼa je choʼndale Jeobá xi nʼio nkjín nó nga tjíochókjoajinle nga kjoa tjíofaʼatojin. Kataʼyala je choa̱le Anatoly Melnik, * xi Moldavia tsʼe. Tokʼiaa 12 nóle nga kindoa je nʼaile, ndoyá kinikʼéjnaʼya kʼoa yaa Siberia kinikasén, xi tsʼato 7,000 kilómetro kjin tíjnale niʼyale. Kʼoa nga jekoan ñanóni, kʼoati ya Siberia kinikasén je Anatoly, na̱le kʼoa kao pajchále. Kʼianga jeki nichxin, koan ki je kjoajtín, kʼoa 30 kilómetro kjin kini ndso̱ko̱ nga tsakʼetsomajin nyʼán nga kicho jñani sʼejna je kjoajtín. Kʼoa nga jekoanskanni, je ndsʼee Melnik jan nó nga ndoyá tsakʼejnaʼya, kʼoa tsín tiya tsakʼejnakaoni je chjoónle xi Lidiya ʼmi kao tsotiʼndíle, xi tosʼa jngo nóle. Ninga nʼio nkjín nó nga tse kjoa jaʼatojin je Anatoly kao familiale tosi tonda je Niná kisixále. Ndʼaibi, je Anatoly 82 nóle kʼoa yaa tíjnajinle je comité xi tsʼe sucursal xi tíjna ya Asia central. Tojo kisʼin je Anatoly kao Lidiya, kʼoénelee yaoná jokji tjen kuicho nganʼioná nga si̱xálee je Jeobá kʼoa tosi tonda kixi kjuintʼalee joni ngasʼa (Gál. 6:9).
KUI SI̱KJAʼAITSJEEN JMENI XI CHOYALEE NICHXIN XI NROAJÁN
14. Jméni xi koanjinle je Pablo nga tjínnele sʼin nga tjoéle je kjoatjao xi tsjoále Niná.
14 Je Pablo ñaki kʼoatsakʼé kon nga kuitjosonle je xále Niná kʼoa nga kuichotjenngi je kjoatjao xi tsjoále Niná. Yaa kisʼele kjoachoya nga ya ngʼajmi koai. Tonga koanjinle nga tjínnele tosi tonda kʼoenele yaole nga tjoéle kjoanda jebi (Filip. 3:14). Je Pablo jngoo choa̱ kisichjén nga tsakasenkao je chjotale Cristo xi Filipos tsʼe nga tosi tonda je Niná katasíxále.
15. Jmé choa̱ xi kisichjén Pablo nga tsakasenkao je chjotale Cristo xi Filipos tsʼe nga tosi tonda je Niná sixále.
15 Je pastro Pablo kui kisikjaʼaitsjenjinle je chjotale Cristo xi Filipos tsʼe nga ya ngʼajmi tjínle kjoachoya (Filip. 3:20). Ánni nga nʼio tjínnile kjoandosin nga tsín kisichajin jebi. Kʼianga kui nichxin nʼio chjí tsaʼyakon ʼyani xi chjota romano sʼin tsaʼyale. * Tonga je chjotale Cristo xi ya ngʼajmi kisʼele kjoachoya ngisaa titse kjoanda kisʼengánile nga ya ngʼajmi koatio. Kuinga i̱ kitsonile Pablo: “Nda tangínkao yaono, josʼin bakinle je énnda xi tʼatsʼe Cristo” (Filip. 1:27). Nichxin xi tiyoaa ndʼaibi, nʼio nda choa̱ batío je chjotale Cristo xi ya ngʼajmi tjínle kjoachoya nga̱ tjíobʼénele yaole nga sʼe̱le je kjoabijnachon xi tsínkʼia fetʼa.
16. Tojo tso Filipenses 4:6, 7, jméni xi tjínnele tosi tonda sʼiaan ni ya ngʼajmi tjínná kjoachoya kʼoa ni i̱ Sonʼnde.
16 Tjínnele nga tosi tonda si̱xálee Niná nga tjoéná je kjoatjao xi tsjoáná, ni ya ngʼajmi tjínná kjoachoya kʼoa ni i̱ Sonʼnde. Ninga kjaʼaí kjaʼaí kjoa bitjatojiaan nga jngó jngoá, alikui kui si̱kjaʼaitsjeen jmeni xi kinikatioá nga Niná tinixálee kʼoa alikui kʼoaiʼndee nga jme xi kʼoechjoaná nga tosi tonda si̱xálee (Filip. 3:16). Tsakui nichxin kʼoasʼin si̱kjaʼaitsjeen nga tsín ndi̱to̱n tíbitjoson jmeni xi choyalee kʼoa tsakuije̱ nga jetínroajen nganʼioná. Tsakui nichxin nkjín nó kiskaná nga kjoa kitjatojiaan kʼoa tsa chjota kitjenngikená. Tojme kjoa xi tibitjatojiaan, alikui si̱kjáojiaan, tosa je Niná kʼoéyanajmílee jotjín tokoán kʼoa si̱jélee nganʼio. Kʼoa jé koasenkaoná nga nyʼán sʼe̱ tokoán (tʼexkiai Filipenses 4:6, 7). *
17. Jméni xi chótʼayajiaan ya kjoaʼmiya xi ijngo.
17 Tojo sʼín jngo chjota xi tokanacha nga ngisa bʼénele yaole nga toka nga tojeme bichó jñani tjen tíchoyale. Tosi tonda si̱xálee Niná jokji tjen bichó nganʼioná, kʼoa kʼoénelee yaoná nga tjoéná je kjoanda xi tsjoáná Niná nichxin xi nroaján. Jméni xi tjínnele sʼiaan nga tosi tonda kui títjon si̱kʼéjnaa xi tʼatsʼe Niná. Je kjoaʼmiya xi ijngo kui chótʼayajiaan xi tʼatsʼe jebi, kʼoa koasenkaoná nga jchaa jméni xi ngisa chjíle nga sʼiaan (Filip. 1:9, 10).
KJOAJNDA 79 Kʼuínyalee nga kixi katafitʼale Niná
^ párr. 5 Ninga jekjoatse kʼoa ninga tosʼa choatse nga Jeobá tinixálee, tjínnele nga tosi tonda kʼoasʼiaan. Je pastro Pablo kʼoakitsole je choʼndale Niná nga tsínkʼia katasíxa̱nle. Je carta xi kiskile je chjotale Cristo xi ya Filipos tsakatio basenkaoná nga tsín si̱xa̱nlee josaʼnda nga tjoéná je kjoabijnachon xi tsínkʼia fetʼa. I̱ kjoaʼmiya jebi kui chótʼayajiaan jósʼin kjuintjenngiaa je kjoafaʼaitsjen xi kitsjoa Pablo.
^ párr. 5 Filipenses 3:12-14: “Kje ficho nrʼoejian jebi, kje majngojinna tonga kjuítjenngile je kjoabi, jméni nga kuinjesínina xi tikuini kjoa nga̱ Cristo tsʼasjentjaina. 13 ʼNdíndsʼe, an nía xi ʼbe nga kje ficho nrʼoejian, tonga jngo kjoa tisʼian. Ñaki tisichajian je xi jejaʼato, tonga bʼasjenía nganʼio, jméni nga kjuicho nrʼoesínia xi sʼa nroa. 14 Sʼinle kjoanʼio yaona, jméni nga kjuicho nrʼoesínia choa̱ nga tjoéna chjína xi tsʼe Niná, xi kui nga Niná kuinchjaminá ngʼajmi nga̱ tiyokoaa Cristo Jesús”.
^ párr. 7 1 Corintios 9:24-27: “A tsí tsa ʼyao je xi tokanacha, kjoakixiní nga ngatsʼi toka, tonga tojngo xi síkinje kjoatjao. Kʼoasʼin tókao, jméni nga kʼoasʼin chjoésínio kjoatjao. 25 Kʼoa toʼyanibe xi kʼoasʼin sítaja, kjoéxkóle yaole ngayije. Jebi xi kʼoasʼín, jméni nga sikinjesíni jngo corona xi tofitson, tonga ñá jngo corona xi tsí kʼia fitson. 26 Kʼoasʼin an toka, likui joni tsa je xi tsí be kixi. Kʼoasʼin kjankoa, likui joni jngo xi tobʼé jinsén. 27 Tosa sikiʼoan yaona, kʼoasʼin bʼenele yaona, joni tsa jngo choʼnda, jméni nga tsí tsa an chjaʼaxinnina kjoatjao kʼia nga an xi kʼoasʼin kinchjayajinle xikʼa”.
^ párr. 11 Xi tʼatsʼe ndsʼee Arthur Secord, yaa faʼaitʼa je revista La Atalaya xi tsʼe 1 de noviembre de 1965, jñani “Mi participación en adelantar la adoración correcta” tso.
^ párr. 13 Xi tʼatsʼe ndsʼee Anatoly Melnik, yaa faʼaitʼa je revista ¡Despertad! xi tsʼe 22 de octubre de 2004, jñani “Me enseñaron desde niño a amar a Dios” tso.
^ párr. 15 Nga Roma kinchja̱ni je naxinandá Filipos, je chjota xi ya tsʼe kʼoati kui kjoanda kisʼele joni je chjota xi Roma tsʼe. Kuinga nda koanjinnile je chjotale Cristo xi ya tsʼe nga kui tsakjákaoni je Pablo.
^ párr. 16 Filipenses 4:6, 7: “Ali kʼoajin mano. Tojmenibe xi machjénno, tijélao Niná, tʼetsʼoalao, kʼoa tʼailao kjoanda. Kʼoasʼin katasʼejinle Niná jme xi nijáo. 7 Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno nga̱ tiyokao Cristo Jesús”.
