JE KJOAMAKJAIN nʼio tse nganʼio tjínle. Tobʼelañá, je Na̱i nkjín koya jmeni xi síkatíobasenná xi ya mangóson joni “flecha xi títi” tojoni nga tsín tinda kuiyoñá ngixko̱n Jeobá, tonga jmeni xi basenkaoná kui kjoamakjainná (Efes. 6:16). Xi ijngosani, je kjoamakjainná basenkaoná nga chókjoajinná ninga sakʼoa tse kjoa bitjatojiaan xi ya mangóson je nindo xi nʼio yʼai kjoan. Je Jesús i kitsole je chjotatjenngile: “Tsa nda makjainno, nda tsa tochoa tjín joni tsa jngo na̱xi̱nle mostaza xi ʼndí nakjoan, kʼoakʼuínlao je nindobi: Titjáni i̱bi ʼnda xingoa ján, kʼoa kjoaʼa. Kʼoa nijmejin xi tsín koa̱nno” (Mat. 17:20). Nga sʼená kjoamakjain basenkaoná nga nda biyoaa ngixko̱n Jeobá, kuinga ndatjínni nga chjónangilee yaoná jebi: Jósʼin tíjna nga sʼená kjoamakjain. Ánni nga ni̱ma̱ná katanroajinni nga sʼe̱ná kjoamakjain. Jmé xi sʼiaan nga ngisa tse kjoamakjain katasʼená, kʼoa ʼyá tʼatsʼe xi tjínnele koa̱nkjainná (Rom. 4:3).

Nga makjainná ali tsa tokuijin nga kʼoabixoán nga ñaki kʼoatjín jmeni xi tso je Biblia, nga̱ tiyaa Énle Niná kʼoatsoni nga je na̱i xi ndajin be nga tíjna je Niná kʼoa tsokjón (Sant. 2:19). Jósʼin tíjna nga sʼená kjoamakjain.

Kʼianga kui nchja̱ni je Biblia tʼatsʼe kjoamakjain jao koya tjínni jmeni xi tsoya. Xi títjon, kʼoatso nga “kui xi nda nʼiotʼatakoán, nga kjoakixi nga tjío je kjoa xi choyalee”, xi tsonile, nga ñaki kuitjoson (Heb. 11:1a). Kʼianga makjainná tʼatsʼe Niná, alikui jao sʼe tokoán nga ñaki kʼoatjín jmeni xi tso kʼoa nga sitjoson je énle. Tobʼelañá, i kitsole je chjota israelita: “Tsa kʼoakoa̱nno nga si̱kixoyao josʼin tsakʼendajian tʼatsʼe nichxin kao tʼatsʼe nitje̱n, nga tsín kʼoachon koa̱nʼisen kʼoa koa̱nnjio jochon tjínnele kʼoakoa̱n. Kʼoajin tikoa̱n kuixo̱ya jme xi tsakʼendajian kao choʼndana David” (Jer. 33:20, 21). Alikui jao tjín tokoán nga nyaon nyaon bitjo je Tsʼuí, kʼoa nga maʼisen kʼoa nga manjio. Kʼoatisʼinni, alikui jao tjín tokoán nga je xi kisinda ngayeje jmeni xi tjín sitjoson jmeni xi tso (Is. 55:10, 11; Mat. 5:18).

Xi majaoni, kʼianga makjainná ʼyañá nga ñaki tjío je “kjoa xi tsín matsen” (Heb. 11:1b). Tobʼelañá, tsa jngo tiʼndí kui skónanginá jósʼin ʼyañá nga tjín je ntjao̱. Kʼoajin kʼuínlee nga ninga tsín matsen, tseen ma kʼianga faʼa, nga síkjan je yá kʼoa nga kʼoati kuinga ma chjenjtañá nga tjín ntjao̱. Kʼianga ʼmiyalee jngo tiʼndí tʼatsʼe jebi, makjainle nga tjín ntjao̱ ninga tsín matsen. Kʼoatisʼin mangóson kʼianga tjínná kjoamakjain (Rom. 1:20).

Kʼianga sʼe̱ná kjoamakjain nʼio tjínle kjoandosin nga kataʼyaa jokjoantjínni je “xi kjoakixi” (1 Tim. 2:4). Tonga ali tsa tokuijin xi machjén, je pastro Pablo kʼoakitso nga “kao ni̱ma̱ná makjainná” (Rom. 10:10). Ali tsa tokuijin nga kʼoasʼin si̱kjaʼaitsjeen nga kixi jmeni xi tso je Énle Niná, machjén nga chjí jchatokoán jmeni xi tsoyaná. Tsa kʼoasʼiaan sʼe̱ná kjoamakjain, xi tsonile, kʼoasʼin koanngínkoaa yaoná josʼin  mele Niná (Sant. 2:20). Kʼianga tsín bechjí jngo chjota jmeni xi kixi tjín, tochale tokui kʼoasʼin jmeni xi ndatjín koa̱nle kʼoa totjín totjenni kjoa koase̱nngi yaole tojoni nga koa̱njngijée (2 Ped. 3:3, 4; Jud. 18). Kʼoakoan je chjota xi tsakatio kjoatse, alikui tongatsʼi nga koankjainle ninga nʼio nkjín kjoaxkón tsabe (Núm. 14:11; Juan 12:37). Je Niná tojé tsjoále nganʼiotsjele je chjota xi tsjoake xi kixi tjín kʼoa xi jtike je énndiso (Gál. 5:22; 2 Tes. 2:10, 11).

Jngo choʼndale Niná xi nʼio kisʼejna kjoamakjainle jé rey David (Heb. 11:32, 33). Tonga alikui tongóson kisʼin je xínkjín. Tobʼelañá, je ndsʼe̱ xi Eliab tsakʼin kiskankao kʼianga kui kiskonangi David tʼatsʼe Goliat, nga kʼoakisʼin je Eliab kui tsakakó nga tsínle kjoamakjain (1 Sam. 17:26-28). Kʼianga tosʼa tsiaan, alikui to jetjínná kjoamakjain, kʼoa ninga tjínle kjoamakjain je xijcháná, alikui xi tsonile nga kʼoati sʼe̱ná tsanda ñá. Kui kisʼenile kjoamakjain je David nga je Jeobá kisimiyo.

Ya Salmo 27, kʼoakitso jmeni xi kisʼin nga nʼio kisʼejna je kjoamakjainle (versículo 1). Kisikjaʼaitsjenjin jme kjoa xi jaʼatojin kʼoa jmeni xi kisikao Jeobá je chjotakontrale (versículo 2, 3). Chjí tsabekon ndʼia jña tsaʼyaxkón Jeobá (versículo 4) kʼoa yaa tsabexkón kao xi ngikʼa chjota israelita (versículo 6). Tsakʼétsʼoale Jeobá kʼianga kʼoakitsole nga je katabándiaale (versículo 7, 8). Kʼoati kitsole Jeobá nga katatsoyale jmeni xi sasénle (versículo 11). Nʼio chjí tsabekon je kjoamakjain xi kisʼele, saʼnda kʼoakitso nga tsínjin nda tsakʼejna tsa tsínlani kisʼele kjoamakjain (versículo 13).

Kʼoati koa̱n nʼio sa̱tío kjoamakjainná tojo kisʼin je David, tsa kʼoasʼin si̱kjaʼaitsjeen kʼoa kʼoasʼiaan jmeni xi tso Salmo 27. Kʼianga ngisa ʼyaa xi tʼatsʼe Niná ngisaa nʼio sʼejna je kjoamakjainná, kuinga ndatjínni nga chótʼayá Biblia kʼoa kʼoéxkiaa je xo̱n xi síkasénná je naxinandále Niná (Sal. 1:2, 3). Kʼianga chótʼayá si̱kjaʼaitsjenjinkaoñá, tsa kʼoasʼiaan nkjín koya jmeni xi koa̱njinná kʼoa kʼoailee kjoanda je Jeobá, kʼoa kui jebi xi koasenkaoná nga ntsjaintsjai koanngían kjoajtínná kʼoa nga kʼoakʼuínlee xi kjaʼaí tʼatsʼe je kjoachoya xi tjínná (Heb. 10:23-25). Kʼianga ntsjaintsjai bʼetsʼoaa kʼoati bakoá nga tjínná kjoamakjain (Luc. 18:1-8). Kʼianga kʼoétsʼoalee je Jeobá ñaki kʼoakʼoé tokoán nga mandosinle xi tʼatsaan (1 Tes. 5:17; 1 Ped. 5:7). Je kjoamakjainná basenkaoná nga nitjosonlee je Niná, kʼoa nga nitjosoán, nʼio sʼejna kjoamakjainná (Sant. 2:22).

Kʼianga tojeme ni̱kʼien je Jesús i kitsole je chjotale: “Makjainno xi tʼatsʼe Niná, kʼoati  katamakjainno xi tʼatsʼan” (Juan 14:1). Kuinga machjénni nga katamakjainná xi tʼatsʼe Jesús. Janla koya kataʼyaa jmeni xi koa̱n sʼiaan.

Xi títjon, kʼoasʼin si̱kjaʼaitsjeen nga jngó jngoá nga tsakʼéchjíntjainá je Jeobá. Je pastro Pablo i kitso: “Tijnakoan nga̱ makjainna tʼatsʼe je ʼndíle Niná, xi koantsjoakena, xi kitsjoantjai yaole xi tʼatsʼan” (Gál. 2:20). Kʼianga tjínná kjoamakjain xi tʼatsʼe Jesús, ʼyañá nga ñá tsakʼéchjíntjainá, nga sichatʼa Niná je jée xi kichʼá, nga tsjoáná kjoachoya nga koa̱n kuiyoaa ngantsjai nichxin kʼoa nga kʼoasʼin bakóniná nga tsjoakená (Rom. 8:32, 38, 39; Efes. 1:7). Jebi kui xi koasenkaoná nga tsínkui si̱kjaʼaitsjeen je xi chʼaotjín (2 Tes. 2:16, 17).

Xi majaoni, xi totʼatsʼe je kjoabʼechjíntjaile Jesús koaan koa̱nchriantʼalee je Jeobá kʼianga kʼoétsʼoalee ánni “nga chjoésínía xi tsʼe kjoamatakonle, kʼoa jméni nga koa̱nsjaisíniná kjoanda xi koasenkaoná kʼia nga koa̱nchjénná” (Heb. 4:15, 16; 10:19-22). Kʼianga bʼetsʼoaa basenkaoná nga tsín bijnyijée (Luc. 22:40).

Xi majanni, si̱tjosonlee je Jesús. Je pastro Juan itso xi kiski: “Je xi makjainle tʼatsʼe ʼndíle Niná, tjínle kjoabijnachon ngantsjai. Je xi tsín makjainle tʼatsʼe ʼndíle Niná, likui skoe̱ kjoabijnachon, tonga je kjoañʼai xi Niná tsjoále tíjnanele” (Juan 3:36). Je Juan kʼoakitso nga tsín mangóson nga sʼená kjoamakjain kʼoa nga tsín nitjosoán. Xi tsonile, kʼianga nitjosoán bakoñá nga tjínná kjoamakjain xi kao Jesús. Kʼoa kʼiaa nitjosoán nga mangíntjenngiaa je “kjoatéxomale Cristo”, xi tsonile, ngayeje jmeni xi kitsoya kʼoa xi tsakʼénená nga kʼoasʼin si̱tjosoán (Gál. 6:2). Kʼoati jeni Jesús nitjosonlee kʼianga mangíntjenngiaa jmeni xi tsoná je “choʼnda xi nʼiotʼakon, xi nda be xá” (Mat. 24:45). Tsa si̱tjosoán jmeni xi tsoná Jesús, chókjoajinná tojme kjoa xi kjoaʼaínená (Mat. 7:24, 25).

Ñandia i̱ kitsole jngo chjota je Jesús: “Makjainna, xi tsín timakjainnina, tisenkaonái” (Mar. 9:24). Ningalani kisʼele kjoamakjain chjota jebi, nangitokon koan kʼoa kʼoakitso nga machjénsale kjoamakjain. Kuicho nichxin kʼianga kʼoati ngisa tse kjoamakjain koa̱nchjénná tsanda ñá. Kuinga ndatjínni nga tongini si̱tajaa kjoamakjainná, nga chótʼayá Biblia kʼoa si̱kjaʼaitsjenjinkaoñá jmeni xi bʼexkiaa, tsa kʼoasʼiaan nkjín koya jmeni xi koa̱njinná kʼoa kʼoailee kjoanda je Jeobá. Josasʼin koa̱n si̱tajaa kjoamakjainná kʼiaa nga mangían kjoajtínná, nga nokjoañá tʼatsʼe kjoachoyaná kʼoa nga kjitʼa bʼetsʼoalee je Jeobá. Tsa kʼoasʼiaan jebi, koa̱ntajasa kjoamakjainná kʼoa nʼio tse kjoanichikontʼain sʼe̱ná. Je Biblia kʼoatsoná nga si̱kinngʼaa je kjoamakjainná ánni nga sʼe̱síniná je kjoatsjoachale Niná (Jud. 20, 21, TNM).