1. Jméni xi mená nga katasʼín je xíngiaa.

JNGO tichjaa xi Pauline ʼmi * itso: “Saʼnda nga tsaʼbe je Énle Niná, kui xi koanmena nga kʼoati ya ʼNdenaxó koatio ngatsʼi je xíngia. Koanmena nga kʼoati Jeobá katasíxále je xʼinna kao tiʼndína”. Kʼoajin tisʼin nikjaʼaitsjeen tsa tjín xíngiaa xi tsín je Jeobá síxále.

2. Jméni xi chótʼayajiaan i̱ kjoaʼmiya jebi.

² Alikui koa̱n kʼoénelee xíngiaa nga je Jeobá katasíxále. Xi koa̱n sʼiaan kuinga kʼuínyalee je Énle Niná (2 Tim. 3:14, 15). Ánni tjínnenile kʼuínyalee Énle Niná je xíngiaa. Ánni tjínnenile si̱jinlee yaoná jotjío kon. Jmé xi koa̱n sʼiaan nga kʼoati tsjoake katama Jeobá joni ñá. Kʼoa jósʼin koa̱n kuinyakaoná je ndsʼee xi tjío jinjtín.

3. Tojo tso 2 Pedro 3:9, ánni tjínnenile kʼuínyalee Énle Niná je xíngiaa.

³ Tojeme sikjeson Jeobá jmeni xi chon sonʼnde. Tojé kuitjontjai chjota xi mele nga sʼe̱le kjoabijnachon xi tsínkʼia fetʼa (Hech. 13:48). Nikʼayañá nichxin nga ʼmiyasonlee je chjota, kʼoa kʼoati kui xi mená nga je Jeobá katasíxále xíngiaa. Je Nʼainá xi tíjna ngʼajmi nʼio tsjoakená kʼoa “kaile nga jngo xi cha̱”, kui xi mele nga katasíkʼantjaiya “kjoafaʼaitsjenle ngatsʼi” (tʼexkiai 2 Pedro 3:9). *

4. Jméni xi sakʼoa nʼia kʼianga chjakaonajmíñá Énle Niná je xíngiaa.

 ⁴ Kjaʼaísʼin chjakaonajmíñá Énle Niná je chjota kʼoa kjaʼaí nikoaa je xíngiaa. Chosonnilee josʼin chjakoaa je chjota xi kjaʼaí, tonga sakʼoaa tsín kʼoanikoaa je xíngiaa.

5. Jméni xi kuenta sʼiaan kʼianga chja̱kaonajmíñá Énle Niná je xíngiaa.

⁵ Kʼianga tosʼa kichjakaonajmí títjonñá Énle Niná je xíngiaa, tsakui nichxin sʼani majinná nga tjínnele kichosonnilee jotsakixoán tsakai. Je Pablo itso kjoafaʼaitsjen kitsjoale je chjotale Cristo: “Je énno ñaki nda tinókjoao kao kjoanda. Katamale joni tsa tsojmi xi nda chine, jméni nga jchasínio josʼin machjén nga chjakao nga jngójngó chjota” (Col. 4:5, 6). Kuenta sʼiaan én jebi nga chja̱kaonajmíñá Énle Niná je xíngiaa. Tsa tsín koa̱nná josʼin chja̱kaonajmiá, ʼndele nga koa̱nndosinle je Énle Niná tosajin tosikjin.

6, 7. Jngo choa̱ tʼejnai xi bakó jokji chjíle nga nijinlee yaoná josʼe kon je xʼin kʼoa tsa chjoón xi tsín choʼndale Niná ma.

⁶ Si̱jinlee yaoná jotjío kon. Je Pauline xi jenása kanikʼaxkiaa, itso: “Nga títjon, tokui koanmena nga tʼatsʼe Niná tsakjakaonajmíña je xʼinna. Alikui jme xi kjaʼaí kichobanajmínijin”. Tonga je Wayne, xi xʼinle mani Pauline, alikui nanda be xi tʼatsʼe Biblia kʼoa alikui koanjinle jmeni xi kitsole. Kʼoasʼin kisikjaʼaitsjen nga tokui mandosinle Pauline xi tʼatsʼe religiónle. Kui kisikjáojin tsakui kijin chjoónle jngo jtín xi nʼio xkón tíjna kʼoa tsa totíchʼanachale.

⁷ Je Pauline kʼoatso kjoaixi nga tse nichxin síkʼaya nga maxon kʼoa nga xoto kao nga taingo nga fisíxatʼa je ndsʼee kao tichjaa, nga fi  kjoajtín kʼoa nga tsoyason. Itsosa: “Sakʼoaa tokjitia ndʼia nga bichó je xʼinna, kʼoa tojé tíjna koanle”. Kisikjáo je chjoónle kao tiʼndíle. Kʼoa nga tsín bexkon ndsʼee, kʼoasʼin kisikjaʼaitsjen nga je Pauline ngisaa koanndosinle miyole tikʼoajinni je. Kuinga kʼoakitsonile nga tosa tsjión. Tjínnenile ngisa kisijinle tsakai yaole Pauline jotjín kon xʼinle.

8. Tojo tso 1 Pedro 3:1, 2, jméni xi ngisa kuenta sʼín je xíngiaa.

⁸ Nda choa̱ kʼoéjnaa. Je xíngiaa kui ngisa kuenta sʼín jmeni xi nʼia tikʼoajinni jmeni xi bixoán (tʼexkiai 1 Pedro 3:1, 2). * Je Pauline koanjinle jebi kʼianga koanskanni, kʼoa itso: “ʼBeña nga tsjoakenajin je xʼinna kʼoa nga tsín kʼoatjín kon nga tsjiónna. Tonga nga kʼoakitsona kʼiaa koanchoyana nga tjínnele kʼoasʼian jotso je Jeobá. Tjínnele nga nda choa̱ kʼoejnale tikʼoajinni nga tokuinchja”. Kuinga tsín tikui tʼatsʼe Biblia nʼio tsakjákaoni je xʼinle tichjaa kʼoa ngisaa kui tsakjáonajmíni je kjoa xi faʼatojin nga nyaon nyaon. Je Wayne tsabee nga ngisa nda chjota koan je chjoónle kʼoa nga nda kisʼin je tiʼndíle (Prov. 31:18, 27, 28). Nga tsabe Wayne josʼin tsakinyakao Biblia je familiale, koanndosinle je Énle Niná (1 Cor. 7:12-14, 16).

9. Ánni nga tsín tokʼoéjngosíñá tokoán.

⁹ Alikui tokʼoéjngoaa tokoán. Nʼio nda choa̱ bʼéjnaná je Jeobá. Nkjín kʼa tsjoáʼndele chjota nga katanrʼoé je énnda chjotse ánni nga tjoénile je kjoabijnachon (Jer. 44:4). Kʼoa je pastro Pablo kʼoakitsole Timoteo nga  tosi tonda katabasenkao je chjota nga katabe Énle Niná, nga̱ kʼoasʼin kuitjontjainile yaole kʼoa kao je xi kjuinrʼoéle (1 Tim. 4:16). Nga tsjoachaa xíngiaa, kui xi mená nga katabe jmeni xi bakóya je Biblia. Tobʼelañá, jmeni xi kisʼin kʼoa jmeni xi kitso je Pauline, kui xi tsakasenkao je xʼinle. Ndʼaibi, nʼio tsjoa tjín kon, nga̱ jé Jeobá tísíxále xʼinle. Nga jao precursor sʼin tjíosíxá kʼoa chjotajchínga sʼin tíjna je xʼinle.

10. Ánni tjínnenile nga tsejta koaan.

¹⁰ Tsejta katamaa. Kʼianga kʼoasʼin mangínkoaa yaoná jotso je Énle Niná, sakʼoaa likui sasénle je xíngiaa. Nga̱ tsín tisʼuí chʼasjeñá kʼoa tsín tikjoa política nojinñá yaoná. Tsakui nichxin tjínkʼa xi saʼnda koa̱njtikená (Mat. 10:35, 36). Tonga alikui koa̱n kʼoasʼin si̱kjaʼaitsjeen nga tsínkʼia sikʼantjaiya yaole. Tsa tsín tichja̱kaonajmíñá je Énle Niná, joxi ñájinni xotibixoán nga tsín bakinle sʼe̱le kjoabijnachon xi tsínkʼia fetʼa. Tonga je Jeobá, jé Jesús tsakánele xá jebi (Juan 5:22). Tsa tsejta koaan, tsakui nichxin channi kjuinrʼoé Énle Niná je xíngiaa (chótsenlai recuadro “ Si̱chjén je página xi tíjnaná ya Internet”).

11-13. Jmé xi bakóyaná jokisikao je xijchále Alice.

¹¹ Ndʼé katamaa, tonga tsín kʼoaiʼndee nga je xíngiaa kʼoakuitsoná jmeni xi chjoéjiaan (Prov. 15:2). Kataʼyala je choa̱le Alice. Kʼianga tsabe je Énle Niná alikui ya tíjnakao je xijchále, xi tsín makjainle nga tíjna Niná kʼoa xi kjoa política nʼio tsakjayojin. Je Alice koanjinle nga tjínnele kuitsoyale je xijchále jmeni xi tíkotʼaya. Itso: “Tsa chóyakaola nga kʼoéyanajmílee jmeni xi tichotʼayá, tsínjin nda sa̱tío kon je xíngiaa”. Kuinga carta kisikasénnile je xijchále kʼoa kui kiskonangile jósʼin síkjaʼaitsjen tʼatsʼe jmeni xi tsoya je Biblia, jolani tʼatsʼe kjoatsjoacha (1 Cor. 13:1-13). Kisikasénle tsojmi kʼoa kitsjoale kjoanda nga kisijchá kʼoa nga kisikuinda. Kʼianga kichosíxatʼa je xijchále tsakasenkao je male jme xá xi sʼín ya yaniʼya. Tonga tsín kisasenle je xijchále nga kʼoakitsole josʼin makjainle.

¹² Kʼianga ya tíjnakao je xijchále nyaon nyaon bʼéxkia je Biblia. Je Alice kʼoatso nga kʼoasʼin koanjinnile je male nga nʼio chjí be je Biblia. Kʼoa je nʼaile koanmele kiskotʼaya je Biblia nga kisijinle yaole ánni nga kʼoasʼin makjainnile je tsotile kʼoa kui koanmele tsakásjai tsa jñani tsín nda tso je Biblia. Je Alice itso: “Jngoo Biblia kitsjoale kʼoa jngoo xo̱n kiskile”. Tonga je nʼaile alikui jme xi chʼaotjín koansjaile nga tsakʼéxkia Biblia, kʼoa tokʼoani koanle nga tsabe jmeni xi bakóya je Énle Niná.

¹³ Tjínnele nga ndʼé koaan, tonga kʼoati tsín koa̱n nga je xíngiaa kʼoakuitsoná jmeni xi chjoéjiaan ninga kjoa kuitjátojiaan (1 Cor. 4:12). Tobʼelañá, kichokjoajinle je Alice nga tsakʼejnachjoale je male. Itso: “Kʼianga kisʼe̱nngindá, je mana kʼoakitsona nga nʼio xíjin kjima”. Je Alice itsosa: “ʼNdele nga tojyó koatejna, ngasin nganda kʼoakixinle nga jekʼoatjín tokoan nga testigole Jeobá koa̱n. Kʼoakixinle nga nʼio tsjoake̱. Kichjiʼndáníjin nga joaijin, kʼoa tsakʼendale xi tsakjenni. Saʼnda nga kʼia, je mana koanjinle nga ngisa nda tisʼian nga Biblia tikotʼaya”.

14. Ánni nga tsínkʼia kʼoaiʼndesíñá nga je xíngiaa kʼoakuitsoná jmeni xi chjoéjiaan.

¹⁴ Tsakui nichxin tsín ndi̱to̱n koa̱njinle xíngiaa nga nʼio tjínle kjoandosin xi kao ñá nga je Jeobá nixálee. Tobʼelañá, kʼianga kʼoakitso je Alice nga precursora sʼin sixá ʼndele nga kui xá sʼin josʼin mele xijchále, je male kiskiʼndá ijngokʼa. Tonga je Alice alikui kui tsakʼéchjoale nga precursora sʼin kisixá. Itso: “Tsa  kʼoaiʼndee nga jme xi kʼoechjoaná je xíngiaa, kʼoajin sikaoná ngantsjai. Tonga tsa ngasin nganda kʼoakʼuínlee josʼin makjainná kʼoa tsín kʼoaiʼndee nga je kʼoakuitsoná jmeni xi sʼiaan, tjínjinkʼa xi kjuinrʼoéná”. Kui kjoa jaʼatojin je Alice. Kʼoa ndʼaibi, je xijchále precursor sʼin tjíosíxá kʼoa chjotajchínga sʼin tíjna je nʼaile.

15. Tojo tso Mateo 5:14-16 kao 1 Pedro 2:12, jósʼin kuinyakao je xíngiaa jmeni xi nʼia.

¹⁵ Je Jeobá jé choʼndale síchjén nga binyakao je chjota nga katafaʼaikatiojin naxinandále (tʼexkiai Mateo 5:14-16; * 1 Pedro 2:12 *). Tsa je xi xʼin kʼoa tsa je xi chjoón tsín testigole Jeobá ma, a bexkon je ndsʼee. Je Pauline xi jenása kanikʼaxkiaa, kinchjaale je ndsʼee ya niʼyale nga tsabexkon je xʼinle. Je xʼinle tichja jebi kʼoatso nga kʼoasʼin tsabeni jokjoan je testigole Jeobá. Itso tʼatsʼe jngo ndsʼee: “Jngo nichxin kisijékjoa ya tʼaxále nga kichotsenlaijin nga kisiská chjota ya televisión. Koanjinna nga kʼoati bʼétsaojin je testigole Jeobá”.

16. Ánni ndatjínsíni nga kʼoakʼuínlee je xíngiaa nga katafi je kjoajtín xi satíoná.

¹⁶ Jngo koya jmeni xi koa̱n sʼiaan nga kuinyakoaa je xíngiaa kuinga kʼoakʼuínlee nga katafikaoná nga satíoná kjoajtín (1 Cor. 14:24, 25). Je kjoajtín xi kitítjon je Wayne  kʼiaa nga jaʼaitsjenya Kjoabiyale Cristo, koan ki nga̱ jekoanxon kʼoa tochoatsee kisʼejna. Itso: “Alikui koanjinna ngayeje jmeni xi kinokjoani, tonga xi nʼio faʼaitsjenna kui josʼin kiskoeyana. Nga kichoa kisitiʼndana kʼoa tsakjákaonajmína, tsaʼbeña nga ñaki kʼoatjío kon”. Jngo ndsʼee kao chjoónle xi nʼio tsakinyakao je Pauline kao tiʼndíle kʼianga satío je kjoajtín kʼoa nga fitsoyason, kʼoati je tsakasenkao Wayne nga kitsoyale Biblia.

17. 1) Ánni nga tsín koa̱n kʼoasʼin si̱kjaʼaitsjenñá nga ñá tjínná jée tsa tsín koa̱nndosinle xíngiaa xi tʼatsʼe Niná. 2) Ánni tjínnenile nga tosi tonda kuinyakoaa je xíngiaa.

¹⁷ Kui xi mená nga kuicho nichxin nga je Jeobá sixále xíngiaa. Tonga kʼoati majinná nga tjínkʼa xi tsínkʼia koa̱nndosinle xi tʼatsʼe Niná ninga koakoyalee. Tsa kʼoalani, alikui koa̱n kʼoasʼin si̱kjaʼaitsjeen nga ñá tjínná jée, nga̱ tsín koa̱n kjoanʼio kʼoénelee. Ninga kʼoalani, alikui si̱chajiaan nga binyakao je xíngiaa nga be nga kao kjoatsjoa nixálee je Jeobá. Kʼoétsʼoantjé kʼoa kao kjoaxkóntokon chja̱kaonajmíñá xi tʼatsʼe Niná kʼoa tosi tonda kuinyakoaa (Hech. 20:20). Alikui jao tjínná nga sichikontʼainná Jeobá jokji kʼoénelee yaoná. Kʼoa tsa kjuinrʼoéná je xíngiaa kuitjontjaile yaole.