1. Jmé xi tjíosʼín kʼa je ndsʼee, kʼoa ánni.

NICHXIN xi tiyoaa ndʼaibi, millón mani je ndsʼee kao tichjaa xi nʼio tjíobʼénele yaole nga tjíosíxále Jeobá. Tobʼelañá, nkjín mani xi tsín bixan. Kʼoa xi jechixan, tjínkʼa xi kʼoasʼin bʼéndajin nga tsínla xti sʼe̱le ndʼaibi. Kʼoa tjínkʼa ndsʼee xi tomanile josʼin tjío. Ngatsʼi ndsʼee jebi nʼio tsjoa tjío kon kʼoa tsín jao tjíole nga je Jeobá tsjoále jmeni xi machjénle. Kʼoa je Jeobá síchikontʼain kjoaixiná. Ánni nga tsín jao tjínni tokoán xi tʼatsʼe jebi. Kuinga kisikuinda je choʼndale nichxin kjoatse. Tobʼelañá, kisichikontʼain je Abrahán, je “nʼaile ngatsʼi chjota” xi makjainle (Rom. 4:11).

2. 1) Tojo tso Hebreos 11:8-10, 16, ánni nga kitjoni je Abrahán ya naxinandá Ur. 2) Jmé xi chótʼayajiaan i̱ kjoaʼmiya jebi.

² Je Abrahán kisikatío ngayeje jmeni xi kisʼele nga tsakʼejna ya naxinandá Ur. Ánni. Kuinga kui kiskoyale je “naxinandátsebe xi tjínle xjáoja̱ma̱” (tʼexkiai Hebreos 11:8-10, 16). * Jñánile je naxinandá jebi. Jmé kjoa xi jaʼatojin je Abrahán jokjitse kiskoya nga kisʼenda je naxinandá jebi. Jósʼin chjénngilee Abrahán, kʼoa jósʼin chjénngilee je ndsʼee kao tichjaa xi kui choa̱le Abrahán tjíokjenngi nichxin xi tiyoaa ndʼaibi. I kjoaʼmiya jebi chótʼayajiaan xi tʼatsʼe jebi.

3. Jmé naxinandáni xi kiskoyale je Abrahán.

³ Je naxinandá xi kiskoyale Abrahán kui je Chjotaxále  Niná, jé Jesucristo xi rey sʼin tíjnale kʼoa 144,000 mani xi ya koatexomakao. Je Pablo kʼoakitso nga je Chjotaxá jebi kui “je naxinandále Niná xi tíjnakon, je Jerusalén xi tsʼe ngʼajmi” (Heb. 12:22; Apoc. 5:8-10; 14:1). Je Jesús kʼoakitsole je chjotatjenngile nga katasíjé nga katafaʼai je Chjotaxá jebi ánni nga kuitjosonni josʼin mele Niná ya ngʼajmi kao i̱ Sonʼnde (Mat. 6:10).

4. Tojo tso Génesis 17:1, 2, 6, jméni xi koanjinle je Abrahán tʼatsʼe Chjotaxá xi kinchja̱ni Niná.

⁴ Je Abrahán alikui koanjinyejele josʼin tjínndajin tʼatsʼe Chjotaxále Niná. Siento nó nga to kisʼeʼma jebi (Efes. 1:8-10; Col. 1:26, 27). Tonga koanjinle nga tjínkʼa ntje̱le xi rey koa̱n, nga̱ tongini kʼoakitsole je Jeobá (tʼexkiai Génesis 17:1, 2, 6). * Koankjainle jmeni xi tongini kitso Niná, nga̱ kʼoasʼin kisikjaʼaitsjen joni tsa ñaki xko̱n tsabeni je xi kiskoejin Niná nga Rey sʼin kʼoéjna. Kuinga i̱ kitsonile Jesús je chjota judío: “Je Abraham nʼaino kjaínga koantsjoale nga kuicho be nichxinna, kʼoa tsabe koantsjoale” (Juan 8:56). Je Abrahán koanjinle nga jngo Chjotaxá sikasénnda je Jeobá kʼoa nga ya ntje̱le kjuinroani je xi koatexomakao Chjotaxá jebi, kʼoa kiskoya je Abrahán nga sitjoson jmeni xi kitso je Jeobá.

5. Jósʼin ʼyañá nga kiskoyale Abrahán je naxinandá xi Niná tsakʼénda.

⁵ Jósʼin tsakakó Abrahán nga kiskoyale je naxinandá xi Niná tsakʼénda xi tsonile je Chjotaxá xi tsakasénnda Niná. Xi títjon, alikui ʼya chjotaxá tsakatéxomale nga̱ tsín tojngo ʼnde tsakʼejna, kʼoa tsín ʼya chjotaxá kitsjoanganʼiole. Kʼoa alikui kui koanmele nga je koatexoma. Tosaa je Jeobá kisitjosonle ngantsjai kʼoa kiskoya nga kuitjoson jme xi tongini kitso Jeobá. Kʼoasʼin tsakakóni nga koankjainle tʼatsʼe Niná. Kataʼyala kʼaa jme kjoa xi jaʼatojin kʼoa jmé xi bakóyaná je choa̱le.

6. Jókoanchon ya naxinandá Ur.

⁶ Ya naxinandá jña kitjoni je Abrahán  nʼio kisʼe tsojmi kʼoa nʼio nda koanchon. Síxkónkjije xjáo xi kisʼendai je naxinandá kʼoa xi jan ngoa nga̱jao̱ kisʼele. Je chjota xi ya naxinandá Ur tsakatio nda koanle kiski kʼoa nda koanle tsakʼasjengi kuenta. Nʼio kisʼe negosio kʼoa je chjota arqueólogo kjimasjaile je xo̱njchá xi kui faʼaitʼa je negosio xi kisʼe. Ladrillo kisʼendani je ndʼia kʼoa kisixjaʼai. Tjínkʼa chjota xi 13 kʼoa tsa 14 cuarto kisʼele ndʼiale kʼoa la̱jao̱ tsakáyo jña nditsinle koan.

7. Ánni kʼoatsakʼéni kon Abrahán nga je Jeobá sikuinda je kao familiale.

⁷ Je Abrahán kʼoatsakʼé kon nga je Jeobá sikuinda je kao familiale. Ánni. Kuinga tsín tikʼoasʼin tsakationi josʼin tjío tsakai ya naxinandá Ur, nga jekitjoni ya ʼnde jebi to ndʼianajño tsakatioʼya ya ʼnde Canaán. Alikui tijme xjáo kjindaini jña tsakatio, kʼoa alikui tijme xi kisʼenile xi tsakasenkao tsa chjotakontrale kichonrʼoe.

8. Jmé kjoa xi jaʼatojin ñandia je Abrahán.

⁸ Ningalani kʼoakisʼin Abrahán jmeni xi mele Jeobá, ñandia nga koantsínle je tsojmi xi kiskine. Tsee kjoañʼai tsakjaʼá nga kjinrá kisʼe ya ʼnde jña kisikasén je Jeobá. Nga nʼio ñʼai koanchon, yaa kikao choatse je familiale ya naxinandá Egipto. Tonga kʼianga jeya tjío, je faraón, chjotaxá xi ya tsakatéxoma tsakjáʼale je chjoónle Abrahán. Nʼiojin ba kisʼe kon je Abrahán kʼoa jé Jeobá xokisʼin nga kitjoé ijngokʼanile chjoónle (Gén. 12:10-19).

9. Jmé kjoa xi ñʼai tjín jaʼatojin je familiale Abrahán.

⁹ Je familiale Abrahán ñʼai tjín kjoa jaʼatojin, nga̱ chjoónʼndi̱ koan je Sara kʼoa nʼio nkjín nó nga kjoaba tsakatiojin. Nga jeki nichxin, je Sara jé kitsjoale Abrahán je chjoónchoʼndale xi Agar ʼmi nga chjoónle katama. Kʼoasʼin sʼe̱nile ʼndí je Sara kao Abrahán xi totʼatsʼe Agar. Kʼianga jekisʼejinle Agar nga ʼndí tjínle totaon tsabe Sara. Nga kjoa kisʼele, je Sara koanjtile kʼoa chan tsakanga je Agar (Gén. 16:1-6).

10. Jósʼin tsakakó Abrahán nga koankjainle jme xi kitso Jeobá xi tʼatsʼe Ismael kao Isaac.

¹⁰ Je Sara chaan kisʼele ʼndí, kʼoa Isaac sʼin kitsjoajaʼaínle je Abrahán. Nʼio tsjoake koan Abrahán nga jao xtile, je Ismael kao Isaac. Tonga je Ismael tsín nda kikao xínkjín kao Isaac, kuinga kʼoakitsonile je Abrahán nga tosa xin ʼnde katafi je Ismael kao Agar (Gén. 21:9-14). Nga jeki nó, je Jeobá kʼoakitsole Abrahán nga katatsjoátʼale je ʼndíle (Gén. 22:1, 2; Heb. 11:17-19). Je Abrahán koankjainle nga sitjoson Jeobá jme xi kitso xi tʼatsʼe xtile.

11. Ánni nga tsejta koanni je Abrahán nga kiskoya saʼnda nga kisitjoson jmeni xi kitso Jeobá.

¹¹ Ningalani nkjín nó jaʼato, je Abrahán tsejta koan kʼoa kiskoya saʼnda nga kisitjoson Jeobá jmeni xi kitso. Tsakui nichxin jetsʼato 70 nóle Abrahán nga kitjoni naxinandá Ur kao familiale (Gén. 11:31-12:4). Kʼoa jngo sientola nó nga ndʼianajño tsakʼejnaʼya nga tsakʼamje ʼnde Canaán. Kʼoa 175 nóle nga kʼien (Gén. 25:7). Je Abrahán alikui tsabe josʼin kisitjoson Jeobá jmeni xi tongini kitsole, nga je ntje̱le kitsjoale je nangi jña tsakʼamje. Kʼoati tsín tsabe je naxinandá xi kiskoyale, xi tsonile, nga tsakatéxoma je Chjotaxále Niná. Ninga kʼoalani, je Biblia kʼoatso kʼianga jekʼien Abrahán “tjín jngojngo kon jokji tse tsakʼejna” (Gén. 25:8). Ninga nʼio tse kjoa jaʼatojin, nʼio kisʼejna je kjoamakjainle kʼoa kiskoya nga sitjoson jme xi kitso Jeobá. Jmé xi tsakasenkao nga kichokjoajinnile je Abrahán. Kuinga miyole Jeobá koan kʼoa jé kisikuinda jokjitse tsakʼejna (Gén. 15:1; Is. 41:8; Sant. 2:22, 23).

12. 1) Jmé xi tichoyalee xi choʼndale Niná maa. 2) Jméni xi chótʼayajiaan xi fisani.

 ¹² Tojo kisʼin Abrahán, kʼoati kui tichoyalee je naxinandá xi tjínle xjáoja̱ma̱. Alikui tikui tichoyanilee nga koatexoma je Chjotaxále Niná, nga̱ kʼiaa tsakʼétsʼiakao nga tsakatéxoma ya ngʼajmi tjen nó 1914 (Apoc. 12:7-10). Kui tichoyalee nga koatexoma i̱ Sonʼnde. Jokjitse nga chóyaa, kʼoati tse kjoa kuitjátojiaan tojo koan je Abrahán kao Sara. Nichxin xi tiyoaa ndʼaibi, nkjín mani choʼndale Jeobá xi kui choa̱le Abrahán tjíofitjenngi. Je Xo̱n xi Bájinkonná nkjín choa̱le ndsʼee faʼaitʼa xi tjíobakó nga tjínle kjoamakjain kʼoa nga tsejta kjima joni Abrahán kao Sara. Chótʼayajinla jme xi tjíosʼín kʼa ndsʼee kʼoa jósʼin koasenkaoná je choa̱le.

13. Jmé xi bakóyali choa̱le ndsʼee Walden.

¹³ Tiyondañá nga kui xále Niná ngisa kʼoailee kjoandosin. Tsa mená nga je Chjotaxále Niná títjon si̱kʼéjnaa, tjínnele kʼoati sʼiaan jokisʼin Abrahán nga kui ngisa kʼoailee kjoandosin nga si̱xálee Niná. Tsa kʼoasʼiaan, tsjoa sʼe̱ kon Niná (Mat. 6:33; Mar. 10:28-30). Kataʼyala tʼatsʼe ndsʼee Bill Walden. * Nga nó 1942, kʼianga ingeniero jekoa̱n ya Estados Unidos, kʼiaa kiskotʼaya Biblia kao testigole Jeobá. Kʼoa jngo maestrole xi tongini tsakajngixále jñani koa̱n sixá kʼianga jekjoetʼale xo̱nle, tonga je Bill alikui kiskoé xá jebi. Kʼoakitso nga tosa je Niná sixále ʼndele nga kui xá sʼin jñani nʼio tse tao̱n kuinje̱le. Tochoatsee jaʼato nga kʼoakitsole je chjotaxá nga sondado katama. Nga tsín kʼoakisʼin, tsakʼéchjíntjai yaole kʼoa kʼoatsakʼinle nga aon nó kʼoéjnaʼya ndoyá. Tonga kinikʼéjnandáini kʼianga kicho jan nó. Nga jeki nichxin, kʼoatsakʼinle nga ya koai Skuela xi tsʼe Galaad, kʼoa xijekoan yaa África kinikasén nga misionero koan. Jé tichjaa xi Eva ʼmi chixankao kʼoa ñatjen kisixále Niná ya África. Alikui choa ñʼai koanle nga ya tsakatio. Nga jejaʼato nó, kinroa ijngokʼani  ya Estados Unidos nga kisikuinda je na̱le Bill. Kʼoa nga síkjaʼaitsjenjin ngayeje jebi, je Bill itso: “Nroajen ndáxkoan nga sikjaʼaitsjenjian jokjitse kjoanda kisʼena nga kisixále Jeobá xi tsʼato 70 nó. Kjitʼaa tsjoale kjoanda nga kitsjoaʼndena nga kui títjon xále kisʼian”. A koaan kʼoati sʼiain tsanda ji, nga ñaki to xále Niná sʼiain.

14, 15. Jmé xi bakóyaná choa̱le je ndsʼee Aristotelis kao chjoónle.

¹⁴ Alikui kui choyalee nga tsín kjoa sʼe̱ná. Je choa̱le Abrahán kui bakóyaná nga kʼoati kjoa faʼatojin ninga je xi ñaki to xále Niná sʼín (Sant. 1:2; 1 Ped. 5:9). Kʼoakoan je ndsʼee Aristotelis Apostolidis. * Kʼiaa kisʼenngindá nga nó 1946 ya Grecia, kʼoa kʼiaa nga nó 1952 kʼoakitsole je tichjaa Eleni nga kuixankao. Kʼoa nga jao ñaki to xále Niná kisʼin. Tonga kitjochʼinle je Eleni kʼoa kʼoakitsole je chjinexki nga jngo tumor kisʼele xokoajko̱. Ninga tsakjaʼáxinle chjinexki, tsʼatsen ijngokʼa je tumor nga tokʼia chrian chixan. Kitiya ijngokʼa kʼoa to kisʼeyása yaole kʼoa tsín tinanda koan kinchja̱ni. Ningalani chʼin kisʼele kʼoa ningalani chjotaxá kitjenngike je testigole Jeobá, je Eleni tosi tonda kao kjoatsjoa kitsoyason.

¹⁵ Je Aristotelis 30 nó kisikuinda je chjoónle. Jokji jaʼato nichxin xotjín, chjotajchínga sʼin tsakʼejna, yaa kitsjoanganʼiole je comité xi tsʼe kjoajtíntse, kʼoa kʼoati kitsjoanganʼio nga kisʼenda jngo Ndʼia jña satío kjoajtíntse. Kʼianga nó 1987, je Eleni kitsiʼaon kʼianga títsoyason. Jan nó nga to nachansa tsakajnason nga̱ tsín tikoan kisikjanni, kʼoa chaan kʼien. Je Aristotelis itso: “Jokji tífaʼato nó, ningalani nʼio tse kjoa tifaʼatojian, nʼiojin kjima kʼoa alikui tisikʼajenle tokoan. Jé Jeobá títsjoánganʼiona ngantsjai nga tíchókjoajinna je kjoa xi tifaʼatojian” (Sal. 94:18, 19). Alikui jao tjínná nga tsjoake Jeobá je xi bʼénele yaole nga je síxále ninga tse kjoa faʼatojin.

16. Jmé kjoafaʼaitsjen kitsjoale ndsʼee Knorr je chjoónle.

¹⁶ Kui si̱kjaʼaitsjeen je nichxin xi nroaján.  Kichokjoajinle je kjoa xi jaʼatojin je Abrahán nga̱ kui kisikjaʼaitsjenjin je kjoanda xi tsjoále Jeobá nichxin xi nroaján. Je tichjaa Audrey Hyde kʼoatisʼin kisikjaʼaitsjen ninga kʼien je xʼinle xi títjon tsakʼejnakao, xi Nathan Knorr tsakʼin, xi cáncer kisikʼien. Kʼoa je xʼinle xi majaoni, xi Glenn Hyde tsakʼin kui chʼin kisʼele xi Alzheimer ʼmi. * Kʼoatso nga nʼio tsakasenkao jmeni xi kitsole je ndsʼee Knorr jao jan xomana tongini nga kjesa mʼejin. I kitsole: “Kʼianga jekuiyá, tjínjngoo tokoán nga tse kjoanda sʼe̱ná, kʼoa tsín tikʼia nga kjoañʼai chja̱ʼañá”. Xijekoan, i kitsole: “Kui kuenta tʼiain nichxin xi nroaján nga̱ tsee kjoanichikontʼain so̱koli”. Kʼoa i kitsosale: “Ali jyójin bijnai, tisenkoai xi ngikʼa. Kui xi tsjoa kʼoe tokuin”. Nʼio ndatjín kjoafaʼaitsjen jebi, nga kuinyakoaa xi kjaʼaí kʼoa nga kjoáyatsjoaa tokoán tʼatsʼe je kjoachoya xi tjínná (Rom. 12:12).

17. 1) Ánni nga kui kuenta sʼianñá nichxin xi nroaján. 2) Jósʼin koasenkaoná nichxin xi nroaján tsa kʼoasʼiaan jmeni xi tso Miqueas 7:7.

¹⁷ Nichxin xi tiyoaa ndʼaibi, ngisaa machjén nga kui kuenta sʼiaan nichxin xi nroaján. Jmeni xi kjimachon sonʼnde kui bakó nga to jetífikjetʼa nichxin. Tochoasa chale nga koatexoma je Chjotaxále Niná i̱ Sonʼnde. Je kjoanichikontʼain xi sʼe̱ná kuinga kjoaʼáyanile je xíngiaa xi jekʼien. Nga kisʼele kjoamakjain kʼoa nga tsejta koan je Abrahán, je Jeobá sikjaʼáyanile je kao familiale. Kʼoati kui kjoanda sʼe̱li tsanda ji tsakui títjon Chjotaxále Niná si̱kʼéjnai, tsakui ngisa kʼoailai kjoandosin, tsa tosi tonda sʼe̱li kjoamakjain ninga kjoa kuitjátojin kʼoa tsa tsejta koai̱n nga chóyalai Jeobá nga sitjoson jmeni xi tso (tʼexkiai Miqueas 7:7). *